REMNA NI -A PARTY PRESIDENT PATHUMTE THUSAWI

Author : Slchhunga Gooner On July 1, 2016
Nimin ni 30/6/16 khan Zoram hmun hrang hrangah hlim takin REMNA NI hman a ni a, a lawmna pui ber Aizawl-a party President pa 3 te thusawi hi chhiar ve duh kan awm takin :

PU LAL THANHAWLA MPCC PRESIDENT,
MPCC President, Mizoram Chief Minister ni bawk Pu Lal Thanhawla chuan zalenna sualtute, martar te leh Mizoram mipui zawng zawngte Remna Ni chibai bukin rambuai khan angkhatin Mizo mipui zawng zawng a nghawng a, mi lian leh mite, mi hausa leh mi rethei te a thliar lova tiin kawng hrang hrangin harsatna leh tawrhna in Mizo mipui te a tlakbuak thu leh kawng tin renga Mizoram dinhmun a tlak hniam thu a sawi a. Rambuai kha politics buaina a ni a tiin sipai chakna leh silai thiltih theihnaa senghawi chi a ni lova, politics bawka senghawi a ni a. Kohhran ho tawngtaina te, khawtlang, political party leh tlawmngai pawl hruaitute leh 1975 a din Peace Advisory Committee te inpekna an hnathawh leh an hmalakna avanga remna leh muanna kan nei hi a ropui a ni, a ti.
He remna leh muanna hi Mizoram mipui bakah hmun hrang hrang a cheng Zohnahthlak te ta anih thu sawiin remna leh muanna hi a man ato a, a vawnhim man pawh a to a, a man a to hle pawhin a man pek kan inhuam tur a ni tiin remna leh muanna vawnghim a, a chhe lai a awmin, a chhe lai siamthat hna chu kan zavai mawhphurhna a ni, a ti bawk.

Pu Lal Thanhawla chuan YMA kaihhruaina hnuaiah Remna Ni hi a hrang hranga hmang lova, a huhova hmun pakhat a an remhriatna leh an ngaituahna hmanga Remna Ni lawmna hun leh thangthar ten remna leh muanna a hlutzia an hriat theih nan a hetiang programme an buatsaih chu lawmawm leh ropui a tih thu a sawi a. Remna leh muanna hi Zohnahtlak zawng zawng ta a ni a, kan dawnsawn thiam a pawimawh a ni, a ti a. Ram hi Pathian min pek ani a, a that leh a chhiat a ram leilung faten angkhatin mawh kan phur a ni tiin Mizo mipuite chu remna leh muanna atan inpe chhunzawm zel turin leh neitu rilru pu a ram hmasawnnaah rinawmna, dikna, taihmakna leh Pathian tihna nung nen kawng engkima sawrkar tawiawma hma la tura Mizoram mipuite chahin leh hmun hrang hranga awm Zofate chu Remna Ni duhsakna a hlan a ni.

PU LALDUHOMA ZNP PRESIDENT
Pu Chairman, khual lian leh khual zahawm, Party leh NGO hruaitute, sorkar mi pawimawhte leh thian duhtak te u,A hmasa berin kan țawngțainate chhanga remna min petu kan Pathian chungah lawmthu ka sawi a. Remna atana theihtawp chhuaha kan thawhpuite, a bik takin Students Joint Action Committee (SJAC) hruaitute chungah, khatih lai huna a hminga Peace Committee Chairman ka lo nih vena angin lawmthu ka sawi bawk a ni.

Yma General Conference-in remna ni a huhova hman an lo rel ta mai hi chung lam hnathawh ni hialin ka hria. Ram buai chungchang leh remna chungchangah hian thu inchuh leh inchirhthehna tam tak a awm țhin a, chu chu kan fate, țhalai rual, thinlung la thianghlimte hian an ning a, tihtawp an duh tawh niin a lang. Chuvangin, tun hma lamin mi tu pawhin eng thil pawh lo tiin, eng thu pawh lo sawi țhin tawh mah ila, vawiin ațang hi chuan sim tawh ila, phum bo tawh ila, inchawimawi te pawh zirin,hma lam thlirin bung thar i kai tawh ang u.

Remna thuthlung hi duhthusam a ni lo tih kan hre țheuh va. Amaherawhchu, kan hnam tana thil hlu engemaw zat ken tel a neihte hi kan hman țangkai thiam a țulin ka hria: Minority humhalh thute a chuang a. Kan rama minority, India khua leh tui dik takte humhalh hi kan mawhphurhna a ni reng a. Amaherawhchu, hei hian foreigner te a huap reng reng lo. Vawiina kan minority te hi ramri pawn lam ațanga rawn lut ruten an chimral mek a. He remna thuthlung tlawhchhan hian, heng foreigner te um chhuah hna hi sorkar, party leh NGO te hian i thawk ang u.

Tin, Mizoram sum indaihlohna phuhruk nan Special Category State te angin Central sorkarin a enkawl zui zel ang tih a ni bawka. India ramah hian Special Category State te hi nuai bo vek pawh lo ni se, remna sign laia Special Category State an enkawl dan anga min enkawl zui zel hi Central sorkar hian a ba a ni tihtepawh i hre thar leh ang u.

Inner Line Regulation pawh tihdanglam emaw, paih emaw a nih dawn chuan Mizoram sorkar rawn hmasak tur tih a ni bawk a. Tun hma lam khan paih tumna a lo awm tawh țhin a, Court ah te pawh min lo khing tawh țhin. Tunah erawh chuan min rawn hmasak zel a ngai tawh dawn a. Min paihsak lui thei tho nain, kan hriat hmasak zel tawh dawn avangin pressure te siamin nasatakin kan nawr thei tawh dawn a, tunhmaa kan dinhmun ai kha chuan a țha ta hrim hrim mai. Hei hian Bengal Eastern Frontier Regulation,1873 in min lo humhimna kha a rawn nemnghet nawn a ni.A hlu lai ber chu kan Special Provision hi a ni a. Hengte hi kan humhalh a kan hlut thiam a pawimawh hle a ni.

Vawiina remna ni kan lawm lai hian lawm ve thei lo tute emaw an awm tih kan hria. He thuthlung tihpuitlinna kawngah hian Central emaw State sorkarin emaw tihhlawnthin loh an la nei a nih chuan chak taka bawhzui turin ka ngen nghal bawk a ni.

Inremna thuthlung hi kan hnam tawpna tur a ni lo tih hi ka sawi duh. Vawiinah hian Zofate hi rorelna pakhat hnuaia awm thei lovin, Barhluih ramriten min la daidang tlat rih a. Heng ramrite an siam lai hian kan remtihna a tel lo, committee ah pawh min telh ve lo, kan aiawh tumah an tel lo, min barh lui a ni. Kum 2007 khan UNO chuan, ” UN Resolution on the rights of indigeneous peoples” chu a lo pass ta a. Hemi hnuaiah hian kan hnam tan kal zelna tur kawng a lo inhawng leh ta a. Chuvangin, remna thuthlung piah lam ram, Zoram thar kan thlir a hun tawh.

India ramah hian minority te tak te kan ni a. Khawvelah hian hnam tenaute laka hnam lian zawkte inlulinna, majority arrogance hi thil thleng fo țhin a ni. Chuvangin, hnam dangte zinga khawsak dan te, chen ho dan te kan zir a, țhiana kan siam thian te pawh hi a ngai khawp mai. Amaherawhchu, Mizo Nationalism leh kan hnam kal zelna tur kawnga tui pawh tui ve hleithei lo khawpa kan inkhenbeh erawh a hlauhawm khawp mai. Pu Rokunga hla- “Tunge lo kal-hriat loh chhingkhual a ni,
Eheu,eheu, len ang derthiam a ni,
Luhtir suh la,zawlaidi pawh a keng,
A dawi ang che, hriatloh chhingkhual a ni,
Thir khaidiatin a hling ang che”
tih hi i hre reng ang u.

A tawp berah chuan, kan hma lamah hian engin nge min hmuak,malsawmna nge anchhia, thihna nge nunna? Khatiang hun rapthlak kha kan tawng leh angem? Buaina siam hi a harsa lo, chinfel erawh har tak a ni. Mnf hruaitute khan India Constitution hnuaia inrem an duh hnuah kha chuan inrem mai awm kan ni tawh a, mahse inremna nei tura inbiakna atan kum 15 lai kan khawhral a nih kha. Mi țhenkhatte chuan hun thim kan hmabak niin an ngai a. Kan Pathian hian warning pe hmasalovin mi a hrem ngawt ngai lo, a mite hmangin sim tura min ngenin simna hun min pe țhin. ” Ka hming pu ka mite chuan inngaitlawma an țawngțai a, an awm dan sualte an hawisan chuan, van ațangin ka lo ngaithla ang a, an sualte ka ngaidam ang a, an ram chu ka tidam leh ang,” tih ziak ang khan kan sualte thupha kan chawi chuan kan Pathian hi inlamlet țhin Pathian a ni a. Khatiang hun thim leh rapthlak kha kan tawh tawh loh nan i fimkhur ang u. Zoram politics ah Pathian ram lo thleng rawh se. Ka lawm e.

PU ZORAMTHANGA MNF PRESIDENT :
1. Mizoram chuan kum tam tak buaina a pal tlang hnuin kum 1986 June ni 30 (vawiin ni angah) hian inremna a lo nei ta a. Ram buai kan nih chhung khan India ram State leh kan chheh vel kan hriat phak chinah chuan ram buai ber pakhat kan ni thin.
Mipui ten an luah lai khawbu lum atanga khalh khawmin kan nun dan pangngai zawng zawng tihpherh darh vek a ni a. Chutiang hmunah chuan rinhlelh apiang man leh kahhlum theihna thuneihnain kum sawmhnih chuang min han hrut a. Mipuite Economy leh nunphung pangngai zawng zawng hi a kehdarh vek a ni mai a. Chutiang khawpa buaina lianin a tuam ramchu kan chheh vel State leh ramdangah pawh hmuh leh hriat reng kan nei lo hial a ni.

2. Chutiang khawpa ram buai chuan remna leh muanna kan neihtheih nan Zoram mipui leh Kohhranho zawng zawngin kan theihtawpin kan tawngtai a. NGO zawng zawng te, Zirlai Pawl leh Political Party ten an theih tawpin remna atan hma an la theuh bawk a. Chutianga kan zavaia kan beihna leh mipui leh Kohhrante tawngtaina chu Pathianin a chhang a. June 30, 1986 chuan Mizoramin inremna ropui tak kan lo nei ta a nih kha. Chu inremna chuan vawiin hian kum sawmthum a lo tling ta hial a. Khami Inremna kan neih zana Mizo zawng zawngte kan hlim lehlawm zia kha sawiin a siak awm lo ve. Ri thei zawng zawng tiriin kan inchibai a, kan lam tlaivar thak a nih kha. Khami zana mipuite hlim zia kha upa zawkte thinlung leh mitthlaah chuan a la cham rengin ka ring.

3. Kha Mizoram Inremna (Mizoram Peace Accord) kha India Sawrkarin a duh ang taka siam a ni lo va, MNF leh Mizoram mipuite duh dan ang taka siam pawh a ni hek lo. Duhthusam lo lai leh duh khawp loh laite pawh a awm ngei ang. Amaherawhchu remna min petu kan Pathianin tha a tih leh tawk a tih anga min pek a nih rih avangin kan lungawi leh kan lawm thiam a tul hmasa ber phawt a ni. Engpawhnise he inremna hi ngun taka kan han en chian chuan Mizoram tan a ropuiin a tha em em a ni tih kan hre theiin ka ring.

4. He Mizoram Peace Accord-ah hian a hmasa berah Constitution sekhupkhawn siamin “India Constitution-ah hian eng pawh khaw pawh lo inziak mah se” tiin a tan a. Mizoram leh leilung neitu nihna te, chung ram lei leh hralh leh khawih chetsawn phalna te chu India Sawrkar laipui chungah ni lovin Mizo mipui aiawhte kutah liau liau a han dah phawt a. Chu bakah kan hnam dan leh culture chunga thuneihna te, chuta tanga thubuai hlabuai lo awm theite rel fel dan zawng zawng te leh kansakhaw biak dan leh chumi kaihhnawih thil zawng zawngte chunga thuneihna chu Parliament-ah ni lovin Mizo mipui aiawhte kutah a dah a. Tin, Mizorama lo luh phalna Inner Line Permit pawh kan kutah chauh a dah bawk a. America Ambassador-te pawhin “Hetiang khawpa thuneihna sang hi keini ramah meuh pawh tu State mahin an nei pha lo” an tih hial khawp ram leh hnam, culture leh sakhaw venhimna hi kan Inremna Thuthlungah kan Pathianin min pe a ni, A va ropui em!

5. Hmun tam taka inremna siam chuan a daih rei lo fo thin a. Keini rama Inremna siam chuan kum sawmthum zet a lo paltlang ta a. Hemi chhung zawng hian India rama remna hlawhtling leh chhuanawm ber pakhat niin “Hunin a fiah tawh Remna Thuthlung” nih chu a tling hle a ni. Chuvangin kan thenawm State te leh kan chheh vela ramdangte pawhin an itin tha an ti em em a. Mizoramin Inremna tluan tling in neih ang kha kan neih ve theih nan min rawn pui rawh u tiin min sawm nasa em em a ni. Heta tang ringawt pawh hian kan Pathianin Zoram tan remna min pek ropui zia leh hlut zia hi chiang takin a hriat theih awm e. Chuvangin he remna hi humhim zel turin Zoram mipui zawng zawng hian tawngtaina nen theih tawpin i bei zel ang u.

6. Zoram hian kan thenawm State leh ramdanga thil hlu leh tangkai thawnchhuah (export) tur tam tak kan la nei zel ang tih ring ila. Amaherawhchu chung zawng zawng zinga a hlu ber leh kan thenawm State leh ramdangte pawhin mamawh an intih ber pakhat chu kan remna neih ang hi a ni. Chu tak chu tunah pawh mamawh intiin min kohna chu a ni. Chuvangin vawiin atang hian kan Pathianin he Remna min pek ropui leh hlut zia hi hria ila, veng him a, ngaipawimawhin,ramdangten min auh angin midangte tan malsawmna ni ngei turin theih tawp i chhuah zel ang u.
Ka lawm e.

Advertisements
Aside | This entry was posted in Uncategorized and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s