9/11 – Bin Laden-a tih a ni chiah em ?

Chhiatna kha engvanga lo thleng nge ?
Kha chhiatna lo thleng vang khan tunge hlawkna tel ?
Thlawhtheihna vanga Twin Tower kha chim a ni chiah em ?
Engvangin nge Building 7 thlawhnain su lo napui a chim ve ngawt a?

Kum tam a liam hnuah 9/11 tharthawh engnge a ṭulna kan ti a nih chuan khuareiah engkim a lanchhuah ṭhin vang a ni. Hnuchhuina hrang hrang kaltlanga thil chi hrang hrang hmuhchhuah, an kalna kawnga mithiam kan tih ten an an thiamna kaltlanga chung hnuchhui an thlawpna chanchin hi mi nazawngin kan hriat loh thil a ni. Khawvela chhiatna lian tham a lo thlen reng reng hian a phenah mi tute emaw hian hlawkna an tel tawh ṭhin tih chu Great Depression, Napoleonic War, Financial Meltdown, Vietnam leh Iraq War etc aṭangte hian kan hmu tawh a. 9/11 chhiatna pawh hi chutiang chu a ni.

A chinchhuakin : Kum 1998 khan Port Authority of NY leh NJ chuan World Trade Centre hi Privatize zai an rel ta rup mai a. April 2001 a lo thlen meuh chuan Silverstein Property nen inremsiamna neiin July 24 a lo thlen chuan WTC chu Larry Silverstein-a, WTC Building No 7 neitu hnenah WTC Building No 4 & 5 chu kum 99 chhûng atân an lease (man neia hman hawhtir) ta a ni. Building an lease-na man hi $ 3.2 billion zet niin GMAC in Silverstein-a hi $ 563 million-in an finance (pawisaa ṭanpui) a ni. GMAC bakah $ 110 million laiin Llyod Goldman leh Cayre (Real Estate Investor) ten an pui bawk. Goldman hian WTC enkawlna aṭanga hlawkna 25% an hmu ang a, 2016-ah a pumin hlawkna a tel tawh ang.

Sylverstean Property hi chuan ama pawisa $ 14 million chiah a tum ve thung. Port Authority hian WTC Insurance-ah hian $ 1.5 billion chiah a seng a. Hetih lai hian WTC hlutna nia an chhut chu $ 1.2 billion a ni thung. Sylverstine-a erawh hi chuan $ 3.55 billion a Insurance hlutna hi tihpun tumin nasa takin a Broker hmangin hma a la a. Pawisa hi a tam tham em avangin Insurance Dealer 25 hnenah semsawm a ni ta a ni. Sylverstean Property hi WTC siam ṭhat leh theihna, an inremsiamnaah khan pêk tel an ni bawk. Insurance chungchanga inremsiamna hi a khirhkhan bawk a, September thlaah pawh Contract hmangin inrem a ni chauh a, engmah tihpuitlin (finalise) a la ni ta lova a ni.

WTC a hlawk lo : Port Authority hian WTC hi 1973 kum khan an sa ṭan a, mahse luah man tlawm avangin duh angin sum an hmu let ṭha lo hle. Hei bakah hian WTC thir banpui zawng zawng tuamtu (steel beam) thirzai sin (fibre), thil kang sa tak dodal thei tura building humhim nân an tih Abestos-te chu lakthlak a, a thara thlak an ngai a. Hun rei tak chhûng PA hian WTC hi hralh duh mah se, hralhna an hmu hlei thei tlat lova ni. PA tâna hmalak theih awm kawng thum niawma langte chu – Man neia mi hawhtir, WTC hralh emaw pawisa tam tak senga Abestos ṭhiah emaw tihchhiat (demolish) emaw chiah an ni ta a. Tichuan, 9/11 thlen hma lawkin Sylverstean-a hnenah hian man neiin an hawh fel tir ta a ni.

9/11 : Sylverstean-a hian Insurance Policy a lakah hian chiang takin Terrorist Attack (firfiaka beihna) a tel mauh mai a. WTC a han hawh takah khan siam ṭhat hna a kutah pêk anih angin heng Abestos thlak nân hian $ 1 billion chuang sen a ngai tih chhut chhuah a ni ta bawk. Khatia thlawhtheihna lianin WTC a sutchhiat hnu aṭanga darkar reiloteah Sylverstean-a chuan a Lawyer be nghalin Insurance Company te chu Travellers Form an tih mai hmanga khuahkhirh an ni a, chuvangin hun inhnaih tak tak, mahse inang si lova thlawhna pahnihin a hran ve vea building an sut avangin Insurance pawh vawihnih Claim (hauh) theihna a nei a ni tiin a nawr hmanhmawh ta a ni.

Khawvel Insurance pawisa tam ber hlawhna chu : A kuma kum tel Court lamah $ 3.55 billion chauha WTC a Insured-na chu, Travellers Form hmang ngei hian $ 7.1 billion hmuh tumin a bei ta ngat ngat mai a ni. Kum 2007 a lo nih chuan Sylverstean-a chuan Insurance pawisa $ 4.55 billion hmuin Largest Insurance Settlement an tih chu a lo thleng ta a ni! Court-in inremna a puan ve leh hian Sylverstean-a vek hian United leh American Airline, WTC sutute chu $ 3.5 billion zetin Dawngdah Case hmangin a khing leh ta a. Court hian a khinna hi hnawl mah se, tunah hian a la appeal mek a ni. Chung zawng ai pawha awihawm loh chu Port Authority-te hian a rukin Sylverstean-te nen hian inremna an lo neih hi a ni.

A tira WTC lease-na man aṭanga 80% equity (company/group share hlutna niin financial terms-ah chuan Asset hlutna leh asset neih nân sum sen hlutna – Car Rs 200,000 man i lei a, Rs 50,000 loan hmangin lo ba ta a, i asset equity chu Rs 1,50,000 a lo ni ang) Sylverstean hnenah pêk let remti chung siin WTC hmunhma enkawl zui theihna an pe bawk chu an ni. He inremsiamna avang hian Sylverstean, Goldman leh Cayre-te hian $ 98 million zet an dawng leh ta bawk a ni! Tichuan, 9/11 lo thleng avang hian mi ṭhenkhat chuan $ billion chuang zetin a hausak phah a, a thurualpuite pawh $ million eng emawzatin an hlawk ta phawt mai a ni.

Khawiah nge 9/11-ah Sylverstean-a a awm : Nitin khel lova WTC buildinga a office-a awm ziah ṭhin kha hemi hi hian mak tak maiin a office a luahlum lo tlat mai a. Chumi chungchanga zawhna a chhanna hi i en chuan dawtsawi hmelhmang, hai rual lohvin i hmu theiin ka ring. https://www.youtube.com/watch?v=9ScGZCqEyGM

Thim tham inrawkna rapthlak chu : Insurance vanga hlawkna hi chu a ve lek a ni mai a. A dawt leha kan sawi tur hi chu eng ang fakaua tam pawisa ruk chhuahna nge tih tun thlengin hriat theih a la ni ta lova ni. Marsh & McLennan Companies, Inc. hian WTC floor 93-100 an luah a, thawktu 2000 an nei. Hna tam tak an pêk zingah insurance brokerage, risk management hi an pawimawh dawn ta a ni. Kum 2000 kum khan Marsh Company leh SylverSteam Co hian thawkhona nei ṭanin Paperless Transaction (lehkha-a hnutchhiah engmah awm lova indawrtawnna) software kan tih mai chungchangah a ni a.

SylverStream hi a hmain khawvela Investment Bank lianpui pui, Merrill Lynch, Deutsche Bank, Bankers Trust, Morgan Stanley, Alex Brown Realty Inc bakah 9/11 a inhnahnawih Financial Institution lianpui pui a lo thawhpui sa tawh a. Tuna Marsh nena an thawhdunna hi chu a danglam ta zak mai a ni. Zoṭawnga sawifiah a har dawn hle mai bawk. Sylverstream hian Bank leh Financial Company lianpui pui tân lehkhapheka ziak ngai miah lovin Computer Mainframe pakhat kaltlang vek ni si a indawrtawnna (Transaction) software a siam hmangin sum leh pai khawih chet a ni ta ti mai ang.

Marsh & McLennan hi Insurance Brokerage lian ber an ni a, AIG pawh Insurance Corporation lian an ni. Computer Mainframe ka sawi kha Marsh & McLennan Office-ah hian a awm ta a ni. Richard Andrew Grove-a chu Silverstream Software-a inhnamhnawih, Sales Executive a ni a. Marsh & McLennan kaltlang hian khing Financial Corporation liante khian WTC-ah hian hmun ruak 9/11 hma khan lei felin Complete Disaster Recovery (chhiatna lo thlen huna dam chhuah leh theihna) pawh Risk Management kaltlangin an lo tifel vek hman a. Richard-a hian $ 10 million Purchase Order felhlel a hmuchhuak ta tlat mai a. Chu chu a aia thuneitu hnena a kalpui chuan theihnghilh tura tih a ni ta a ni.

A ngamtlak leh a rintlakte hnenah a rukin sumdawnna dik lo tak hmanga sum siamna awma a hriat chu a hrilh ta a, anni pawh chuan chutiang chu thil awmdan nia an hriat thu an lo sawi ve ta chiah bawk a ni. Marsh Co. chuan a hardware ṭhenkhat hralhin dik lo taka thiltihna awm ngeia hriatna a lo awm ta a. 9/11 zingah chung thil dik lo awm nia hriaa chhuitu IT Staff zawng zawngte chu Conference neihpui tura koh an ni a, Richard-a erawh traffic jam vangin Conference hmun thleng hman lovin a thawhpuite erawh an zavaiin an thi mang ta phiar anih chu! Richard-a conference a tel tura kotu leh thil dik lo a hmuhchhuah a va hrilh Executive erawh office kai lovin in aṭangin Teleconferencing hi a hmanpui thung ta hlauh anih chu!

Kan hriatthiam theih dan tur berah chuan 9/11 hma ngei khan Marsh software khan hna kal lai zawng zawng kha thawh zawh tir vek tumin nasa takin nawr hmanhmawh a ni a. Transaction zawng zawng pawh a peihfel hman vek tur a ni. Dan lo angin sum khawih chet a ni tihna anih chu. Hei hi Richard-a vang chauh hriat a ni ta a ni.

Marsh & McLennan awmna floor ber kher : Mak tak maiin North Tower thlawhnain a sut khan he company awmna ber kher hi va suin software kaihhnawih thil zawng zawng chu a kang chhe ta vek mai nia! Germany rama Convar Soft Co chu Data Recovery titura rawih an ni a, an thil hmuhchhuah chu hei hi a ni. CNN-Sci-Tech-ah Convar chuan tihian thuchhuah a siam ta a ni. Firfiaka beihna WTC in a tawh hma lawk khan nasa takin Transaction a sosang (software a sa) nasa tih hmuhchhuah a ni a. Firfiaka beihna hrelawk miin pawisa tam tham tak a transfer-in hlawkna eng emawzat a tel niin rin theih a ni. Nimahsela, heng transaction tihna hmunte hi WTC chhûng an nih avangin engmah hriatchian theih a ni ta lova ni, tiin.

Reuters pawhin Convar CEO thuchhuah an tarlan chu hei hi a ni bawk. Firfiaka beihna kha lo hrelawk awmin Financial Transaction ti tura Software command leh authorization pêk a ni a, khatia buai nuaih nuaih kârah khan thil sual titute chuan hma takah bul an lo ṭan daih tawh tihna a ni. Anih loh chuan khami tuk khan American mipuite chu nasa takin an sumdawng tihna a ni leh thei ang a. Chuti chung chuan Transaction awm chhan mumal nei lo, finfiah theih loh tam tak a la awm tho tihna a ni ang. Nidang zawng aiin Transaction Volumn a chhah tlat a ni, tiin. Convad mithiam Wagner-a pawhin tihian a sawi a. Mi ṭhenkhat chuan thlawhtheihnain WTC a sut hun tur chiah an hria a, pawisa $ 100 million chuang an lo la sawn hman a ni. Mainframe tihchhiat anih khan heng transaction hi hmuhchhuah theih lohvah an ngai a ni ber ang chu, tiin.

Deutsche Bank buaina : Thlawhtheihnain WTC a rawn sut hma lawk khan he bank chhûnga an computer server chu chhûnglam aṭangin engin emaw a rawn control ta a. Rang takin transaction tam tham tak rawn tiin Data tam tak a rawn download nghal bawk a. Thawktu zingah hei hi tuman an Override thei lo. Building a chim hma minute 40 chhûng vel khan chawl lovin an server hian hna a thawk mawlh mawlh mai a ni. Marsh & McLennan Mainframe kha Prosecutor Management Intelligence System, PROMIS Software ni a ngaih, AI ang maia mahnia ngaihtuahna, assesment siam thei a ni tih tunah kan sawi ta. A awihawm loh viau em? I awih loh chuan PROMIS chanchin hi i ngaihven mai dawn nia. http://z4.invisionfree.com/The_Great_Deception/index.php?showtopic=545

US Security and Exchange Commission thil hmuhchhuah : 9/11 tuk, ni 12 niah chuan USEC chuan Sumdawng pawl pakhat, firfiaka chetna lo hrelawk a, he firfiaka inbeihnaa inhnamhnawih company chi hrang hrang share hmanga dollar maktaduai tam tak lo rut an awm tih a hmuchhuak ta a ni.

United leh American Airlines : Firfiaka chetna lo thlen hma ni 5 la awmah khan 2000 (chutiang chu kar thum chhûng a sumdawnna aia tam a ni) contracts of United Airlines chu United Airline duhsak lo zawng (against) a leiin UA stock hlutna a tlahniam dawn tiin tu emaw chuan inthapna a nei a. Thlawhtheihnain WTC a sut hnu lawkah $ 180,000 chu $ 2.4 million a lo chang ta mai a ni! American Airlines Stock pawh chutiang bawk chuan $ 337,000 chu $ 1.8 million a ni ta dawrh mai a ni! Chutiang chuan mi ṭhenkhat ten sum tam tak an lo siam tih an hmuchhuak ta a ni.

Company hming lo langte chu : Morgan Stanley leh Marsh &McLennan lakah pawh miin Bet an siam tih hmuhchhuah a ni bawk. Anni bakah hian Boeing, AAA, Citigroup, Bank of America, Merrill Lynch, Munich RC, JP Morgan Chase te hi an Stock tlakhniam a ni dawn a ni tia an laka lo inthap an awm tih Stock Market chetdan aṭanga hmuhchhuah a ni a. Chumi piahlamah Defense Contractor lian Raytheon stock chu 9/11 hma chiah khan share 1 $ 25 a lei niin 9/11 vang khan an stock hlutna chu share khat zelah $ 34 a kai chho dawrh mai a ni. An tomahawk missile khan Afghanistan indonaah an hmang nasa hle reng anih kha.

Khawvel pum a nghawng : A tawi zawngin tihian i han sawi teh ang. Italian Foreign Minister Antonio Martino chuan 9/11 hnuah hemi chungchanga Italy hnuchhuina puangchhuakin, “Firfiak Pawl ṭhenkhat, International Market kaltlanga sum siam an awm ngei nia hriat a ni” tiin. Sept 24 a lo thlenin Belgium Finance Minister pawh chuan, “British Market te chu Transaction tih nân hman ni ngeiin kan hria” tiin mipui hmaah a puang a. Germany Central Bank President pawhin, “Kan thil hmuhchhuah hian he chhiatna lo thlengah hian firfiak pawl nena inhnamhnawih miten hlawkna tel an tum tih kan chiang a ni” tiin.

Mithiam zingah Insider Trading awm ring an tam : Univ of Chigaco Finance Prof George Constantinides te, Columbia Law Prof John Coffee te, Duke Univ Law Prof James Cox leh mithiam dang dang ten he chhiatna hmanga sum siam an awm an ring nghet tlat tih an sawi bawk.

USEC : USEC hian 9.5 million Security Transaction, company 150 dawn, khawvela market hrang hrang 7, 32 Exchange Funds an endikin FBI, Dept of Treasuries, Dept of Justice nena ṭanghoin mithiam rual nen hnu an chhui a, an thil hmuhchhuah hi english thiam tân kan tarlang ang e. We had not developed any evidence suggesting that those who had advance knowledge of Sept 11 attacks traded on the basis of that information. Uai! Thil dik lo a awm si loh hi lo ti suh. ‘that those who had advance knowledge of Sept 11 attacks’ a tih kua hi maw, a Zoṭawng chuan Sept ni 11 a firfiaka beihna lo thleng, a lo thlen hun hmaa lo hre lawkte khan, tihna a ni! https://www.youtube.com/watch?v=7cH6l8_D9DQ

Marsh & McLennan : Anni hian an hnuaia hnathawk mi 294 chân vekin hlauhna thlifim lêng vangin Risk Insurance an hnenah an rawn ti sup sup a. Kum 2010 kha chuan $ 10.6 billion revenue neiin khawvela Insurance Broker lian ber an la ni ta reng a ni. http://www.minyanville.com/businessmarkets/articles/9252F11-companies-9252F11-companies-in-world/9/9/2011/id/36795?page=full

Kellogg, Brown & Root : Halliburton Division pakhat niin ralthuam lam siamtu an ni. Anni hian Iraq indona avang khan Military Contractor anihna angin $ 17.2 billion contract a hmu bawk. A va ho ve i ti maw? 9/11 hnu lawkah US in Iraq do a puan hma hauh khan Middle East hmun tam takah Camp a din nghal chuk chuk a, Sweetheart Deal pêk an niin US sipaite tân ek-in leh internet café thlengin engkim an kutah a awm a sin! Chu mai bakah Halliburton CEO chu Dick Cheney niin a hma thla li liam ta lawk khan kum tin $ 36 million hlawh chungin a chawl a, US Vice-President a ni ta anih kha!

US Oil Company : 60% oil field te hi Middle East a awm an ni tih kan hria. US hian a oil hi tun aṭanga kum 10 chhûng vela hmang zo tawh tura ngaih niiin Supply aiin Demand sang tawh tura ngaih a ni. Kum 1980 aṭang khan US oil company te hian Caspian Sea Oil-te hi Afghanistan kaltlanga Pipe thlunzawm a lo tum tawh ṭhin a, mahse Afghanistan awptu Taliban-te chuan hei hi an remti lo anih kha. Nimahsela, US-in Aghanistan a luah chiah khan Brazilian Oil Contractor hnenah contract pêk niin tunhma aṭanga China leh Russia, Oil hmanga control a duh ang ngeiin Afghanistan kaltlang hian Oil Pipe hmangin Caspian Sea a Oil khurte chu a thlunzawm ta a ni!

A sei ta êm a, i duhtawk phawt ang. Part – II kan la ziak leh dawn nia. Conspiracy Theory lo tiliam mai lo la, Facts kan tarlan hi lo ringhlel bawk suh ang che.

Advertisements
Aside | This entry was posted in Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s