Police officer ten mihang tlangval pahnih, Alton Sterling leh Philando Castile te an kah hlum vanga lungawi lo Dallas khawpuia mipui kawng zawh mek kar atangin mihang sniper 2 te chuan police officer te chu hmun biru atangin an lo bitum ve a, heng sniper te hian officer 11 lai an kap fuh a, an zinga 5 chu an thi.
Sterling hi in leh lo nei lova khawsa niin Thawhlehni zing kar khan police officer-in silai a kawl vangin a kap hlum a, police officer hian vawi ruk zet a silai a hmet puak. Castile hi Nilaini khan a bialnu nena an motor-a chuang dun lai dan pangngaia check an nih laiin kah hlum a ni bawk a, hetia police ten an kah dawn lai pawh hian beih lettumna an nei lo va, chhan leh vang awm lovin an kap ta mai nia tarlan a ni.
Heng thihna thleng vang hian U.S rampumah mipui lungawi lo thinrim au thawm a ri chuah chuah a, New York, Atlanta, Philadelphia, Chicago leh Washington DC bakah Louisiana leh Minnesota ah te mi sang rualin kawng an zawh a, nizana Dallas khawpuia lungawi lo kawngzawh mipui kar atangin mihang lam an che ve ta thung a, hmunhim biru chin atangin police officer te hi an lo kap ve ta nghauh nghauh a ni ber. Tunah hian mipui thinrim a sosang chho mek zel a, chi leh chi, hnam leh hnam inthliarna a ni tiin mihang ho mai pawh ni lo, mingo ho te nen police officer te chet danah chuan lungawi har an ti hle a ni.
Dallas khawpui chhung hmun engemaw laiah te chuan ‘bomb’ kam ruk te pawh a awm niin an sawia, ‘bomb’ niawm tak pakhat chu tihpuah niawma tarlan a ni nghe nghe. Buaina hi la kal mek zel a ni.
Police te chuan hetianga police officer kaptu mi 2 te hi an man tawh a ni. Mihang silai keng hi 2 chauh an lo ni lova, rinhlelh 4-na chu amahin a inkaphlum veleh ta!
Mizo Archive 