Benghazi Scandal chu eng nge a nih

Benghazi Scandal chu eng nge a nih a, Hillary Clinton-i tân a hmelma lian ber a lo nih tak mai ? E-mail buaina, a pawi vawng vawng !

Sept 11, 2012 : Tlai lam khua a duai ruai tawh a, Libya ram leilung pawh khaw lum lutukin kiansanin America palai rual, Benghazi hungchhûnga chengte pawh an nileng hna zovin hahchawlh zai an rel ṭan tawh a. Zan lam dar 9:40 bawr velah chuan ‘Allahu Akbar’ tia authawmin US Consulate lam a rawn pan ta! Silai leh ralthuam ṭha pui pui keng, hmaikawr maksak tak tak nena inthuam mi 125 aṭanga 150 vel chuan inrinlawkna awm miah lovin US mi leh sate awmna hmun chu an rawn bei ta a ni.

Vawilehkhatah bomb puak thawm leh silai puak zawt zawt thawm hriaiin thawm a han reh meuh chuan Islam firfiak pawltevangin U.S. Ambassador J. Christopher Stevens leh U.S. Foreign Service Information Management Officer Sean Smith-ate chuan an nunna hlu tak an chân der a! A tuk zing dar 4 bawr velah Benghazi Consulate aṭanga CIA mi leh sate awmna hnaite chu mortar silai hmanga beih leh a ni a, CIA contractors Tyrone S. Woods leh Glen Doherty an boral a, midang 10 te chu nâ taka hliam an ni bawk a ni.

Libya ramah US a lut e :

Kum 2011, February aṭanga Libya rama Libyan Revolutiona chhuah ve leh khan US chu Libya ramah a inkhuar ve nghal a. Indo chhûng hian Delta Force te chuthil thlithlai tura tirh an ni ta bawk a ni. Engvang nge? A chhan chu Al-Qaeda member Ansar al-Sharia an lo enthlak lawk tawh vang leh Libya ram enkawl tura an duhzawng mi leh sate an tundin theih nân a ni. Syria rama ralthuam a ruka thawn luh nân Libya hi an hmang ṭangkai vang pawh a ni.

Hlauhawm a hnai e :

Libya rama US a inkulh ngheh viau hnu hian April 2012 khan Benghazi Consulate-ah hian puak thei bomb vawm luh a ni a. A hnu ni li-ah International Red Cross office beih a ni bawk. June ni 10-ah British Ambassador Dominic-a chuan amah thah tuma beihna lakah damin a chhuak mial a, June 18 ah Tunisia Consulate beih a ni zui bawk. Heng buaina thlengte hian US State Dept a kai harh zo si lo!

Hlauhawm ngaihthah :
Heng warning sign hi hmuin hre reng mah se, US chuan a palaite himna turin ruahmanna emaw security lama ṭanlakna emaw a nei chuang lo! U.S. security officer Eric Nordstrom-a chuan State Dept hnenah venhimna kawnga ṭanpui vawihnih lai dil mah se, pêk a ni lo bawk! US State Dept hi khawvel hmun hrang hrang 275 hmuna an palaite 6000 chuang enkawl a, venghimtu an ni a, an hotu ber chu US Secretary of State niin hemi hunlai hian Secy chu Hillary Clinton, tuna Democratic Party Presidential Candidate hi a ni ta a ni.

Thil an theihnghilh ve mai mai ngai lo :
US hian India leh Mizoram ang lo takin thil hi an theihnghilhin an inngaidam ve zung zung ta lova ni! Hotu chan a chanlaiin a mi leh sate himna kawngah nasa taka dawngdah leh hma pawh la lovah an ngaih mi chu an rampum enkawl turin tunah a inzuar ta hi Mizoram angin an enliam ve mai mai thei ta tlat lova ni! Islam firfiak pawlte chetna a ni si a, engah Clinton-i career a nghawng daih a?

Obama Administration :
Tun thlenga Official Investigation tak tak zawh a la nih loh chhan chu Obama Administration aṭangathawhpuina an hmuh ṭhat loh vang leh Clinton-i nikhua loh vang tiin United States House Select Committee on Benghazi Chairman Trey Crowdy chuan a sawi a. Freedom of Information Act hmanga thlalak ka tarlan hi dil a ni a, a tirah pêk a ni lo! Lawsuit, Dept of State lakah pêk anih hnuah heng thlalakte hi pêkchhuah an ni ta chauh a ni.

Documents hmuhchhuahte chu :
Investigation tih a han ni ta a, hlauhawm a hnaihzia leh venhimna kawnga thuamṭhat an ngaihzia ziaka State Dept hnena ngenna lut an hmu ta ṭuk ṭuk mai a. Heng ngennate hi chhan ni se, mi pali nunna kha hloh a ni lo mai thei. Kan mi leh sate himna hi ka kuta awm a ni ti si khan Benghazi hnaih bera US thlawhna awmna chu Italy daih a ni si! Benghazi-a kan awm chhan hi Politics thil liau liau niin National Interest a ni lo tiin chhuahchhal Clinton-i hian a tawk hi a mak lova ni.Hei vang hian mi tam takin Clinton-i hi America enkawl tur atân mi tam tak chuan an duh lova ni. Mawhphurhna hlen zo lo mi chu an ram hruai turin an duh lo êm êm hi America kan entawnna lai ni se ka va duh ṭhin tak êm!

E-mail buaina a neih hi :
March 2015 khan Clinton-i hian Secy of State anih chhûng khan State Dept official email hmang lovin ama laptop aṭangin an chhûngkaw email server chu inbiakpawh nân a hmang tih hriatchhuak a ni leh ta! Email 1200 chuang, Iraq indona kaihhnawih chu Wikileaks chuan a tarlan piahlamah lehkha pawimawh phek 50,547 zet mai June 2010 aṭanga Aug 2014 khan a laptop-ah hmuh a ni ta bawk! Assange-a chuan nakin lawkah hêk anih ngei ngei theihna tur thil a la rawn tarlan dawn thu pawh a la sawi ang deuh deuh!Secy of State in private server hman hi dan lo chu a ni hauh lo, mahse sawrkar thuruk pawimawh chu awlsam taka hack theih anih avangin ram himna kawngah hlauhawm thleng thei anih avangin an ngai pawimawh ta a ni zawk. Donald Trump-a phei chuan Jail-a tang ngei ngei tur a ni, a ti bur tawh a nih kha. Tun ang inthlanpui hnaih hunah hian i beihpui hmingchhiatna zawna, mipui i lama hip chu chance ṭha lutuk anih avangin awlsam takin Clinton-i hi he buaina lak ata hi a talchhuak thei kher lo mai thei. I lo thlir zui zel teh ang u.

Advertisements

About Mizo Archive

I'm the one who collect the best writings of Mizos
Aside | This entry was posted in World News and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s