Indonesia rama tlangram thliarkar pakhat South Sulawesi hmuna cheng Toraja hnam ho chu Kristian hnama chhal theih deuh thuak ni tawh mahse mitthi an sawngbawl danah erawh hmasanga an pipu te serh leh sang practice țhin, puithuna atthlak angreng tak “Aluk to Dolo”(‘Thlahtute tih dan’ tihna a ni awm e) an tih chu an la chhawm nung reng thung a. An rindan chuan, mitthi chu lawi(buffalo) hlanna(sacrifice) hmanga vuiliam/thlahliam an nih hma chu an la thi fel tak tak lova, an thlarau chu an zingah a la cheng zui reng niin an ngai a, lawi an hlan(talh) sak hnuah an thlarauvin an chhungte kalsanin ‘thih hnu khawvel'(afterlife) panin an zinkawng an zawh țan ve chauh țhin niin an ngai.
Mitthi ruang chu a rimchhiat loh na’n formaldehyde leh tui inchawhpawlhin nitin an chulh chhuak a, tichuan an vuiliam hma-in hun rei tak tak, a thla hial te, an chenpui țhin a, an chhung leh laina ramdang/hmundanga awmte innghahkhawm pah na’n an hmang bawk a ni.
Mitthi chu chaw ei hunah chaw an barh ve mai a, an bual fai a, thawmhnaw an hak tir a, an be bawk a, inpawhtheihna(connection) la awm-a an rin tlat avangin minung ang maiin an cheibawl chawt țhin a ni.
Tichuan, chutianga hun engemawti chhung an chenpui hnu chuan a tawpah lawi talhin vantlang ruai nen ropui leh urhsun takin an vuiliam ta țhin a, lawi chu a tluk tam poh leh mitthi thlarau chu thih hnu khawvel pana a zinkawngah a kal chak/pen chak ting mai dawn niin an ngai. Tin, mitthi ruang chu Kristian tihdan angin lei chhungah an phum ve lova, thinga siam kuangah zalhin an thlan atan kham sang tak tak, lung khawkrawk hmuna pûk(natural cave) an hmang țhin thung a, puk chhungah chuan mitthi khua-a an mamawh tur hmanrua leh thawmhnaw chi hrâng hrâng– eitur, meizial, nawhalh, chem adt. tih vel chu an dah sak țhin a ni.
Hei mai a nilo, kum tin, August thla apiangin mitthi chhungte chuan an hnam dan(tradition) pakhat “Ruang sil faina hunpui” an tih chu an hmang țhin a, an chhungte țheuh ruang chu phawrh chhuakin, bual fai/silfaiin an kawr te an thlak sak a, ruang chu an thihna hmun fanpuiin a tawpah an thlan, kham sanga lung pûk-ah chuan chuan an dah kir leh țhin a ni.
Mizo Archive 