Roman Catholic leh Milem Biak Inkungkaihna : Pagan sakhuain Roman Catholic chhûng a luhchilh dan ngaihnawm !

POSTED by Lalremliana Pachuau On July 6, 2016

  • Roman Catholic kalsualna
  • Roman Catholic leh milem biakna
  • Sunday serh tanna
  • Bible khuahkhirh
A hmasain kohhran huatna ka nei lo, historical facts ka sawi mai a ni e.

A tirin :
Thup 12 a kan hmuh angin Lal Isua lo piang tur dan tumin Setana chuan Heroda kaltlangin nausen rawtna rapthlak thlenin a rawngbawl chhûng kum 3 emaw lek chhûngin theihtawp chhuahin khawvela a lo kal chhan tihtawp tum mah se, thihna hneha thova, Pa dinglama Setana khawih phak lohva a han chho hnuin Setana chuan Lal Isua zuitute chungah a thinrimna a leihbaw ta a. A hmanrua atân Heroda lalram Rome sawrkar chak tak mai chu hmangin Thup-a kan hmuh angin Lal Isua zuitute thisen chu a luantir ta a ni.

Sakhaw thar a lo piang ta :
Kristiante sawisakna leh tawrhna chuan Christianity chu nasa tak maiin a vawrh lar a, Isua hnungzuitu an pung ta tual tual zawk a. Zirtirte kaihhruaina hnuaiah kohhran chu a ṭhang lian chak ta êm êm mai a ni. AD 306 a lo thlen chuan Rome chuan lal thar a nei ta. Constantine-a chu Rome lal a lo ni ta a. Kross chhinchhiahnaa hmanga hnehna a chan tak zel avangin AD 313 ah lo nih meuh chuan Edict of Milan hmangin Kristian sakhua chu vulh lian zelin AD 380 a lo thlen chuan Emperor Theodosius – I chuan Edict of Thessalonica hmangin Rome sakhuaah Christianity chu a puang ta hial a!

Kristian nih chu vanneihna a ni ta :
Constantine a lalna leh rorelna hnuaiah chuan Kristian ten dinhmun ṭha zawng zawng an chang chho ta a. Court a ni emaw, Lal in a ni emaw Politics thila dinhmun duhawm zawng zawng chelhtu chu Kristian an nih tak avangin Sipai-ah nihna sang i chelh duh emaw Politics thilah i thleng sang duh emaw Rorelna inah dinhmun duhawm i chang duh anih chuan Kristian i nih mai kha a ngai ta a ni. Rome sakhaw betu (Pagan) kan tih maite chuan dinhmun ṭha duhin Kristian-ah rawn lutin an sakhaw serh leh sang chu Krsitian Sakhua-ah thiam takin an rawn la lut ta a ni.

Pagan Temple leh serh leh sang chhawm nunna chu :
Rome khawchhunga pathiam lem an biakna hmun ropui tak takte chu Kristiante Pathian biakna hmunah an hmang chho ta mawlh mawlh a. A hmasa berah chuan Greek leh Rome mite hi Idolatry (Milem biak ngaihsanna) chawisangtu niin an pathiante hi lim siam an uar êm êm tih kan hriain kan hmu ṭhin. An pathian Diana lim chu tichhe si lovin an chei danglam a, Mari limah chhuahin Jupiter lim chu Petera limah thlakin Apollo lim pawh Paula limah a chang chho ta zel a ni. Isis pathiannu lim ang maiin Mary lim an din chuan naute a pawm ta a nih hi!

Isis fapa Horus-a leh Hermis-a lim ang maiin Isua lim pawh an siam a, mithianghlimte lim pawh din zelin heng limte hi chibai an buk ṭan ta a ni. Exodus 20:4 Milem siam chawp leh thil, a anpui reng rêng – chung lam vâna mi emaw, hnuai lam leia miemaw, lei hnuai lama tuia mi emaw – i tân i siam tur a ni lo: tih chu an rawn thlak danglam ta thawk a ni ber. Mary hi bible-a kan hmuh angin mi tinin vannei an la tihtur chauh kha ni siin Veneration of Mary (Mari zahna lantir) chu a takin an han hmang zui ta thuai a nih kha. Pathian tenauah chhuahin mihringte sualna ngaidam theia ngaih a ni zui ta thuai a ni!

Council of Nicea :
AD 325 a an neihah chuan kohhran chuan Mary chu pathiannu nihna dinhmunah pein an chawisang ta a ni! Chumi hnuah Baptisma, kristian ten sual tlenfai nâna an hman, tuia inchiah chu rawn thlak danglam lehin maihunah tui dahin an kut hmawrin tui an khawih a, an chalah a kawkawlhinan thai ta mai a! Lal Isua anga chhia leh ṭha hriat hnua baptisma chang ta lo chuan nausen pianghlim chenin baptisma an chantir ta a ni. A chhan pawh nausen chu a pian hnu lawkah thi ta se, Hremhmun a kal loh nân tiin kristian thurin an thlak danglam ta a ni.

A dawt lehah chuan Lalpa Zanriah ei dan an tidanglam leh ta!
Dawidim tel loh Isuan a hman ang kha hmang ta lovin dawidim telh ngei an hmang chhova, mipui nawlpui ei leh in theihin Lalpa Zanriah chu Pagan dan angin an let leh ta a ni. An puithiamte chuan chhang leh wine chu Isua tisa leh thisenah an chantir thei ta a, mihring chhandamna hmanruaah an chantir ta hlauh mai ani! Min hriatreng nân lo ti ṭhin rawh u, a tih chu chhandamna kailawn pawimawh takah an chantir ta hlauh a ni.

AD 1415, Council of Constane :
Pope John 22 na hnuaiah kohhran chuan Puithiamte chauhin wine an in theiin mipui leh hmeichhiate chuan chhang an ei thei ang tih a ni leh ta a. Lalpa zanriah Isua hova an ei ang kha a ni leh ta lo. Lal Isua thih aṭanga kum 300 n liam meuh chuan Rome Kohhran chuan Thupêk 10 zinga a pali-na chu an thlak danglam leh ta a. Sabbath i serh tur a ni tih a nih kha. Rome hnuaia kristian ten tihduhdah an tawrh lai khan Juda-te hnen aṭang pawhin tihduhdah an tawk ve tho. Chuvang chuan kristian-te khan Jud-te lak aṭangin an inla hrang tial tial ve a nih kha.

Tichuan, kristiante chuan Pathianni kan tihah hian chaw i eiin i bar thei ang a, Inrinni erawh chuan chaw i nghei thei ang tiin thil hriatsual an nei ta tlat mai a. Chu chu milem betute hun hman dan a ni si a, Juda-te kha chu Zirtawpni-ah chaw an nghei a, Inrinni-ah chaw an eiin an bar thung ṭhin. Tichuan, kohhran hruaitu, milem betu ni ṭhinte thu angin milem pathian an biak laia Ni pathian tâna hun an serhhran, Pathian ni-ah Juda-te angin Sabbath an hmang ta hlauh mai a ni. AD 313 a lo nih chuan Edict of Milano hmangin Constantine-a chuan Pathianni chu Pathian biak nân hman tur a ti ta a ni. Lalpa Pathian chawimawina ni ni ta lovin Appolo chawimawina ni an hmang ta a ni.

Purgatory a lo piang ta :
Milem betute thurinah chuan mi an lo thihin an thilsual tih vangin thih hnuah sual tenau kan faina hremhmun a awm a, chutah chuan hreawm tawrh hnuah Vanram luh theih a ni tih a ni a. Zawiin Rome kohhran chuan herinna hi kohhranah la lutin mipui an zirtir ta a. Bible zirtirna ang chuan Hremhmun a tlak tawh chuan chhuahsan leh theih a ni tawh lo tih a ni si a. Johana 5:28 “Heng hi mak ti suh u, a hun a thleng dawn ta, chutih hunah chuan thlana awmzawng zawngin a aw an hria ang a, an chhuak vek ang; thil tha titute chu nunna changing an tho leh ang a, thil sual titute chu thiam loh changing an tho leh ang, tih a ni tawp a, inngaihdam lam a lang lo.

Tichuan, puithiamte chuan mipuite hnenah an chhûngte thi tawh, Purgatory-a awmte chhanchhuah an nih theih nân pawisa khawnin kohhran chuan namên lova tam pawisa a puanhnuai ta a, a hausak phah nasa ngang mai a. Ṭawngṭaina hmanga an chhûngte thi tawh chhanchhuah duh lo mihring awm hek suh, puk leh ba thlauvin kohhranah mipuite chuan sum an chhunglut ta mawlh mawlh mai a ni, inbumna tenawm tak vanga Rome kohhran biak in an cheimawite khu ropui tak an ni. He thil lo thlen chhan bulpui ber chu kohhran a corrupt lutuk vang leh sum a duh lutuk vang a ni a, kalsualna lian tak, sual tinreng bul chu sum tih laka inven zawh loh vang a ni.

Sual ngaihdam theihna an nei ta :
Lal Isua kaltlang lo chuan kan sual ngaihdamna a awm lo tih bible-ah kan hmu a. Nimahsela, Rome kohhran chuan mimalin puithiam hnenah sualpuanna (Confession) a neih chuan a sualte chu ngaihdam an ni, tih zirtirna thar a lo piang leh ta a. Miin a sualna laka chhanchhuah a nih theih nân chuan pawisa tam tak sengin thil ṭha a tih emaw mahni inhremna kaltlanga Pilgrimage (ram thianghlim tlawh) emaw a sual a puan a, fel taka a nun chuan chhandamin a awm thei ang tih a ni ta a. Leia Lal Isua lo kal a ṭulna reng reng a awm ta lo.

Bible khuahkhirhna chu :
Kohhran hruaitu corrupt tak takte chuan heng an thiltih dik lo hrang hrangte hmuhchhuaha an awm lohna tur chuan Bible khuahkhirh chu tihmakmawh a ni tih an hria a. A tirah chuan bible hi zalen takin mi tupawhin an chhiar thei a, mahse hun a lo kal zel a, mipuite chuan an puithiamte chu bible zirtirna chungchangah an kalh ta zauh zauh a. Tichuan kum zabi 5-15 chhûng khan puithiamte chauh lo chu bible chhûng thuken hrilhfiah a, sawifiah tura tling (qualify) an awm lo tiin mipui nawlpui tân bible chhiar emaw zir emaw a rem ta lova ni.

Ni pathian chhinchhiahna :
Christian an nih hma chuan Rome pathian pui ber chu ni pathian a ni. Chu ni pathian chuan lem (symbol) a nei a. Chungte chu hmuh theih turin Berlin Cathedral, St Peter Basilica, Milan Cathedral, Church of The Gesu, St Vitus Cathedral, Basilica of St Antonio, Bulgarian Orthodox Church, Church of Santa Maria di Nazareth-ahte chuan ni pathian chu Isua lu-ah remchang takin an tarlang ta zel a ni.

Pagan (milem betute) serh leh sang lakluh chu :
AD 300-ah Hremhmuna hrem tuarte tâna ṭawngṭaina a ching ṭan a.
AD 320-ah Sathau khawnvar hmanga chibai bukna lachhawng lehin
AD 321-ah Sabbath serh leh sang a titawp a.
AD 325-ah bible-a Kalhlen Kût tibangin,
AD 354-ah ni pathian piancham Dec 25 chu Christmas ni-ah puangin
AD 375-ah mithianghlim thi tawhte chibai buk a ching thar ṭan a.
AD 431-ah Mary chu Pathian nu (mother) nihna pein chibai a buk ṭan a,
AD 600-ah Mari, Mithianghlim thi tawh leh vantirhkoh hnena ṭawngṭai a vawrh lar a,
AD 709-ah mihringte ke fawh chu dânah siamin,
AD 890-ah Isua pa, Josepha chu chibai a buk ṭan ta a ni. Heng thilte hi sakhaw lam kaihhnawih ni lo, khawvel thil angah chhuah an ni ta thuai zui a ni.

Thiltithei ropui Roman Kohhran chu :
AD 493-ah Heruli, Eastern Roman Empire puihnaa Rome kohhran dodaltu chu a hneh a. AD 496-ah France lal Clovis-a chu Catholic-ah inlehtirin Politics leh Sakhua-ah hotu nihna a chelhtir a. AD 534-ah Roman Catholic Church dodaltu Vandals hnehin a awm a. AD 538 ah amah dodaltu Ostrogoths hneh lehin AD 754-ah Vatican chu State a lo ni a, khawvela ram tê ber a lo ni ta a ni.

Pope thiltihtheihzia:
Pope Gregory – VII a hunlai khan he Pope hian “mi tumah, he khawvel damlai mihring zingah Pope hi endik a, a chungchang thua thutlukna siam thei an awm lo” tiin lalte leh roreltu tupawh an lalna ata a paihthla thei a ni, a lo ti tawh a. Henry IV a chungchang thuah hei hi a chiang ngang mai a. A lalna ata paihthlak a nih dawn khan Canossa (Germany) hmuna awm Pope Gregory hnenah hian ngaihdam dil turin a va kal a. Ni thum chhûng Pope awmna Castle pawnah, ke lawngin Pope hmuh dilin kawngka kikin a ṭhingṭhi a. Hei hi Humiliation at Canossa Incident an tih hmingthang êm êm kha a ni.

A dawt lehah chuan Roman Catholic kalsualna hrang hrang, Pope thuneihna hmansual lianpui pui kan tarlang leh dawn nia

Advertisements
Aside | This entry was posted in kohhran and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s