Church History – II Roman Inquisition, Dark Ages & Reformation

  • Roman Catholic hnuaia tihduhdahna
  • Inquisition awmzia
  • Roman Catholic in a tihsual
  • Protestant lo chhuah chhan
Thuhma :
Kohhran History kan en a, Roman Catholic kohhran chhûngrila thiam taka Setanan bu a khuar dan chu ngaihnawm, hmelmapa finzia tarlanna anih nen mi ṭhenkhat chuan khatih hunlai khan kan lo kalsual a, Pathian chakna nen kan dingchhuak leh ta zawk a ni tih tum
ahnek a, history, duh hun huna chhiar tur awm thailan chu kohhran erna emaw sawichhiat tumna emawa ngai tlat kan awm hian kan hnam la naupanzia leh critic (faksel) leh Scholar Debate kan la dawl lohzia a tarlang chiang hlein ka hria.

History chu ziaktu an tam a, ziaktu an tam ang zelin thu pawh a tam. History kan tarlana chu a dik lo ti chung si a, a dikna sawi thei chuang si lo, chumi chuan chutiang zawk chuan a ziaka tih pawh sawi tur hre chuang si lo khawpa History hre lo ber berte chu hnialtu pawr pawr, mit fim taka laka mawl chhah chhah an ni tih pawh inhre si lo an ni a. Inhnialna a awmin hlawkna kan chhar theih nân chuan inhnialna awmze nei kan hmang tur a nih laiin Mizoram ṭhalaite hi rin aiin kan hriatna a lo chhah tawk lo hle tih pawh a lang chiang hle bawk.

Kan kohhran a nih tak avanga hmâna dik lo taka kan lo kal tawhna pawm thei lova, thudik pawh dawn pha lova kohhran ṭan kan ti nâ a nih vaih chuan Pathian ni lovin kohhran bia kanni tihna tluk chauh a ni ang. Khawi kohhran pawh kalsual palh thei vek an ni a, an kalsual nawk reng a. Chung an kalsualna atang chuan kawng dik zawhin tunhma angin an chetsualna ah an chesual nawn tawh lo ṭhin a ni zawk ngai a. History hmangin ram a inzir a, kohhran pawh a harhchhuak ṭhin. Chutih laia History sawi pawh phal lo, tarlan pawh remti lo mi chu mi pangngai nihna pêk chi a ni lovang.

Holy Inquisition :
Roman Catholic History-a lar êm êm chu Inquisition hi niin chu chu “inenfiahna” tiin kan dah thei ang. Mahse, Catholic kohhran chungchang kan sawi avangin Roman Kohhran atanga rinnaa kalpengte hremna ngaihtuahtu pawl tiin sawi an ni thung a ni.

Roman kohhran mi leh sa, an rinna kawnga peng (heresy) te chunga hremna an lekkawh dan hi a rapthlak a, nunna pawh an la nasa hle reng a ni. AD 1231 khan Pope Gregory IX chuan Papal Inquisition hi a din a. A tirah chuan Cathari leh Waldenses mi leh sa, rinna kawnga kalpengte bitum tura din niin a hnuah chuan dawithiam te, Pathian sawichhetu leh midang dang an bitum zui ta a ni. Medieval & Spanish & Portuguese Inquisition, history kan en chuan kan hmu thei ang.

Medieval & Spanish Inquisition :
Thuneihna sang tak neiin kohhran mi leh sa tupawh Heresy a puh an nih chuan a tirah Inquisitor hian a va zawng chhuak thin nangin rei rial lovin chutianga puhna tawkte chu koh thei turin thuneihna pêk an ni ta thuai a ni. Cathari leh Waldenses mi leh sate hi France rama cheng niin Rome kohhranin sakrament a kalpui dan chu dik tawk lo leh bible thu angin Pathian thu an sawi lo an tih vangin Heresy a puh tawkin Pope Innocent-a thuin a Crusade hmanga beih an ni. Kum zabi 13-na lai vel khan Cathari-ho hi maktaduai 4 chuang, khawpui 1000 chuanga khawsa an ni a. Heng mite thah chimih tuma an beihna hi a rapthlak hle a, hmun pakhatah phei chuan mi 1000-2000 chuangte chu a huhova thah chimih vek an ni – Michael C.Thomsett – The Inquisition – A History

Hemi chungchang hi Pihilip Schaff, History of Christian Church chuan ti hian a sawi nghe nghe a ni.
Naupang leh hmeichhia pawh thliar hran an ni lo. Biak in bangte chu inhumhim nân an tlak lohva, St Magdalen chhûngah ringawt pawh mi 7000 tihhlum an ni, tiin. Tin, Catholic puithiam 140 laite chu a nung chunga halhlum an ni bawk. An mi mante beng, lei leh hnarte chu tansak vek an ni bawk. A History of Christian Church ziaktu Williston-a chuan hemi chungchang hi ziakin, Pope Innocent-a hmalakna avang hian kum 20 (1209-29) chhûng inpawng thahna rapthlak thlengin Chhim lam ropuina chu chhe vekin khawpui leh thingtlang khuate pawh sawpchhiat vek an ni, tiin.

An che nâ tulh tulh :
Pope Innocent – IV a hnuaiah phei chuan a hma zawng aiin an nunrawngin an hmanraw chelek pawh a rapthlak zawk a. Ani hian nunrawng taka insawisak hman a phal ta a. Bible Believer tiin bible zirtirna pawmtute chu hetih hunlai hian koh an ni a. MNF in zalenna a sual lai a, Kawktu an awm ang mai khan ngeih loh leh huatzawng apiang mai kha Heresy-a puh an ni ta sup sup mai a. Nunrawng taka insawisak chu 1259-ah Pope Alexander – IV leh 1265-ah Pope Clement – IV te khan hman chhunzawm an remti zui ta zel a ni. Conrad of Marburg chuan puhna tawkte chu rang taka an confession lain a nung chungin a hal hlum a. Archbishop of Mainz-in hemi chungchang Pope Gregory IX hnenah a va report a, Pope chuan Conrad-a chu Champion of Christian Faith tih tawh tur a nih thuin a lo chhang!-
Michael C.Thomsett

Inquisition awm chhan :
Historian tam takin ziak chiah duh lo mah se, an thuziak atanga lang chiang êm êm chu Pope hiana thuneihna leh lalna tichhe thei emaw hlauhthawnawmna dintir thei an ngai thei lo tih a chiang êm êm a ni. An thu leh hla hnial emaw dik lo ti emaw an awm an duh loh avangin he Inquisition hi awm a ni tih hai rual a awm lo. Tin, Italy rama Protestant darh zau tur dalna hmanrua dik tak a ni tiin Jeremy-a, Galileo-a chungchang ziaktu chuan a sawi bawk. Italian Philosopher leh Scientist Giordano Bruno chu Universe hi tawpchin nei lo leh lai bik nei lo a tih a ṭanchhan vangte leh Catholic doctrine hrang hrang pawm lova ngaih a nih vangin hal hlum a ni a. Galileo-a pawh Leiin Ni a hel tih a sawi an duh loh avangin an pawm dan thlak tirin a thih thlengin House Arrest a ni. France chhanchhuaktu Joan of Arc pawh dawithiama puh a nih vangin hal hlum a ni.

Halley’s Bible Handbook ziaktu Henry H.Halley chuan, “Inquisition kha mihring chanchin liam tawhah chuan a chhe zawnga hmingthang ber leh ramhuai zia dik tak, Pope ten an duanchhuah leh kum 500 chhûnga thuneihna an chan theih nâna an hman a ni” tiin a ziak hial a ni. Museum of Torture, Rep of San Marino hmunah heng hunlaia mi an sawisakna hmanraw hrang hrangte hi tarlan an ni a, an hmanraw hman duhzawng rapthlakzia atang ngawt pawh hian Devilish a lo ti hi a awm hliah hliah a lo ni. Heng hunlai chanchin hi chipchiarin sawi dawn ta ila, Catholic tân chuan beng hupa tlanchhiat vang vangna tur khawpa ngaihthlak nuam lo leh chanchin rapthlak sawi tur a awm thei ang, mahse kan duhtawk ang. Spanish Inquisition hi chu khatih hunlaia Protestant, sorcery, immorality, blasphemy, Judaizing leh witchcraft bitum tur bik deuha duan an ni thung. He hun thimah hian mi engzat chiah nge boral hriat fak a har a, mi 3000-10,000 vel hi tihhlum niin mi nuai 1-1.25 vel chu Tan In lama boral an awm an ring deuh ber a ni.

Reformation :

Kum zabi 16 na a lo thlen chuan Europe-ah Siam Thatna a rawn thleng ṭan ta a. Protestant Reformation hi Revolution ropui ber pawl niin History ziaktute chuan an sawi ṭhin. A chhan pawh Europe sakhua, politics, nunphung thar leh finna lama harhna a rawn thlen vang leh Europe hmelhmang a thlak danglam vang a ni. Wycliff-a, Peter Waldo leh Jan Hus-a ten nasa taka hma an lo lak tawhna chu chhunzawmin Martin Luther-a te, John Calvin-a leh Henry VIII te chuan Pope thuneihna chu sawiselin kristiante nundan tur an duan chungchang thuah zawhna an rawn nei ta a. Heng hunlai hian Europe-ah sakhua pakhat awmin Catholic an ni vek a. Mi ṭhenkhatte chuan kohhran chauhin bible sawifiah theihna a neihte pawh an rawn sawisel chho ta a ni.

Germany :
Luther-a hian Catholic puithiam ten chhandamna lei theiha an zuar leh inngaihhnathiamna lehkha lei theih chu sawiselin mipui nundan tur sawifiahna awm si lo chu a ngai theilo hle a. He lehkhaah hi chuan an chhûngte thi tawh chhandamna an lei thei a, hma lam huna thil tihsual palh laka invenna niin hei hi Catholic kohhran kalsualna a ni tiin Pope hian Purgatory chungchangah thuneihna a nei lova, mithianghlimte hamṭhatna hian ṭanchhan a nei lo tiin aw a chhuah ta a. Theses 95 kan tih mai, Catholic kalsualna chu Wittenburg biak inah a tar ta a ni.

Hengte avang hian Roman Emperor Charles V hmaah inlan tura koh a ni ta a. 1521 ah Diet of Worms hmunah Luther-a hi Charles V hmaah a inlan a, engmah a sawi ve hmain Heretic-a puh niin thiamthu pawh sawi thei lovin an tantir ta nghal a. A thu zuk tir an tum ngial pawhin bible thuziak ang a nih loh chuan a thu zuk a tum loh thu a sawichiang ta a. Gutenberg Printing Press din thar chu nasa taka hmang ṭangkaiin Catholic kohhran dik lohna leh ama thu leh hla chu a theihna hmun hmunah a thehdarh ta a. Reformation thupui ber chu Kohhran Then Thianghlim leh Bible zawk, Kohhran kalphung ni lo, chu Thlarau Thuneihna hnâr a ni tih a ni ber. Luther-a hi Friedrich, elector of Saxony chuan humin Bible chu German tawngin a letling chho ta a ni.

Switzerland lamah John Calvin-a hnuaiah Reformation hi neih niin he hmunah pawh hian hlawhtlinna siam ṭhatna hian a chang chho zel a. England lamah pawh Henry VIII a hnuaiah siam ṭhatna hi vung taka kalpui a ni bawk. Sum siam nân Catholic puithiamte thil hman duh lohna leh an kalphung nghet an lo neih duh lohna chu hmun tinah a lian chho zel a. Kum 1525 khan Protestant ti thumal hi lam rik a ni chho ta a. Germany lamah chuan diet of Speyer chuan sakhaw thlak danglam phal lohna leh catholic kohhran tundin lehna tur hmalakna a nei ta a. Hemi duh lohna aṭang hian Protestant kohhran hi a lo piang ta a ni.

Roman Emperor Charles V chuan a theihtawpin France leh German ramah Catholic tundin tumin hma a la a. Leh lamah Germany lama rawn luh tum Muslim a do a ngai bawk si, German lalte puihna a han mamawh leh rih si a. Charles V hian Muslim lam a do zawh hnuah Protestant-ho chu do hneh bawk mah se, Reformation Movement erawh a chhumit thei ta lova ni. Peace of Ausburg of 1555 ziah a ni a, chu treaty chuan Charles V chu German state tina roreltu turah Catholicism emaw Lutheranism emaw thlang turin a dang chep ta a ni.

Heng thil zawng zawng a thlen tirh leh laihawl lai pawh khan Catholic kohhran hi a che muang ang reng khawp mai a. Movement satliaha an ngaih kha a nghawng an han hriat chuan hma an lo la duai tawh si a, an kalsualna laka hmalakna pawh kum 1545-1563 khan Council of Trent hmangin an siam ṭha ta chauh a. He council hmang hian khawlo taka dan an hman te, hmanlai rindan leh pawmdante chu an siam ṭhain kum zabi 16 a han tawp meuh chuan Catholic kohhran chuan Protestant laka a mi leh sa a hloh tam tak a hmu kir leh hman a ni.

Khaikhawmna :

Ni e, Roman Catholic din tirh buai nuaih kârah setana inrawlhin ringlo mite tihdan leh kalphung lalutin kohhran pawh nasa takin a kalsual hman a. Mi tam takin an in leh lo, an nunna an chân a, sum leh thuneihna a duh luat avangin mawi leh mawi lo pawh dawn lovin kohhran a kal tih hi tuma phat theih loh, thudik tak a ni. Nimahsela, Pathianin a kohhran a ensan ngai lo tih kan hria a, tunah hian mi leh sa tluklehdingawn khat chuang nei hian a mihringpuite tân tha nasa takin a thawh a. Ṭam a enkawl a, damlo a chhawmdawl a, khawvela muanna a awm theih nân hma a la tih kan hria e. Bible thu ang lova an kal leh hun hun chu an kalsual leh hun a nimai dawn tih pawh an hrechiang tawh ngei bawk ang.

Heng thute hi hriatna a lo zauh a, sualin kohhran a beih dan kan hriat nâna ziak ka ni a. Mimal emaw kohhran emaw huat vang ni lovin Catholic Church History ngaihnawm ka tih vang chauh a ni e.

Advertisements
Aside | This entry was posted in kohhran, Thu Ngaihnawm, True Story and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s