MAIMIZIAL AȚANGA HARHCHHUAH DAN THURUK PARIAT CHU

POSTED by Joseph Lr Kop Chhangte On July 6, 2016

  • Maimizial tih reh dan

Zanlaiah i mu lai i țhanharh hlawl a, i taksa chu rit deuh lûkin i hria a, i âwmah engemaw takin delh bet che in i inhria a, hlauhna țihbaiawm takin i thau a rawn man nghal chat a, chutah le.. i hma-ah chuan palian pui rapawm zet mai ding luau i hmu a, emaw i nghawnga rêk tu che adt an awm tlata hriatna i nei a, auchhuah tumin theihtâwp i chhuah a, i awrâwl rêng a chhuak thei silo. I taksa chu kaih ang maiin che thei lovin a awm a, i thochhuak thei lova, i rilru erawh a harh fim kura, mahse i thil tawn rapthlak tak ațang chuan i talchhuak thei der bawk si lo.

Hetianga i awm a nih chuan sleeping disorder chi khat ‘sleep paralysis’ i nei tihna a ni a, Mizo țawngin a awmzia chu ‘mut zengna’ tih a ni mai a, mahse “Maimizial” tiin a sawina țawngkam kan nei a ni. Kan pipute khan huai chikhat mumang lama inlar țhin ‘Maimi’ hnathawh-ah an ngai a(?), hetianga an awm hian ‘Maimi in min zial’ an ti țhin a, chuta țanga he țawngkam hi lo piangchhuak a ni awm e. Khawvel ram hnam hrâng hrâng pipu thawnthu-ah pawh Maimizial hi ramhuai/thlahrang(demon and ghost) hnathawh-ah an lo ngai ve fur hlawm tho mai.

Mithiamte sawi dan chuan Maimizial hi thazâm/tihrawl(muscle) kal vel țhuanawpna avangin a rawn awm țhin a, mutchhuakin min zem țiam țiam lai, harhna leh muthilhna inthlakthleng tur lai vel takah a thleng châwk țhin an ti. Taksa rimtawng lutuk avangte, depression avangte, mut tlem luat avangte, doctor chawh damdawi ei lai(prescribed drugs) avangte, taksa chaklo avangte leh tunhnai-a an hmuhchhuah belh pakhat,inthlahchhawna/chi ațanga inkai (genetic) ațangin a neih theih an ti bawk a ni.

Awle Maimizial ațanga harh chhuah dan thuruk chu hei hi a ni e. Heng te hi lo vawng kiau la, Maimizial i neih hunah lo apply ve thawr chhin teh, kei ngei pawhin țhenkhat hi a takin ka hmang țangkai tawh nghe nghe a ni.

1. SÛAL LET CHIAM SUH:
I taksa chu thil rit takin bawh bet tlat che in i inhria a, mahse bei let chiam suh ang che. Pawng tal chhuah i tum vak vak khan i rilru a mangang tulh tulh dawn a, ibuaina a zual ting mai dawn a ni. Hlauhna i in hneh tir loh a pawimawh. Rilru fim takin hlauhna thunun tum la, chiai miah suh ang che. Maimizial avangin a thih theih loh.

2. INPE HLÂWM RAWH:
Hei hi a taka apply harsa tak a ni. Talchhuah tum lovin i taksa chu surrender tawp la, “Maimizial mai mai anih hi, a reh veleh mai ang” tih ngaihtuah chungin, hahdam(relax) takin awm tum la, a zial dan ang ang che-in inpe hlâwm tawp mai rawh. Thahrui hmang miah lova indona-a hnehna changtu ang mai i ni dawn tihna a ni.

3. I KEZUNGȚANG CHET TIR TUM RAWH:
He tactic hi kan hman tam ber a ni hial awm mange. Maimizial-a kan awm hian kan dul, awmbawr leh hrawk bawr vel hi kan taksa a zenna hmun a ni chawk a, i rilru zawng zawng i ke hmawrah sawrbingin tih chet zeuh zeuh tum rawh. He tactic hi Maimizial tam takah chuan a thawk a ni.

4. I KUT HUMRUHIN PHARH LEH ȚHIN RAWH:
Naute thiam thil thar zirtir na’n ‘tumbailek tumbailek’ kan țih țhin ang deuhin, i kut chu humruhin pharh leh țhin la, chutianga i tih i tih chuan i harh chhuak hlawl mai ang.

5. I THÂWK LÂK AH RILRU SAWRBING RAWH:
Hlauhna-in min rawn țham er er a, kan thâwk pawh kal buaiin a sak țalh țhin. I thâwk lâk ah i rilru sawrbing la, boruak hip lut vâng vângin thawchhuak leh halh țhin la, chutianga i tih chuan rilru hahdamna leh thlamuanna i nei anga, harsatna awm lovin i lo harhchhuak leh thei dawn a ni.

6. I MUTPUI HNEN AȚANGIN PUIHNA:
Mutpui i neih chuan emaw pindan țawmpui i neih chuan i dinhmun hriattir la,i thaw ri a pangngai loh emaw i rum chhuah țuah țuahin sâwi harh tur che-in hrilh lâwk rawh.

7. KHUH(COUGH) TUM RAWH:
Mak tak maiin Maimizial ațang hian a in khuh harh theih. I khuh a chhuah kher a ngailo, ihrawk thian karh karh emaw khuh chhuah țhawt țhawt tum la i harh nawlh mai ang..8. A tawp ber atan a țha ber kan khek khal a. He tactic hi chu thawk lo theilo, za a za a chiang a ni ziri țhuai mai a ni.
Kei ngei pawhin a taka apply-in ka finfiah ngat tawh a ni. I hmel chu tikawisawiin insiam chhe vel chiam rawh. I ha țhen lang țhu la, i mit ti kalh kual vel la, ner deuh sûng sûng la, rim hria ni awm takin i hnar chu han len kual vel la, i hmui tisawi bawk la, i awmdan khirh tak lak ațangin tihzalenin i awm ngei ngei ang.

Țhahnemngaih luatah kan ziak thui mah mah a, a zavai hi chuan in țangkai pui kherlo maithei a, pakhat tal erawh in țangkai pui ka beisei. Kei hi Maimizial nei nasa tak mai ka ni a, a hrehawm zia ka hrechiang a, keimah anga he harsatna nei ve te ka puih theih mial beiseiin ka rawn thailang ve rawih a ni e.

Source : Dream Studies

Advertisements

About Mizo Archive

I'm the one who collect the best writings of Mizos
Aside | This entry was posted in Health and Lifestyle and tagged . Bookmark the permalink.

2 Responses to MAIMIZIAL AȚANGA HARHCHHUAH DAN THURUK PARIAT CHU

  1. Mapuia says:

    No.8 ka chhiar atang khan , maimizial in ka awm leh chak tawp….😂😂😂

    Like

  2. ZOSANGLIANA says:

    maimizial in Ka awm thin a,engtin nge Ka harh chhuah ang.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s