ZU ZUAR PUTAR LEH KEIMAH — ZR Lalthlanmawia

YMA in Kupuan thupuiah *RUIHHLO DO* a hman lai leh a kalpui vung lai khan kan awmna Branch ațangin pawhin Ruihhlo check leh a zuarte dap chhuahnaah a tel tam pawl ka ni ve a. Thil hi a beiha beih tak tak chuan keimahni hriatna leh finna piah lamah min țanpuitu mak tak a awm ve a maw ni chu aw tih turin kan chet dan pawh kha a mawiin a nalh thei khawp mai. Lirthei țhenkhata Ruihhlo kan man dan te kha a neitu te pawn mak an ti țhin. A chhan chu, khatiang thleng thleng a kan check kha an ring pha ngai lo fo. Motor hnuai lama thil siam chawp hmanga thiam tak maia an thup te kha kan hmuchhuak a, kan Strick poh leh a neitu te an fimkhur ve zel bawk a, phur reng si man chhuah miah lohte pawh kha kan nei ve nual tho bawk a.

Ka sawi duh tak chu, khatih lai khan Putar kum 65 bawr vel amah chauha khawsa, chawmtu pawh nei tawh lo kha kumpuan duty ten țum hnih ngawt kan man hnuin a ruihhlo zawrhte a sim lo a nih a, vawi thum nan kan man leh a nih chuan a In kalh sak leh khua ațanga hnawhchhuah a nih tur thu te, chu thu chu VC leh YMA țangkawpin a chungthu kan rel dan a nih thu te kan hrilhhriat tawh hnu a ni nghe nghe a. Tichuan, Warning kan pe a, ani pawh chuan a ruihhlo zawrhte a sim tur thu leh YMA leh VC ten a chunga thutlukna an siam te pawh chu a pawmin a hriatthiam thute a sawi ve nghe nge a nih kha.

Mahse țum khat chu zu phur Report kan dawn bawhzuiin duty turin ka han chhuak khawm leh ta a. A zuar țhin in te chu rinhlelh thuah kan han dap hmasa a, chu putar In pawh chu dap a ngai leh ta tlat mai a. Țhiante ho nen chuan kan han check țan ta a, a in chhung leh pawn hmun hrang hrangah kan insem darh a, kei chuan a kawmchhak lam dithlifarfem zawn a bawlhhlawh awm nil nial chu rinhlelh vang em em pawh ni lem lovin ka kut hlei chuan ka hmawlh ken chuan ka han thai deuh a, rin aiin thai a nuam a nia nge ka thai leh țhin a. Thuk loteah dithlifarfem zawnah zelah chuan zu fun leng tawk leka lei lai khuarin zu fun dahțhat nan a lo hmang țhin hi a lo ni a.

Ka hmawlh ken laia ka han hai thui deuh chuan zu fun hi a lo in rem tlar dal mai a ni tih chiang takim ka hmu thei ta a, ka hmuh tirh phei chuan ka rin lo leh beisei loh lutuka zu fun uluk taka dahțhat ka hmu thut kha ka phu deuh zawk a, a zu neitu pa Putar lam ka va melh chuan lo mengphawk nasa kher mai, a chhan chu YMA in Warning kan pek leh kan enthlak lai kha a ni miau a.

Mahse, a mit meng ka hmuh khan a rilru a thlaphan zia leh a hlauhthawn zia a lang vek hian ka hria a. Tichuan a zu fun chu ka țhianten an hmuh ve hmain hmanhmawh takin bawlhhlawh nawi chuan ka hai vur sak leh ta a. Chutia a zu fun ka hai vur sak hnu a chu putar hmel ka va en leh chuan, a hmelah chuan lawmna hmel mak tak mai ka la hmuh ngai loh hmel danglam hi ka hmu tel tlat hian ka inhre lehnghal a..!!

Tichuan chu putar chuan ka pa hnenah ti hian a lo sawi.
“I fapa anga mi rilru țha hi khawvel mi hi ni vek se a nuam ngawt ang, ka chunga a țhatna kha a mak ka ti a, ka lawm lutuk ka țap hial a ni; ka dam chhungin ka theihnghilh tawh lovang.” tiin ka chunga a lawm zia thu chu ka pa hnenah a lo sawi a; a mak khawp mai, keipawh kha engemaw ti takin ka lawm ru riau hian ka in hre lehnghal a..!!

Ni e, a rau zawng chuan a rau lo ber ber te zing a mi ka nih ka in hai lo ve khawp asin. Mahse, ka nu leh ka paten thil hre rual kan nih tirh ațanga khawngaih ngaite khawngaih tura min lo hrilh țhinna kha a hun takah a lo rah chhuak ta niin ka hria.

Ka duh chuan kha putar zu kha ka man sak ang a, inti man thei takin ka chapo pui ang a, chutih rual erawh chuan keimah vangin kha putar khawngaihthlak khan a nupui fanaute nena a thlum a al ei za a, thlamuang taka zan mu an lo chhin za na run kha mittui nen a chhuahsan loh a le leh, thih sak pawh ka ngam.

“Mi khawngaih thei tak te chu an eng a thawl e ; khawngaih an la hlawh dawn si a” (Mat.5:7)

Advertisements
Aside | This entry was posted in Thu leh Hla, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s