Nuthlawi Virgin

  • Thuziak mi ka ni lo a, a chhiar lam pawh hi thil tul a nih loh chuan ka taimak lohna lam tak ka ni. Mahse mite’n ‘Nuthlawi Virgin’ min tih fo nachhan hi sawi chhuah tul ka ti viau bawk si a, he thu lo chhiartu te’n min hriatthiamna ka rawn dil hmasa a ni e.

    Ka hming chu Laropari a ni a, ‘Parte’ tiin min ko thin. Medical doctor niin Civil Hospital-ah ka thawk a, ka hnathawhna ah chuan Dr. Papari tiin min ko mai thin. Aizawlah chuan chhungkaw pangngai pawl tak kan ni a, chhungte’n naupan lai atanga doctor ka zir zawh thlengin phaiah min dah a. Mahni tum tawhna lama kal na ve tak ka nih avangin ka zir zawh thleng hian ngaihzawng pangngai takin ka nei ngai lo hrim hrim a. Mizorama ka rawn chhuah hnu pawh pasal nei rual uai tawh pawh ni mah ila mahni hna a ka bur deuh tlut avangin ka uksak lutuk lo a, chubakah mit mei min hmuhtu emaw in lengte chu hmu ve zeuh zeuh mah ila ka mize frank tak avang hian ngaihzawng ka nei lo chhunzawm ta zel a ni. Ka tawng uan thu chang lo se, han hmu zo lo bik tur chu ka ni hauh lo a, Mizo nula ah chuan a sang pawl, ria chum bat an tih ang chi hi ka ni a,mahse nuthlawi ka nih tak hnu hi chuan tlem chuan ka thau deuh hlek tawh. Mi tawngkam ah chuan, “Pasal nei lo atan chuan a uihawm mang e” min ti ve vawng vawng thin. Ni e, pasal chu ka nei tawh ngei a, mahse ka neihdan hi chu mite’n hlim taka an neih a, lawithat zan hlimawm tak an hman ang hi a ni ve lo a, kan inneih atanga mit khap kar lekah ka pasal ‘Mama’ ti a ka koh thin, Lalrinzuala chuan mual min liamsan vang a ni. Mama chuan ka nun zawng zawng a thlak danglam a, ka rindan thleng in. Tun hun hi ka thleng ta a, pasal nei leh chuang loin ka awm hlen ta a, inchhirna nei miah loin a hun lo thlen hun chu ka nghak ta reng mai a ni.

    A thih dawn hnaih lama a sawi kha ka la hre reng mai, “Hun han nei hnem deuh ila I bula awm reng mai hi ka duh a ni. Mahse ka kal hun a hnai ta, ka tana I rinawm reng theih chuan thlarau ramah ka lo nghak reng ang che” a tih kha. Kei chuan, “Chutiang a theih dawn em ni. Vanramah angel te lenna ramah hrehawm tuar tawh lo turin I kal ang chu, min hriat tawh pawh ka ring lo e” ka han ti a. Ani chuan, “Ka dil chuan a theih ngei ka ring a ni. Ka dam chhungin Pathian tan ka theih tawkin rawng ka bawl ve a, a lung ka tihawi loh pawh ka hre lo. Ka nu leh pa te’n min boralsan pawh khan vawikhat pawh ka vui lo. Tuna ka vanduaina tawhah pawh hian a remruatna ah ngaiin lawm zel ka tum a ni. Chumi a nih avang chuan a fapa meuh ka tana min pe phaltu hian vanram kawtchhuahah ka lo nghah che chu a phal em em ang. I tel lo chuan vanram a nawm pawh ka ring lo e” thutak deuh chuan a han ti a. Ka lo rin thin dan nen chuan a inang lo hle mai a, awi zawk tur pawh ka hre mai lo. Keia lo rin ve dan chuan kan thih hnu hian kan thlarau chu van lamah chhoin vanram kawtchhuah ah chuan nunna bu a kan hming awm leh awm loh kan en ang a, a awm chuan vanramah Pathian fak turin kan lut mai ang a, a lo awm loh erawh chuan hremhmun lamah thawn liam kan ni ang. Vanrama kan awm a nih chuan kumkhuain Pathian kan fak tawh ang a,a ni chuan hmangaih takin min lo kuangkuah tawh ang. Han chhan mai ngaihna pawh ka hre lo, amah chuan rawn sawi zawm lehin, “Kumkhuaa fak ringawt chu chhia leh tha hre lo kan ang dawn em a sin, mahni duh thu ngeia fak a nih loh chuan Pathian a lawm chuang lo ang. Nangmah fak tur ringawtin robot siam chhuak ta la, englai pawhin nangmah fakna hlir chhakchhuak se la, rei lo teah I ning thuai mai ang. Chutiang chiah chu a ni, vanramah chuan ka duh thu ngeiin ka fak ang a, chuti a nih chuan chhia leh tha ka hre hrang ang a, nang pawh ka hre ngei ang che. Nang ka hriat reng che chuan I bula ka awm loh avangin ka ngai thei ngawt ang che” a ti ta duah a. A sawidanah chuan a chiangin a thutak run bawk si a, kei pawh chuan amah ka duh hneh em avang chuan ka awi ta a, tun thleng hian amah ka tawh hun chu ka nghak ta a ni. He thu a sawi hi a dam loh nasat tawh hnu, min nei tura ka sawm zin em avanga ka hnena a sawi a ni. Ani chuan a thih huna pasal dang nei a, hlim taka nun hmang turin min duh a, min hnar reng a, mahse ka sawi ngun em avanga rem ti ta mai a ni. Kan chanchin hma lam chu ka han hrilh tawh ang che u.

    MBBS ka zawh hnuin Aizawl Civil Hospital-ah internship te tiin ka thawk chhunzawm nghal a, ka hna hi ka tuina lam zawng tak niin chu chuan a taima ber pawl min nih chhoh tir a. Kum naupangte niin ka hming pawh an hre lar tan ve ta viau a, chu chu Doctor ten hlawhtlinna kan channa ti lang tu ve berah kan ngai a ni. Thahnem ngai viau mah ila tlema ka thin a chhiat deuh avangin min hrechiang lo tu chuan min nel nghal mawh khawp mai a, sim duh viau mah ila ka lo insum thei lo leh thin. Mama ka hmuh hmasak berna ah pawh hian a chetdan chuan ka insum theihna a rawn thiat leh a, mahse khami ni khan lo thinrim lo ila hetiang hun hi kan thleng an gem tih te ka ngaihtuah leh hnuhnawh mai mai. Casualty-a ka duty ni a ni a, ani chu hnathawh thawmhnaw nen hian lo kalin a hnar thi reh thei lo chu a rawn kal pui a. Kei chuan a hnar thi chu tihreh tum chuan ka bei tan gar ngar a, hetiang reh har deuh hi chu kan ngai serious viau a. A reh hnu chuan a thisen te chu test tir turin laboratory ah ka thawn phei a, result nghak nghal law law turin ka ti a. A rei deuh avang chuan ani chu a tho a, engmah sawi lo chuan chhuah a rual ta nghal mai a. Lo ngaih serious rilruk nak alaia amah zawkin result pawh nghah chhuah peih lo chu ka thin a sa ta zek mai. Pawnah chuan ka tlan chhuak ve nghal a, “Hey, nangpa kha, I result hi lo nghak rawh” thu pe aw tak hian ka va au a. Ani chuan, “Ka hman lo, hnathawh laklawh lai ka nei, kalsan rei chi ka ni lo, nidangah ka rawn lam mai ang” a ti sam et a, kal chu a rual leh nghal a. Chumi avang chuan ka thin a rim zual leh sauh a, a kal liam tur chu auh zui pah hian, “Ka hnenah lo kal hlek suh ang che, result I rawn lam hunah pawh private ah to takin I entir dawn nia, hnathawh I duh lutuk avang khan thih pawh I thi hial ang” ka han han ti zui tuar a, kal liam loin hmu zui reng phei ila chu hei aia thui pawh hi chham tur ka la hria ang mawle, a liam dawn tepah chuan kut a la rawn vai zui leh nghal a, ka ngei a zual sauh mai, “Mawl khat lutuk” tiin kan phun chhuak leh nghal a. Ka bula inentir tur lo awm ve te chuan mak tih hmel tak hian min lo melh hrek hrek a, nuam lo chu ka ti ang reng viau. Nidang ang bawk chuan ka ang ta kher kher kha ka inchhir lehnghal a, ka insum zawh loh thin avang hian ka in haw thei ngei mai. Ka thawhpui te erawh chuan min lo nuih vur vur hlawm a, “Thang an rawn dai per leh tawh a ni maw” an lo ti a, kei chuang,”Niang chu mawle, ka thinchhiat hi an lo hre lo thin a lawm mawle” tih pah chuan ka thawk zawm leh bawrh bawrh a. Ka thawh hun a zawh chuan laboratory ah chuan va kalin a thawkte hnenah chuan, “Result chu ka hnenah lo dah rih lo ula, a rawn lam duh ang. Ka hnenah lamna chang pawh a hre loin helai bak hi a rawn hre chuang lo ang” ka ti a, ka room lamah chuan chawl turin ka kal ta nghal a.

    A hnu ni thumna, inrinni ah chuan kan in hmu leh a, a result te chu rawn lamin ka hnenah an rawn tir hi a lo ni a. Inthlahrung tak hian ka pindanah chuan a rawn lut a, kei lah pek chuan ka lo hmu lo der a, tul vak lo hian lehkha hi keu lawr ka keu lawr a. Ani chuan, “Ka pi, I hnena kal tur hian min ti a, private a kal chu ka tum deuh tho na a, han kal hmasa lawk rawh min ti tlat a” zawite hian fiah fak si hian a han ti a. A inthlahrung aw chu ka khawngaih angreng viau a,mahse ka lo tum kawh ve laklawh tawh si a, “Khawi lehkha chu” tih pahin hawi pawh hawi chhuak lo hian a lehkha chu ka han ban a. Ani chuan min pek pah hian, “Ka lawm e, hmanni a ka kal daih avang khan min hrethiam dawn nia, khatiang khan I thinchhia ang tih hria I la chu ka kal bik miah lo ang” fiamthu chuan a han tih zawm a. Vawihnih inhmuhna a ka thinchhiat zia fiamthu a min han hrilh ngam mai chu mak ka tiin ka nuih pawh a za angreng viau a, mahse ka tum laklawh rih tlat, ka la ngawi reng a. “Ka farnu pawh doctor a zir ve asin, a harsat zia hi min rawn hrilh thin a, a zir chhuak tawh ho hi chu in chhuanawm khawp mai” a han ti leh a, ‘ka farnu’ a tih lai chuan a chhuan hmel viau a ni. Ka la ngawih tak zel avang chuan ani pawh chu ngawih a chuh ve ta a. A result chu ka ensak ta a, ka ngawi ta reng a. Hetiang hrilh hi ngaiah ka nei thei lo thin, doctor ka nih hnua hrehawm ka tih ber thin a ni. Thisen cancer Stage 4!! Ka han hawi chhuak a, ani chuan min lo nuihvar a, Keimah ang rual vel, la thalai tak, hmel chang rat mai, ngaihno bei tak mai, hnar ngul vuah dik zaih mai leh nui hmel mawi tak mai, mahse cancer natna vei chu ka han hmu a. Ka huphurh zual sauh mai, ka rilru in ka tawngtai ru mawlh mawlh a, thildang sawi pui phawt a ngai a ni. “Hmanni chuan engvanga hmanhmawh em em maw I nih a” ka han ti phawt a. Ani chuan, “Kan thenawmah in sa thar an awm a, ka hmanni a nih avangin ka inhlawh a, vawikhat ka thawh sakna te a nih avangin thawh pawh thawh zawh theih loh ringawt kha nuam ka ti lo a, ka haw ta mai a lawm” a han ti a. Kei chuan, “Chu, chu nimin velah pawh chuan I thawk chhunzawm zel a ni maw” ka han ti a. Ani chuan,”Zawm lo e, hmanni kha chu office chawlhni a ni a,ka thawk hman a. Secretariat ah sawn contract-in ka thawk ve a” a han ti a. Kei chuan, “Hna I nei a, chawlh changing I inhlawh bawk a, sum in indaih lo hle a ni maw”ka han ti a, mak ka ti angreng viau a. A ni chuan, “ka farnu zirna hi a hautak sia, theihtawp a tan a ngai alawm” hmel hlim siah hian a han ti a. Mifel pangngai tak chu a nih ka ring ta phawt a, ka ngaihtuahna ka kawm mai mai lai chuan a ni chuan, “Doctor, private ah te la kal a ngaih dawn chuan ka hmanhmawh riau a ni a, result chu min lo hrilh mai ta che, min hrilh duh loh pawhin ka thiam loh a nia, ka vuilo ang” fiamthu deuh hian a han ti a. A thusawi zawng chuan nui hmel hi a pu reng a. Kei chuan, “Private kal chu a ngai lo ang, ka fiam mai mai che a nih kha” ka han ti a, ka huphurh zual zel a, a chhungte a rawn hruai a ngai a ni. “Naktukah I chhungte rawn hruai la,rawn kal leh mai ta che” ka han ti rawi a, amah chu ka hrilh ngam thlawt lo a ni. hetiang thalai, a hmel hmuh ringawt pawhin mi sual a ni lo tih hriat ngawih ngawih si, ‘cancer I vei a, I thi tep tawh tih chu’. Chutia ka tih takah chuan ani pawh chu a ngaih a tha chiah lo a ni ang, a thutak ta sawt a, “Chhungte hruai tur ka nei lo, ka nu leh pate chu kum sawm kal ta khan cancer in min boral san tawh a, farnu pakhat ka nei a, chu zawng chu kan ni mai. Ani chu hetah a awm si lo a, keimah tlawng hi a ni mai” tiin min chhang a. Kan ngawi dun ta rauh rauh a, engtin nge kan hrilh ang aw ti a ka ngaihtuah lai chuan a ni chuan, “Doctor, thil dik lo a awm a nih chuan sawi hreh reng reng suh, ka pawmzam thiam viau a nia. in tan a harsa ang tih chu ka hria a lawm” tiin min hnem zaw mah a. Chu chuan ka hnuk a ti ulh lek lek mai, ka mittui a tla dawn mai a, hmeichhia tak hi chu. Tap deuh tuau hian, “Cancer I vei a, thisen cancer, in enkawl vat I ngai a ni” ka han ti a. Ani chu a ngaihna hre lo hian a han ngawi deuh vang vang a, vanvadakin a maimitchhing vang vang a, han hnem tur pawhin chakna ka nei lo reng reng, ka va han in haw thin tak em. Maimitchhing reng chung chuan, “Doctor, tlang takin min hrilh la, chance a la awm em? Hun engzat vel nge ka la neih theih ang” a han ti a. Kei chuan zep a hun lo tih hria in, “Stage 4 a ni a, kan tlai tep tawh mai thei a ni. Eng takin nge a awm ka la hre chiang lo a, mah se uluk taka enkawl a nih chuan thla 5 vel chu a ni ang, kum khat lai pawh I la nei thei” tiin ka hrilh ta a. “Pathian thu thu a ni mai, I dam tha leh thei bawk a” awi vak chuang lo chuan ka han ti a. Ani chu muk tak hian a in ngaihtuah vang vang a, “Va haw phawt la, tih fel ngai te I nei awm si a, ti fel phawt la, naktukah damdawiin awm peih sain ka hnenah I lokal leh dawn nia” ka han ti a. Tul lo deuh hian eng nge ka sawi chhan pawh hre lo hian, “Ka tihpalh a ni” ka han ti ngawt a. Ani chu rawn dak chhuakin, “ Nia, I thiam loh vek a lawm” nui chung hian a rawn ti a. Chutia fiamthu a min rawn chhang leh nghal thei mai chu mak ka tiin ka lawm viau mai a, lungawi lo der tak hian, “Kal mai teh” tih pahin ka thawhsan ta a, a chhuah dawn chuan naktukah chuan rawn tlai suh ang che” ka han ti zui a. A liamhnu chuan ka ngaihtuah let leh a, ka mittui a lo hnam leh tiam tiam a,hetiang em a damlo ka khawngaih pawh ka hre ngai lo hial a ni. Nileng chuan ka rilruah a awm reng a, nidang angin hna pawh ka thawk tui lo kher mai. A tuk mawlh chu ka rilru ah a lian a, zan ka mut dawn thleng chuan ka rilru a la luah a, atan ka tawngtai ta hial a, ka hmelhriat miah loh tana ka tawngtai vawikhatna a ni hial ang.

    A tuk chu chawlhni ni mah se damdawiinah chuan hma takin ka thleng a, ka duty ni ni lo mah se ka room ah chuan ka lo nghak a, mahse nileng chuan a rawn lang ta lo. A lehkha vel chu ka han en let leh a, a hming te, a phone number te, an veng hming te chu a lo awm kiau a, a phone numer chu ka hmet ta mawh mawlh a, phone chu ka tum ta uk a, mahse chawlhni te a ni a,inkhawm te a duh a ni ang, naktuka rawn kal a tum zawk a ni ang tiin ka thulh leh ta a. A phone number leh hming chu ka phone-ah chuan ka save ta a, ka haw san ta a. A tukah pawh chuan nidang zawng aiin ka hma leh a, tin, engvang teh kher nge ni, ka in chei nasa zawkin ka in uluk hle a, nidanga make up pawh hmang ngai hlei lo kha ka rim chu a tui tha ham ham hle mai. Mahse chumi nileng pawh chuan a rawn lang leh ta chuang lo a, phone chu la chhuakin phone chu ka han tum ta a, switch off a in ti ta hmak a. “Ka thin terek a rawn chhuak leh a, “Phone ma lek lo ila ni mai lawm, mahni pawh in ngaihtuah hlei lo” ka ti a, ka phone chu ka dah ta chawrh a, mahse ka ngaih a tha lo tulh tulh mai, naktuka a rawn kal loh chuan ka zawng hmu tho tho ang” tiin rilru ka siam ta a.

    A tukah pawh chuan nilengin a rawn lang leh ta chuang lo a, haw hma ka dil a, a awmna veng leh hming ka hriat tho avangin zawn chhuah ka tum ta a. Ka kal dawn chuan phone ka han tum leh a, switch off hi a lo la inti ta reng tho a. An veng ka thlen chuan ka han zawt kual tan ta a, veng a zau tham si a, a hming tak an lo hriat vak loh vang pawh a ni ang, ka zawng hmu har angreng viau a. A tawpah chuan nu pakhat hian, “Mama kha a ni ang I tih chu, a hming hian kan ko ngai hlawm lo a, hria pawh an awm vak lo ang” tiin an in awmna chu min kawh hmuh a, hmanhmawh tak chuan ka pan ta a. An in ka thlen dawn hnaih chuan eng vang kher nge ni, ka zam nge ka helhhawlh pawh ka hre lo, ka tlan ti tih hi a ni ngawt mai. An in awmna zawn chu ka han thleng a, in te fel ren rawn tak a ni a, kawt zawl zau vak lo,mahse pangpar in a khat emaw tih mai tur hi a nei a, in nen pawh chuan a in hmeh hle mai. An gate bulah chuan ka han ding ren rawn a, “Engtin nge ka zuk tih ang aw” tiin kan ngaihtuah leh te te phawt a. Chutih lai chuan ka bulah chuan car hi a rawn ding a, a hma a designation plate atang chuan khawilai office director ber emaw chu a ni ngei ang, chutah motor atang chuan tlangval ngo vuah mai, palian angreng tak hi a rawn chhuak a, a hmel atang chuan a zahawmin mi neinung tak tih hriat hluah hluah mai hi a rawn chhuak a. Polite tak chung hian, “Thiani, kha ina kal ve tur kha em ni I nih” a rawn ti a. Kei chuan, “Aw, ni e” tiin ka chhang a. A ni chuan, “Ka va hmu ngai lo che ve, Mama thiannu I ni ang chu maw? Kei pawh kal ka tum a, I lut rual ang hmiang” a rawn ti a. Kei chuan, “A doctor ti mai ang, chu chu ka nia” ka han ti a, gate ah chuan lutin in lam chu kan pan rual ta a. Chupa chuan, “A doctor a ni, a damlo a mi a, ka va hre lo ve!” a ti hu a, thu chiang zawk hrilhna hun awm loin kawngka chu kan thleng a, kik pawh kik lem loin a lut a, kei pawh chuan ka zui lut ve ta nghal a. Kawngka a kik loh danah a thian hnai tak a nih loh pawhin an chhung khat hnai tak a ni ngei ang a, hetiang te hi rawn hruai tur a ni a,’chhungte ka nei lo’ ti kual vel pawh a ngai lo asin le te ka lo ti rilru hmanhmawh a.

    Nu pakhat hian hmun hi a lo phiat a, chu pa chuan, “Nu Mawi, khawi nge Mama hi a awm a, tukin khan a damsam loh thu I fapa kha min rawn hrilh tir a” tiin a han zawt a. Nu Mawii chuan, “Khumah a mu a nih kha, nimin tlai atang khan a damlo tan a, nidangin in sawisel ve zeuh zeuh mahse tiang hian a awm ngai lo mawle” a han ti a, “Kha I thiannu I rawn hruai em ni” tih pahin min rawn melh a. Ani chuan hai hawt hmel zet hian, “E, ni tak maw, kan in hmu ve chauh a, hming in hrilhna chang pawh ka hre hlei nem, sawlai gate ah sawn kan intawng a, Mama doctor ni awm tak a ni” tih pah chuan ka lam a rawn hawi a, “Lalramliana ka ni a, MAram min ti mai dawn nia. Mama te thawhna ah hian Director-in ka awm a, hei hi an thenawmnu Nu Mawii a nih hi, hmeichhe awm lo nafam chu a tul tul a va thawh sak thin a, an fel tak tak a ni” tiin chhungkaw hotu ang deuh hian a han fak pah nghal a. NU Mawii chuan, “Kan fel zo lo ngawt zawk alawm, engtikah mah a ni hi kan rul seng lo ang” a lo ti a. Kei chuan ka hmingte hrilh ve in, ka kal chhan te, a natdan te chu ka han hrilh nghal a, zep chi pawh ni tawh hek lo, zep pawh tum se a zep zo tawh chuang lo ang. Ka han hrilh zawh hnu chuan an pahnih thin chu a thawng hle tih a hriat a, Marama (Marama tih ka hmang zel tawh mai ang, ka koh hlen dan a ni a) chu a thu hnawk a, “Engvanga min hrilh lo nge maw a nih le, atan hian eng nge maw ka nih ve le” tiin a phun chhuak a. Nu Mawii chuan, “Kei pawh engmah min hrilh hlei nem, mi tihbuai hreh mi tak hi a ni a, mahse amah maia tuar chhuah a tum em maw ni le, a va han mawl thin tak em” ti bawrh bawrh chungin Mama room lam chu a pan ta nghal a. Kan pahnih pawh chuan kan zui lut ta nghal a.

    Mama room kan luh chuan a khawsik a lo sangin a lo tlun ti tih a, kei chuan rang takin ka han bawisawm nghal a, nachhawkna engmah ka ken loh avangin ka mamawh tur thu ka sawi a. Marama chuan, A tul ang chu ziak la, ka va lei nghal ang e” a ti a. Ka ziak sawk sawka, ka doctor card chu ka ken tir a, “A chak angrentg si a, an lo phalloh takin” ka ti a. Kal chhuah pah chuan, “Phal lo pawh ni se ka chhuhsak tho tho ang” tih pah hian a tlan chhuak nghal a. A mar te chu ka han en a, a tha rih viau a, a khawsik tih tawp phawt a ngai a ni tih ka hria a, Nu Mawii bulah chuan tuisik leh puan chhia la turin ka ti a, ani pawh chuan a la vat a, a chal chu kan dep ta a. Marama pawh chu a lo thleng thuai a, nachhawkna chuan kan chiu ta a,a rawn harh deuh ruaiah chuan Marama hming chu rawn lamin, “Sangtei chu lo la hrilh suh ang che” a rawn ti a, nachhawkna chu a thawk tha bawk a ni ang, a muhil nghal ta siai siai a.

    Kan buai zual a reh a, a khum bulah chuan kan thu ta thap a, Marama chuan, “Doctor, I rawn kallo ang tih a hlauhawm hle mai, a lawmawm tak tak a ni” a han ti a. Nu Mawii lamah chuan hawi pheiin, “Engtin nge a nat tan a, I fapain pawisa a rawn dah te kha eng nge a awm zia ni” a rawn ti a. Nu Mawii chuan, “Niminah khan a bike kha a hralh a, a rawn haw hnu khan chaw hmeh suah ka va tum a, tawngtaina room-ah a lo awm a, be lem loin ka chhuahsan a. Mahse zanah pawh chuan a thim deuh thuap avangin ka fapa ka va entir a, tawngtaina room-ah a awm tih min rawn hrilh leh a, nidangah hetiang em hian a tawngtai rei ngai si lo a, ka ngaihtha lo chu ka va en ta a. Tawngtaina room-ah chuan a lo muhil a, a khua a sik nasa bawk si a, khumah kan zawn phei a,nachhawkna te kan pe a, a rawn that chhuah hnuin pawisa kha ka fapa a pe a, nangmah pe tur che in leh a hman loh avanga Sangtei lo thawn mai tur che in a ti a. A phone a la a, a khawih ruk ruk a, “Ngatinge min rawn phone mai loh’ a tih chuan, ‘a phone a chhia I ti mai dawn nia a ti a,’ a phone chu a ti chhhe ta nghal a” a tia. Kei chuan” “Ngatinge phone chu a tih chhiat luih a” ka lo ti hmanhmawh a. Marama chuan nui suk pah hian, “Dawt a sawi loh nan a nih kha” a lo ti a. Mak ka ti angreng viau mai, a tan chuan dawt var leh dum pawh a awm lem lo a nih dawn hi” tiin ka ngaihtuah mai mai a.

    Marama phone chu a ri ral ral a, Sangtei chu a ni ngei ang a chhan danah chuan, “ A phone a ti chhia a…. keimah ka kal remchang a, ka rawn thawn maia nih kha…. Ka hre bik lo, khawi atang nge maw a neih ni… aw ka lo va zawt ang e…..” A dah hnu chuan, “Tunge Sangtei chu, engvanga hrilh duh lo nge a nih a” ka han ti a. Marama chuan, “A farnu a ni a,doctor zir mek, kum khat a la nei a. Tul tawpah lo chuan a hrilh duh lo ang. Tunah pawh hian hria se zawng a rawn chho nghal rum rum duh ang,chu chu Mama hian a duh lo ve thung a nih hi” a han ti a. Kei chuan, “Tun hi tul tawp chu a va ni awm ve” ka han ti a. Marama chuan, “Nih chu a ni ngei a, mahse amah khan lo hrilh suh min ti miau a, nakinah a harh hunah a tum dan kan zawt chiang dawn nia” a han ti a.

    Nachhawkna chuan a chhawk tha bawk a, Marama chuan, Doctor, hei a tha viau tawh a,hnathawk chau te I ni awm si a, haw pahin ka va thlah ang che. Nu MAwi, keipawh ka va inthlak vel phawt ang a, zanah ka rawn kal leh ang, eng emaw a thlen thut leh min rawn phone vat dawn nia” tih pah hian a number chu a pe a. Kei chuan haw san hreh ru viau mah ila, vawikhat kalna a ni bawk sia, a mawi chiah loa ka hriat avang chuan ka zui haw ta a. Motora kan chuan chhung zawng chuan Marama chuan Mama chungchang chu chiang zawkin min hrilh a. Office a tlai ngai loh thu te, a taimak zia leh rinawm zia, Pathian a tih zia te chu ngaihsan hmel tak hian min hrilh a. An vanduai zia te, kum zawna a nu leh pa an sun dan te, a farnu doctor zir chhuah tir ve ngei a duh avanga a hna neih pawh duh tawk lo a chanchinbu a sem pah te, sawrkar chawlhni a, a inhlawh deuh ziah thute leh a in renchem dan te chu min hrilh mawlh mawlh a. A thil phal zia te, an thenawm Nu Mawii, pasal sun ve tho te a tanpui peih dan te, a chanchinbu semlai pawh a fapa a semtir avanga khawsa chho ve hram hram an nih thu te chu min hrilh a. A thusawi tawp lamah chuan a thinrim lek lek emaw tih mai tur hian, “Hetianga mifel chungah pawh hian Pathian hian khawngaihna a lantir ngai lo em ni dawn le, tanpui ka tum ve pawh hian min hnial ngar ngar zel tho bawk si a” a han ti a. Kei chuan hriatchian chak deuh hian, “An chhungte I ni turah ka ngai ngawt a, ngatinge tanpui chu a duh loh a” a han ti a. Marama chuan, “A inthlahrung thei lutuk hi ka ngei lek lek thin zawk a sin, han inchhunna chu kan nei lo, nawi pawh ni ila a duh chuang lo ang. Sangtei thianpa ka ni a, kum hnih vel chu kan in zui ve tawh, Mama atanga ka hriat tho chu a ni a, mahse hetianga nasa taka a thawh pawh hian Sangtei zirna a daih ngawr ngawr chauh a ni a. Pawisa pek ka tumin a duh ngai miah lo a, I puk ang a, nakinah a thawh hunah min pe mai dawn alawm tia thlem pawhin, ‘Leiba neih tun chuan kan muhil thei nang’ a ti zel bawk si a. Sangtei hnena ka sawi lahin, ‘Ka u thu lo chuan a tih chi loh ang’ a ti zel bawk si. Hemi thuah chauh hian kan la in ti thiam lo” a han ti a. ”Tunah pawh hian a u chanchin hrereng chunga ka hrilh lo hi a hriat hunah chun insawifiah chu a ngai nasa khawp ang” a han tih zawm leh a. Kei chuan, “Mahse a u I lamah a tang thung dawn alawm” ka han ti zeuh a, “Ni tak e” a ti a, a nui hak a. Ka chhuk dawn chuan, “Zan lamah phei chu I tum leh amaw?” ka han ti a. Ani chuan, “Phei ang, Nu Mawii te kha hmeichhia mai an ni a, an thla a lo phang ang e, ka chhungte pawh an kal ve duh ka ring” in huam hmel tak hian a han ti a. Kei chuan ka phone number pe in, eng emaw thut ah min rawn phone nghal turin ka ti a, ka chhuk san ta a.

    Chumi ni atang chuan ka thinlungah hian englai pawh hian a awm emaw tih theih hi a ni a, ka thil tih lai pawh ngaihsak lo hian thil ka lo ngaihtuah leh veng veng thin. A tuk tlaiah pawh chuan ka kal leh a, a lo la tho chhuak peih lo a, mahse a khawsik chu a zia awm viau a,a hnar a thi leh thin tih mai loh chu a zia viau a. “A rawn harh ve tawh em” tiin Nu Mawii bulah chuan ka zawt a. Ani chuan, Chhun lamah kha chuan harh e, nimina I rawn kal thu te kha ka hrilh a, ‘Mi fel tak a ni ngei ang’ a ti che a” a han ti a. Chu chuan min ti lawm ve em em ringawt a, “Mi fakna lo hi chu a ka atang hian a chhuak khat asin”a rawn tih zawm leh a, ka lo lawm ve hman tawh nen. Karkhat chhung chu tlaitin ka tlawh a, zana ka duty dawn a nih pawhin ka kal hma deuh mai a, ka chhungte pawh chuan ka awmdan velah chuan ngaihthat lohna an nei a ni ang, ka pa chuan, “Mami chu I rawn haw tlai ta reng mai a, ngaihzawngte hi I nei ve tawh a ni maw” tiin min fiam a. Ka nu pawh chuan,”Nia, tunlai I awmdan hi vei nei I ang riau, I thawven theih thin nen, I zia a dang riau mai. Ngaihzawng neih hun lo pawh in ni lo a, eng mi pawh ni se kan pawm thei vek a, mahse I nun hlauh phah nan hmang suh ang che” a rawn ti a.Ka chhungte hriat lohna lutuk chuan ka nuih a ti za a, ka nui chhuak hak a. Ngaihzawng lam hi ka ngaihtuah ngai miah lo tih theih hi a ni a, ka zia a dang ta deuh chu ka neih ve tawh ringin an lo phur em em ringawt mai a. “Nakinah in hre mai ang” tih pahin ka thawhsan a, roomah ka luhsan a. Hetiang em em a ka damlo ten ka rilru a luah hi ka la hre lo a, ka ngaizawng em ni dawn le tih te ka ngaihtuah mai mai a, ngaihzawn chi lah a ni si lo.

    A karleh lamah chuan kal ka thulh ngai chuang lo a, damdawi tha ni tura ka rin apiang chu ka kensak mai thin a, hemi kar hi chuan Mama pawh a lo tho chhuak peihin tlaia ka va kal apiang hian kawtah hian pangpar thlir hian a lo thu thin a. A khawsikin a kiansan tawh avangin a tho kang peih viau a, a inthlahrun thu a sawi reng a, a hmelah pawh chuan a lang chhuak thei hial a. Rawn kal a ngaih tawh loh thu leh ka hun a lak then nasat avanga a inthiam loh thu in min thlah ziah a, pangpar hi min thliah haw tir ziah bawk a, ka at a chhuak nge pawh ka hre lo, roomah te chuan a chhiat thleng pawh hian ka paih phal ngai lo reng reng. A chang leh Marama kha a office bang a lo kawi ve thin a, Mama chu tawngkam a thiam in han nuihna tur thusawi a thiam si a, a damlo bera thusawi ngaithla in kan nui kan nui thin. Marama hnen atanga ka hriat dan in a bike a hralhna leh a sum lo khawlsa tlem nen khan Sangtei kumkhat awmna chu a daih thei mai dawn a, damchhuah zawh pawh a in rin lem loh avangin sum tam tak senga inenkawl kha hek sak mai mai a a hriata vangin Sangtei zir zawh tir kha a thlang ta a ni.

    Karthumna a ka va kal leh chu a lo in kalh bam a, thenawm Nu Mawii hnenah chuan thil awmzia ka zawt a, A pu te khua ah a zin thu leh, kar tawpah a lo haw tur thuin min chhang a. Hemi ni atang hian a ni ka hmangaih tih ka hriat tan chu. A hmel hmu loa karkhat chu sawi loh, nikhat han awm loh ringawt pawh harsa ka ti hle mai a, hunte hi kal muang ka tiin kar tawp ringawt chu ka rilru ah a awm a, mut ka duh thin teh reng nen, a hmel ka hmuh leh hma zawng kha chu ka mu ngai lo tih theih a ni. Kar tawpa phur taka ka va kal pawh chuan a lo la haw chuang lo a, damkawr a chak loh tehreng nen zin thei pawh a mawi lo kha kar khat a cham tawh a ni a, ka ngaituah zual sauh mai. Nu Mawii lah chanchin zawh lahin chhanna a nei tlem si a, a rawn haw hun tur lah a sawi thei tawh bawk si lo. Marama ka zawh lahin a chanchin a hriat bik loh thuin min chhang reng bawk si, an khaw hming tak ngial pawh a hriat bik loh thu a sawi chu awihawm loh zawk a ni. Thlakhat vel chu tlaitin ka kal ziah a, a lo in kalh ziah bawk a, a thi a nih te ka ring rum rum tawh hial a, mahse thi se zawng a chhungte tal chu in ngaihtuah hian an haw ngei ang. A chang leh kawta a thutna thinah chuan amah ngaihtuah hian ka thu leh veng veng thin. Chaw ka ei thei lo, mu tlem bawk si chu ka pawr fap tawh mai a, ka chhungte pawh an mangang tan ta a, ka chanchin chu min zawt min zawt a, a tawpah chuan Mama chungchang zawng zwng, kan in tawn dan te, ka hmangaih ni a ka hriat thu thleng chuan ka sawi ta a. Ka chhungte chuan mak an ti ngei mai, an fanu chuan em em in a ngaihzawng neih vawikhatna ah thi lek lek tlangval a neih chu an rin loh lam pang deih a ni. Mahse keiman ka tawrh em avangin a tha lo lam zawngin thu an sawi lo a, min tawng thlamuan liam liam a, chhungkaw pawimawhna ka hre chiang hle.

    Nikhat chu tlaiah a ngaite bawka pangpar thlira ka thut lai chuan, a hma a ka lo chik ngai miah loh, pangpar chu a lo inthliak then pheuh pheuh tih ka hmu a, Mama pangpar min thliah thin ngei mai kha.Ngaituahna thar ka nei ta,kawngka lam chu panin kawngka bulah chuan ka au ta a, “Mama, I awm reng tih ka hria a nia aw, khatah khan tawmsen reng lo khan min lo chhawn ta che, ka rawn kal thin tih pawh I hre vek. Nu Mawii te, Marama te ho nen hian min lo thlim a ni, in va phakar ve” ka ti ta nghek a. Ka thinrim tawt tawh bawk si chu ka tap lo chauh a ni mai. Chhanna pawh awm lo chuan a reh thiap reng a, mahse ka thinlung chuan inchhungah a awm tih min hrilh reng a, a ring bawk a. Ka kalsan dawn chuan, “Min dan tum mah la, min dang thei chuang lo ang, eng nge ka tih tur hi lo en rawh” tiin thil sual ti ang maiin ka han vau zui leh a, ka kalsawn ta a. Nu Mawii te inah chuan ka lut kawi a, dawt min hrilh a ni maw tiin ka chhuah chhal a, ka thinrim em avang chuan hawi pawh hawi chhuak loin a kun tlat a, chhan pawh min chhang lo. Hmanhmawh tak chuan ka haw ta a, “ka thil tum chu chhungte’n engtin tak ngai ang maw! Mahse tuman min dang thei lo ang” tiin rilru ka siam a.

    Ina ka thlen chuan ka thil tum te ka han hrilh chuan ka chhungte chuan hnial min han tum deuh a, mahse min khawngaih ve bawk si. Ka pa chuan, “Mami, chutiang em em te chu miin engtin nge an ngaih ang, nitin I tlawh thei tho si a”a han ti a. Kei chuan, “Ka pa, min hrethiam rawh aw, mi ngaihdan tur chu engpawh ni se ka pawi ti lo, nangma phalna a nih phawt chuan a tawk. A bula awm ka duh a ni, a tel lo a awm zawng har ka ti em a ni” ka ti a, biangah mittui a luang zawih zawih a. Ka nu pawh chu a insum zo lo, “Bawihte, kei chuan ka dang lo ang che, I rilru damna tur a nih phawt chuan engtin pawh awm rawh.I hrehawm tuar hmel hmuh ai chuan ka lawm zawk” a ti a, a mittui a hru mawlh mawlh mai a. Ka pa pawh chu a lung chhe ve hle mai, “In siam la, ka lo thlah dawn che a nia” a ti ta a.

    Ka thawmhnaw te ka siam sawk sawk a, ka hmanraw neih ang ang te chu ka keng bawk a, thla khat chawlh lak ka duh thu kan hotu te ka hrilh a. Chawlh ka dil ngai loh avangin anni chuan an lo phal nghal mai a, phallo pawh nise ban mai pawh pawi tihna ka nei tawh lo. Ka nu chu lo kal ve se ka duh loh avangin ka pain min thlah a, gate zawn kan thlen chuan ka haw tir leh nghal a, a chhan chu engtia rei nge luhlul a la chhuah dawn ka hre si lo. Khua a thim tawh a,inchhung pawh chu a thim thap a, kawngka bulah chuan ka au leh tan ta. “Mama, thawmhnaw nen I bula awm turin ka rawn kal a, zana pawna ka riah I phal loh chuan kawngka min lo hawn ang che” ka ti ta a. Kawngka pakhat inkalh mah se pakhat zawk a in kalh lo a. Thawm a la nei chuang lo, kei chuan, “Min hawn lo pawh ni la, ka haw tawh dawn chuang lo. I awm tih ka hre vek tawh,pangpar pawh ka tan min thliah sak ziah, engvanga hrehawm min tuar tir reng nge I nih” ka ti ta vak a, ka in sut leh hliam hliam a. Chutah zet chuan thawm a lo nei ta a, hmeichhe mittui hi hmanraw tha tak a ni reng a ni. Light chu rawn ti engin kawngka chu a lo hawng ta a, ka hmuh hnuhnun ber ai khan a lo cher sawt tawh a, a hmel pawh a pawr fap mai, ka hmuh rual chuan ka ban nghal a, ka kuah nghal chawt chawt a ni ber. Hmeichhia zawk ni mah ila, zah pawh ka dawn seng tawh lo hi a ni ber. Ani pawh chuan min lo kuah let ve in engtik lai khan nge kan hmui leh kan hmui a lo in tawn pawh ka hre hman lo, thaw chham lo chauh hian kan in fawp mawlh mawlh a ni ber. Kei chu ka lawm lutuk vang nge ka mittui chu a lo luang ngiai ngiai a, chutah chuan kan chawl ta chauh a ni, ka bianga ka mittui chu duat tak hian a hru fai a, tawng tuma a ka ang zuai chu ka kut hian ka han hup ak a, “Min hnarna tawngkam a nih dawn chuan engmah sawi suh ang che, min duh emaw duh lo emaw ka haw tawh dawn rih lo tlat.Min hmangaih ve a, min duh ve thu I sawi dawn a nih chuan zan khua pawhin ka ngaithla ang” ka han ti hnap a.Ani chu a ngaihddan a nih hmel loh lek lek a, a ngawi ta reng a. Kei chuan, “Min duh lo mah la pawi ka ti lo, mahse min la ngainat chhoh theih ve ngei ka ring” ka han ti leh a. Ani chuan, “Nang anga nula hmeltha hi tunge duh lo ang le” a han ti a, kei chuan rang zet hian, “Nang man” ka han ti zauh a. A ni chuan, “Ka thinlung I tih retheih zia hi hria lang chuan min inchhuan khum zawk hial ang. Ka vawikhat hmuhna atang che khan ka thinlungah bu I khuar daih tawh asin” a han ti a. “Ka awi lo, result pawh lam hman loin min tlanchhiatsan daih kha” ka la awi ngam lo zawk a. Mama chuan, “ Ka hna thawh kha chu chhuanlam dang mai a nih kha, I bula ka awm rei kha chuan ka hrehawmna mai tur niin ka ngai a, ka phu loh dan che ka ngaihtuah a, ka theihnghilh hma theih che ka ring a, ka haw vat a nih kha. Tunah phei chuan ka phu lo leh zual…” A hmui chu ka hup leh vat a, “Khatiang sawi awi loh ka tih kha” ka han ti leh a. “Nangmah vang hian Pathian hnenah pawh ka vui ve hial a sin, kan ina I rawn kal tih ka hriat khan ‘Lalpa, I remruat danah hian vuina ka nei ngai lo, mahse hetiang dinhmuna ka din hnuah engvang nge a ni kher min tawn tir’ ka ti a” a han ti a. Chu chuan ka thinlung chu a hneh ngei mai, kan infawp leh vang vang a, insumtheihna ka hlauh dawn dawn mai, amah chu a tawp hmasa zawkah atang a. “Min la lut dawn ta em” ka ti ta a, ani chuan, “I tan chuan engpawh ka huam a sin, mahse tih theih ka nei tlem em a ni, ka tih theih chhun a nih hi” tih pahin ka thawmhnaw te chu a chawi ta tuih tuih a.

    Mama bulah chuan ka awm ve ta reng a, a hriat loh hian Marama chu damdawi tul ang ang te ka va chah a, ani chuan a man pek ka tum pawh hian la duh ngai miah lo hian min rawn pe ziah bawk a, eitur tha ni a a hriat apiang chu a rawn keng tel ziah bawk a. Kan enkawl uluk bawk a, a hmel pawh a mawi sawt viau a, treatment lak pui chi a ni tawh lo a, hahdam taka hun hman kha a tan chuan a tha ber ani mai. A bula ka awm avang chuan tawngtai pawh ka tawngtai tam phah ve hle mai a, chhunlamah chuan a kawtah chuan pangpar thlir hian kan ti ti dun reng mai a, englai pawh hian Pathian thu leh thu lo deuh pawh sawi tur hi a hre reng mai a ni. Ka chhungte rawn kal an tum chang hian min hnial ziah thin a,”Engtin nge an fanu tichhe tu hian an hmel ka hmuh ngam ang” a ti mai thin. Ka hmangaih tih chu a hre chiang a, mahse ka hmangaihna a nasat poh leh min khawngaihna a zual ting a ni mai. Eng emaw chang chuan a farnu Sangtei chu a ngaihtuah em em thin a, eng emaw chang chuan a mittui hi a lo hru leh mawlh mawlh thin. “Parte, thil pakhat ka ngen ang che aw. Ka lo boral ta a nih chuan ka farnu hi Iaizawnnu ang chiah in lo en ang che aw. Marama hi chu a fel tih chu ka hre tho a, an lo innei ta a nih pawhin a pasal tur a ni a, mihrang an ni si. Vui leh vaina lo neiin, eng emaw thulhah lo tlan ve duh pawh ni se, khawiah nge thiamthu a sawi ang a, khawiah nge a tlan ang le tih ringawt hian ka thinlung a chhun na a ni. Chumi hunah chuan I bulah lo awm tir la, lo hnem la, a dik lo a nih chuan lo zilh la, ama thiamna a nih erawh chuan a thlavang lo hauh thin rawh aw” min ti a, a lung a chhe hle tih a hriat a. Kei chuan, “Thih chung chang kha sawi tawh suh ang che, I thih ka phal lo” ka han ti a. A ni chuan, “Parte, doctor I ni a, min hriatchian kha, chumi lo thleng tur chu pumpelh theih a ni lo a, lo in puahchah lawk hi tawrhdan tha ber a ni” a han ti a. Kei chuan tap tuau chung hian, “Engtin nge ka in puah chah ang, tuna I sawi ringawt pawhin heti hi ka ni a” ka han ti a, ani pawh chu a lung a chhe ru ve hle a, ka mittui te chu a rawn chul fai leh a. Kei chuan, kan inneih a ngai a ni” ka ti chhuak phawng mai a, ani chu a phu deuh dawr hian ka hria a. “A theih loh tih I hriat kha” a rawn ti a. Kei chuan, “Min kalsan i tum reng bawk si a, chuvangin I fa pai ka duh a ni” ka han ti a. Ani chuan min han melh vawng vawng phawt a, “ Naupangte a nuthlawi fa pawm ni tur chuan I uihawm lutuk. Nakinah pasal tha tak, nagmah hmangaih em em tu, hmangaih tu nih tling I la hmu dawn a lawm” min ti a. Inneih lam chu sawi thui pui ngam chi pawh a ni lo, a duh lo lutuk chu a thinrim hial zawk emaw tih tur hi a ni, tihtauh a hlawh chhuah theih pawh a ni lo. Mahse sawi ka thulh chuang lo a, min hnial reng bawk a.
    Thlakhat a liam hnu chuan ka chawlh te pawh chu a zo tawh a, hna lamah chuan ka kal tan veleh ta a, mahse ka chhuahsan chuang lo. Sangtei room chu ka room atan ka hmang mai a. Karkhat ka kal ve ren rawn a, tlaitin kawtah hian pangpar nen hian min lo nghak ziah a, sawi lang lem lo mahse min lo ngai ve hman hle ni hian ka hre thin. Karkhat ka kal hnuah chuan ka thei thlawt lo a, ka hna ah rilru ka pe thei bawk si lo a, chawlh chu ka dil chhunzawm leh ta a, an phal lo dawn viau na a, hlawh nei rih loh mai pawh ka hnial loh thu ka sawi chuan ka chawlh tho tho an ring a ni ang, min pe leh ta a. Chumi thla tawp lamah chuan a natna chuan zual lam a pan tlat mai a, hreh hle mahs e damdawiin lamah in hmanrua te a that zawk avangin kan lut ta a. Marama chuan engkim lo ti felin Cabin kan chang thei a, a ni nen chuan kan vil deuh chawt a ni mai. A nau Sangtei chu a ngai thei em em mai a, chah haw chu a duh miah si lo. A rawn harh that deuh hi chuan lawmthu hi a sawi reng ringawt mai a, Pathian mitirh ka nih thu te sawiin Pathian hnenah pawh chuan lawmthu a sawi bang lo a, damna erawh a dil ngai hauh lo.

    Nikhat chu ngaihtuahna thar ka nei leh ta a, ka pate bulah chuan Mama neih ka duh thu ka sawi ta a. Anni chuan ka hmangaih zia an hriat tawh avangin leh hun a neih tlem tawh zia an hriat avangin an lo rem ti ve mai a. Mama chuan rem ti lo mah se tan fung ka nei that lat, a farnu ka enkawl dawn chuan kan la inhmu ngai si lo a, kan innel em em awm si lo a, a u nupui ka nih chuan chhungkhat kan ni tawh dawn a, nau ang takin ka en thei dawn a ni ka ti ta tlat a. Ka chhungte pawh ka dil vek tawh thu ka sawi chuan hnial ngaihna pawh min hre lo, a mittui hi a luang zawih zawih reng mai a ni. Chumi ka sawi ni atang chuan rilru tawngtaina hi a nei reng mai a, Pathian a rawn nasa a ni tih ka hre thiam mai a. A hnuah chuan ka nawr nasat em avangin, “Ka tan I rinawm reng thei ang em” min han ti a, kei chuan, “Ka dam chhung zawngin” ka lo ti a. Ani chuan, “Pasal nei leh pawh ni la ka dem hauh lo ang che” tiin Pathian hnena kawtchhuaha min lo nghah a dil tur thu chu min hrilh ta a ni.

    Natna khuma mu reng ni mah se engkim mizo dan ang thlap a tih a duh a, ka chhungte’n an phal tih hi a awi thei thlawt lo a. Ka pa ka chah a, hmaichhanah ngei a dil ta a, chutah chuan a ngaih a tha thei chauh a ni. Chumi hnu chuan Marama chu a ko a, “Nang lo chu makpa han tirh mai tur ka nei lo, ka ring tawk che a, chuvanga ka farnu pawhin in ngaihzawn min rawn dil khan lo phal ka ni reng a”. Marama chuan, “A rawn dil che a maw” a ti let a. Mama chuan, “Dil ang chu mawle, I try dan te pawh kha min rawn hrilh vek alawm. Lalramliana ka nia, Ramte tiin min ko thin. Min hre lo maithei ang a,mahse I u….”. Marama chuan, “A tawk a tawk, zahthlak lutuk” a lo ti a, kan nui tlang leh dar dar phawt a. Mama chuan, “Zei lo viau mah la, a awksa ang a ni a, min va dil chhuah sak thei ang chu mawle” a han ti a. Marama chuan, “Min ngaihtuah reng reng suh, midang tan hi chuan ka zei ve the a nia, mahse Sangtei bulah chuan tun thleng pawh hian ka la zam a ni” a han ti a. “Sangtei ngaih a tha tawh lo a, in neih kan buatsaih dawn phei chuan rawn kal ve ngei se ka duh mang e” thu tak zawk hian a han tih zawm a. Mama chuan, “Ka hun a hnai tawh a” a han ti tan chiah a, kei chuan hlauthawng tak hian a kut ka va vuan nghal a, A ni chuan, “Bawihte, lo hlauthawng suh, sawi ngei a ngai sia lawm” tiin min lo hnem a. Marama lamah chuan,”A hmel hmu lo a liam mawlh hi ka hlau a ni. Tin, Partei’n min hmangaihna mak zia te leh, ka tana a that zia te hi ka sawi chak tawh a sin” a ti a, a lung a chhe lek lek mai. Marama chuan, “Chuti chu kan chah ngei dawn nia, ka thlem rei leh a ngai viau ang” a han ti a, a nui pah bawk a. Mama chuan, “kan in ang a nih chu, ka natna ka hrilh loh avang hian zan khuain a vui thei ang” a ti a, kan nui tlang leh rih a. Chutah Marama chuan,”Thutak zawk hian, “Sawi nuam lo ni mahse Mama, tawngthu chhe loah I lo boral thut takin, Sangtei hi neih ka duh a, ka dil rawih mai che a ni. A hun chu Sangtei in peih hun hun ni se, kum hnih thum pawh ni se ka nghak thei ang, mahse nangmah ngei hi dil che ka duh a, ka rawn in palai tawp mai a ni” inthlahrung aw tak hian a ti a. Mama chuan, “Maram, kei chuan Sangtei hnena phalna ka pek atang che u khan ka phal daih tawh alawm. Hnathawhna lama kan pu I nih vang ni miah lo hian I mihring mihrinna ringawt pawh hi kan phu lo a sin. Keia rem tih leh tih loh chu thudang ni se, hei u thar a nei tawh a, a ni hi in lo dil dawn nia, a ni thu thu hi a ni mai” tiin min rawn melh a. Kei chu chutianga mawhphurhna min rawn pe ringawt pawh chu ka lo lawm em em mai a ni, hmangaihna hi chu a va han mak tak em.

    Marama chuan Sangtei haw na tur engkim tifel nghal vekin a tukah chuan airport ah a zuk lam a, Mama chuan na lutuk ang a lan duh loin in tih fai a duh thu a sawi a, theih ang tawk chuan kan han chei mawi a, mahse a hmel dang bei chuan a na tih chu a lantir chiang tho si. An rawn thlen chuan Sangtei chu a tap nasa tih hriat tak hian a mit a bui luk a, a u in a lo chhuang hle pawh kha a awm hle mai. Mizo nula ah chuan a hmeltha ber pawl a ni hial awm e, Marama nen pawh chuan an inhmeh hle a ni. A rawn tap lut nghal emaw tih theih hi a ni a, a demawm hran loh e, an unau in hmangaih zia hriat phei chuan Sangtei tan chuan na tak tur a ni. Hun thawl pek kan duh avangin bathlar lamah chuan kan chhuak phei ta a. Marama chuan chhuan hmel tak hian, “A hmel tha a ni tiraw, a hmel mawina belhchhah tur hian a nun hian a zir bawk si. Tun thleng hian min duh thei hi mak ka la ti zawk” a rawn ti chhuak phawng mai a. Kei chuan, “Nang pawh hi duhawm tak I ni a sin, in inhmeh lutuk” ka han ti a. Ngaihthat loh hmel tak hian, “Mahse kan inhmuh atang hian ka la be tawng zo miah lo, a u natna ka zep pui avang hian min ngaidam thei em ang chu” a rawn ti chhuak sup a. Kei chuan, “ Lungngai reng reng suh, tan ka lo lak pui ang che” ka han ti zauh a.

    Kan bulah chuan Sangtei chu a rawn chhuak ve a, “U Parte, ka u chunga I thiltih zawng zawng hi ka rul seng zo lo ang che, natna te nei loin han in in nei ta ni ula zawng, ka u hi a va hlim dawn em. Sawi tur pawh ka hre lo, ka awm loh laia ka aiawh tura Pathianin angel a rawn tir a nih hi. I hmangaihna hi kan phu thlawt lo a ni” a ti a, min rawn kuah a, a tap leh zawih zawih mai a. Kei chuan, “Lungngai reng reng suh, I u ni turin Pathianin min ruat vang a ni, I u hi tawng lo ila hetiang anga hlimna hi ka tawng bik lo ang. Rei lo hle mahse a bula ka awm hi ka damchhunga ka hlim ber tum a ni” ka han ti a. “I u ka hmangaih ang tho hian Marama pawhin a hmangaih che a sin, englai pawhin I u a vil reng a, I zirna tih bahlah a hlauh avangin hrilh lo turin I u in a vau bet char char alawm” ka han ti leh a. Marama lam chu kan han hawi a, Marama chuan inthiam loh hmel zet hian, “Ni e Sangte, ka hmangaih lutuk che a sin. Mahse khawi zawkah nge rinawm tur ka hre lo a ni,min ngaidam rawh” a rawn ti a. Sangtei chuan a pan phei a, a va kuah thlawp a, “U Maram, kei chauh ni lo a, ka u thleng a min hmangaih pui theih avang hian I hmangaihna pawh hi ka phu zo lo a ni. Min ngaidam rawh aw, ka hlauthawng em a ni, eng nge ka tih tur pawh ka hre lo, ka u a awm loh chuan engtin nge ka awm tak ang, a ni hi doctor ka zirna chhan chu a ni a sin. Ka tan engkim a hlan zo vek a, ka zir a duh avangin hrilh pawh min hrilh duh lo a, enkawl pawh ka enkawl hman lo, a na ka va ti em” a ti a, a awmah chuan lungchhe tak chuan a tap ta hawm hawm a, Marama chuan duat tak chuan a lo kuah a, a hnem mawlh mawlh bawk a, kei chu a sirah mittui ka lo hru mial mial a.

    Kan inneih ni chuan ka chhungte leh Marama te chhung, Nu Mawii te nufa nen chuan kan ni tlawng mai a, mittui tla lo a ram pawh kan awmlo. A hma zan atangin Mama chu a zual deuh a, hunserh hman lai pawh chuan a khua a sik reng a, a hnar atang pawh chuan thisen a chhuak deuh reng mai a ni. Pastor in min inneih tir a, Sangtei chu ka thian a ni a, Mama chuan marama chu a hmang leh mai a, engkim urhsun takin kan ti a, kan zo felah chuan Mama chuan thusawi duh a neih thu a sawi a. A ngawih vang vang hnuah a mittui hi a rawn luang zawih zawih a, ka nu leh pa te bulah ngaihdam a dil leh phawt a. “Kan inneih hma atang khan Pathian ka rawn char char a, rem a tih loh chuan inneih hma a a nunna la mai turin, mahse ka nunna zuah a nih avang hian a rem ti ah ka ngai e, engpawh tawk ila ka farnu hi in chhungkua angin in lo enkawl dawn nia” tih a rawn sawi a, a chauh deuh tawh avangin kan mut that tir a, a khawsik a lo sang hle mai a, nachhawkna te kan han pe a, a chhawk mawh kher mai. Zan khuain biak hleih theih lohin a awm ta a, tumah han haw na chi a nih loh avangin kan awm deuh thap reng a, Marama leh Nu Mawii chuan Mama chungchang chu an sawi bang thei lo, a chanchin an sawi atang te chuan hmangaih hi a lo phu ve reng a nih hi, ka hmangaihna chhan pawh hi Pathian ruat a ni ngei ang tih chu ka ring nghet ta a ni. Zing lamah chuan a rawn harh hlawl mai a, Sangtei chu a rawn ko a, Sangtei chuan a pan vat a, Marama pawh chu a hui hnai a, “I va han duhawm em, I hmelah hian ka nu ngaih em em kha ka hmu a, I nungchangah ka pa ka hrechhuak thin” tawng chu a harsat hle mai. Sangtei chuan, “Ka u, tawng tam suh, I chau zual mai ang, ka tan tuar hram hram rawh aw” a han ti a. Mama chuan, “ I tan, engtik lai pawha awm hi ka tum thin a,mahse tunah chuan ka chakna piah lam a ni ta. Hlauthawng lo la, ka ai awh tur Pathianin Partei a pek che hi, pathian hmangaihna chu a va thuk em.” “Maram, hei hi min tiam rawh, ka nau ka neih chhun, a chhungte’n kan kalsan vek tur hi, a tawrh atan chuan a na tawh lutuk a, lo tih nat belh suh aw. Thil a lo tisual a nih pawhin vawi hnih vawi thum pawh lo ngaidam mai rawh aw” a farnu ngaihtuah hmel tak chuan a rawn sawi chhuak a. Marama pawh chuan, “Ka tiam e, eng pawh thleng se, aman min hnar te a nih ngawt loh chuan ka then hauh lo ang” tih pahin a kut chu a zuk hmer vawn vawn a. Ka lam chu a lo hawi leh a, a kut chu ka lo chelh vat a, “Casualty-a min hauh hrep kha I la hria em?” a rawn ti a , a nui deuh suk a, kei chuan tah nuih pah hian, “Hria ang chu, mi mawlpa” ka han ti a. “I thinrim hmel pawh hi ka en ning thei ngai lo ang. Pangpar kha min lo enkawl sak rawh aw” a ti a, a chawl leh vang vang a, a thaw pawh a dik lo tan viau a, a biak theih loh chhunzawm ta a. Khatih laia ka rilru awmdan chiah pawh kha ka hrethiam tawh lo, a kal dawn tep chuan, “Ka lo nghak reng dawn che a nia” tiin a phun sep a, chu chu a sawi hnuhnung ber a ni ta.

    Min lo nghak reng tih ka hriat avangin kei pawh atan ka rinawm ta reng a, NUTHLAWI VIRGIN tih ka lo ni ta a ni.

    Advertisements

    About Mizo Archive

    I'm the one who collect the best writings of Mizos
    Aside | This entry was posted in Uncategorized and tagged , , , . Bookmark the permalink.

    6 Responses to Nuthlawi Virgin

    1. Chhunthng val LRA says:

      Hnuk ulh teuh in ka chhiar a ka chhiar zo thei ngang lo in ka u ka in chiar zawm tir top.

      Like

    2. Laltlanhlui says:

      Mittui nen ka chhiar chhuak dap e…a ngaihnawm lutuk👍👍

      Like

    3. Mahnema says:

      He thu tluk a mizo thawnthu in ka mittui a koh chhuah hnem hi ka hre ngai lo.

      Like

    4. Mahnema says:

      He thu tluk a mizo thawnthu in min velh tah hi a la awm ngai lo he thu hian ka mittui a ko chhuak hnem kher mai.

      Like

    5. Peka says:

      A tak ami,anih chuan Hmangaihna tak tak aniang dam chhung leh thih hnu daih,ka chhiara ka tah phah ania.

      Like

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out /  Change )

    Google+ photo

    You are commenting using your Google+ account. Log Out /  Change )

    Twitter picture

    You are commenting using your Twitter account. Log Out /  Change )

    Facebook photo

    You are commenting using your Facebook account. Log Out /  Change )

    Connecting to %s