LALMĂNGA NU LĂWM RAWIH NI- Zahau Lal Thangtinliana Version

Lalmânga nu lâwm rawih ni chungchangah inhnialna tamtak a awm fo tawh thin a, a la awm mek zel a, hria inti te leh intihre tak takte sawi ngai loh ‘thu’ ka han sawi ve mai mai ang e. Unau thawnthu sawi mah a dang an ti mathlawm lovin kan pipute chanchin hi ziaka dah a nih miau loh avangin hriat dan inang lo, lo awm thin hi thil nih dan tur dik tak tur chu a ni reng a, hriat dan inan loh avanga indem leh insawt hi kan tih tur ni awm lo tak chu ani a, a dik zawk kan zawnna kawngah a ţangkai em em vek zawk a ni.

Zahau lal Thangtinliana hi a piantirh atang renga mi dangdai a ni a, lehkhathiam hmasa te an lo ni a, type-writer hmang thiam hmasa a ni a, a thih hnu pawh hian zanah a type-writer hi a rawn chhu fo niin a fanu, kan naupan laia kan Science zirtirtu, Mandalay Universityatanga B.Sc zirchhuak Sayama Ni Dawngi, tuna Americaram-a awm ta chuan min hrilh a ni.
“In hlau em?” ka ti a, ani chuan, “Kan hlau lo, ‘ka nu hian: chu a lo kal leh ta,’ a ti a ngawi ţhiapin kan mu thin” a ti.

Thangtinliana kha a fing a, a ropui bawk a, khaw 82 –ah ro a rel a ni a, kan pian hma kha chuan Mizorama mipuite pawhin an ngaisang em em a, Rih leh Falam kawngpui pawh khi Thangtinliana kawngpui an ti thin niin ka pu Pastor Lalsawma chuan min hrilh a ni.

Japan ral a lo len khan Rangoon University an khar tak avangin Zahau Lal Thantinliana fapa 3, Za Hre Liana ( A hnu-a Burma Union MInister lo ni ta), Sum Manga leh Ral Lian Suma te chu an khua-ah an haw ta a. Chu hun awl chu remchanna leiin Thangtinliana chuan Zahau Chanchin a sawi ta a, a fapa 3-te chuan an inziahchhawk ta a ni. A hnua Professor lo ni ta, Ral Lian Suma hi Australia atanga M.Sc zirchhuak a ni a, Head of Forestry Department, Rangoon University, a nih laia Rector hnena recommandation mi ziahsak avanga University Hostel ţha, Pegu Hostel, General Aung San lo awm tawhna chang thei ka ni . Aung San lo awmna Room No. 123 hi mi dang luahphal lovin an kharkhip tlat a ni.

Chu Thangtinliana thil sawi a fapa 3-in an ziak chu a fapa upa ber Lalbik-a’n lehkhabu chu 1952 kum khan a bu cyclostyled-in a tichhuak a, he lehkhabu pakhat la awm chhun hi a fapa zinga Sum Manga ( Retired Director of School Education Department, Chin State ) la dam lai, 1991 kum khan ka hmu fuh hlauh mai a, Zahau ţawnga inziak chu kutziak ngatin ka copy chhuak vek a, chu lehkhabu chu tunah hian ka la kawl ţha a. Mizo historian tam takin an hriat loh thil hlui leh pi leh pute chanchin, Hlado lo chhuah dan…etc ka lo hriat phah ta a ni.

Thangtinliana mak dangdai em em-na chu thil a hre thei em em a, a thil hriat a theihnghilh tawh mang mang lo kha a ni a, a fate pawh hian mak an ti hial a ni. Zahau inthlahchhawn dan pawh kimchang tak leh chipchiar takina sawi thei vek tlat mai a, Lalmânga nu lâwm rawih ni lo chhuah dan a sawi pawh hi a dik hmel viau a ni.

LALMÂNGA CHU TU NGE NI?
Lalmanga chu Thlanrawn lal ropui Chawnglula hmei fa a ni a. Lalmanga pian lai tak hian Chawnglula chu Ralte-hovin an man lai kha a ni a. A tan rei zawng hi phiang (beliang) kum kum 3 tih a ni a, phiang kum chu Zahau ramah kum thuma dana vawi khat awm ziah thin a ni a, kum 9 lai a tang a nih hmel a. Ralte Kawlni-ho chuan Pawihral an hneh thu hla an phuah a,
“Pawih no cha cha hawng thawk e, Kawlni runah.
Ka Suaipui leh ka Langmual a nuam o ve.
Hnah thing hnuaiah sakruang pal thing ang kan tun,
An thlunglu leh kawr silai tui ang kan lak” tiin.

Heta a tan laia piang a ni a, Chawnglula chhiahhlawhte chuan “ Hei fapa I nei a, a hming han sa rawh le” an ti a. Chawnglula chuan, ‘Lal pawh ka nih tawh loh hi lal kan mâng zo ta , a hmingah Lalmânga ka sa e” a ti ta a ni.

Mizote thlang kan tlak chhan pawh hi Thlanrawn ral kan chelh loh vang a ni ber a, Zahau hnam pawh hian Thlanrawn ral hi an chelh lo va, an khua Tlauzawl, tun hnu-a Tlauhmun an tih tak hi vawi hnih an ţiausan a ni. Zahau khawpui Tlauzawl an țiau laia thlang rawn tla tam tak hi Mizoramah Tlau hnam an inti ta niin Thangtinliana hian a sawi a ni.

Mizorama Zahau lal ropui Nikuala pu, Khawkimthanga leh a fapa Khuangcheuva hunah khan Halkha leh Thlanrawn hnenah dawva kaiin khaw din an va dil a, an lo phalsak hnu-in Rallang-ah khua a dinthar leh ta a. Halkha leh Thlanrawn nen inremna an siam tak avangin Rallang khua chu ral nei lo ang a lo ni ta, a rei lote chhungin in 300 khua an lo ni ta a, Sailo lal hmingthang Vuta mantu pawh kha Zahau an ni a, Rallangah hian kum 7 a tan hnu-in se sawmthum hu-in an han tlan ta kha a ni a. Zahau leh Thlanrawn nen inremna a awm theih nan Zahau khua Zathlir chuan Chawnglula hmei fa Lalmanga chu an khaw lal atan an sawm ta a, Lalmanga chu Zathlir khua-ah a lal ta a ni.

Zahau rama ram reng reng hi Zahauva leh Khalthanga te insiamrem hun, ţuan leh mâng atang tawh khan Zahau lal ta vek a ni a, a khua leh tuite’n lo an neih manah Zahau khaw tin lal ‘lo’ chu fur laiin tha khat, ţhal laiin tha khat an thlawhsak ziah thin a. Chu chu Zahau ţawngin “Lo hlawh” an ti. Tin, Zahau ramah chuan Mizoram angin kum tin lo an vat ve ngai lo va, an lo “ Lo Pil” khat an tih chu kum 3 atanga kum 5 te an nei thin a ni.

Zathlir khaw lal Lalmâng nu, Chawnglula hmei chu a lo fing fal hle a, kum khat chhunga ni rei ber ni tak hian fur ‘lo hlawh’ thawk turin lâwm a ruai thin a. Chuta tang chuan June ni 21 hi “Lalmânga nu hlawh rawih ni” an lo ti ta a ni.

Lisguistics subject hi tlem azawng ka lo zir sil awng ve nial nual a, a, ţawng hi a che reng a, a danglam reng a, thumal thenkhat a ‘thi-sawn’ a, ţawngkam thar, ţawngkauchheh thar leh thumal thar a lo piang reng bawk a ni. Chuvangin Mizorama Mizote’n June ni 21 hi ‘Lalmânga nu lâwm rawih ni’ kan lo ti ta pawh hi a mak em em hran lo va, tawng kalphung dik tak angin ‘hlawh rawih ni’ tih aiah kan lo hmang ta niin a lang atni. Zahau ramah chuan “hlawh rawih ni” tih an hmang a, a dik tho bawk. Hetianga thil thu hmun reng, a hmun azira sawi dan inang lo, hnam khat țawng chin dan bik hi Linguistics țawngkam chuan “dialects” an ti a ni.
chanchinthar.com

COMMENTS

Hlondo David
Hlawh ruai tih chu Zahau țawng a nia, Lawm ruai tih hi Mizoțawng dik a ni tih a pawm awm ta berin ka hria, post ațang khi chuan

Tlang Rokhuma
COMMENT ve tawh teh ang aw :
Mizoram atangin mizo tawng hmangin tihdik kan tum a.. measuring tape in kan pawt vak vak hi a dik thei dawn em ni ?..
HLAWHRUAI tih hi Pawi tawng a ni asin. Tunah pawh hlawh ruai tih tawngkam hi an la hmang reng tih hria ilachu hetin kan inrinsiak duh lo tur. Chu chu Lawmruai kan tih nen a in ang reng.
■ Hlawh ruai= Pawi tawng.
■ Lawm ruai= Mizo tawng.

HB Zauva Chhakchhuak
Kan Lusei (Mizo) tawng-upa leh hla-do zawng zawng kha Pawih tawng vek a ni a. Chuvang chuan Lusei (Mizo) tawng bul kan chhui tak tak dawn a nih chuan “Hlawh Ruai,” tih hi a dik a ni. “Lawm Ruai” tih hi chu tunhnuah kan hmang ve chauh ni in a lang.
Tin, Mazuala Hauhnar sawi ang hian”Lawm” tih pawh hi Paihte (Tedim) unaute tawng daih a ni. Lawm Ruai tih ai chuan Hlawh Ruai tih hi a ţobul zawk chu a lo ni.

Advertisements
Aside | This entry was posted in Thu leh Hla and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s