HAUZASINGA LEH KEIPUI HLIAM

  • Pasaltha leh sakei an inbei
  • Sakei ringruh a elh tliak
  • Tedim biala Tamhel khua atangin Lutzamanga chuan Saizang khua a kai a. Kum 1882 vel ah Saizang atang Tuivai kam hmar ram lama cheng turin a pem chhuak leh a. Saizang lal chuan Lutzamanga te chhung pem chhuak tur chu a ui ngang mai a, a fapate pahnih Hauzasinga leh a nau Thangzakula te vanga ui pawh a ni reng a; khaw dai ngul leh phaw tluka mi pawimawh leh innghahna hi lal khua leh tui tan a aia han ngaihhlut em em tur a awm lo reng a ni.

    Tuivai lui dung, Mualnuam khaw per Thuangtam khua ah an in bengbel ta a. (He khua hi Manipura awm a ni.) Hauzasinga te unau hi an khawsakna tlang dung tin maiah an che hraw hraih zel mai a, mi huaisen leh chak ngang an nih avangin mi hriat an hlawh hle a ni.

    Tumkhat chu Hauzasinga leh a thian, Siakkhaipa chu hmawng-kai ram lamah an ramchhuak a, chhun ni herah hmawng-kai ram an lut a. Riah buk tur an sual zawh chuan sa chan khan tha zawng turin an inhawlchhuak leh nghal a.
    Hmawng-kai tlang pang per an zawh zel a, Hauzasinga chuan mautlawn tluk nga zet awma hla ah sa a hmu ta mai a, sazuk niin a hria a, a silai chuan a han tin vang mai a, chutah silai ri thuntling tih hriat fahran hian a han kap ri dur mai a. A thianpa chu a rawn thleng thuai a, an thiandun chuan an sa awmna lam an pan phei a. Hauzasinga sa kah chu a thlang ruam lamah a lum thla a ni tih hriat reng rengin ruam lam chu a pe thla hun mai a. A hnuai an zu thleng chu, kawng sialtharna niawm taka thisen a khat tawka lo far zauh zauh an hmu ta a, Sazuk ni ngeiin an ngai a, tlai hmeh atan man ngei an tum bawk a, a hnuchhui chu an bei ngawrh in an tumruh hle a ni. Nimahse an sa hliam chhui chuan mak tak maiin an lamah a hnu a rawn thlep let ta tlat mai a, anmahni chu a rawn veh let niin an hre tlat mai a ni. Siakkhaipa chuan an sa hliam hnuchhui chu sakei niin a hre ta tlat mai a, a hlau hnuhnawh chuan bansan a rawt ta chuk chuk mai a. “Thiana, kan sa chhui hi kut nei ni hian a lang tlat mai a, kan kirsan mai loh chuan mihringah kan in chanlo hlauh dah a nge” a ti ta hial a. Mahse, Hauzasinga chuan eng sa pawh lo ni se, kirsan a tum bau silo; amah chauh pawha chhui zuizel a tum nghet tlat mai a ni.

    Zasinga chuan hma a han hruai a, a hnungah a thiana chuan kimki duk hian a rawn zui ngam hram a. Kawr atanga lengkir inkhawhthlakna kiang an han thleng chuan kham ko puk tanchhanin sakei hliam lian tak a lo tawm run mai a, an inhnaihchilh lulai ta lutuka, silaia han tin theih a ni ta lo. Hauzasinga’n Tan hmun sawh rem tura hnunglam a han tawlh zauh chuan rawpum a rap hrual palh ta hlauh mai a, chutia a tan a han phet zauh lai chuan sakei hliam chakai kawtawptan chuan a rawn zuan ta thurh mai a, a silai a ben persak nawlh bawk a. Hauzasinga chuan sakei beng pahnih ah lo thamin a chelh bet tlat mai a, sakei meuh pawhin a seh mai thei hauh lo. Chutia sakei hliam kawlh tak mai a chelh beh tlat lai chuan a thianpa chu sat hlum turin a han ko a; mahse, a thianpa chuan puih taka ruangin, hlauin a tlan hawsan ta hlauh mai a.

    Chutia sakei hliam thinrim nen an han insual tak tak chu an chená viau a ni awm e, fing khat vel lai chu a pe hen hun mai a ni. A tawpah zawng Hauzasinga chuan sakei hliam nghawng ruh chu a herh tliak ta thawt mai a, sakei thihsual chalchang chu a lengna viau mai a, sah tuma a tha a han thlahdul zauh lai chuan pasaltha Hauzasinga luah tak mai chuan sakei chuan a rawn hap ta thut mai a, a thluak pawh turin sakei ngho chu a seiin a hriam tawk si a, pasaltha huaisen leh ngawltawt, sapui hliam hu avanga zam ve ngailo Hauzasinga chu leiah a thingthi deuh rup mai a, muangchanga sakei kâ chu kuai zauin, a lu a han phawi a, sakei chu lengkir sang tak atang a tlawh thla ta a ni.

    Sakeiin thluak pawh meuh khawpa Hauzasinga a seh chung pawh hian hliampui namai lo tak tuar chungin an riah buk chu a la kal thleng hram hrama, khaw mipui an rawn thleng thuai bawk a. A hliam chu an khaw upa Mangvunga’n a han en chiang a,”Pa chang paruk thihpuina tham a ni”a ti hial (a nâ tawk hle a ni). An khua Thuangtam an thlenpui hnu rei lo te, zanlai âr khuan hun awmah, pasaltha huaisen leh sa kawlh hmaa zam ngai lo Hauzasinga chu a boral ta a ni.

    Pa huaisenin famkhua a lawi zan chuan Thuangtam khaw luah sar a zam kulh mai a, âr an khuang lova, ui an bauh na hek lo; khawvel hi a ngawih hian a ngawi vung vung a ni ber e.

    Leilung a rawn lang a, Hauzasinga sulhnu an zu chhui leh chuan ring ruh thlep hnupa sakei lo thi reng chu an zu hmu ta a ni. Hauzasinga nau Thangzakula chuan sapui hliam kuta a û a han thi ta mai chu a rilru a na ngang mai a, “Ka u nen kei hi ramchhuak chu ni ila, ka û hi sakei ka sehtir reng reng lo vang “tiin a tlak bap bap mai a ni.

    Thangzakula pawh hi a û dungthula pasaltha huaisen a ni a, sa hliam pawh tam tak a tudawl tawh a ni.

    Thubelh:
    Hmanlai kan pipute nunah kha chuan sa leh ral laka thian chhan thihngam nun neitute chu pasalthate tih an ni thin a, sa leh ral laka lu an rawlh thin avangin nunna hial chân ta pawh an tam hle thin. Dawizep avanga Tlanchhe tute nun erawh thihna nen, a lem chuan loh avangin, nun ve reng ai, thih daih pawh a thlanawm fo. Zawlbuka val upaten ram deuh hmaka tlangval ngeng leh nung duhdah deuh an han kamkhat hlak tawh chuan a tuartu tan he thila inhremna hrehawmzia leh zahthlakzia chu an kumkhaw sawi a tling thin. Chu aia zahthlak chu a la awm thei cheu mai, chu chu, thiante chhan ngam lova tlanchhiatsan hi a ni awm e, damchhung mualphona leh chhuan tam tak thlenga kori tu thei thil a nih vang a ni.

    Chuvangin vawin ni thlenga tlawmngai huaisente tana chawimawina Nopui kan hlan thin hi thil ropui tak niin ka hria.

    Advertisements

    About Mizo Archive

    I'm the one who collect the best writings of Mizos
    Aside | This entry was posted in Uncategorized and tagged , , , . Bookmark the permalink.

    1 Response to HAUZASINGA LEH KEIPUI HLIAM

    1. Pingback: Mizo Thawnthu List Directory - Sakeibaknei

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out /  Change )

    Google photo

    You are commenting using your Google account. Log Out /  Change )

    Twitter picture

    You are commenting using your Twitter account. Log Out /  Change )

    Facebook photo

    You are commenting using your Facebook account. Log Out /  Change )

    Connecting to %s