Pu Denga’n Independent a Sual Em?

Geneva atanga August ni 20.1975 –a, Pu Laldengan India Prime Minister lehkha a thawn (Mizo tawngin)

HOTEL du LA Rotissene Box
COPPET
R.COTTRAUX OFFICER-MAITRE-ROTSSEUP
TELEPHONE (D22) 761521
TELLEX 27639:CABLE:HOTLAC
To.

The Prime Minister
Govt of India
New Delhi

Pi duhtak Prime Minister

Political buaina chinfel hlenna neih nana Mizoram remna leh ngaiawhna awm tir lehna chungchang sawiho turin Nov,1973 atang tawh khan ka hnuaia thawktuten nangma aiawhtute an hmu tawh thin a. Heng sawihote bawhzui hian lehkha ka rawn thawn tawh che a. Chutah chuan buaina chu India Constitution chhunga chinfel dan sawiho ka duh thu ka sawi lang a. I hnuaia hna thawk tuin keimah ngei min hmuh a duh avangin hlauhawm nasa tak khum chungin Pakistan atangin ka rawn tal chhuak ta hram a. Geneva-ah i aiawh Pu Singhal ka hmu a, He buaina awmze hrang hrangte chu thui takin kan ka sawipui a, Chumi zawhah chuan he mimal lehkha hi khawngaih taka i lo ngaihtuah ngei beisei tlatin i hnenah ka han ziak a ni.

Ka sawi tawh angin, Mizoram politik buaina chinfelna India Constitution chhunga thlentir a ngai dawn tih rinhlelhna ka thinlungah a awm lova. India Constitution chhungah hian inbiakremna(settlement) kan duh chu hmuh harsatna lovang tih chu ka tiam thei che a; amaherawh chu kan hnam leh nunphung leh sakhuana atante hian humhalh mamawh a ni dawn a. Hemi atan hian sawrkar hnathawkte hnathawhna dan kalphung (minor administrative adjustments) chu, politika inbiakna kan neih chhung chuan dap chhuah a tul ang a.

Ka ngaihdan min tawmpui theihnan ka rindan leh ka hmuh dante anmahnia ka tuhna tura ramhnuai lama ka thawhpuite ka biak theih nan India-a lo kal theihna remchang min siam sak ka ngen duh a. Lo luh ngei chu ka inpeih a ni. Tun tuma Pakistan atanga ka lo chhuah leh hi ka chhuah hlenna pawh a ni tawh nghe nghe ang a, hlauhawm nasa tak ka tawn a ngaih avangin, i thatna a zarah i sawrkar chuan India-a ka awm chhunga, a tul anga himna min pek leh, ramhnuai lama ka thawhpuite a remchang i tihna hmun apianga biak theihna min pek ka beisei bawk. Ramhnuai lam hruaitute ka hmuh hmasak duhte chu:- ka Vice Pre. Pu.Tlangchhuaka te, MNF Party Pre.Pu Chawngzuala te, ka Army Chief Pu Biakchhunga leh Col.Zamana te an ni. Anmahniho hi hmuh theihna remchang min siamsak a, buaina chungchang kawng hrang hrangte kan sawiho theih ngat chuan, buaina chinfel nana ka ngaihdan min tawmpui tura kawihher theih ngei ka inringin ka tiam ngam a che

India Constitution chhunga buaina chingfel tura sawiho ka remtih tawh thu hi an hnenah a ruh langin ka hrilh thei dawn lova, a chhan chu sawi tam ngai lovin a lang reng a. Heng mite hian khawvel pum politik inher zel mila zau zawka kan buaina hi thlir thiam theihna remchang an nei lova. Chuvangin heng zawng zawng hi kimchang taka hrilhfiah leh beiseina engemaw neihtir ka duh dawn a. I ai awhtuin a duh angin a boruak hrisel, inbiak hma leh inbiak laia lentir a nih theih nan keima lam atangin “operation” chawlhtir turin ka thawhpuite pawh ka hrilh mek a. Chu lehkha copy pawh chu i lo hriat ve atan ka han telh e. Nangni lam atang pawhin Mizorama in sipaite hnenah khawngaih takin hnathawh dan tur a ruka i hrilh ka beisei tak meuh a ni. Tichuan ka thawhpuite hnenah pawh inkahna tibang turin India Sawrkar hi ka ngen a ni tih ka hriat chiantir thei ang.

A chunga ka sawi point te khi khawngaih takin I lo ngaihtuah ang tih ka beisei. HE LEHKHA HI THURUK TAWPKHAWK A SAWNGBAWL A NIH KA BEISEI BAWK. I sorkar aiawhtu Pu Singhala chuan hetiang ti tur hian min tiam tawh nghe nghe. Ka lehkha thawn che chungchang hi a ruk theih tawpa vawn anih chiah chauhvin ka thawhpuite chu nawrluihna avanga hnathawk ka ni tih ngaihdan nei hauh lovin ka hmin thei dawn a ni.

Nangmah ngaisangtu
Yours sincerely
Sd/-Laldenga
20.8.1975

Note: Kum 1975 June thla khan Thailand khawpui Bangkok-ah India aiawhte leh Pu Laldenga mi tirh chuan inbiakna an nei leh a. Chumi hnu August 1975 khan amah Pu Laldengan a staff te hnutchhiahin, a nupui fanau leh Pu Zoramthanga hruaiin Switzerland khawpui Geneva-ah India aiawh inchhal Mr.Singhal inti,(a hming tak chu Hassan Wallia) Addl.Secretary RAW ami nen chuan an indawr ta a. Heta an indawrna rah chu Prime Minister Indira Gandhi hnen a Pu Laldenga lehkhathawn a ni.

Extracted from
“Eng vangin nge MNF alo phir?”
Published by MNF Returnee Rehabilation Committee.
Aizawl.

Advertisements

About Mizo Archive

I'm the one who collect the best writings of Mizos
Aside | This entry was posted in Uncategorized and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s