Euro 2016 Semi final ah France in Germany hnehin Final an lut

POSTED by Lawmkima Hmar On July 8. 2016

France 2-0 Germany FT
Fra : Griezmann 45’+1 (p), 72′.

Final tluk thuaka boruak nei lian, final khel tur lane lehlam an chhiat deuh avanga final aia hmuhnawm zawk tura ngaih chu Marseille khawpuiah thehdarhin a awm ta.

German lamah centre forward inhliam Gomez aiah World Cup-a goal 10 thun tawh Euro-a goal la thun miah lo Muller chu a hmatawngah a awm a, a hnung dawl turin ball pass tam Tony Kroos, assist lalpa Ozil leh winger tha mi Draxler te an awm.

An hnung chiahah hian midfield luahlum turin damkawr Schweinsteiger leh Emre Can te an awm a, defender inlan thei lo Hummels aiah Howedes kan hmu bawk.

France lamah erawh 5-2 a Iceland an nawp tuma an team ngai chiahin bul an tan leh a, hrem tuar zo Adil Rami leh Kante te aiah Barca player thar Umiti leh Sissoko te kan hmu nawn..Inkhel tan phatah mikhual chunga thatchhuah tum lo French an rawn dawk chhuak nghal a, goal thun tam ber (4) ni mek Griezmann leh Payet te an langsar nghal.

Mahse, French manager Deschamps chuan tihfuh tawk lo a nei, an midfield a ruak a, minute 8 a ral chuan Germany inmual laiah ro an rel tawh.
Tony Kroos chu French box chhungah tlu mah se a beisei penalty pek a ni lova, Ozil leh Schweisteiger ten tha takin pet mahse goal-ah a chang ta lo.
Mual laiah an khingpuite khan lo mahse wing hmang tangkai thin French tan winger tlanchak leh thawkrim Griezmann a rawn lawr thut thin a, thlawptu a tlachham lek lek mai pawha a hlauhawm viau.
Tun tournament-a Zidane nena an tehkhin Payet chuan free-kick tha zetin pet mahse German keeper hlamthui Neuer thatzia pholanna remchangah changin goalkeeper tam zawkin an ben per tur ang chi chu second ball awm lovin a lo man. A ball man (grip) ava nghet tehlul em.

German hmatawng ten Lloris chu awl hman lek lovin an siam a, French tantute lungphu a rang..Ball a chhuak phei zeuh a, Atletico Madrid winger Griezmann chuan tha zetin lei hrulah pet mahse a hmaa ding hi Neuer a ni tlat. Hemi hnu hian Griezmann-a free-kick hlawhchhuah chu World record fee a Real Madrid leh Man. United in an ngam mek Pogba chuan petin Neuer-ah bawk a tawp leh. Counter attack atanga ball la fuh Giroud chuan French hmahruaina goal a thun ngei dawnin lang mahse a ke veilama a pet hi German defender Howedes chuan pui takin dansak.

Keeper pahnih zuang tawn zak zak karah goal awm lovin chawlhlawk an hmang mai dawn emaw tih laiin minute 45-naah captain Schwensteiger chuan Italy an khelh tuma Boateng tih thik niawm hrimin a ban a phar chhuak a, penalty leh yellow card a chawi ta hlauh. Khatiang huna ban phar kha ava tul lo em. Referee thutlukna kha a dik.

Inkhel tan hmaa goal 4 thuna goal thun tam ber ni mek Griezmann lo pen chhuakin Neuer dan hman lohvin French hmahruaina goal a thun. Euro-a goal 5 thuntu Zidane-a goal thunzat a thun ta reng mai.

Second half-ah hma hruaituin goal venhim tumin bul an tan lova, a si phur zawk lahin chhuahbelh hlau niawm hrima mahni chan lama tawmim an thlang hek lo. Goal bul tawn tawnah ball a leng fua fua a,Muller chuan an si phurh a sut teuh hle. Chak tum, goal thun tum, tlawm duhlo inkhel ropui kan hmuh chhunzawm a, hun a kal chak; menrei man ava awm em. Hei lo liama ennawm mak tak a awm chuang dawn em ni?.Darkar khat ralah German defender Boateng inhliam chu Mustafi chuan a rawn thlak. Germany hmatawng ten French defence an thiat teuh thin hle a, defender kum 30 mi Koscielny ke a rim mawlh mawlh khawp. Griezmann a hlauhawm chhunzawm a, an tumpuite tan sa har a tling.

Minute 66-naah Low chuan ‘nawr’ tih thupuia hmangin tlarhnung puithiam Can la chhuakin a nawr lama tangkai Gotze a rawn luhtir, goal thunna remchang nei tha zawk erawh France tho an ni. Payet chuan Neuer tibuai tur khawpin a pet lo thung.

World Cup 1998 a France an champion tuma an captain tuna an manager ni ta Deschamps chuan Kroos & co dangchat turin midfield hnawhchep a ngai tih hriain nidang phak lo Payet a la chhuak a; tlarhnung pui pah turin Kante a rawn dah lut. Pogba a chhuak thui thei sawt.
Pogba hian box chhungah German defender ball chanlai chhuhsakin Mustafi a bum hnuah Neuer tana ban phak si lohvin a cross a, Griezmann chuan tun tournament-a a goal 6-na atan hlap sawt zeuhin goal-ah a chantir.

Draxler chuan tha mangkheng a petin an si phurh a sut then ngei dawnin lang mahse goal chungkham kil a per hlauh, free-kick atangin a thun teuh viau bawk.

Giroud aiah Gignac rawn lutin German captain Schwensteiger aiah rawlthar duhawm kum 20 mi, a khelhna club Schalke in £40m an chhiar mek chu mual chhungah a rawn penlut ta bawk.

Tiatpuia tharum ngah bera an sawi thin German palian rual ten mihang midfielder Sissoko an nawr leng zo lova, French counter attack atan a kila lung tangkai a ni. Griezmann chuan hat-trick siam theihna remchang nei mahse a pet lir ter ter thei chauh a. Hun tawp na’n minute 4 a la awm tihah Cabaye chuan a rawn thlak zui.

Hun tawp dawn a ruaiah German tan Kimmich chuan a lu hman thiamzia tarlang mahse Lloris chuan ropui lutukin a lo dansak a, Gotze goal thun tur pawh engmah lovah a chhuahsak chhunzawm.

A entute tan pawha inthlahdahna hun awm lek lova thiamthil leh fin kherek tinreng hmanga an inbeih hnuah France chuan, kum 2015 friendly match a an hnehna ang 2-0 thovin German rallian tur hi Marseille-ah an lo tukzal ta a ni.

France in chak an phu e.

Advertisements
Aside | This entry was posted in Sport News and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s