HIV+ FAHRAH RIANGVAI 22 TE FA ATAN PAWM-A NUN PANGNGAI PETU PASTOR REJI-A HI LO HMELHRIAT VE TEH LE

Mi neinung leh thiltithei a ni lova, kohhran tetakte enkawlin an chhungkaw eikhawp ngawr ngawr chauh a lalut a ni. Chutichung chuan he mihring ngilnei leh hmangaihna ngah tak hian Mumbai khawpuia miten an thinhrik leh endawng, HIV hrik pai fahrah naupang 22 zet fa angin a enkawl mek a ni. Mipui mimirin HIV hrik pai te nasa taka an thinhrik leh țih hunlai ațang tawh khan HIV+ naupang an nu leh pa ten an hlamchhiah, tuamhlawmtu neilo te chu hmangaih takin fa atan an chhungkuaah a lo senglut țan tawh țhin a ni.

Harsatna, tuarna leh dinhmun khirhkhan tak tak a a paltlang a, a naupang enkawl bawrhsawm leh chawrche tak te chu tlaipuar taka an inhnangfak theih na’n leh tui taka mutmu an tuah theih na’n an fairel bela eitur a tlem changa an nupa-a chaw an nghei leh sin tur mutbu mumal neilova zan hun an hman chang a tam hle. A naupang enkawl mite thinhrik leh endawng te chuan damchhan tlak nun pangngai an neih theih na’n leh nuihna chhan tur an neih ve theih na’n phut let nei lo hmangaihna-in a enkawla a, ama fa hrin pahnihte nen thlei bik nei miah lovin hmangaihna angkhatin a enkawl za țhin. A falak ho te chuan chhuang takin “Papa Reji” tiin an ko.

He mihring tlawm tak, nun ropui neitu Prostestant pastor Reji Thomas-a hi “Humans of Bombay” in biangbiakna an nei a, chuta a thusawi chu kan lo thailang ang e.

BUL ȚAN NA
“Ni khat chu DY hospital ka tlawh chhuah laiin hmeichhe naupang damlo pakhat pawna mu ka hmu a, a chawrche hle a, a ruhte chu a lang chhuak țhawt thei a ni. HIV+ a nih thu leh a nu leh pa in an boral san tawh thu ka hre zui a. Enge a ei châk ber ka zawt a, Noodles tiin min chhang a, mahse khawiah mah lei tur ka hmuh zawh loh avangin naktukah ka lo kal leh ang tiin ka tiam ta ringawt a. Mahse chumi zan chuan a lo boral ta si a, kha ka thil tawn runthlak tak khan namen lova na-in min vaw zui a ni. Tichuan, damdawi inah chuan lutin chutiang ang naupang chu an awm leh aunih chuan min lo be pawp țhin turin ka hrilh ta rawih a ni.”.

KHAWSAK A HARSA.
“Chutiang naupang chu chhan hrâng hrâng avangin min rawn thawn ta țhin a, 2009 khan ka nupui, ka fâ pahnih leh HIV+ naupang pahnihte nen kan chen ho na turin Navi Mumbai-ah man chawiin in kan luah lut ve ta rawih a ni. A tirah chuan kan khawsak a harsa hle a, awngphah pakhat chauh kan nei a, tahchuan ka fa palite chu an mu ho a, kan nupa chu chhuat lawngah kan mu mai țhin. A hnuah mite țanpuina kan dawng chho bek bek a, khum, buhfai leh pawisa te min rawn pe liam liam țhin a. Chutih mek lai chuan, HIV+ naupang min rawn thawn belh ve zel bawk a, zawi zawiin ka chhungkaw(fate)member 4 chu 24-ah a pung chho ta dawr a ni.”

DAMCHHAN TLAK NUN PANGNGAI PEK KAN TUM.
“Kan nu hian lungpui ang mai-a nghet tlutin min thlawp țha a, kan fate nen kan thliar hrang ngailo. An zavaiin kan hau vek a, kan hmangaih vek a, thilpek pawh inang vek kan pe țhin. Kan nuin an zavai 24 tan eirawng a bawl sak a, an damdawi a pe a, inentir turin damdawi inah a hruai bawk țhin. Zirna țha(good education) an dawn theih na’n leh damchhan tlak nun pangngai an neih ngei theih na’n theihtawp kan chhuah a ni.”

HMANGAIHNA VANGIN DAM CHHUAK.
“Ka theihngilh theih tawh ngai loh tur ka thil tawn pakhat chu, naupang chawrche tak pakhat chu a nu leh pa in an hlamchhiah avangin kan hnenah an rawn hruai a, TB leh HIV natna hun hmawr lam hmang mek a ni a. Kan lo tuamhlawma, thei tui leh thlai hnah ilo a taksa in a mamawh ang te chu pe in kan enkawl chho a. Kan infiampui lawp lawp a, a bulah hlim takin kan nui bâwk báwk a, hmangaihna-a kan han vur tak tak mai chu a rawn damchhuak zawt zawt mai. A hma-a tho kang thei miah lo kha kar hnih chhung lekin hmun tinrengah a tlan kual zar zar thei a ni.”

“Chhuang takin hei hi ka sawi thei–ka chhungkaw member 24 te hian a luangliamin hmangaihna an dawng a ni. HIV an vei avangin an dam rei dawn lo tihna a nilo, mi pangngai dam chen an dam thei a, chumi atan chuan kei hi ka awm a ni. Chhanchhuak turin leh an dam khua ti sei turin. Hmangaihna leh duatna nen chuan engkim a tih theih. He’ng naupang te hian ‘Papa Reji’ tiin min ko a, chhungkaw pa hna chu a fate humhim a ni. Tu emaw mi bik ka ni lova, patling pakhat mahni fa te enkawl ve mai ka ni” a ti.

Pastor Reji-a te chhungkua hi tunah pawh an khawsak a harsa em em a, publicity a zawng ve vak vak lo niin a lang. ‘Humans of Bombay’ a a article an post na-a comment tu pakhat Christopher Roy-an a address a rawn tarlang hlauh a, Mumbai lama khawsa in awm chuan lo tlawh chhuak ve ngei teh u. Khawi media mahin pastor a nih thu hi an tarlang lova, Christopher-a bawk hian a rawn sawilang a, chumi denchhan chuan ‘pastor’ tiin ka rawn ziak rawih a ni.

BLESS FOUNDATION
Bless Care Home, Row House no 8
River View
Row House
Panvel-410206
Phone number: 09594952722
(Pastor Reji Thomas)

Advertisements
Aside | This entry was posted in Uncategorized and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s