Rumliana Titi

Chhephaki Phaktei Phaks

🌾Hnam tin zingah hian mi danglam bik, mi mak sarâng sawi tur hi an awm thin a. Chutiang mi chu a pian pawh an piang zen zenlo, mi vâng an ni. Mizo zinga hetiang mi mak sarâng kan neih pakhat chu Rumliana ani.

A nu leh pa chu Vungkawnga Ralte lehLianchhingi Ralte an ni a. Rumliana hi kum1897-ah Lianphunga khua Zawngtah-ah a lopiang a. A naupan laiin Tlungvel khawperZobawk-ah an pêm a, a pa chu Melveng hotu a ni.

Rawlthar a nihin vawi khat chu a thiante nen Phulmawi khaw nula zen an rawt a. An pa chu hmeithai inah an lênpui hmasa a, zu an hrai rui a, a muthilh hnuin an chhuahsan a, nula in chu an pan ta a.
Rumliana chuan a thiante hnenah, “Ka lut hmasa ang a, min lo ngaithla rawh u,” a ti a. Sumhmuna a awm laiin an pa kha a muhil a harh a, a lo haw ve chiah a, an indang kawlawk chu a ni ta der a. Rumliana tlanchhiat ngaihna hre tawh si lo chu thingkhawn hnuaiah mawng lang rengin a tawm kuh mai a. An pa chuan, “E he he he…In mi han tih dan vei chuh! Hetiang in tum vang hi a ni maw zu min pêk ruih?” a ti a. Hmawlh a la a, a hawlh ta nghek nghek mai a. Rumliana chu ring zetin a ‘awiah’ vak vak a. Thenawm khawveng an lo tlan khawm thuai a. Zak zetin an haw ta hna hna a. An inah pawh riak ngam lovin a thiante inah a riak ta a.

A lo tlangval a, kum 1917 khan French ramah German râl rûnin a kal ve a. Kum 1921-ah Assam Rifles-ah a tang a. Silchar-a a awm laiin Assam Rifles-a Mizote chu in an saktir a. A chung dî an chih laiin an hotupa Holder chuan a hnuai lam atangin a phui leh phui loh a rawn endik a. Hmawlh zum a keng a, a phui lo lai a hmuh chuan, “He lai hi a la phui lo,” tiin a hawlh tlang zawk zawk fo mai a. A chang chuan anmahnite pawh a han hawlh fuh thin a.A tawpah Rumliana ning chuan a hnuaia an hotupa chu a zunkhum ta vak mai a. An hotupa thinrim chuan Sap hnenah a hêk a.
Sap chuan a ko va, “Rumlian, engati nge inHolder i zunkhum?” a ti a.
Ani chuan, “Mizovin in chung dî kan chih chuan a phui leh phui loh en nan kan zung thin a. A hnuailam ka hmu thei si lo alawm,” a ti ve tlat a. Hrem ngaihna an hre ta lo ani.

Rumliana hi pa lian leh rual pawl thiam tak,a duh chuan an hotute tihlawm pawh thiam tak a ni a, nula lakah pawh a luck hle a. Silchar-a a awm lai khan vai nupui a khawih nual niin an sawi. An hotu vaiho runluih rëng rënga khawsa a nih avangin sazai pawh a hmu fo va. A hrem nana thil rit tak an phurhtir chuan zâng ti âwm deuhvin a lang lui tlat a. A zâng deuh an puttir lahin rit ti âwm takin a kal pai leh chawn chawn thin a ni.

Vawi khat chu an parade-naah mawza khing leh pheikhawk khing chauh bun ve vein a lo chhuak a. An hotupa chuan, “Hei, Rumlian,engtizia nge?” tiin a zawt a.
Ani chuan, “Field-a chhuah a huntawh si a, kan rawn tlai chuan min hrem ang tih ka hlau va. Ka hmanhmawh tawh bawk si a, a lehlam chauh ka rawn bun hman a ni,” a ti a. An hotupa thinrim chuan, “Misual, lammual hi vawi li tlan hêl rawh,” a ti a. Rumliana chu zawi tëin a tlan a. An hotupain, “Tlan chakrawh a tih pawhin a tlan chak duh lo va. An hotupa thinrim chuan vuak tumin a ûm a. A vuak phakloh tawk chiah chiahin a tlan chak ve zel a. An hotupa lah a thinrim tawlh tawlh a. An pahnihin mual chu vawi li an tlan hel ta ringawt a ni.

A chang chuan a pheikhawk khing lehlam chauh siai tle taka hnawia bun chhuah a chîng a. An hotute’n an hrem dawn chuan,“Siai bur khat chauh kan dawng si a, lehlamhnawihna a daih lo,” a ti ve tlat a. Siai bur hnih an pêk phah ringawt a ni.

Vawi khat chu a chhuti a kîr leh har deuh va.An hotupa hnena a han in-report chu an hotupa chuan, “Engatinge ni Rumlian, chu chen chen i awm? I va rawn kír leh har em em ve?” a ti a. Ani chuan, “Tui lianin mindang a ni,” a ti a. An hotupa chuan, “Thâllaiin tui a lian ngai em ni?” a ti a. Rumliana chuan, “Kei pawhin mak ka ti reng a ni,” a lo ti sam ëet!

Bel a kai thei lo chuan hla a phuah a.
‘Kei zawng promotion kai ve reng hian ka mawilo,
Vaiho zawng zawng ka hmêlma in lo ni e.’
A tawpah chuan bel khat a kai ve ta hram a. A kawr pathuma bel tur an pek chu a kawr pawhthlaksak leh ta a. Hla bawkin..
‘Sangthangpa lal lai a tawi mang e,
Lal lai bangin Thadang run kai ka rel e;
Chhai lai leh dî zûn ka thlang zawk.’
tiin.

Aizawla a awm laiin lênchhuah an châk si a, an hotute’n lên phalna an pe duh si lo. Zankhat chu a thiante nen Tlangnuam veng nula an rîm ru a. An duhthawh lutuk chu an nula rîm mitmei pawh vêng sêng lovin khawvar dawn thleng mai an lêng ta pek a. A thiante chuan an bahrika haw leh chu an hreh khawp mai a. “Rumlian, engtin nge ni ang? Nangin rem han ruat teh,” an ti a. Zing ni chhuahah camp chu an thleng a. Rumliana chu chirhah a intâl berh vek a, camp-ah chuan an zâwn lût ta a. An hotupa chuan a lo hmu a, “Het Rumliana, chalak lutuk, nakin lawkah dam leh mai ang,” a ti a. Hrem erawh chu an pumpelh phah ta ani.

Rumliana chuan Pawnga thing chheh khâwlsa, ramhnuaia mi a put rûksak thin a. Vawikhat chu a ru leh tur a lo inpu uai tawh chu a zuk phâwk a, “E he he Rumlian, nangmah hi a ni maw ka thing chheh sa lo ru thin hi?tLal hnenah ka sawi ang,” a ti a. Rumliana chuan, “E khai, hetiang mai maiah unau intihchhiat loh tur,” a ti a. A ‘hei hah’ dut dut a, a kal ta daih a. Pawnga chuan Aizawl lal hnenah thubuai a thlen a. Lal leh upate chuan Rumliana chu an kova. Rumliana lal ina a luh chuan Pawnga leh lal leh upate chu an lo awm taih tawh a. Eng khaw dang sawi lovin Rumliana chuan Pawnga kutah chuan a kai lawk a, “He’ng he’ngah te i lo awm? Zu i châk a nih kha, ti rawh i in ang; i tan chuan engmah ui ka nei hleinem,” a ti a, pawnah a chhuahpui leh ta daih mai a. Lal leh upate chuan, “Ti khan kan chalrem che u ni rawh se, in thu chu a tâwp e,” tiin an au zui a. Rumlian chuan zu a lei a, a nui huau huau reng a. Tichuan, Pawnga pawhin engtia tih zui vak ngaihna a hre lo va,lungawi takin an awm zui leh ta mai a ni.

Lunglei-ah an sawn leh a. Sipai zingah chuan pasaltha an awm em tih an inzawt kual a. An sa kah zat an han sawi a. Rumliana chuan rang puatin, “Kei chuan 99-in za ka la kap lo,” a han ti a. An zinga sa kap thei ber turah an ring ta a, ramvak turin an chhuahtir ta a. Ani chu ramhnuai tak takah kal lovin a nuthlawi hriat pakhat inah a rawlh a, chawlhkar khat zet a riahchilh a. Ni khat chu an hotupa lengchhuakin nuthlawiin atanga pawna zung tura Rumliana lo chhuak a hmu a. An camp-ah a haw vang vang a, Rumliana chu a va kohtir nghal a. A thiante chuan, “Engtin tak pha leh ang maw?” an lo ti nak nak a.
Rumliana chuan an hotupa hnenah chuan,“Ka vahna a hla a, sa ka kap hliam a, ramchin hre lovin a hnu ka chhui kual a. Ka riltam lutuk ka lo haw a, nichina min rawn hmuhna inah khan chaw lamin ka lut a. Ka chaw ei kham inthiar tura ka chhuak mi rawn hmu a nih kha,” a ti a. An hotupa chuan a thusawi chu awih lo hle mah se, fiahna a nei si lo va, “A nih tak chu,” a ti ta ringawt a ni.

Assam Rifles-ah hian kum 7 tangin kum 1927-ah a bang a. Baktawng khawperNganabawk-ah a awm a. Vawi khat chu pa hovin zu an in khawm a. Rumliana chuan hla a han hril a:
“Sodom khua ang maia sual kan ni,
Lalnunnema’n mei kât han sûrtir se,
Nganabawk khua zawng chu fam rawh se, keitel lovin,’a han ti piap mai pek a. Paho chu an han thinrim dawn viau va, mahse, Rumliana chuan, “Han sa ve chhin teh u,” a ti a. An han sak chuan, “Kei tel lovin,” tih vek kha a ni si a, an lungawi leh ta a ni.

Vawi khat chu Aizawl-ah a kal a. A haw lehlam chu Tuirial lui a lo lian sen phût a, a kamah chuan tui lianin a dan hmeichheho an thu thup a. Rumliana chuan a puanven a kek thla lawk a, “Ti rawh u, ka hruai kai ang che u,” a ti a. Duh loh theih a ni si lo va, anwduh loh chuan tân reng a ni mai si a. Rumliana chuan phawk a chhuah a, a hruaikai turte chu duh a han thlang hmasa leh rih a. A mal malin a hruai a, tui khauhna lai an thlen chuan a serh a vawntir a. “Em em a che!” an tih chuan, “In vawn in thlah chuan kei pawhin ka thlah ve ang che u,” a ti tlat mai si a. Thenkhat chuan an chûm taih taih hlawm a. “Thi rawh,” ti tawkte pawh an awma ni awm e! Tichuan, a mal malin a hruai kai ta vek a.

Rumliana hi pa phawk leh fiamthu duh tak anih avangin a hruai kai hmeichhiate chuan huat enah an en lo va. Hlim takin an kal ho ta zel a ni. A hnua an han zawh leh chuan,“Chutiangin ka ti lo reng reng. An hlau mangang vawn tur hre lovin an rawn hûm palh thin a nih zawk kha,” a ti ve hlauh mai.✍🏼✍🏼✍🏼✍🏼✍🏼✍🏼✍?

Advertisements

About Mizo Archive

I'm the one who collect the best writings of Mizos
Aside | This entry was posted in Uncategorized and tagged , , . Bookmark the permalink.

2 Responses to Rumliana Titi

  1. Pingback: RUMLIANA – Rev.Zokima – chanchinthar

  2. Pingback: MIZO SIPAI ŢANG HMASA RUMLIANA – Rev.Zokima (L) – chanchinthar

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s