Lenghawn Ar

Lenghawn Ar
Word Count : 19106 char.

Favang awllen lai a ni a, khua pawh tlai lamah chuan a vawt tan tawh a, Lungrang khaw mipuite pawh, an khaw Dawrkai hlun Pu Ngurdinga fapa, Sap missionary Mr.P.S William hming chawia,Pi Khuali,Pu Ngurdinga nu in William Nghilhloha tia a hming a phhuah tak, Lungrang tlangval chhuanvawr leh lehkhathiam, Williama nupui neih lawm turin an in puahchah mek a. Thingtlang in 200 awrh khua an ni a, kut hnathawh chu an eizawnna ber a ni. An thlai thar te chu an khaw VCP leh dawrkai hlun tak Pu Ngurdinga hian a leikhawm thin a, chu chu Vaisanga an tih mai, Pu Ngura thianpa chuan Vairamah,a motor lian chi hmang chuan a phur hawng thin a, an thlai thar atam kum chuan Vaisanga chuan thian pahnih,thum te a rawn hruai bawk thin. Pu Ngura nupui Rengkhumi chu, nu nasa,mahni thatna turah chuan zah nei lem lo, a duhloh zawng erawh pe na ve tak, thenrual kawm thiam tak ni lawi hi a ni a. Nu lerh ti a sawi sep pawh a hlawh chawk,a pasal lahin a tha en mai mai bawk si.

Williama chu Unau pathum zinga a pang ber a ni a, a u te hmeichhe pahnih chuan pasal an nei tawh a,Lungrang khua ah na na na chuan a hausa ber an ni bawk a, an fapa neihchhun nupui nei tur chu laina pawh an chah nasa hle. Se pachal lian zet chu an thlung rung tawh a, Vawk nise an vulh lai sum ruk rual pahnih chu a awm bawk a. An monu tur lah, mi hausa lawm ta reng reng Pi Rengi duhzawng tak, khawpui nula a ni vei nen, a ropui thei ang bera lawm chu an tum ruh hle a ni.

“Ka nu, ka nu ka pum a na lutuk” tiin Hmingpuii chuan a nu buhpho rut mek chu a au teng tung a. Pi Rinliani (Zirtir Rini ) an tih mai, Lungrang khaw zirtirtu hlun ni bawk chu, a fanu lam pan chuan a tlan phei hlawk hlawk a, a fanu puanpho seng tur, lo kun ngawt ngawt chu a han kuah a, “Ngah nge maw i insuk kher ni aw, i neihthla a nih tawh hi,indim ta che ” vin lek lek a tih pah chuan inchhungah a kuah lut a.
“Zing atang khan a na riai riai tawh a, mahse engah vak ka lo ngai lova” na tih vanga in pet fan fan chung hian a ti a. Fatir a nih piah lamah nula tan awrh chauh a la ni vei nen, nau vei chu na a ti ngei mai le..

“Khawnge maw Sangtea hi le,,..Sangte, tlanin i ni Ruali zu ko rawh, ka u Hmingin nau a vei han ti ang che ” tiin a fapa,Hmingpuii nau Sangtea saihlum hrual lai chu a tir ta a. Hmingpuii chuan na ti hle mah se, vawi khat pawh a rum chhin duhlo. A thlanfim te chu a luang zawih zawih na a,a te eih lo, chutianga na ti taka a awm lai chuan a rilru ah a tunhma nun chu a lo lang uai uai a. A fa pa lah chuan a tuk maiah nupui a nei dawn a, a khaw nawtin an ur a ni si. A rilru chu na leh chuang tur awm lovin a keh sawm zo tawh. Tah a tum lova, rum a tum hek lo, chhel takin a awm lui hram hram zel a ni.

Ni e, Hmingpuii leh Williama te hi an lo in hmangaih tawh thin. Lungrang khaw nula ah chuan, kei ka ni inti pha ve ngat khawpa lehkha thiam thei, ngo no nuai mai, hmeltha han tih vut tur ni silo, mahse a biangsum khuar kelh leh a ha var tha tak chawih tura a heh sen hiam mai te chu, a rualpui ten tluk loh ena an en chhan a ni a. Fanu mal tih takah, a pa Pu Hmuaka pawhin duat tak tein a duat a, a nu lahin chuti bawk. A u mipa Zothana lah chuan a chhuangin, a duat em em a, Hmingpuii tan pawh u a nih piah lamah thian tha ber a ni bawk a, a nau Sangtea lah in a u Hmingi chu a thik lek lek thin. Hausa tak ni lo mah se, an neih tawk ang apiang chu Hmingi tan an ui lo takzet a ni. Williama leh Mathana chu thian inkawm ngeih tak an ni a, Hmingpuii tleirawl biang tai no tek mai te chuan Williama mit chu an la thei thin hle a,nau anga en awm taka lang chung chuan a rukin Hmingpuii chu a fiam fova, ei tur eng eng emaw a hawn fo bawk a. A tir chuan Hmingpuii chuan a ngei lek lek thin na a,an innel hnu chuan, a lo duat thiam nen, a ngaina ve ta hle a ni.

Zankhat chu, a nawmsam meuh loh avangin Hmingpuii chu inah a mu zal mai mai a, a chhungte chu thenawmah an leng diak a. Williama chu alo leng a, zan dang ang bawkin an titi dun siam siam hnu chuan, “Hmingpui, i chunga ka rilru put hmang hi hrilh che ka duh thin a, mahse chhan let a ni lovang tih ka hlauh em avang in, sawi lovah ka tlak fo thin. Ka duh em em che tih hi hre ve la tha in ka hria, i chhan na pawh hriat ve ka duh dawn a nia” Williama chuan a ti a. Hmingpuii chu lai deuh tak hian hnuailam bih ngarin a thu a, “Mahse U Willy nang chu,ka u ang mai i ni sia” a ti zawi sap a. “A poi hleinem, min lo nghak anga, ka nupui i la ni duh ang tiraw, hmelthate” tiin Hmingpuii chu a kuah a. Tleirawl ngaihzawng pawh la neilo rilru thianghlim tan chuan, a lo hmelduh ve em em leh amah duat tu Williama awmah chuan rinhlelhna nei miah lovin a bei ve ta hle hle a. A chhungte rawn hawn hnu pawhin Williama chu enge maw chen a leng rih a, a haw tur Hmingpuiin ava thlah chu thla alo eng no nghulh mai a. “Ka bawih hmeltha, ka van ngai dawn che” tiin Williama chuan a biang tawnah vuanin,Hmingpuii chu a fawp ta vawng vawng a. Chutih lai chuan kil tin atangin Lenghawn ar an khuang chhawn thliah hlawm a. “Naktuk zan atang chuan maw. Lenghawn ar a khuan veleh, i lo chhuak ru ang a,sikul ah hian kan inhmu ziah dawn nia” tiin Williama chuan an thlang lawka Sikul in chu a kawk a. Hmingpuii chuan a lu a bu nghat a, a kir san ta a. Chu chu a ni an thawnthu in tan dan chu. Khumah te chuan a rukin a nui ver ver a, mipa a vawikhat fawhna a ni a, a hmui te chu an khawih thin,zak ru tak mahse hlim si in chu zan chu Hmingpuii chuan a hmang ral a.

A pum a nat zual leh tak avangin a ngaihtuahna khawvel chu an harh san leh rih a, an vial leh ngawlh ngawlh a. San a pe mai silo,nau chhar thiam pi Ruali chuan a pum an hmet a. “E khai, nau a la hla riau, a sehsam mai mai a la ni e, mu lo hian i peih chuan va vei rawh pawn lamah te sawn ” ati a. A nu Pi Rini chuan a kai a,a vei pui ta a. Pawna Sikul in ding chul riap te chuan a nunhlui ah bawk an hruai let leh a.

Williama chuan an khua ah High School a pass tak avangin, a pa pu Ngurdinga chuan phai lama zir zawm tir chu a tum ruh hle mai a. Chhun lamah khaw pum huapin ruai nen a pass an lawm mup mup a, a tuk maia phaia liamthlak an rilruk thu te chu Pu Ngura chuan a sawi lur lur a. Chumi zan Williama leh Hmingpuii in hmu chu an ngui dun nghiai mai. “U willy,i tel lovin ka awm thei lovang” tiin Hmingpuii chu a tap fap fap a. “Kei pawn ka ngai ngawt ang che, mahse lehkha te kan inthawn tawn zel ang a,ka tan rinawm takin lo awm tlat rawh aw” tiin William chuan a chhang a, in thlahlel leh in ngai tak chungin rinawm na thu tiamin an in then ta a. Kum te a liam a,Hmingpuii pawhin pawl sawm chu tha takin a pass ve ta mai a.

Williama phai awm atang pawn kum hnih zet a liam tawh nghe nghe a, lehkha te in thawn tawn in,a lo haw chang lah in eng eng emaw a hawn sak reng a. Chutianga Hmingpuiin a pass ve thu lehkha a an hrilh chuan Williama pawh a lawm hle a,an awm na hmuna lehkha zir zawm ve turin a sawm bawk a,Hmingpuii chuan a chhungte hnenah ngen tak te in a ngen ve a, fanu mal duat rawn anih bakah, lehkha a thiam thei bawk nen an remtih sak ve ta mai a. Mahse chu chu Hmingpuii tan chuan a nun ti danglam zo tu a ni ta si.

Chutianga chhungte mitmei ven tur awmloh na hmuna awm ta chu, an lo zalen zawk si a, an inzui in an in kawm tam tulh tulh a,Pathian phal loh, nupa kar chauha hman tura ruat, angel te huang chu an pel dun ta fo mai. A hunlai chuan an hlim dun hle a, kum tawp an haw tur te chu an hreh dun hle tawh mai a. Hmingpuii chuan in neih mai a duh a, Williama chu a hrilh thin, “Kan awmdan hi a dik lo, in nei law law ila, kan zir zawm tho dawn nia” a ti fo thin a. Mahse Williama chuan “mi awmloh dan pawh a ni lova, kan la in nei dawn tho alawm, ka zir chhuak anga hna te ka nei ve phot ang chu” ati tlat si a. Sawizui pui vak ngaihna lah a hre si lo. A thi neih hunbi a awl ta fova, thla hnih khat ah kha chuan hlauhthawn nachang pawh a hrelo,mahse thla li pum hlum a nei ta lo chu, a mangang in doctor a pan ta ringawt a, a hlauh ruk ang ngei in a lo rai ta si.
“Willy, i fa ka pai asin,min ru mai rawh, innei ila i zir zawm mai dawn nia. Ka chhungte ka hrilh ngam lo, ka u mama phei chuan,min vaw duh hial ang,” tiin a tap zawih zawih a.
“Eng tin nge i pai theih a, ka fimkhur tehlul nen, a va mak ve, titla mai rawh, a senso ka tum vek ang” Williama chhanna chuan a deng na ngei mai. “I fa ngei,kan fa, kan thisen hi ka titla dawn lo, i va nunrawng ve,engtin nge khatiang rilru i put theih,” Hmingpuii chu a tap hawm hawm tawh a, Williama chuan eng mah sawi lovin a en ngawt ngawt hnu chuan, “Naktip mai hi nipui chawlh a ni a, khua a kan hawn hunah, ka nu leh pa ka lo titi pui ang a, palai kan in tir dawn nia” a ti ta a.

Lungrang an thlen atangin kar a liam tawh, Williama hmel emaw Palai hmel pawh hmuh tur a la awm silo, Hmingpuii mangang chu mutmu pawh a tuah thei lova, chaw a ei thei hek lo. A nu leh pa te lah a hrilh ngam si lova,Williama lehkha tur chu ziakin a nau Sangtea chu a tir ta ringawt a. Chumi zan chuan lenghawn ar khuan hun nghakin mittui nen a mu meng kar reng a, ar a khuang ta chiah chiah tih ah, zawi te in a tukverh chu a hawng a, sikul in lam pan chuan a chhuk thla ta a. Williama chu a lo la awm lova,minute 10 dawn beidawng leh beisei taka a nghah hnu chuan, a lo kal ve ta tawk a. “Willy, ngatinge min pehhel i tum tlat a, palai hmel lah hmuh ni a awm silo, ka ngai che asin” tiin a lo kuah chawt a. Williama chuan a kuah let ve hauh lo,
“Nau chu titla mai rawh, i chhungte duhdan zawk pawh a ni ang” chang fak hian a ti a.
“Nilo, ka titla dawn lo, engatinge Willy..ka hmangaih che min ti a ni lawm ni” a aw te chu a khur dat dat tawh a.
“Inneih a la rem lo, ka chhung ten rem anti lo, i ti tla duhlo anih chuan i thu ni rawh se, sawi tur ka nei tawh lo,” a ti a. Williama chuan a kalsan ta nghal a.

Hmingpuii thinlung chu vih ang maiin a na a ni. Tah hawm hawm a duh a, a tap ri turin, awrawl reng a neilo, amah hmangaih tu nia a lo hriat, a lo rin em em chuan ti mai khan a kalsan ta si. Williama chu a um zui a, “Willy,ka nun zawng zawng a chhe vek dawn asin, i fa ngei fahrah tur chu i duh bik lovang tiraw,khawngaihtakin min kalsan suh” a mittui luang zung zung te chu Williama chuan hrukfai sakin, duat takin kuah hle hle se a ti tak zet. Mahse en tak ngial pawh a en tha duh lova, “Kan inkar a tawp tawh,ka chhungten an pawm lo che,min ngaidam rawh” chu zawng chu a dawn let a ni si. Rilru fim pawh a pu thei lova,tah chhuah vek theih ni se, a rilru ipik lutuk te chu tah thawl hawk hawk a chak. Thlifim thaw heuh heuh in a sam a chhem len siau siau lai chuan vanlam a hawi a, “Lalpa,i awm ta lo em ni, ngatinge hetianga min tawp tir, khawngaih takin min hum rawh, min pui rawh” tiin a phun mawlh mawlh a. Vai ruai chungin a khum chu a thleng a, a thawmhnaw a vaivut kai pawh thlak lovin, rizai chuan a in lukhup a, a pum chu dawmin, “Ka naute khawngaihthlak, lungngai reng reng suh aw, i nu ka awm a nia, ka venghim tlat ang che,” a ti rilru niah niah a..
“Mambawih, tho rawh chaw ei kan siam” tia a nu in a rawn sawi dat dat chuan a ti harh hlawl a, khum atang chuan a tho chhuak nghal a.

Chutih lai mek chuan Williama nu Pi Rengi a lo lut hlawl bawk a. “U Rengi teh nawlh chu, enge i duh, hawh lo thu rawh” pi Rini chuan a lo ti luam a. “Thut muan pawh ka tum lo, hei in fanu Hmingi hian, Mama fa ka pai e, a lo ti a ni awm a, sawn man keimah ngei in ka rawn dah a nih hi” tih pahin pawisa chu dawhkan ah a dah a. Hmingpuii lam chu mak ti takin an en thap a. “E khai Pi Reng, engtin maw,mambawihi hi a rai a maw! I hai a ni zawk lo maw, engmah kan hre si hleinem” pa ber chuan a lo ti chat chat a. “Hai awkawng lo, zawt ula in hria ang chu, nizan lawkah pawh kan fapa ko chhuakin, a tah khum vel a ni awm a, “hre rawh u, kan nei dawn chuang lo, Williama tan zawng,khawpui nula lehkhathiam ngat kan nei ang, kan fa erawh chu in enkawl peih loh leh min pe a niang chu” tih leh chhuah a rual a. Hmingpuii zak lutuk chu a khur hlawk hlawk a. A pa, pa te thin thawk chuan, “i lova tenawm ve, lehkha zir turin kan dah che a, sawn maw i rawn hawn” tih leh ben a rual a. Vawikhat mah a kuthmawr pawha a khawih phal loh, a fanu chu rilru na leh thinrim takin kut a thlak ta. A u Zothana ve thung chuan engmah a sawilo, mahse a hmel atang chuan rilru na lutuk hmel a lo lang thung.

“Khatiang kha an mizia a ni a,Williama hian a bum let der che a nih hi, neih che a tumlo ta sa sa, nau hi i pawm bik tur a ni lo” a nu chuan a ti ve tan tan a, a mit ah chuan mittui a tling pam bawk a. “Ni e, insiam se la, keiman naktukah phaiah ka hruai ang, titla rawh se” a pa chuan a lo ti nawn bawk a. “Nu, Pa min ngaidam rawh u, keimah vangin in rilru a na tih ka hria,mahse he naute hi ka ti tla a nih chuan an lakah ka tlawm dawn tihna a ni. Ka pai ang a,ka hring ngei bawk ang,khawngaih in min remtih sak rawh u” tap chungin a ti a, a roomah chuan a in kalh hnan ta a. Tiang chuan nitin, zantin a chhungten nau titla turin nawr mahse..Hmingpuii chuan tihtlak a tum lo. A lo tihsual tawh rah chu pawisawilo, a thisen zawm ngei nunna a thleng a remti hlawl lo a ni. A rilru chu a na takzet, a pa amah duat em em thin tu chuan en pawh a en tha duh tawh lova, a thian tha ber ni thin a u lahin a be ngai hek lo. A duh duh lama, a duh apiang tihsak thin tu te lak atang chuan a hrang ta ngawih ngawih in a in hre thin a. Tluk loh ena en thin tu ten an nuihzat a, mawi taka a than na khua ah ngei chuan mualpho tawp in, pawn chhuak ngam lovin a awm a ni si. Vawi tamtak intihhlum duhna rilru a pu thin, mahse ama nunna chu sawiloh, a pum chhunga pawisawilo nunna leh zel lak zawng, a huaisenna in a tlin ngang lo a ni.

Nikhat chu Williama lehkha a dawng nawlh mai a, a la hmangaih thu te, ngaihdam a dilna te, naute nena nghak tura a sawmna te leh a rilru mangan vanga then ta mai a nih thu te. A chhungten rem tilo mah se neih a duh thu te leh a rilru mangan vanga a then ta mai kha a in thiamloh thu te a lo inziak a. Chu lehkha an chhiar zo chu a mittui a luang ngiah ngiah a. Williama chu a ngai a, a la thlahlel em em bawk a, mah se khatiang khawpa mualpho leh rilru hliama kalsan tu kha a nunah lak luh nawn leh a tum reng reng lo. A hui pap a, a pum kawh luah tawh chu a dawm vang vang a.

Hmingpuiin lehkha a dawn atanga thla hnih lekah chuan, Lungrang zirtirtu ni tura an rawn dah, khawpui nula, mi hausa fanu nia in sawi chu, Williama nupui a tan an be ta a. Nula hmeltha angreng tak,mahse a rilru erawh hriatthiam har tak, nu te lam deuh, Jenifer-i a ni a. Pi Rengin a hma daih atang tawha a lo tlawn lawk leh Hmingpuii a duhloh chhan ni bawk a ni. Williama awm na ah te an tir thla fo a, riakah an sawm fo bawk a, tun dinhmun hi thlengin an in nei dawn ta nge nge a. Pi Rengi pawh a lawm surh surh khawp mai.

Hmingpuii nau vei pachan zia chu a awm ve te chuan an sawi ru sep sep a. Naupang te si in, a tuarchhel zia te chu an fak ru hle a. A fa pa, a tuk mai nupui nei tur an han ngaihtuah phei chuan an khawngaih takzet a ni. Khua a thim a, zan a reh tan a, a pum na lutuk chuan ngaihtuahna fim pawh a puttir thei tawh lo,nau chhar thiam pi Rualin “Sang rawh le” a tih chu a hre viai viai a, a theihtawpa inti chak chungin an sang ta a, mipa duhawm tak a hring ta. A na te chu lak ang huai ni hian a hria a, a fapa hmel an hmu chu dan rual lohin a mittui a luang ngiai ngiai a, “Ka fapa, nang hi awmlo la chu maw, ka nung tawh awm silo. I nu hian ka venghim tlat ang che, Vanah mi zawng zawng te Pa aia hausa leh ropui Pa i nei asin,(a kuah hle hle a) hun lokal zel turah pawh maw, i hmel ka hmuh apiang hian, thang ka awh tawh loh nan, ka fimkhur a ngaihzia ka hmu ang a, ka dai sual leh tawh lovang. Hmangaihna mawi ber te pawh hi bumna tenawm a nih chang a awm tih te leh,ngaihtuahna fim hmang lova nun kawng dai in a hrinchhuah te ka hrethiam tawh ang. Bawihte, i va hlu em “ tiin a kuah vawng vawng a, a chau deuh aniang a muhil zui ta sek sek a.

Zothana, room lehlam atanga lo chhuak chuan. A nu leh pa in a naute nufa mu bem an lo thlir tlawk tlawk chu a hmu a,a nau a hmangaih em em dang bem mai leh a fapa a kuah chial te chuan lainatna nasa tak a pe thar leh a. “Mambawih, ka fanu, i nu leh pa,i u leh nau te hi min ngaidam rawh aw. Humsual dai palhin bumna thangah i awk a. Hrehawm i tawrh lai khan i pemah chi kan lo phul thin a, dam han hauh la e, anni aia sang hi ni ang che,” Pa ber chuan a ti bah deuh nuah a. Hmingpuii nu leh a u te pawh chu an mittui a lo parawl kiang a. Kawngka kirh karh karh chu Pi Rini chuan mittui hru mawlh mawlh chungin a han hawng a, Williama a lo ni a. “Haw leh rawh, ngatinge i lo kal duh,nupui nei mai tur i nih kha ” Pi Rini chuan a ti tawi tak a. “Ka nu Rin, khawngaih takin naute tal min entir rawh u” a tih tlat avang chuan, haw rilru chungin naute mutna pindanah chuan a hruai lut ta a. A fapa kuaha lo mu bem Hmingpuii chu a lo meng diar diar a. “I lo kal a ni maw,(insum hle mahse a mittui chu a dang zo lo). “vawikhat chiah ka lo pawm thei ang em” tiin a fapa chu khawih mai an tum a, “Ni love, i en a, a tawk e, i fapa ni lovin ka fa chauh a ni, i duhloh, i hnawl hnu kha a nih hi” Hmingpuii chuan a lo ti a. Inthiamlo leh zak hmel taka Williama kal tur chu a banah a lo chelh a, “Ka nu khawngaih takin ka puan thleh karah khian lehkhaip ka dah a, min lo lak ta che” Hmingpuii chuan a ti a, a nu in a rawn pek chu, “William i ta tur a ni e, in inneih thilpek a tan” tiin a pe ta a.

Williama chu ngawi reng in a roomah a lut tlang a. A nu emaw a pa emaw, midang lo awm ve te biakna pawh a chhang lo. Lehkha, Hmingpuiin a pek chu phawrhin, khawnvar a chhi eng a, he thu inziak hi a chhiar ta a::-

Willy, Tleirawl thinlung nem tak kha i hmangaihna der ah cham tirin, thu thlum i fah a, ka thinlung zawng zawng ka hlan che kha ka tihsual lian ber a ni. Ka hmangaih che,mahse chumi avang chuan ka nunah lo kir leh turin ka sawm hauh lo che. Hmangaihna hi maw, a hen chiah huatna in a buk tawh chuan,hriamhrei hlauhawm ber a ni si. Kha ka thil lo tihsual tawh khan, tisual nawn leh tawh lo tura chakna min pek dawn avangin,huaisen takin hringnun hi ka hmachhawn tawh dawn a ni. He naute hi a lo puitlin hunah pawh, nang nena kan dai ram kha a dai ve ka phal ngai lovang a, thinlung kehsawm in ka awmtir ve hlek lovang. Lenghawn ar a khuan apiangin,vul nawn tawh ngai lo tur hmangaihna kha, ka la hrechhuak nawn fo dawn a ni. Chung hunah chuan i tana ka hmangaihna chhinchhiah tu ka fa hi kuahin, mittui karah nui hmel ka la hmuh ngei ang.
.
Tleirawl at laia hmangaihna a tluk luh hi sual ka ti lo. Mahse fimkhur lo taka, nupa te chanpual, lo hman ve ngawt hian hliam dam theilo chauh a hnutchhiah tih ka hre ta. I fa ngei thah duhna rilru i put avang khan Pathian hnenah ngaihdam i lo dil fo thin dawn nia. Kei zawngin tualthat chunga vanram luh ka in beisei lo ang bawkin, mahni tihsual thup nana tualthah zawng,ka ngam ve lo. Hetiang ti tu te nun hi, inthiam loh na a a khah loh vek pawn, kan beisei vanram rim chauh pawh khi, an nam hlek lovin ka ring a ni.
Willy,LENGHAWN AR a khuan chiah chiah hunah min han hrechhuak ve fo rawh aw.Mangtha le..

William-an lehkha a chhiar zo chu a chau rawih in a in hria a,lehkha chu thlepin, a ipah chuan an khung leh dawn a,tangkaraw zungbun, Hmingpuii a pek ngei kha, a rawn tla chhuak nalh a. Hmingpuii a buntir nia a lawmzia te leh, a nui hmel te chu a mitthla ah a rawn lang thar a. Chutih lai tak chuan Lenghawn ar chu an khuang ta chiah chiah a.
( Phuahchawp thawnthu..behchhan neilo,) A TAWP TAMM

About Mizo Archive

I'm the one who collect the best writings of Mizos
This entry was posted in Uncategorized and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s