KA NI DARI THLAMAH

Author: R Zonuna RL
  • Thlam chhunga Pa ho buaina turu
  • Ni Dari mutbu a hnawk.
  • A huaisen ber vang a ni.
  • THU HMA
    Thingtlang hlira seilian ta chu kum tawpa khua a han thengthawt hi chuan ram lam hian rilru a pawt tung mai thin. Silai nena han vah khawthawn ka chak zek zek tawh thin.

    Hemi kum pawh hian December thla College chawlh veleh a rang arangin kan khuaah ka haw a. Ka nite lova ka ni pasal riak mek chu zawm ve ka tum a. Ka ni chuan, “Buhfai leh silai bak engmah keng duh suh. Ramah mutbu leh Vaithangte chu a awm vek a lawm. I pa Lawma buh chhekpui tur hlawhfa pakhat kan la dawn a. Chu pa rual chuan i kal dawn nia,” min ti a. Ka phur ngei mai.

    THANG DAWTHEIA
    Ka nite hlawhfa tur nen chuan kan chhuak ta a. Hepa hi khawchhak lam atanga rawn tla thla a ni a. Palian leh sek tul mai, tawng duh leh insawithei em em mai a ni. A hming chu Thanga. Kawng tluanin a huai zia te, sa a kah hnem tawh zia te, a chak zia te, khawchhak lama awm a nu leh pate hausak zia te hlir mai ka ngaithla a, ka va han hne tak em!

    A thil sawi zinga ka awih loh ber chu Mawngkaw pahnih a neih thu a ni! Mawngkaw phir a neih bik theihna dan tur kha khawi road ah mah a awm ka hre lo a ni. Hepa hi ka ngei tlat.

    Lo kan thleng ta a. Lo chu inzawm vek hian an nei a, thlam an nei hrang vek bawk a; nuam tak a ni. A lai velah chuan thlam lian bik deuh tak hi a awm a. Sazu kawngtum bel tak tak ka hmu nghal teuh mai a, ka phur tak zet mai.

    KA PA LAWMA THIL SAWI
    Chhunchaw kan fak lai chuan ka pa Lawma chuan, “Tunlai hian kan zauvah hian sakei a awm a. Zanah thlam te a vel thin a. Tin, sipai ui chhuak lian deuh mai a awm bawk a. Ui hi chu a hlauhawm lova, sakei hi kan hlauva. Buh chhek pawhin a huho zelin kan kal thin. Zanah pawh Ka Ni Dari thlamah kan riak khawm thin a. Khawthim hnuah pawnah kan awm ngai meuh tawh lo. Nang pawh Vaithang chu en laiin kam zo vek ang che,” a ti a. Thanga a lo insawi thei ve sek lehnghal a! A huai zia leh sakei a hlauh loh zia a sawi chamchi a!

    Anni pahnih chuan buh an chhek nghal a, keiin Vaithang ka kam nghal char char bawk a. Thang sawmsarih lai hlau deuh chungin ka kam hman. Hma deuh takah tlai chaw kan ei a, thim hma deuhin Ni Dari thlam chu kan thleng phei ve a ni. Ni Dari thlama riak tur chu an lo kim vek tawh a; kan vaiin sawm lai kan ni. Ni Dari chu hmeichhe awmchhun a ni bawk.

    KA NI DARI
    Nu chang lam tawh, hmeithai a ni. Hmelchhe ung ve tak, mahse hlim thei tak leh a bula awm nuam em em mai a ni. Mak tak maiin kan khaw mi naupang leh tar thlengin ‘Ka Ni Dar’ tia kan koh vek a ni. Hmeichhe dang ang lo takin mi chhungkaw chanchin chhe lamte a sawi ve ngai lem lo. Mi chanchin a sawi pawhin a tha lam chauh a sawisak thin. Heng vangte hi a niang taupawhin an ngaina a; puih te hi an hreh reng reng lo. Kan khaw hmeichhiaah chuan a ni aia lar an awm lo. Hmeithai a nih vangin ri paho hnatlangin thlam an saksak a, a nei lian ta ber a ni.

    MUT HMUN TITI
    Phai a nih vangin a la vawt vak lova, thlam chhungah chuan an titi luai luai hlawm a. Sakei inlar thin mek te sawiin an nui leh dar dar thin a. A karah Thanga chuan a huai zia leh sakei a hlauh loh zia a lo sawi ve leh sek bawk a!

    Ramah chuan khua a tlai hma ngei mai. Zan dar sarih leh a chanve a rik meuh chuan kan mawng a kham der mai. Ka Ni Dari thlam chu kan en thin a, mi sawm riah nan chuan a te ka ti a ni. Ka rilru chuan engtin tak mu ang i maw ka ti rilru a, ka lo inngaihtuah buai ngei mai.

    Ka Ni Dari chuan, “Mut dawn tawh ang u, ka kawng a kham e. Duh leh mut pahin kan titi chhunzawm dawn nia,” a ti a. Mutna chu kan han siam ta a lawm le.

    Thanga chuan, “Kei chu sakei ka hlau lo, kawngka bulah hian kan mu ang e; kawngka pawh hi khar a ngai lo, a thawpik mai mai,” a ti lung lung a. Kei chuan engmah sawi lo leh hlau chung chuan Thanga dawt chiahah ka inphah ve a. Midang pawh chu an inphah ve zel a. Thosi a la awm tho avangin Thosilen zar erawh buaithlak tak a ni. A hran veka zar kan duh si.

    Thosilen chu engtin tin emaw, a chingchivet thei ang ber hian kan han zar kawkalh tak tak a. A kil lama mute tan phei chuan zan zun pawh a theih loh tluk a ni. Mi thosilen hruiahte kan thlung bet fer fur mai a. Engtin tin emaw kan inbeng leng hram a ni. Ka hlau bawk a ka lukham bulah Torch eng zet mai ka dan ran mai a. Chutah pa ho chu an titi ta a lawm le. Pa ho titi then khat chu:

    PU KHUMA : Pu Khuma hi sipai bang a ni. Fa a ngah a, a pension kham hek lo le, lo a nei ve ziah a. A pension tirha lo a nei phei chu a’n dawih mai mai khawp a. Vau hnungchhawn zawngin a hlo a thlo ngam reng reng lova! Hlo hi a chhuk thlawh thin! A bunna bula Ulhbun silai a chhawp zel bawk thin.

    A sipai tanlai hi hahipin a sawi thin a, dawt leh a tak anih fiah theih a ni thin si lo!! Anni ho hi an thianten Nawhchizuar an kawm laia lo nghak thin ang hian a insawi vek lehnghal a!!!

    Pu Khuma chuan, “Kan Batallion hmunah Swimming Pool kan nei a. Zuan thlakna tur hi a san zawng indawt hian a awm chho thluai mai a. A sang lamte chu sang tak an ni a, kan kal ngai meuh lo.

    Vawikhat chu Rawngrut trainning lai hi an rawn cheng ve a. Sang tak tak atangte chuan an han zuangthla thin a. Ka tlawm a ngai ta tlat mai a. Rawngrut ho hmuha intihtheih chu ka chak tlat mai bawk a. Intithei tak hian ka kawr ka phelh sawk sawk a, ka lawn chho ta a. A sang berah chuan ka han ding ta vang mai a, min thlir thap bawk a. Ka hlau ru ngei mai.

    Chutah chapo tak mai hian ka’n zuangthla ta a lawm le. Ka zuan tawh hnuah ka ngam leh si lova!!! Ngam leh si lo ta chu a biling a balangin ka tla thla ta vawn vawn mai a. Tuiah chuan a phek zawngin ka tla ta a, a thip duh ngei mai,” a ti a. Kan nui dar dar a.

    PA THARA : Pa Thara chu tawngkam thiam zet mai leh sawi tur hre zet mai a ni. Heti hian a sawi a. “Khawthlanga kan awm laiin khawhar inah kan riak a. An sawi hrang deuh a. Kei tak chuan thawm ka la hre ve lova. Tlangval riak kan tam khawp mai a, ka thianpa Laia nen bang thlang lam depah kan mu a.

    Zan khat chu zanlai velah bang chhak lama mu ho chu an ri ta hlut mai a. Thim tham zingah han pawh ngam hawt si lo khan mahni mutna theuhah kan dinga, kan han “Enge ni” tak tak mai a. Mahni awm hmun theuh atangin kan ENGE NI chuah chuah mai a. Ka thianpa Laia khan a rizai a pawm luah mai a, a’n ENGE NI ring em em khawp a. Kei pawh vawi ruk vel lai ENGE NI ka ti hman. Laltin an han chhi eng chu an putar zan zung tur thim thama bang rawn dap phei khan tlangval thenkhat lu a rawn rap phei chu lo niin,” a ti a. Ka nuih a za ngei mai.

    Thildang an sawi zel a, zan a lo rei ta a. Ka Ni Dari chuan, “I muhil tawh ang u, zing thawh hma kan ngai thin si,” a ti a. Kan reh ta thap a.



    Mutna ngai loh a ni nen, ka hlau deuh nen, ka muhil thei lo tawp mai a. Midang chu an hnar bur bur tawh a, Ka Ni Dari pawh a tawngvai leh niah niah thin a. Thanga pawh a muhil lo tih ka hria.

    Zanlai vel a nih tawh ka ring. Thlam luhka chu a ri ta thak mai a. Engemaw chu a rawn zuang kai a ni. Thosilen chhanah chuan kawngka inhawngsa lam chu van thlarah ka hmu chiang thei hle a. A rawn ri phei leh a, thlam kawngka ah chuan ui lian zet mai hi a rawn dak ta vuah mai a. Kan mihuai kawngka bula mu, Thanga chuan ring zet mai hian, “Hei le Ka Ni Dar,” tih pahin a thosilen pawh keu hlei lo chuan a lai lamah a zuang phei ta mai a!

    THIMTHAM BUAINA
    Ka thosilen pawh chu a vaiin a zuan pheipui daih mai a. Ui tlan chhe ri leh leia a zuangthla ri ka hre zui bawk a. Chutia Thanga a zuan phei thut tak avang chuan thlam chhungah chuan buaina zakhua a thleng ta. Thim em em zingah chuan thlam chhuat chu a ri ta tuk tuk mai a, a nghing luai luai bawk a. A ri thum leh dawp thin a. A rik thum dawp rual chuan Thanga aw hian, “Aiah” a rawn ti thin a. Thlam chhung hmun tin mai chu a ri tuk tuk mai a. Puan nge thosilen tet tih a hriat loh, a ri leh kawk thin a.

    Ka Ni Dari chuan a khat tawk hian, “Aiah siii..” a rawn ti leh thin bawk a. Ka torch light chu kan dap thin a, ka hmu zo der lo. Thlam bangte chu a ri leh thuai thin a. Thanga leh Ni Dari ten a khat tawka, “Aiah” an ti thin mai lo chu tawng thawm a awm lo. Mahse chu thlam chhungah chuan thil rapthlak a thleng mek tih a thawm atangin a hriat si! An hmuh theih si lohva, an thawm ringawt hriat chu min timangangtu a ni.

    Ka torch light chu ka mawng bula a lo awm teh daih a, Thanga zuang phei khan a pal nge ni dawn ni? Ka han hmet eng chiah mai chu, mak tak a ni, mak tak! Tumah hmuh tur an awm lo! Thosilen zar chingvet lutuk tak mai kha a tla vek a; a hnuaiah chuan an tal sup sup mai a. Inhaihawng mai thei reng reng an awm lo. Ka han en kual a, ka nuih a za ngang mai a. Thosilen hnuaiah chuan an phu luai luai mai a ni. Engemaw ang ka tia tehkhin tur erawh ka hre si lo!

    Chutah Ni Dari chuan, “Min rek suh uuu,” a rawn ti tham tiak a. Chutih lai tak chuan Namthlak bula mu chu a rawn inhai hawng hlawl mai a. A’n en ve chu a nui ta vak vak mai! Chitih lai vek chuan ka pa Lawma a rawn inhai hawng ve leh a, a rawn pawr ngang mai. “Tunge ka tukkhuma min hnek kha,” a rawn ti! Mahse a’n hawi kual a, a nui ve leh ta.

    Chutih lai chuan, Ni Dari chuan, “Ka thaw a pik a nia,” a rawn ti tawk tawk a. Tal buai mekte chu ka kar pawk pawk a, ka han enchiang a. Ni Dari nghawng leh lu chu phuar luih ang tlat maia nghet hian thosilen leh puan vel chuan a lo vet luk mai chu niin! Ka’n pawt ngawt a, nget tak a ni. Ka pawh nat deuh lahin a pum kan leh vu vu lawi si! A ke lam pawh a inphuar tlat. Ka pa Lawma chuan min rawn pui vat a.

    Ni Dari taksa chu kan han kuai let thawk a, a awmzia kan man tan ta. A taksa chu kan lir kual zel a, kan phelh thei ta hram a. A rawn inhaihawng chiah chu a thin hi a rim em em mai a. “Tunge ka nguma min rawn tlawh kha? Tunge min rawn delh vak vak kha?” a rawn ti!

    Ni Dari kan buaipui chhung khan midang chu an lo inhai hawng kim tawh a. Bati te pawh an lo chhi eng tawh a. Enga han en kual chuan thlam chhuata thosilen leh mutbu chu a kawi hian a kawi chingchivet nuaih a ni ber mai. Chinfel leh mahni ta lak leh pawh huphurhawm a ni. Hlawhfa lakna tham ni hialin ka hria. Thanga chuan a nak a dawm a, kil khatah a thu kun run mai a. A lo dawng hnem bik deuh a niang. A ‘aiah’ zing ka ti reng a!

    THIL AWMZIA
    Thingpui an lum tha leh a, thil awmzia kan han sawi khawm a. A chiang ta kuar mai.

    Thanga hlauh kha sakei nilovin ui a ni phawt. Khatia a zuan phei dawn a, “Hei le Ka Ni Dar,” a tih kha an lo hre deuh vek a. A zuang phei kha thimthamah Sakei rawn zuang lut emaw an lo ti vek a; an lo dim lo nasa mai chu niin! Thosilen hnuaiah talbuai hlawm lo phei se chu Thanga kha a na hle mai dawn a lo ni. Thosilen khuh hnuaiah khan engmah hmu thei hek lo; anmahni rawn delh tu apiang kha a rem dan danin an lo khawih tawk zel mai a ni awm e.

    Mahse Ni Dari khati tak maia invet nghet kha erawh amah pawhin thil thlen dan a sawi thei lo. “Khatia thosilenin ka hmai a rawn tuam hlup khan ka tal buai nghal a. Ka tal kual nasa lutuk, ka talna lam apiangah min rawn delh zel bawk sia,” tih chiah a sawi thei a ni. Kan nui nasa hlawm teh asin aw!

    KHARNA
    Kan han insingsa leh chu kan han bei rei khawp a. Ni Dari hmai vet tlat tu zingah khan ka thosilen a lo tel ve daih a nih chu! Mut kan han siam leh naa tumah kan muhil tawh lovin ka hria.

    Keia pawh chu nupui nei ve dawn ta i la tih vel mai mai ka ngaihtuah a. Lawithat zan te ka tawng ve ngei ang a, ka che buai awm hian ka hria a. Hmeichhe taksa bung hrang hrangte lah an awmna ka la hre kim hlawm si lo te ka tia! Thiante ka zawt ngam dawn der mai si lova.

    Reiloteah khua a rawn var zui ta mai a.

    Thang-Mihuaia chu a dawih luatah a tuar ta hrep mai chu a nia! A na tuar chu ka khawngaih deuh naa chawh ka ti ru khawp mai. Enge a insawitheih viau teh ei! Lo chum hlum sela chu a mawngkaw phir leh phir loh ka ensak hrim hrim ang!!

    About Mizo Archive

    I'm the one who collect the best writings of Mizos
    Aside | This entry was posted in Uncategorized and tagged , , , , . Bookmark the permalink.

    2 Responses to KA NI DARI THLAMAH

    1. Chhana says:

      Ka nui hle mai… Ka channel ZodaiPasaltha ah upload remti la… Ka lawm viau ang

      Like

    2. Lana says:

      Nui hnem hle mai

      Like

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out /  Change )

    Google photo

    You are commenting using your Google account. Log Out /  Change )

    Twitter picture

    You are commenting using your Twitter account. Log Out /  Change )

    Facebook photo

    You are commenting using your Facebook account. Log Out /  Change )

    Connecting to %s