SAHUAIIN THANZUALA A SEH

Lunglei Pukpui venga Chalţhianga fapa Thanzuala leh a ţhianpa, Kawmzawl Pu Lalrova huan hnuai Lalbiaka kawnga an kal lai chuan kawngsir mau bulah sahuai hi a lo awm a, Thanzuala chuan a han man chu sahuai chuan a kut vei lam zungchalah a seh ta mai a. A seh hnu lawk chuan Thanzuala pum chu a na ta vak a, kawngherh ang maiin a kawng a na bawk a, a awm a tawt a, thawk a harsat a, a kawchhungah khawsikin a ţham bawk a. A ţhianpa chuan scooter-in a phur haw ta vat a, in an thlen chuan a chau hle tawh a, Christian Hospital Serkawn an panpui nghal a, an lo chiu mawlh mawlh a, a zia ve leh ta mai a, zan 2 damdawi ina a awm hnu chuan a chhuak ve leh thei ta mai a. Dam chiang tawha inngaiin arsa a ei hnu chuan a pum a na leh ta chiam a, a ek a dum vek bawk a, damdawi inah bawk chuan an dah leh ta poh va, engmah ei an phal ta lo va, chutianga kar khat lai an enkawl hnu chuan a lo zia leh ta mai bawk a, damdawi in atang chuan an inlachhuak leh ta a, damdawi in awm man Rs.20,000 chuang an chawi phah ta a ni.

Sahuai hi ramsa dangdai tak a ni a, Mizo upa te phei chuan sawisak thiang lo hialin an lo sawi thin a. Sahuai sawisa-te chu an thih dawnin thih ţhatin an thi lo a, a chalchang chiam zel a ni, an ti. Pu Lalţhianga pawh thih thata a thih loh kha- a Sahuai sawisak an chhuanlam a ni.

Pa Chalţhianga chuan Pukpui rama lo an vah laiin thlengreng kungah hian sahuai a bei a, a thing chawpin an kihhnan a. A thing vawn a thlah duh si lova, a thing zar chawpin khua-ah an hnuk haw a, upa hovin an lo hauh avangin sahuai chu an chhuah leh ta niin a sawi.

Pa pakhat chuan a nupui rai laiin sahuai hi a man a, inah a hawn a, a chhungte’n chhuah leh vat turin an ti a, a chhuah leh ta a, a nupuiin nau a neih chuan a naute ke chu sahuai ke angin a keţang a inzawm vek a, ke tang 6 a nei bawk niin an sawi.

‘Sahuai ring reh tum chu a ka zen ang a ni’ an lo ti a, sahuai ring hi a chih hle a, nghawng hi a nei lo emaw tih mai tur a ni. Chhimbuk ang hian a hawi kual vek thei a, a nghawnga man tum rualin mi a seh nghal thei mai zel a ni.

Upa titi-ah chuan sahuai hian hauhuk nau nei hi hauhuk pakhat hlawhah a chhar thin an ti a, scientific literature chu awm lo mahse thil ni thei chu ni ve awm tak chu a ni a. Keimah tak phei hi chuan ka la awi thei chuang lem lo va.

Pu Saitluanga Sailo, Sialhawk lal fapa, pasaltha kum 87 mi chuan sahuaiin hauhuk tukhum a seh lai a hmu fuh a, hetiang hian a sawi. Kan ram vak a. Haw kawngah kan chawl a. Hauhuk hualreu thawm kan hria a, Hauhuk kap turin ka kal ta a.Thingzara sahuai ţhu hi ka hmu a,chutih lai tak chuan hauhuk pakhat hi a lo kal a, sahuai hmaah chuan a kun a, sahuai chuan a tukhumah a seh a, a thluak a hip ta vek mai a, a taksa chu a paihthla tawp mai a,hauhuk thi chu kan la a, ka hawn ta a, ka thiante chuan silai ri an hriat loh avangin ka hlawhchham emaw an ti a, ka hauhuk hawn an hmuh chuan mak an ti hle a ni. a ti.

Khaw pakhatah pawh Sahuai hi khaw chhungah a lo lut a, an lo man a, a kun chal mai a. Tlangval pakhat chuan a kun lai chu a kuai dak lui a. Hun a kal zel a, chu tlangval chuan nupui a nei a, fate a lo nei a, a fapa chu a kun thei lo va, a dak tlat ve thung an ti.

Pathlawi Pu Vuana chuan, “Kan tlangval lai 57 kum khan Mausenah lo kan vat a, Hnahkhar kungah hian sahuai hi a awm a, kan lo vahpui Lalhmuaka chuan sahuai awmna thing chu a kit a,a thing tluk rual chuan sahuai chu maubul kan chhawkah khan a invitbur a, a thi ta a, kan hawn hnu chuan Hmuaka chu a nak a na ta vak mai a ni, a ti. A hnu fe-ah Thenzawl-ah an pem ta a,a mit a del hlauh va, a nupuiin a thihsan a,fapa sual tak a nei bawk a ni, a ti.

Mausena pa pakhat Sangzika pawh sahuaiin a seh a, a lei a tawt tlat a, a tawng thei hlek lo niin an sawi.

Dr.Lianchhinga Ramzotlang chuan an khaw pa pakhat sahuai seh chu zawn haw a ngai hial niin a sawi ve bawk a ni.

Sahuai seh han sawi han sawi tak azarah chuan nikum February thla khan the musical artist, Lady Gaga chuan intih mak leh intih dangdai a tumna lamah a music video thar-ah sahuai lantir a tum a, a chanchin engmah hre lovin a han chawi ve ngawt chu, sahuai chuan a seh ta reuh va, a rang a rangin sahuai chu a bawmah an khung leh vat a, a music video-ah pawh an tilang ta lo reng a ni.

Pu Hawla chal hnawih sen chungchanga ha chang ţhial ri rap rap khawpa thinrim mi zalen, a duh lam lam sawi ngam u Remsiama chuan, “Rauri rama ka ram kal chu phul raw kung awn-ah hian sahuai a rawn kal a, “Muankim-meizial heh, ha bala pawhin a perh tlak pawp kha maw” tiin ka sairawkherh chuan ka perh pawp mai a, hlau awm pawhin a awm reng reng lo va,na ti awm pawhin a lang lo va,a ţe chhin eih lo bawk a, a kalna tur, a tum ram kha a rawn pan zel a, hlauh nei miah lo khan a rawn kal zel mai a, phul raw awn ler a rawn thlen chuan a rihna khan phul rua chu a ti uai thla ta deuh a, ka sah phak chinah a awm ta a. Han sahchhum hmawk ka tum a, ka han sat ta chu a dar kha ka sat uai ta hnawk mai a, a la ţe chhin miah lo va, khatah khan mi rap ta riau mai a, khati khawpa na-a kut ka thlak tawh si avang khan tihhlum loh chu ni theiin ka hre si lo va, engemaw titi chuan ka han tihlum ta kha chu a ni a. Khatiang ang thil kha ka tawng leh a nih pawhin ka ti leh tawh ngai lo vang ka ti a, ka inchhir khawp mai.

Vawikhat Chhuanawma nen Rauri ramah bawk kan ramvak a, zawng emaw tiin maulera sahuai chu a kap a, a kap fuh hle si a, a tla ta reng reng lo mai a, a mau chu ka sat ta a, sahuai chu lo niin! kan han enchiang chu note a lo pawm a, a nu a thi tawh bawk si a, a note pawh chu kan khawngaih lutuk a engemaw titi-in kan tihlum ta ringawt mai a ni. Sahuai hi chu lo khawih loh reng reng mai tur hi a lo ni, a ti.

Sahuai hi a scientific hming chu genus Nycticebus a ni a, khawvelah hian Asia ram chhimchhak-ah deuh chauh hian an awm a,kan tunlai khawvel thalaite anga zana meng rei chi ,chaw zawng chi leh chhuna mu chi an ni.

Sahuai hi chi 8 lai an awm a, chungte chu Sunda slow loris (N. coucang),
Bengal slow loris (N. bengalensis),
pygmy slow loris (N. pygmaeus),
Javan slow loris (N. javanicus),
Bornean slow loris (N. menagensis),
N. bancanus, N. borneanus, leh
N. kayan te an ni a.
Rannung te tak te te leh hnimhnah ei chi omnivorous an ni.

Sahuai hian tŭr a nei reng em?
Hnute tuia note chawm,mammal zingah sahuai hi tŭr nei anga sawi theih a nihna lai a awm a. Tŭr nei han tih hian venomous tih leh poisonous ti hian ţhen hrang leh ila, a hriatfiah a awlsam deuh awm e.

Venomous animal kan tih chuan rul te, khawmual kaikuang te, tit te, khuai te ang hian an tur chu an miseh taksa-ah an seh,an chuk, an zuk rualin tur an zuk thunlut ta a, a sehte taksa-ah nghawng a nei ta thin a ni. Poisonous animal/substance kan tih chuan chutiang rannung/thil mihringin ka ei vang emaw, kan taksa-a a luh avanga kan ngeih loh leh na kan tih ang chi kha a ni thung ta a. pa ei sual te pawh hi poisonous chu a ni ang a, utawk/uchang tur nei mihring ei sual theih tak te pawh a kawk thei ang a, bekang eisualte pawh hi a ni thei ang chu.

Sahuai kiu bul a ban chhung lamah hian brachial gland a awm a, chuta ţang chuan pan hnai ang deuh tuihnang a tichhuak thei a, heng tuihnang hi an hmang tangkai thiam em em a, saphihrik lam chi leh vangvat leh thosi, vaihmite ang laka inven nan an hmang thei a, tur angin an hmang thiam bawk a ni. He an kiu bul atang an tihchhuah tuihnang hi Fel d 1 ang a ni a, an chil nen an chawhpawlh hnu phei chuan tŭr chak tak ang a lo ni ta a, an kiu bula brachial gland hi sahuai-te hian an liak fo thin a ni.

Sahuai hian ha hriam tak tak an nei a,ngho kan tih ang hi an ha chung lam leh hnuai lamah an nei ve ve a, sahuaiin mi a seh hian a sehte-ah anaphylactic shock (extreme allergic reaction), thawk harsa, vung, pumna vak vak, lungphu danglam thut thut ang chi te a awm thei a, hun engemaw ti hnu-ah hematuria (the presence of red blood cells (erythrocytes) in the urine) a awm thei bawk.

Sahuai ban leh ke insiam dan hi a danglam hle a, rei tak tak thing vuan bei mahse an ban tha a kham ve thei lo va, pathlawi lungleng Pa Chalţhianga’n min hrilh dan phei chuan sahuai pakhat thing vawn phei chu a rek vek a ni, a ti.

Sahuaite hi June thla atang September thla laihawl thleng hian an hur lai, chi an inthlah lai hun a ni a, an hur chhung hi ni 29 atang ni 45 inkar a ni tlangpui a, an no pai hun chhung hi ni 185 atanga ni 197 a ni. A note hi a pianhlim hian an te hle mai a, gram 30 atanga gram 60 inkar vel an ni thin a ni. A nu te hi thla 18 atanga thla 24 velah a nula ve tan a, a pa hi thla 17 an nihin chi an thlah ve thei tan a, sahuai pa ber, chi thlahtu hian a note, a pa te chu thla 12-14 an nih rualin a um darh vek zel a ni. Sahuai an khawi ngam tawhte hi kum 20 vel an dam thei a, ramhnuaia awmte hi kum engzat tak dam thei ang maw? Sahuai an khawi ngam tawhho hian ram hnuaia awmte angin a kiu leh an chil-ah tur an nei chak tawk lo tih an hmuchhuak tawh bawk a ni.

Sahuai hian ze nghet tak mai a nei a. A tih ngai chu a ti tlat, a luhlul hle a, a ngaihdan a thlak mai mai lo. Thing a vawn tawh chu a vuan nghet tlat mai a ni. Tawngkamah pawh “Sahuai thing vawn ang tlat mai” tih leh “Sahuai Ni do ang tlat maiin” tih te hian ngaihdan nghet tlat mai neih chungchanga kan tawng hman thin a ni.

Comment from Lallianzuala Khawlhring

Sawi ve zeuh te’ng…. High School kan kal lai hian School chawlh laiin kan khuaah (Thingtlang khua) ka haw a. In bul lawk maiah hian Zuang thing a lo par tuara, chu chu sazaw-in an tlan a. Zan khat chu tlangval hovin…kan kap thla thei lo,zanin chu zuk chang ve chhin teh…an ti a. Ram buai vanglai kha a nih avangin UT silai chauh an lo nei a,a mu pawh rod tan bun hmawk a ni mai.Zan dar 9 velah chuan ka thianpa hruaiin kan veh thla ta a, sih det/en a ka’n chhun kual vel chuan a zar pakhat hmawrah hian a lo meng sen ram mai a. Sazaw emaw tiin ka kap ta a,thingtang a vawnna kut hrul chiahah hian ka chhawk a, a tla a,ka thianpa chu phur fahranin a tlan thla a, thingtang chawp chuan kawngah a rawn khai chho a, a thlah duh mai miah lo.Ka thianpain a’n en chian chuan….a ke hi…ramhuai a niang tih leh tlanchhiat a rual ti tih a. Ka han en chuan…Sahuai an tih hi a niang,hruizen han la rawh ka ti a, ka tlawh bet a,rei a bet duh miah lo, a che tial tiala a put chhuak zel a, a tukkhum lam atangin leia nawr bet chungin ka’n rek thin a,a nghawng a tawm tial tial a, a ka a thleng vat zel.Ka thianpa lo thlen chuan…fimkhur deuhin a nghawngah hian lo nawr bet rawh, a chak a nia,a kawngah kan hling a nge…ka ti a. A kawnga ka hlin chhungin a kut zungchalah a seh tir hman hram leh nghal, mahse Pathian zarah vawin thlengin eng em a ti lo. Kan khalh haw ta a, in kan thlenpui chuan ka pi Thangchhuahkimichu a thin a lo rim em em mai a…Engatinge Sahuai in rawn man, chhuah leh nghal rawh u tiin min lo hau a, zan a rei tawh avangin a tuk zing dar 6 velah kawtchhuah ah thingah kan chhuah a, kan ban phak tawk a kakpuiah kan dah a,kawng bul a ni a,mahse nilengin a che sawn duh miah lo, khaw thim hnuah a kal sawn chauh. Enge tih hre chiang loin kan lo that ve tep a ni. A thil man/ vawn a nghet em em a, hmui a chhem a haw hle bawk…Ka’n share ve mai mai che u a ni e.

About Mizo Archive

I'm the one who collect the best writings of Mizos
Aside | This entry was posted in Uncategorized and tagged , , , , . Bookmark the permalink.

1 Response to SAHUAIIN THANZUALA A SEH

  1. Anonymous says:

    Min seh engtinmah ka om lo

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s