LAL RORELNA HNUAIAH ZOFATE LA AWM

POSTED by Aizawl Post

  • Manipur ah Mizo Lal an la tam
  • Manipur Zohnathlak te an inti mizo hle

Mizoramah lal ban an nih tawh avangin Mizoram Mizote chuan lal an awm tawh lovah an ngai thin a, Mizoram state pawna Zofate chanchinin naihven a hlawh thin loh avangin Mizoram thenawm mai Manipur-ah ngei pawh Zo hnahthlakte hi lal hnuaiah an la awm tih hi a hriat loh theih khawp ang.Manipur-ah hian tlangmite’n lal an la nei a, Zo hnahthlakte pawh lal rorelna hnuaiah an la awm. Zo hnahthlak lal hi 2000 chuang daih an ni a, Lusei lal pawh an awm ve.

Zo hnahthlak lalte inzawmkhawmna United Chief Committee-a an spokeperson Lalmalsawma sawi danin, Manipur-ah hian Hmar lal 30 vel an awm a, Paite lal 100 chuang, Thado lal 2000 chuang, Kom lal 20 chuang, Lusei lal pahnih an la awm. Lusei hi Kawnpui leh Ngathal-ah an lal.

Zo hnahthlak dang Simte, Zou, Vaiphei, Gangte leh a dangte pawhin lal an la nei a, Zo hnahthlak lal hi 3000 an tlin a ring.

Malsawma hi Mualbem lal a ni a, 1929-a din Mualbem-ah hian 1993 atang khan lal a ni. A sawi danin, a tirah chuan Mualbem lal hi Thanchungnunga a ni a, ani hi Thuamchaka pa nen unau an ni. Thangchungnunga’n fapa a neih loh avangin a dawtah Thuamchaka kha lal tur a ni a, a duh loh avangin a lal ta lo.

Thangchungnunga unaupa (mi dang) fapa Mangthang a lal ta a,tuna an lal Lalmalsawma hi Mangthanga tupa a ni. Mualbem hi in 64 khua a ni a, Hmar an tam ber avangin an tawng lar ber pawh Hmar tawng a ni. Mahse Duhlian tawng an thiam vek thu an lal chuan a sawi.

Mizorama Village Council ang hi Manipur-ah chuan Village Authority an ti a, chutah chuan lal hi ex-officio chairman an ni. Lal kaihhruaiin Village Authority chuan ro an rel ta a ni.”Lal hi Village Authority-ah chuan chairman kan ni a, chumi tihloh a dangah chuan Mizorama Sailo lalte kalphung kha kan kalphung chu a ni mai. Mipuiin a pawisain chhiah an chawi lo a, mahse Sailo lalte hnena chhiah an pek thin ang kha helamah pawh lal hnenah an chhung ve a, Village Authority a awm tih lohah chuan thil dangah chuan Sailo lalte kal dan kha kan kal dan chu a ni,” Malsawma chuan a ti.

Lal hian ram chungchangah thuneihna sang tak an nei; an khuate’n LSC an nei lo a, khaw tam zawkah chuan LSC hi lal hming zelin a awm. Judicial power an neih bawk avangin thubuai hlabuai reng reng an kutah a awm a, thu chhe rem hi an thuneihna pawimawh a tling.
“Ram hi lal kutah a awm a, chuvangin khuaah lal thu lovin tumah an awm thei lo. Lal hian mi a awmtir theih bakah misual leh hnawksakte a hnawtchhuak thei,” tiin Malsawma chuan lal thuneihna chungchang a sawi a, “Mikhual pawh lal hnenah an in-report thin,” a ti.

Tun hnaiah pawh Mualbem-ah hian Assam Rifles-in mi in an lo dap a, a hnuah ngaihdam an dil. Ngaihdam dil nan hian sipai hian vawk an talh a ni.

Manipur-a Zo hnahthlakte’n Mizoram an thlir thu leh an lung tilengtu a nih thu a sawi a, “Mizoram hi kan ngaisang a. ‘Kan ram’ kan ti a, Meitei-ho nena kan intihthiamloh chang pawhin kan thlamuanpui a, ‘Ram kan nei,’ tiin Mizoram kan sawi thin. Mahse Mizoram lam hian eng vakah min lo ngai lo a, chuti chung chuan kan rawn inti neitu tho,” a ti.

Advertisements
Aside | This entry was posted in Zoram History and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s