EU ATANGIN “GET OUT SOON” AN TI : UK AN BUAI CHHO MEK ZEL E : LONDON KHAWPUIAH KAWNG AN ZAWH

POSTED by Ct Lalrinawma On July 2, 2016

July 2 ah London khawpuiah EU chhuahsan duhlo mipui tam takin kawng zawhin, Parliament Suare ah an pungkhawm. He anti-Brexit rally ah hian Live-Aid concert hlawhtling taka lo huaihawttu Boomtown Rats hotupa zaithiam Sir Bob Geldof pawhin thu a sawi. Anti-Brexit rally a pungkhawmte chuan thuziak (placard) kengin, “No Brexit Please, We Are British”,”Eton Mess”, ” Hell no, we won’t go”, “Science need EU”, tih te leh Whitney Houston hla, “I will always love EU” tihte an keng. Heng pungkhawm te hian “We Are the 48%” an in ti. EU referendum ah UK mipui 51.9% in EU chhuahsan an duh, 48% in an duh lo.

London khawpui bikah 72% dawnin Brexit hi an duhlo. Northern Ireland leh Scotland mipui 65% chung lamin Brexit an duh lova, England leh Wales ramin Brexit an duh.

Hetianga Brexit duh 52%-48% an lo nih takah chuan EU ram hotute pawh an thinrim ve tawh bawk nen, “inthen fel thuai teh ang u, hma la thuai thuai ula, in thawmhnaw chhawmho nen in la chhuak hman hmawh teh u”, tiin “Get Out Now” an ti ta mai si. UK politician ho pawh an buai phah ta nuai mai a ni. Labor party lah chu an hruaitu Jeremy Corbyn paih turin MP’s rual 200 dawnah 40 chauhvin an duh ta! Labor party chhungah pawh an buai phah nasa.

Rorel lai Conservative (Tory) party lah an buai chho hle. PM David Cameron chuan Sept 2 ah a aiawh thlang fel turin Tory party te ngenin, Prime Minister thar hmel UK in a hmu dawn a ni. Oct thlaa ban a tum pawh EU hruaitu lamin “Get out soon” an tih takah inthen fel dan tur rel turin UK Prime Minister hmalakna a ngai si a; October thla Tory party conf pawh a nghak zo ta bik lo.

PM Cameron aiawha Conservative party leadership ah chuhtu 5 awm mekin, Brexit sawimawia champion puitu, London Mayor hlui, Eton College chhuak ngat Boris Johnson chuan politic ah a thlan a lai ta, PM leh hruaitu a chuh ngei tura mipui rin a nih laiin duhlotu an tam ta si, amah chuan hming pekluh hma darkar 1 ah hruaitu nih leh PM nihna a chuh dawn lo tih Zirtawpni khan a puang thut a, mi tam tak a barakhaih! Amah thlawp tura ngaih Michael Gove chuan Boris Johnson chu hruaitu tlaklo, mi chaklo tiin thlawp a tum lo tih sawiin, hruaitu leh PM chu a chuh dawn tih a puankhum a ni.

Tory party zingah hruaitu nih tum mi 5 te inhruipawhna chu a ruk mai ni lovin, a lang a pauvin a chak ta hle. Brexit duh leh duhlo zingah mai ni lovin, duhlo zingah pawh ngaihdan a thuhmun thei ta lo. Anti-Brexit zingah Home Secy Theresa May chuan duhtu MP’s 103 a nei a, Brexit duhtu Michael Gove chuan 23, Brexit duhlotu Stephan Crabb chuan 22, Brexit duhtu Andrea Leadsome 20, Defense Secy nilai Brexit duhlotu Liam Fox 9. Andrea Leadsom chuan, tun dinhmunah Brexit duhlohtu ni lovin, Brexit thlawptu ngei Prime Minister leh ram hruaitu kan neih a ngai, tiin PM leh leadership hi a rawn chuh ve leh a ni.
Thenkhat chuan Leadsom hian MP’s 50 dawn chu nizan lamah thlawptu a nei ta niin an sawi.

A tirah Boris Johnson leh Therasa May hi an inkhin ber an ring a, mahse, politic chhiarkawp chu a dang ta daih a ni. Naktukah Conservative party chuan hruaitu tur hi thlir hovin Committed member 1922 awmna chuan Thawhlehni-July 5 ah vote an la ang a, an thlitfim 2 atangin July 8-ah Tory party mi 150,000 in vote hmangin hruaitu an thlang ang a; chuta hnehtu chu UK Prime Minister a ni ang.

EU hruaitute chuan a hrana EU Army neih an sawiho tawh a, he thu hi EU-a meizang hlaptu France leh Germany chuan an rawt thin laiin UK hian a dang tlat a, UK hi EU leh NATO ah sum thawh tam an ni a; EU chhuahsan mah se NATO member a ni zel tho ang. EU referendum hma khan PM David Cameron chuan, Britain hi EU ah a awm reng chuan indona pumpelh nan a tha dawn a ni, tiin “UK in EU a chhuahsan chuan Russia President Vladir Putin leh ISIS hote an hlim ber ang” a ti.

UK-in EU an lo chhuahsan takah chuan EU ram atanga University kal lai leh workers an tlem phah anga, University tam takah Mizote tan pawh chance a awm ve phah mahna! EU an chhuahsan chuan kartin EU member fee ang deuh, EU kal mumal theih nana US$ maktaduai 350 vel erawh London chuan Brussels a chhun luh a ngai dawn ta lo. Chutih rualin EU ram 27 zeta sumdawnna-exports & imports a tih thinte leh free-visa etc tih velah an buai phah ve tan dawn a ni.

Advertisements
Aside | This entry was posted in Uncategorized and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s