MNF HRUAITUTEN, CHIEF MINISTER HNENAH MLPC ACT HMAN MEK THIAT TURA NGENNA AN THEHLUT

June 29, 2016 (Nilaini) chawhnu dar 1:00pm khan MNF hruaitu te chuan Mizoram Chief Minister, Pu Lal Thanhawla hnenah Mizorama zu zawrh phalna MLPC Act hman mek thiat tura ngenna ziakin an thehlut. An lehkha thehluh chhan hi June 28, 2016 a MNF National Executive thurel bawhzuina a nih thu tarlan a ni a. Chief Minister, Pu Lal Thanhawla hi a zinbo hlan a nih avangin a Personal Secretary, Alexander V. Chongthu MCS hnenah MNF hruaitute hian lehkha hi an pe a ni.

1. Zu zawrh tulna chhan nia sawrkarin a sawi pakhat chu Chhiah (Revenue) tam tak lain kan hlawk phah dawn a ni tih kha a ni a. Tunah hian kan hriat dan chuan Sawrkar hian chhiah atangin cheng vaibelchhe za vel chu la tawh niin kan lo hria a. Chutih lai chuan zu leina man atan a let li vel vaibelchhe zali zet chu Mizoram pawn vairamah Mizo mipuite pawisa a luang chhuak ve thung niin kan hria a. A nihna takah chuan cheng sawm tihbo zawn nan cheng sawmnga seng ang kan ni. Financial chhiarkawp nuihzatthlak tak leh awmze nei hauh lova Revenue lak luh tum leh sawimawina niin kan hria.

2. A pahnihnaah chuan Mizoram sawrkarin thiam taka zuar tura insawi a nih laiin a opposite chiahin a kal ta a. Kan Police MAP First Battalion chauhin zu zawrh phalna an neih laiin a tak takah chuan Battalion Headquarters tin leh Home Guard Headquarters-in an zuar ta vek mai a. Chu bakah Public Undertakings hrang hrangte zawrhtir an ni a. Chuta thawk Kohhran rawngbawltute chuan hrehawm tiin an bansan zawih zawih a ngai ta hial a. Kohhran leh midang hriatah pawh zahthlak leh hrehawm khawpin zawrh a ni ta a ni.

3. MLPC Act hnuaia zu zawrh a nih chuan zu chhia in tur a vang ang a, zu tha hlir an in tawh ang a. Tin, Drug leh a kaihhnawih thilte a tlemin ruihhlo ngaite pawh an kiam ang tih kha zawrh chhan pakhata sawi a ni a. Amaherawhchu Local zu a tam dan a ngai reng a. Kan zu zawrh Quality phei chu a zuartu ngeite pawhin an in duh lohte a ni. Drug phei chu a hma aiin a zalenin a tam zawk daih a, a ruih ching thalai pawh an pung sauh thung a ni tih mitin hriat a ni bawk.

4. Zu kaihhnawih avanga thi an pung nasa ta em em mai a. Zu zawrh a nih atanga zu kaihhnawih avanga thi ringawt pawh hi mi sang chuang zet chu an ni tawha hriat a ni. Tin, kan Police-te zu kaihhnawih avanga thi pawh hi zahnih an pel tawh hiala hriat a ni. An hlawh lakna Headquarters-ah a man pe nghal leh a ba pawha lei nghal theih zu zempui a awm nghal miau avangin an thi zawih zawih mai chu a ni.

5. Chhungkaw nun a khawih buai nasa ta em em mai a. Nupa inkara inhauna leh inthenna pun belh nasa ta em em mai te, nula leh tlangvalte zu lei phalrai avanga nun inthlahdah ta, natna tihbaiawm vei hlauhna boruak mi tuamtu hahthlak tak te leh Mizo Hnam tlem te pung tam tura induhthawh nak alaia zu avanga a hun hmaa kan han thi zawih zawih ta mai te hi a pawiin a rapthlak tak meuh a ni.

6. India rama Kristian nilo State tam takin “A chhiah (Revenue) pawh kan it zo tawh lo” tia zu zawrh khapna dan hmanga hmanhmawh taka zu zawrh an khap chawn chawn laia keini zaa za Kristian inti, ramdanga Chanchin Tha hril darh tura a Kohhran leh mipuite inbuatsaih mup mupin zu kan han zuar thar ta sung sung mai hi ngaihtuah chian chuan ip chawih chawihna tham niin kan hria. Kan Missionary ten “Mizoramin zu kan han zawrh meuh hi chuan keini Missionary ho Chanchin Tha hril tur pawh kan zak a, kan va hrilna mite pawhin min lo en dan a dang hlein kan hria a ni” an tih pawh hi thil awm tak a ni reng a ni.

Advertisements

About Mizo Archive

I'm the one who collect the best writings of Mizos
Aside | This entry was posted in Uncategorized and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s