RUANG KAN LA.

Zing dàr khat a hnai tawh a. Damdawi In bathlar pawh a vawt tawh hle a. Status update tumin Facebook lam chu ka’n hawng a. Mi pakhat, eng hnam nge pawh ka hriat loh, ‘Puyee Khyngte,’ inti hian ama wall-ah, ‘Bawngkawn kham hnuai(Sairang road)-ah hmeichhe ruang chhar,’ a nih thu chu a rawn update a. ‘A pawi mang e. RIP!’ tiin, ka’n comment ve ngawt a. Mahse, a tuk thleng mai chuan chu thu comment zuina rèng rèng chu ka hmu ta si lo a. Chanchinthar lamah pawh chutiang accident rèng a thlen thu leh puanzarna pawh pakhatmah hmuh tùr leh hriat tùr a awm zui ta si lo a. Mak ka ti ta hle mai. Thiante ho ka’n zawh kual pawh chuan chutianga update an hmuh loh thu chuan min chhàng ta vek mai si a. Thil mak tak zawng a ni ngei ang!

A fb ac atang chuan chu nu chu ka chhui ta ngat ngat mai a. Ka chhui atanga nì 3 àwm vèlah chuan chu nula chu ka mumang lamah ka hmu ta zauh zauh mai a! Kawngpui dunga parapet-ah te hian sam thlah hniang chungin, thlang lam hawia a thu reng lai te, a chàng leh hlau taka te chunga min ban tawk tawk a, tanpui tùra min auh lawm lawm chãng te a awm a. Chutiang deuh hlir chuan ka hmu thin a. Chutih lai chuan, mumang mai chu duh tàwk lovin a ka mit hmuhah ngei vawi khat chu a rawn inlàr ta a ni!

Chhun pachang a ni a. Keimaha ka pindana ka awm rauh rauh lai chuan choka lama thawm ka hriat avàngin ka chemtè chhuan ve tak chu lek chungin ka va chhuak a. Chutah, min hnungchhawn záwnga ka mumanga ka hmuh thin hmeichhia ngei mai khan kan chaw ei dawhkan chu lo kilin eng emaw ni hi a lo ei mawlh mawlh a. Mitkhap kár lek chuan ka lam a lo hawi a, a nui ta a. Mahse, ha rèng a nei tawh lo. A kà atang chuan thil lung te an lo vak chhuak a. ” Min pui tak tak dàwn em? ” a ti ta.
” Ka tum alawm! “
A nui leh a. A inher a, a inher rual chuan a ral zui leh ta nghàl a!

Tichuan, ka lo tiam tawh angin chhuichhuah chu hna berah ka neih ta hial a. ‘ Puyee Khyngtè’ inti chu an awm nual mai a. An profile-a ‘Aizawl’ inti te kha thingtlàng khaw chengker ang reng taka lo chèng te an ni a. A then lah, state pàwn leh foreign-a hnathawka awm ni-a indah te kha an chhùngte thawh chhuah saa phone man to tak taka lo online ve thin, mahni khuaa lo tal ve mai mai an lo bawk a. Ka kalna vélah ka insen phah ta erh a. A tàwpah chuan Puyee Khyngtè diktak chènna chu ka hre thei ta a.

Aizawl veng pakhat bawlhhlawh chhetè an paihna piaha Building hlui tawh tak hnuai ber chu zing dàr kua vèl chuan ka’n kik ta karh karh a. Nu tàr lam tawh hian kawng min lo hawn vat a. Mak ti hmel taka min en chung chuan, ” Lo lut rawh,” a ti a. ” Engnge i duh a, Vala?” amah vek chuan a ti leh a.

Chháng ta mai lo chuan ka’n hawi kual tè tè a. Thlalak ka ken leh chu ina thlalak intàr ka entawn sek lai chuan chu nu chuan min kuai thu a. Ka thlalak ken a’n hmuh chuan a mengphawk nasa ta mai a. ” Ka pi, i fanu a ni ang maw? ” ka ti a. ” Ni e, thla khat liam ta khàn a thi tawh! ” a ti ta mai a.
” A thi tawh a? “
” A bo…!”
Kum 5 chuang ram pàwna ka awm avàngin an fanu tualthihna lungchhiatthlàk tak chu ka lo hriat ve loh thu hrilh pahin thupha te ka’n chawi hnuhnawh leh a. Chutih pah chuan hman zàna a status update kha a hriatthiam theih ngei tùrin ka hrilh ta a. Ani chuan a ring thlap mai, tih a hmèlah chuan ka hmu a. A fapa chu a’n phone nghàl chùk chùk a. A fapa, ka rualpui àwm vèl nèn chuan hmanraw thenkhat kengin Bawngkawn kham hnuai( Sairang road) lam chu kan pan ta a. Rei tak kan beih hnu, tlai lam dàr 3 pelhah chuan Puyee Khyngtè dik tak, a ruang chhe mèk chu kan hmu ta mai a ni!

Zoram khawvèlin beidawnga an lo thlah tawh hnu kan hmuh leh thu chuan Zoram chu dàrkár loha a dèng chhuak leh ta thuai a. An postmortem result-ah chuan thah ngei a nih thu an hre thei ta a. Chumi atanga thla khat pawh tling loah a thattute pahnih chu an man ta nghál a ni!

Sualna chu leiah lang lo mah se, Vàn kawtthlerah khian puan a la ni tho tho ang!
– KC-i Pa, Khawlhring

About Mizo Archive

I'm the one who collect the best writings of Mizos
Aside | This entry was posted in Uncategorized and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s