LUNGLEI CIVIL HOSPITAL-A NAUTE THIH CHUNGCHANGAH NURSE DUTY JAIL-AH KHUNG A NI.

POSTED by Vanneihthanga Vanchhawng On 14th July, 2016

July 13 khan Dr HTC Lalrinchhana CJM Lunglei chuan dt 27/9/2014 a Civil Hospital Lunglei a nausen thih chungchangah hetihlai a Nurse duty Lalbiakdiki w/o Vanlalpeka Ngente Rahsi veng Lunglei chu U/s 304A/166 IPC anga thiamloh chantirin a convict a. Lunglei District Jail, Sazaikawnah khung nghal a ni.

He Nurse hi Sangau PHC a thawklai a ni. Mizoramah damdawiina thihna chungchangah court in Nurse duty a convict na hmasaber nia hriat a ni.

Thudawn danin Lunglei Civil Hospital-a nausen damlo ICU-a enkawl mek chu a thi tiin nurse hian oxygen leh thil dang a phawi vek a, a chhung te hnenah hlanin anni’n, thi tawhah ngaiin in lamah an hawn a, in an thlen pui chuan nausen hi a la thi lo tih an hre ta a, hmanhmawh takin damdawiin lamah an tlanpui leh a, hemi hnu lawkah hian doctor chuan a thi tih a declare niin an sawi.

He thil thleng chungchangah hian lungawi lovin naute pa hian FIR a thehlut ta a, heti ang hian court chuan thutlukna a siam ta a ni.

Court thutlukna chungchangah hian MNF General Hqrs leh Sub-Headquarter MNF, Lunglei te chuan emergency meeting an ko ve ve a, khatih laia Nurse duty court in hremna a pek Pi Lalbiakdiki Pu Vanlalpeka, MNF Lunglei Sub. Headquarters Information & Publicity Secretary ni lai nupui chu thlur bik nia an ngaih thu sawiin thiam loh chantir a nih theihna tura nawrna kawngah MLA thenkhat pawh an inrawlh ngei nia an hriat thu an sawi a, hetianga Staff Nurse in ama thuneihna piah lam khawih anga puh a nihna hi thil pawmawm a nih theih loh thu an sawi a. Doctor te’n tih tur an hrilh chin bak eng case mah khawih tur an nih lohna thu te, Damlo leh Nau nei tur te Damdawi In-a Admit leh Release chungchangah thuneihna leh tih theih engmah nurse ten a neih loh laia, Doctor hmer telna pakhatmah nei lo va, hleih nei taka investigation kalpuiah MNF hotute chuan an ngai nghet tlat tih an sawi.

Hetih mek laia politics phuba lak duhna avanga Staff nurse Pi Lalbiakdiki chunga dan rorelna lekkawh a ni ta mai hi MNF Party chuan engti kawng mahin a hrethiam thei lova, a tul anga na taka chet an tum tih an sawi a ni.

September ni 27, 2014-a Lunglei Civl Hospital-a naute thihna chungchangah hian Lunglei Chanchinbu Vulmawi chuan naute Nu a kawmna chu 29th September, 2014 khan a ti chhuak a, a ngai ang angin heti ang hi a ni:

(Kar kalta Nilaini (24.9.2014) zan Dar 8:30 vela Lunglei Civil Hospital-a nau nei Lalchansangi Lunglei Venglai chuan Nurse chunga a lungawi loh thu kan palai a hrilh.

Kan palaiin Lalchansangi hi kawmin,
‘Civil Hospital-a nau in neih chungchangah i nau neih la thi lo pui Nurse ten a thi tiin Polythene a pack a hawnpui turin an ti che u em ni,’ tia a zawhna chu chhangin naute nu Lalchansangi chuan, “Aw ni e, kan rilru a na khawp mai, Nau ka nei zo kha, Nurse in i nau neihhi a thi dawn tho tho, Polythene khan khai thla u la, min ti a, mahse a thi lo tih kan hria a, a mak kan ti” a ti. “A thih tak si lo vah chuan zanah naute upnaah min upsak a, dar 2 velah kan nauvin naute a va en chuan naute upna chu on lohvin a lo awm a, naute chu a lo tap nasa hle a, kan va pawm chhuak nghe nghe a ni” a ti.

Naute pa Vanlalkunga chuan, “Ni 27. 9. 2014 Inrinni chhun Dar 12 vel khan a thi, tiin Nurse ten min hrilh leh a, thi pawm hawnin kan pawm hawng a, In kan thlen hnua Khuma kan mut chuan a thi lo tih kan hre leh a, Damdawi Inah kan tlan chhoh pui leh a, tlai Dar 5:30 vel khan a thi ta a, kan rilru a na hle a ni” a ti.

Nurse pakhatin, ‘A thi dawn tho tho va up a ngai lo vang, tih a sawi lai hian a bula Doctor awm chuan Nurse chu a hau niin naute nu hian a sawi bawk.

Nurse zinga tawng thlahdah deuh deuh nia an hriat chu Nuteii, Zonuni leh Rahsivenga mi a ni tih naute nu hian a sawi) Heti ang hian Vulmawi chanchinbu 29th September, 2014 chhuakah a lo tarlang tawh a ni.

Advertisements
Aside | This entry was posted in Zoram Crimes and Accidents, Zoram History and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s