Mizoram Weekly Roundup 3 – January 17-23

Author:

17 january sunday
Zan dar 8:00pm vel khan Lalthakima leh a unaupa Laldinthara s/o Thawmpaua te chuan Ratu khuaa Pu Laltluangkima te nupa chu an inkawt atangin tawngkam mawi lo tak taka au in an fiam a, Pu Tluangkima ning lutuk chu an in chhunga atangin chhuak a, Thakima te unau chuan kut an lo thlak avanga a thinrim chuan Hmanrua chuhin an unau hian a bei a. thisen a baw nasa hle a, a kawi ngei nguai niin mita hmutute chuan an sawi.
Thakima te unau hian hliam na tak an tawrh avangin darlawn Damdawiin panpui an ni a. An inbeihna hmun ah hian tuboh, chem leh thingfak te hmuh a ni. Post thenkhat ah chuan Thakima te unau zinga pakhat zawk hian Pu Tluangkima nupui hi a uire nia sawiin hei hi an buaina bul niin an tarlang thung.

Zan ah CIJW sikul a Sipai duty te leh Vairengte khawtlang an intibuai a, boruak a sosang hle. Lalrinpuia leh a thiante, Auto rickshaw hmanga an leng chhuak chu, CIJW sikul luhna gate aizawl lam hnaih zawk zawn a an tlanlaiin truck silcher atanga Aizawl lam pana tlan nen an in tawk a, truck hian side a lak vak loh avangin a tai tep a, Sangpuia chuan a auto khalh lai chu ti dingin truck khalhtu chu pawr takin a au zui a, chutia a au chu Gate a sipai duty chuan amah emaw an auh tiin a thiante punin Sangpuia te thian ho nen chuan an in tibuai ta a. Auto hnunga chuang Zosangpuia (Mahnuma) chu sipai hian hnuk thlain a kut leh ke ah phuar betin an Barik chhungah an hnuklut a. Sangpuia chu a insaseng theiin, Kudama mizo awm ho zu punin an thianpa Mahnuma chu lak chhuah tumin an thawk chhuak leh a, Khaw lama an thawm hria apiang an kal khawm zel a, sipai lam pawh an in pun khawm ve bawk a an innawr buai ta a ni. Vairegte Police in an thawm hriain buaina hmun hi an pan nghal a, sipaihotute nen inbiain a bul tumtu sipai hi Police kuta pek an rem tih avangin zing lam dar 3:30 vel khan an inrem ta hram. Police lam hian buaina chawkchhuaktu a puh Sipai an man hi an chhuah leh mai an hlauh avangin vairengte khaw tlangval thenkhat chu thana kawt ah hian an duty tlaivar niin an sawi.
tlai dar 5 vel khan Siaha District-a, Ahmypi khaw chhungah car chesualin Papao, Ahmypi leh Beikhukhei, Khopai khuate an boral.

January 18 monday
zing dar 7:30 vel khan Thuampui venga sipai camp piah, Thuampui leh Zuangtui inrina, Sipai tuikhur kawrah Pu Vanlalthafamkima (tetea) kum 39 mi ruang chhar a ni a. Pu Vanlalthafamkima ruang hi kawng atanga metre 10 vel, kawrah hmuh a ni a, a keah pem chhete a awm tih loh chu hmuh theihah hliam dang a neih hriat a ni lo. A hmun hma hi a awih em em hran lova, ruang awmna hi kawng atangin a hla lutuk lo bawk.
Pu Vanlalthafamkima hi zu in ve thin a ni a, a nupui Marami niin fa hmeichhe naupang kum 9 mi vel an nei a, Thuampui vengah an khawsa thin. Tunhnaiah a nupui fanau bula riak lovin an inpui Zemabawk lamah a riak phei thin a, sunday zan khan a nupui fanau te bulah pheiin chaw te pawh a ei a, zan dar 8 velah Zemabawk lama hawng phei turin a chhuah san a, zingah ti hian a ruang chhar a ni ta a ni.

Australia Open Lawn Tennis chu khelh tan a ni a. India No 1 Yuki Bhambri chu Tomas Berdych (Cze) in 7-5 6-1 6-2 in a lo tlawm nghal.
Zawlnuam Sub Post Office chu Kawrthah a sawn a, Zawlnuam chu branch Office anga kalpui tur a ruahmanna kalpui a nih duh loh na Zawlnuam Joint VC kaihhruai na in Tukin zing dar 7:30 khan Zawlnuam a Sub Post Office kawt ah neih a ni a. Zawlnuam atang a Sub Post Office sawnna tur order hi Zawlnuan Joint VC Chairman Pu C Lalropuia chuan a hal a ni.
Mizo Students’ Union (MSU) huaihawtin nimin khan Persons with Disabilities(PwD)Commissioner office kawt Chaltlang,Aizawl ah PwD Commissioner B Sairengpuii Sawrkarin kum thum a rawih nawn hnuah kum hnih dang atana rawih nawn leh tan mek bang tura phutin a Pisa kai tur dang turin zirlai eng emaw zat an kalkhawm ani. B Sairengpuii hi chhan leh vang hriatlohin office hi a kal lova,dan buai tur a awm tak loh avangin chhun dar 12 vel khan zirlai kalkhawm te chu B Sairengpuii duhlohna thu chi hrang hrang keng chhuakin an aurual bawk.
MSU hmalakna hi AIzawl City College Joint Students’ Union(ACCJSU) leh Mizoram Blind Society(MBS) ten an thlawp a ni.

MZP chuan thuchhuah siamin , Chakma foreigner an pung lutuk chu tha antih loh thu tarlangin, zirchian ngai nia hriain zir chiang tur Sub – Committee din an tum thu an puang.

?

MZP chuan Mizorama Chakma foreigner pung chak lutuk chu veiawm an tih thu sawiin, Kum 2015 chhunga Tlabung damdawiina naupiang zawng zawng zinga naupiang 81 (81%) chu Chakma a ni ta mai chu ngaih a ti tha lo hle a. An pun chak dan hian ngaih a ti tha thei lova, dan lova pem lut an tam viau nia hriatna a piang lo thei lo a ni an ti. Chakma te hi dan lovin an lo lut nasa hle tih chhiarpui atangin a lang thei nia sawiin, MZP chuan Chhiarpui hmasa ber kum 1901 ah Chakma mi 198 lek an awm laiin tunah 1,50,000 vel zet an awm tawh a. inthlah pun dan pangngai a pung ni lo in Bangladesh atangin tam tak an lo pem lut tih a nemnghet a ni an ti a, Hetiang a nih chuan kar lo ah Chakma te hi Mizote tan an hnawksak hle dawn nia ngaiin dan lova pem lut Chakma te chu dapchhuah an nih theih nan hma la turin Sorkar laipui leh State sorkar chu ngen a.
MZP chuan Ramri venghimtu BSF te pawh dan lova rawn pem lutte venna leh dapchhuah kawngah inthlahdah lova taimak chhuah lehzual turin an duh tih an sawi bawk.
Saiha College building sak lai, mamawhna vanga luah tawh, a satu contractor-in bill lak tur nawr nana January 13, 2016-a a kalh chu Saiha District Magistrate ngen angin hawn leh a ni.

19 Jan. Tuesday
chawhnu dar 1 Home Minister Pu R. Lalzirliana hovin ama office ah Meeting of Traffic Management neih a ni a. He committee ah hian Additional Secretary, Home chu Member Secretary a ni a, Member te chu : Chief Secretary, Secretary Transport, Secretary School Education, Councillor AMC in-charge Traffic, DC Aizawl, Director Transport, Director LAD, Director LR & S, Director I & PR, Director T & C, Director UD & PA, CE PWD (Buildings), Secretary AMC, SP Aizawl, SP Traffic leh President MJA te an ni.
Dr. BR Ambedkar birth anniversary 125-na lawmna chi khat atan Nehru Yuva Kendra, Aizawl, Mizoram Zone buatsaihin chawhma dar 11 hian I&PR Auditorium ah District Youth Convention neih a ni.

Public Accounts Committee te chu Assembly Secretariat Annexe Building Committee Room-ah an thukhawm a. PAC ah hian Chairman Pu K.Sangthuama a ni a, Member te chu : Pu R.L Pianmawia, Pu S.Laldingliana,Pu Lalrobiaka, Pu Lalthanliana, Pu Lalruatkima, Pu Chalrosanga Ralte te an ni.
Nl. Hmangaihdawngkimi – Kum 20, Upa F.Lalhmachhuana fanu, Khawzawl Vengsang, December 10 vel atanga a chhungten an biak theih tawh loh chu facebook group hrang hrangah a bo thu post a nih hnuah Hotel Chief manager EKLAS nen anmahni consent ngeiin Guwahati high court ah an lo zuk innei zawk a ni tih hriat a ni a. Kan thaw huai mai.
Vawiin 19/1/16 chawhnu a Home Minister Pu R. Lalzirlaina ho a a pisa a Coordination Committee on Traffic Management thukhawm chuan Aizawl khawpui chhunga Traffic jam ti ziaawm turin Taxi te chu March ni 1 atangin intlan chhawk tir hrih nise an ti a, private motor-te pawh zirchiang a, intlan chhawk dan tur ruahmanna siam tha an tih thu an sawi.
ADFA I Div. League Final chu zanin dar 6 hian Aizawl FC Academy leh Chhinga Veng ten an khel a. ZONET Cable TV in Live in a pe chhuak bawk a. Chinga Veng FC chuan 2-0 a Aizawl FC Academy hnehin an champion.
Food & Civil Supply Department a Officers & Staff Welfare te chuan kum 2016 chhung atana inhlantharna leh department hnathawh thlirletna hun hmangin 2015 chhung in an Deptt. in hma a sawn a, budget leh sale proceeds ah pawh Rs. 30 crore chuang an hlep thu leh Financial Year ah pawh deficit awm tawh lovin hman ban an nei ta zawk tih an sawilang.
Vawiin atang khan Kum 2016 chhunga a thawh khat nan Ram pumah Zenghri laka invenna Polio Vaccine pek tan a ni.
Zanlai avangin Whatsapp chu Lifetime account ah thlak a ni.

20 january. Wednesday
State Level Commtt. on Minimum Wages chu ni 20.1.2016 chhun dar 12-ah an thu khawm.
Hlawh hniam berin ni khatah Rs 270/- rawt chhin a ni a,bawngsa Kg 1 man Rs 300/- a niin, mistiri helper ni khata Rs 500/- te a ni tawh hlawm. Hlawh sang ber
Rs 460/- a ni bawk.

Swachh Bharat Mission (Urban) LPS Spelling Bee 2016 chu dar 1 ah Zarkawt Recreation Centre ah tan a ni
Zanah Ruah a tla deuh. Fang engzat nge ka chhiar thei lo .
MSU chuan, Home Minister, Pu R. Lalzirliana’n a pisa-a leng tura a sawm anga an inkawmna ah Home Minister chuan, “MSU-in PwD Commissioner, Pi B. Sairengpuii an duh lohna an lantir chu sorkar-in a hriat thu leh, sorkar-in thla thar ni 15 hma in Pi B. Sairengpuii hi a chawlhtir tur thu a lo hrilh nia sawiin Jan. 21 a Pi B. Sairengpuii ban phuta kawngzawh an tum chu an thulh.
Hetihlai hian ZONET zawhna chhangin Home Minister, Pu R. Lalzirliana chuan, Pi B. Sairengpuii hi February ni 15-a chawlhtir chu MSU hruaitute hma-ah a tiam lo nia sawiin a, an kawngzawh tum thulh tura a ngen thu leh, sorkar ngenna an ngaipawimawh a nih chuan theihtawp chhuah a tum thu a hrilh niin a sawi a. Home Minister chuan, MSU hruaitute hian intiam turin phut mahse, a intiam lo niin a sawi thung a. MSU duh ber chu PwD Commissioner atanga Pi B. Sairengpuii chawlhtir a ni a, hemi atan hian amah an rin ngam chuan theihtawp chhuah a tiam a, an ring ngam lo a nih erawh chuan theihtawp chhuah a tum bik loh thu a hrilh niin a sawi.
tlai dar 5:45 pm vel khan LPK (407) Truck B/R No.Mz 01/L-2299 Denzyl Zothantluanga (27) S/o J.Saitluanga, Chaltlang Venglai khalh leh Scooty (Rodeo ) B/R No. Mz 01 H/1503 Michael Pazawna (43) S/o S.H.Lalkhama, Ramthar veng Aizawl khalh te chu Hunthar veng lei tlahniam ah in tipalh in, Scooty khalhtu Michael Pazawna hi Civil Hospital Aizawl thlenpui a nih hmain a boral.
chawhnu dar 2:30pm vel khan Aizawl Chhinga veng ah Zodinliana (31) s/o Lalnghaka(L), champhai Chungte Bawk, Tuna Tuikual C a awm hnen atangin Heroin, a zawrh lai chu Spl. Narcotic PS staff ten an man sak.
ASI Aizawl Circle din a nih thu sorkar laipuia Ministry of Culture-in a pawmpui hnuah, ASI director general Dr Rakesh Tiwari chuan a tichhuak.

21 jan. Thu
A hna atanga a chawlh tawh hnua sorkarin a rawih nawn Persons With Disability PWD Commissioner Pi B.Sairengpuii ban phutin vawiin khan Mizo Students Union MSU huaihawtin zirlai thahnem takin Aizawl khawpui chhungah kawng an zawh a, MSU bakah hian Aizawl City College Joint Students’ Union (ACCJSU) leh Mizoram Blind Society (MBS) te an tel a, Zarkawt atangin Chaltlanga PWD office thleng kawng an zawh a, hetah hian tlai dar 5 thleng kawngpui dangin an thukhawm a, tlai lamah Pi B Sairengpuii office luhchilh tumin an thawk a, Magistrate in ti lo tura a ngen hnuah anmahni hnawhdarh tum police te nen an innawr a, police 5-6 vel an hliam a, zirlai zingah thisen chhuak khawpa hliam leh buaipui ngai an awm nual a, a zat chiah erawh a hriat theih lo. Hriat theih chinah MSU President thisen chhuak khawpa khawih a ni a, ACCJSU President Ruatpuia bakah midang pahnih damdawi inah an awm bawk. Kal thei lo khawpa vuak tuar leh Tear Gas vanga thaw chham buaipui ngai eng emaw zat an awm bawk. HBC VP Jacoba a chin hriat a la ni lo. AIR Corr. sawi danin, Kawngzawhna ah hian tel an thahnem hle a, police nen an innawr naah hian police te chuan mittui tlakna hlo leh tiang an hmang a, khawthim hnuah pawh zirlai te hi an la inhawr khawm a, Home Minister leh Chief Minister te pawh aukhumin, an thil nawr chu chhunzawm zel an tum thu an sawi a ni. A tuka kawng zawh leh turin Aizawl College SU chuan an zirlai te hnenah tel vek tura hriattirna a siam hial a ni.
Hetihlai hian zirlai pawl pakhat ve tho MZP erawh chengkawl zaipawl ang maiin an ngawi mai mai thung a.
Ti hian thu chhuah erawh an siam – MZP chuan mi bik takte an nih lem loh chuan Sorkar hnathawk pension tawh rawih nawn fo hi hman atang tawhin alo duh lo tawh thin a. Tuna sawrkar hnathawk pension tawh vawihnih lai Sorkarin a rawih nawn vanga duh lohna lantir mek kan unau MSU te hmalakna hi MZP chuan a thlawp a ni” tiin thu an chhuah thung
Khua a nuam lo hle a. Mizoram hmun thenkhat ah chuan a sur ve viau. Lei chunglang a hnawng thei hial a. Tuihawk erawh a luang lo.
chawhma lam khan Bairabi-a Pu Ch.Chhunga leiletah Assam Forest leh Assam police te chuan leilet a hnathawkte tibuaiin an umdarh a, MZP in a hriat ve leh President chamber-ah emergency meeting neih nghal a ni a, tlai dar 1:30pm khan a hmun ngeiah kala thil awmdan enchiang turin MZP Vice President leh mi engemawzatin Bairabi lam an pan nghal
KOLASIB Venglai St Johns bula sorkar phalna neia Jan. 21 a zu dawr hawn tum chu veng mipui ten an duh lo a. Veng mipui te ngenna in zu zawrh tumtu David Lalengmawia Aizawl khua chuan a zu te chu a phurchhuak nghal a, boruak duhawmlo thleng a awmlo.
Press Information Bureau PIB Aizawl buatsaihin thuthar thehdarh tu ten chanchinthar theh darh kawnga zau zawka thingtlang mipuite tuam theih dan tur an zirho a. Chanchinthar a report tam tak enin Thingtlang tuam dan tur tak erawh sawi a awm lem chuang lo.
Aizawl District Excise & Narcotics ten Phunchawng leh Rangvamual ramah zu check beihpui an thlak a, rakzu litre 130 leihbuain zu bilhlai tin 960 an tichhe bawk a, zu thlawr nana hman bel an man nual bawk.
Tripura, Manipur leh Meghalaya te State Day a ni.

22 Jan. Friday
chawhnu dar 2:00 ah Aizawl FC Home Ground Rajiv Gandhi Stadium Mualpuiah Aizawl FC leh DSK Shivajian FC an intum a AIZAWL FC chuan 2-0 a DSK SHIVAJIANS a vawi khat nan an Chak ta. Alfred Jaryan 18, Kinowaki 45 ten Goal an thun.
Pi B.Sairengpuii PwD Commissioner atan rawih nawn duhloh avanga kawngzawh chu a nihnih na atana nei leh turin MSU huaihawtin zirlai leh anmahni tawiawmtu tam tak Vanapa Hall kawtah an pungkhawm a. Kawngpui an dan avangin motor a jam masa hle a.
Federation of Mizoram Govt Employees & Workers dar 10:30 Vanapa Hall a general conference an neih tur pawh an thulh phah hial hnuah Pi B. Sairengpuii rawih nawn lehna order chu vawiin ni 22, 2016 hian a sut ta a ni.

Federation of Mizoram Govt Employees & Workers ten dar 10:30 AM a Vanapa Hall a general conference an neih tur chu, PwD Commissioner atanga Pi B. Sairengpuii ban phuta Vanapa Hall tuala pungkhawm zirlai hruaituten hmun danga nei mai turin an ngen a. Insawnna tur hmun dang a awm mai si loh avangin, conference neih tur chu an thulh.

tlai dar 3:30 – 4:00 vel khan Aibawk khaw dai ah Maruti 800 – nausen 2 leh puitling 5 chuanna chu a chesual a, nausen pa 2 leh puitling 2 an vaiin mi 4 an boral. An chetsualna hmunah hian nausen pahnih Lalhmangaiha s/o Rodingliana thla 7 – a upa, Lalruatzeli s/o Ramtharnghaka thla hnih a upa leh Pi Laldinthari (35) h/o Vanlalvena Darlung khua te chu ka pawh chhawn loin an boral nghal a, Referral Hospital panpui a nih laiin motor neitu leh khalhtu Pu Rodingliana (27) pawh a boral ve leh a ni.

Motor chesual awm thu an hriat ve leh Aibawk leh Sateek atangin mi tlawmngaite an tlan khawm nghal a, hliam te leh mitthi ruang te hi bawihsawm nghalin Aibawk Damdawiin ah lak an ni a, Sateek leh Aibawk YMA ten kuang an siamsak a,

car accident an buaipui mek lai hian a piah lawk Aibawk ram chhungah chhangthawp sema kal thin Maruti van chu kawng thlangah a tlan liam bawk a. He Maruti Van-ah hian Salim Uddin (29) leh Mustak Uddin (20) te an chuang a, Salima hi a ngal ruh a tliak a,Mustak Uddin hi a malpui ruh a tliak bawk a ni. Anni pahnih hi Aizawl damdawiin panpui an ni.
KTP CONFERENCE TAN A NI.

23 Jan. Saturday
zingkar ah India Republic Day vawi 67-na lawmna leh ram leh hnam tana inpekna kawnga in fuihtharna tura Project Pushpak-in a buatsaih Mini Marathon, ‘Run For India’ chu Lammualah neih a ni. He Mini Marathon intihsiakna hi category nga-ah then a ni a. Mipa leh hmeichhiate tan kum 14-18 leh kum 18 leh a chunglam tan intihsiakna a hrang theuh a buatsaih a ni a. Mipa leh hmeichhe naupang kum 14 hnuailamte erawhchu a huhoa intihsiakna neih tir an ni. He intihsiaknaah hian category tin a ti tha berin tangkafai Rs. 3,000/- leh thilpek an dawng a, pahnihnain tangkafai Rs. 2,000/-, pathumnain tankafai Rs. 1,000/- an dawn bakah Consolation Prize Rs. 500/- chu a ti tha zualte hnenah pek a ni bawk. Intihsiaknaa tel zawng zawng te hnenah hemi ni atan bika siam T-shirt leh Lukhum pek an ni.
Ngopa khua hmeichhe naupang thla 5 mi chu a Walker chuang lai a nu insuk hlanin an meihawl thukah a tlu palh a, a hmai a kang nasa hle. Ngopa damdawiin ah enkawl a ni.
Zan ah i10 Car pakhat chu Sikulpuikawn-JL Cinema Hall bula Oikos HSS bul kawi ah kual zo lovin kawng chhak lama electric ban taiin a piaha Highlander school opposite a In chu natakin a su. Mita hmu tute sawi danin he Car hi a tlan chak hle a, kawngkualah a kual zo lo a. Savety Airbag nei Car a ni hlauh a, thi leh hliam na lutuk an awmlo.

Advertisements

About Mizo Archive

I'm the one who collect the best writings of Mizos
Aside | This entry was posted in Weekly roundup and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s