KHAW BAWRAW TAKA SAWIIN YOGA HMANGIN A KHAW NAWTIN SIAMTHARNA CHANG

POSTED by Joseph Lr Kop Chhangte On 21 June 2016

Tunlai ‘yoga’ chungchangah inhnialna a tam malh malh hle a, hetiang post han siam pawh hi a inthlahrunawm lek lek mai. Mahse ‘yoga’ in he khaw pakhat a tihdanglam dan Times of India in an tarlan hi phochhuah loh atan chuan a uihawm riau a, kan ram, Kelkang, camping, crusade adt boruakin nasa taka min chiah chunga, a taka rahchhuah hmuh tur a awm si lohna ramah hian ngaihtuah a tithui hle-in ka hria. Yoga-in a tih theih ang hi kan Pathian thu hmangin a tih theih vek a ni tih rilrua dah chungin he news hi ilo chhiar dawn nia.

Gujarat, Bhavnagar district huamchhunga thingtlang khaw te takte, an bawraw na leh suahsualna avanga lar hat Alampar khua chu a khaw nawt deuh thaw-in Yoga hmangin siamtharna an chang a, ramhnuai leh khawlai-a an au thler duai duai leh zaikhawma an lam phar vak vak thu erawh report awm lemlo mahse he khuaah hian mak takin “simna” a thleng niin media ten an report thung.

He khuaa harhna thlentu hi sakhaw puithiam emaw rawngbawltu a ni lova, an khaw primary school principal Digubha Gohil kaltlangin he harhna ropui tak hi Alampar-ah hian a thleng a ni. Kum 42 mi Digubha-a hian sualin nasa taka ro a relna khua chu siamțhat nan tuktin yoga a huaihawt țhin a, zing dar 4.30 ah a khaw mite chu phone hmangin tuktin a kaitho zak zak a, school compound ah kalkhawmin dar 5 ațangin yoga an bei țan țhin a. Zawi zawiin kalkhawm an pung chhova, a hnuah chuan a khaw nawt deuh thaw in Yoga chu an bei ta luai luai a ni.

A hma chuan he khua hi kuva(anni chuan ‘maava’ anti) heh khua-a sawi a ni a, mahse a nawlpuiin kuva an nghei ta duak a, ei a bar an awm tawh meuh lo niin an sawi. Hemi avang hian an hriselna pawhin nasa takin hma a sawn a ni. An school attendance pawh 40% ațangin 100% ah a in vawrh chho rup mai bawka, sikul naupang tlanbo ching tak tak ho te chu yoga an tih chinah regular takin sikul an kal zat zat tawh a, zirna lamah nasa takin hma an sawn a ni. Chumi rahchhuah-ah chuan, an sikul ațanga zirchhuak zirlai 18 te’n entrance exams paltlangin police department leh army ah hna an hmu nghe nghe bawk a ni.

Hei mai a nilo, an khaw tlangval zurui chunga mi pawng tihbuai hrat tak tak te pawh an reh ta duak a, tunhma-a mikhual tan zan dar 7 hnulama khawlai-a veivah him lo khawpa ralțitna hmun ni țhin kha tunah chuan hmun ralmuang tak a lo ni ta. Tin, he khua hian faina lamah nasa takin hma an sawn bawk a, tunhma anga kawng dunga tuichhe paih leh luan tir mai mai te chu bansanin, tuichhe paihna/luan tirna tur nala felfai takin an siam țheuh tawh hlawm a ni. Hei ngei hi harhna dik tak chu a ni mai lom ni??

Kan rama harhna thleng te hian hetiang zawng hian min tiharh ve țhin se kan ram hian hma kan va sawn nasa dawn tak em! Yoga in heti taka khaw pakhat a țha lamah a sawi danglam dawr thei anih chuan kan Pathian thu hmangin kan ram hi kan siamthar ve thei dawn lom ni? tih chu he post zawhna hi ni teh se.

Hei hi kum 6 chhung an practice tawh a, hetianga an beih hnu ah rah tha an hmu a ni.

Advertisements
Aside | This entry was posted in Uncategorized and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s