RODRIGO ROA DUTERTE

Author : RK Lianzuala

Kan kawmchhak, Philippines ramah khian President thar, maksak zet an nei thar pek a, a hming lemah ‘Hremtu’ (The Punisher) an ti! An President 16-na a ni a, Kan remna ni-ah khan pisa a luah țan. Kum 71 lai, ukil hlui a ni.

Duterte hi term 7 (kum 22 chuang), Davao City Mayor a ni tawh a, a hmain ViceMayor leh Parliament (Congress) member a ni tawh bawk. Davao City hi ‘tualthahna khawpui’ an tih khawpa khawpui țawp leh rapthlak a ni a, dan a awm lo va, tualthah, ruihhlo tawlh rûk, misual pawl ralthuam nei, a chhia zawng zawng awm khawmna a ni. Duterte-a’n kum 20 chuang a’n enkawl meuh chuan ‘Asia chhim chhak biala khawpui ralmuang ber pakhat’ a ni ta a, numbeo.com pawhin khawvela khawpui him 4-naah a dah ta. Miin hna an thawha thil danglam theihzia hi a mak ti rawh u? Beihpui a thlâkna kawngah hian Duterte hian dodalna pawh a tâwk nasa kher mai. Media leh Philippines National Police hotute pawhin an sawisel nasa. Mahse a hnathawh hi a sâwt tih khawvelin a hre miau a, President thlanna chuh tur pawhin vawiduai lo an thlem a, mahse Davao a enkawl fel hma chuan a bengkhawn ngai lo.

Nikum November ni 21 khan kumina President thlanna a chuh ve tur thu a puang ta a, an han inthlan chuan kum 6 chhung President atan hneh lutuka thlan tlin a ni ta mai reng a ni. Kumin May ni 26-a vote an han chhiar chuan Duterte hian vote 1,66,01,997 a hmu a, amah hnaih bertu, Mar Roxas a khûmna ringawt pawh vote nuai 66 zuk nia! Davao siam țhat tuma a beih tak tak lai chuan motorcycle lianpuiah, siren tiri lovin, M16 rifle kengin a hote nen an tleh dùl dùl mai a, TIME magazine-ah pawh tarlan hial a ni. A chang leh taxi-a chuangin a kal kual a, ruihhlo zuar lui leh hmang lui tlat chu tihhlum pawh a hnial lo. A nghei duhte tan an pawisa, Peso mtd. 12 séngin ‘Rehabilitationand Treatment Center’ a din a, kum 2003-ah khan ruihhlo ngai, simna thinlung pu-a amah pante chu thla tin, Peso 2,000 a pe mai bawk.
A hnathawh dan buru tak hi an hriatin President hlui pali – Fidel V. Ramos, Joseph Ejercito Estrada, Gloria Macapagal-Arroyo leh Benigno S. Aquino III khan Home Minister (Interior Secretary) atan an sawm vek a, a hnar fithla vek.

Kum 2014 April thla khan World Mayor Prize pêk an tum bawk a, ani chuan ‘Chawimawina ka dawn chhan tur a awm lo, ka hna ka thawk mai a ni” zuk tia mawle! (Unaute u, kan va inang lo em! Mizo zingah hian engmah thiam belh uk si lova ropui châk avang ringawta doctoral degree lem deuh deuh dawng leh lei hi engzatnge awm tawh?) Davao City Council chuan thupêk khauh tak tak hi an chhuah reng mai a, zing dar 1-8 inkara zu hralh, lei leh in an khap a, khawpui chhunga motor tlan chak theih dan chin an bituk a, mei zûk leh halpuah hàl khapna te…. a tam lutuk.

Thupêk an chhuah ve satliah lo, an bawhzui!
Lalberin chuti taka bei ta na na na chu, dan bawhchhiatna, kum 1985 chho vela mi 1,000 zela za chuang tlingțhin kha, kum 2000 chho-ah chuan mi 10,000-ah 0.8 ah a tla thla ta daih mai a, nikum April ni 30-a Numbeo.com report-ah chuan, Davao hi khawvela khawpui him zual 9-na a tling hman a, thla hnih a liam leh hnuah 5-ah a chho a, a hnuah 4-naah a chho leh bawk. Chutiang chuan mi pakhat avangin khawpui ralți leh țawp hmingthang, Davao chu a letlinga khai ang a lo ni ta.

Ningani kal ta khan Manila-a Malacañang Palace-a Rizal Ceremonial Hall-ah President atan lakluh a ni ta a, a fanu kensak Bible nem chungin thu a tiam. Chumi ni la la chuan (inchibai khawtlai ringawt lovin) Cabinet meeting hmasa ber an nei nghal a, an thurelte chu –
☞ Ram pumah lungawi lo apiangin an thlenna tur, Complaint office, chhun zan zawma hawn,
☞ Kum 2013-a thlipui, Typhoon Haiyan tuar, la chhawmdawl mumal lohte dinhmun enfel,
☞ Manila-a Ninoy Aquino International Airport lùn lutuk tihziaawm nan ram chhung hmun dang pan nan Clark International Airport hman lailawk a, țumhmun thar siam belh,
☞ Amah leh Cabinet Minister-te pawh mi naran chan ve loh duhsakna engmah pe lo tura Civil Aviation Authority hriattir (hawrawppuia chhut ka va châk ve! Lengpui țumhmun hulhliapah tak ngial pawh tlan lût thei lo, mi narante aiawhin!),
☞ Mipuite hriselna atan Cuba rama an tih dan entawn nghal turin Health Secretary, Paulyn Ubial tirh liam nghal,
☞ Internet hmanga pawisa khelhna tihtawp dan tur (Mi retheiten lei rem an rah nan pawisa kan sem ang, tih a va tel lo ve, Pu Duterte!)

Ngawi r’u…. sei tawh hle mah se, President atana lakluh a nih hnu chiaha a thusawiah chuan –
” Hlemhletna te, dan bawhchhiatna leh ruihhlo dona kawngah hian tha thlah lovin, dimdawina tel lovin hna kan thawk dawn a, heng zawng zawng hi kan ram mipuite rilru put hmang fel lo, natna chi khat lo lan chhuahna a ni. Kan mipuiten an hruaitute an rinna pawh a ngêt tawh tih ka hmu a, dan hmanga rorelna pawh an ring ngam tawh lova, nuam zawka khawsak nan te, himna leh hriselna atante pawh sorkar hnathawkte an ring tawh hek lo…. retheihna leh intluk tlàn lohna nasa lutuk hi mipuiin an kham tawh a, lal leh thuneitute inlek velte hi an ning… (Haleluiah! … Awh khaih) .. Ukil ka ni tawh a, dan ka hria a, a him chin pawh ka hria. Ram tana țha turah chuan dan ka bawhchhe lek lek fo dawn a, mi tih dang anga zei tak leh fel taka che turin min beisei suh u….”

President lâk luh ni-ah hian an mi sawm, 627 tan ni danga zanriah ropui leh ‘MLPC’ a awm lo! Hna thawh dan tur an ngaihtuah a, an puang nghal a, an bawhzui nghal sup sup mai a ni. ‘Kar a hla, di bawihte’ tih hla kha i lo sa ang u!

Advertisements
Aside | This entry was posted in Uncategorized and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s