PI RAMDINMAWII VUI A NI, CM PU HAWLA TE NUPAIN SUNNA LEH TAWRHPUINA THU AN THAWN

Author:
  • April 10 sunday a Pi Ramdinmawii, kum 34 a thih leh tak avangin Mamit Bazar venga Pu Saikhuma te chhungkua pa eisual avanga thi zat chu 4 an tling ta a, damlo pathum chu enkawl mek an la ni.

    Pi Ramdinmawii hi Aizawl Civil Hospital-ah ICU a chan loh avangin Khatla Peter Street-a Aizawl Hospital ICU-ah dah a nih hnu-in sunday chawhma dar 10 leh a chanve vel khan a chatthla leh ta a ni. A fa naupang ber kum 3 mi, Miriam Lalremruati pawh a nu bulah hian an dah ve a.

    Miriam Lalremruati Kum – 3
    Ani hi a dinhmun a hlauhthawnawm lo niin an sawi.

    Pi Ramdinmawii ruang hi Mamit panpui nghal a ni a. Sunday khan Mamit Bazar Veng Hall-ah tlaivarpui a ni a, April 11 chhun dar 12-ah vui a ni.

    Aizawl Civil Hospital atanga thudawn danin an fa upa ber kum 12 mi Saihmingthanga hi a dinhmun a la ngai deuh reng a, sunday khan Dialyasis te tih a ni a, a thisen a sang bawk. ICU-ah ngun taka enkawl mek a ni a. An mikhual kum 20 mi V.L Hriata chu a dinhmun a that loh avang leh Aizawl Civil Hospital ICU a ruah loh avangin sunday vek khan Aizawl Civil Hospital Casualty atangin Greenwood Hospital-ah sawn phei a ni a, ICU-ah dahluh nghal a ni.

    Tarlan thin tawh angin Mamit Bazar venga Pu Saikhuma-te chhungkua hian ramhnuai atanga an lak, Papar ni-a an hriat chu kangin April 4 Thawhtan zan khan an ei a, hemi hnu hian an pum a nat bakah luak leh khawsik an nei nghal a, Thawhleh zan khan Mamit Damdawiin-ah an lut nghal a, Mamit Damdawiinah hian an fapa Biakrinawma, kum 10 mi chu April 7 Ningani zan dar 8 velah a thi a; a chhang chiah Malsawmtluanga kum 8 mi chu a tuk Zirtawpni zinglamah a boral ve leh a. An chhungkaw pa ber Pu Saikhuma kum 35 mi chu Aizawl Civil Hospital an rawn thlenpui hnu-ah a thi leh a ni.

    An pathum hian Zirtawp zan khan vui an nia, thlan khatah phum an ni.

    Chief Minister Pu Lal Thanhawla chuan a zinna Myanmar atangin sunna leh tawrhpuina thu a rawn thawn a;

    “Mamit Bazar veng Pu Saikhuma leh a Nupui leh a fa te pahnih, Pa eisual avaingin an nunna hlu tak an chan tih Myanmar rama kan zin laia kan hriatin, kei leh ka nupui thinlung a thawng hle a, pawi kan tiin an chhungkua kan tawrhpui takzet a ni. Pu Saikhuma chhungte Pathianin awmpuiin thlamuan se tih hi kan tawngtaina a ni. An ruala Pa eisual avang bawka damdawiina enkawl mek, Pu Saikhuma fapa leh an mikhual V.L Hriata pawh dam leh hrisel taka an lo chhuah leh ngei hi kan duh ber a ni a, Pathian hnenah tawngtaiin kan dilpui reng a ni.” tiin Chief Minister Pu Lal Thanhawla leh a Nupui te chuan sunna leh tawrhpuina thu an thawn a ni.

    Pi Ramdinmawii hi Aizawl chu tluang taka Helicopter hmanga thlengin amah pawh a harh tha hle a. A pasal Sk-a (hetih lai hian Sk-a ruang hi Mamit lam pana phurh mek a ni) chu a lam a lam a. “Enge a an ?” Engtinnge an enkawl” tiin min zawt reng a, Phone a be turin min tur reng bawk a, a boral tawh thu a hriat ka hlauh em avangin ka phone ah top up ka thun loh thu te hrehawm ti takin ka chhang hrilh țhin a. Amah kha a rilru a fimin a thil hriatna a la pangngai reng a. Casualty Ward No 2, 3 leh 4 – ah a fanu, an mikhualpa nen min dah nghal a, a fapa erawh chu ICU ah an dah nghal a ni. Zirtawp zan atangin amah a chau in a pum a puar tan a, a mah pawh a beidawng tan riau a, a natdan te chu a beidawn thu leh a chauh telh telh thu te sawiin a mah buaipuitu Doctor te hnenah pawh chuan a dinhmun dik tak chiang taka hrilh turin chau tak chung chuan a lo ngen a, Inrinni zing a lo ni a, a pum puar a lo zual zela, amah pawh a chau zual zela, a rilru erawh a la fim hle a, a beidawn thu leh a fapa boral ta te pahnih ang thova a pum puar a in hriat te chuan a beidawng tak zet a ni. A tawng erawh a fiah lo telh telh a, a tuiin hal a sawi pawhin a ka a rawn ang mai a. A bul lawka awm a fanu Miriam-i chu a lainat em em mai a. Doctor ten a fanu thisen test tura an han buaipui lai te pawh chuan a khawngaih lutuk khan thei leh thei lovin a rawn tawng chhuak a, a fanu thlabar em em mai en ngawih ngawih chung chuan “ti rih lo mai rawh u” tiin thei leh thei lovin a rawn sawi a.
    .
    Inrinni chawhnu lam a lo nih chuan a chauh telh telh avangin Doctor ten Aizawl Hospital ICU ah awm turin min buaipui leh ta a.. chutih lai vel pawh chuan a chau em em maia..thisen test tura a taksa atanga hip chhuah tur pawh a awm tawh mang lo a ni. A beidawng lutuk chuan a fanu chungchang thei leh thei lovin a rawn sawi leh a.. “Ka awmdan hi a dik lo reng reng, engmah ka ni dawn lo..Lal Miriam-i hi tha deuhin lo enkawl rawh aw..” tiin chau tak chung chuan min rawn melh tawk tawk a.. Ka theihna zawng zawng sawm khawm chung leh tawngtai chungin ka hnem mawlh mawlh a, Pathianin engkim a tih theih thu leh a ni chu Pathianin a tih dam dawn thu te, nu ber a ni a, kal thei a la nih loh thu te hnuk ulh tak si, inti pachang ve tak chung chuan ka hrilh ve a.

    tiin Amah enkawltu chuan a sawi.

    He vanduaina hian ngaihven a hlawh a, lumen puia tlaivar ringawt pwh 300 chuang an ni. Vuina prog a kal leh thlanmual thlenga zui tu pawh an tamin thlan lai pwh veng hrang2 atangin an thawk chhuak tha hle.
    An in tak hi sak that a hun ve tawh em avangin kumin hian sak that tumin an bei nasa ve hle a. Tuna ICU a awm mek lek a nau thi tate kum 10 leh kum 8 mite pwh hian thing zai te zawnin, an in hnuaiah an dah ve nual tawh a, nu ber phei chu rim taka thawkin nghakhlel takin an in sak that nan tan an lak ho laiin heti hi an ni zo ta a ni.

    About Mizo Archive

    I'm the one who collect the best writings of Mizos
    Aside | This entry was posted in Zoram Crimes and Accidents and tagged , , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out /  Change )

    Google photo

    You are commenting using your Google account. Log Out /  Change )

    Twitter picture

    You are commenting using your Twitter account. Log Out /  Change )

    Facebook photo

    You are commenting using your Facebook account. Log Out /  Change )

    Connecting to %s