Tindarin Huana Keimi (Thil thleng mak chu)

Siliguri leh Darjeeling inkara Tindaria thingpui huanah chuan Sap pasaltha pakhat, Augustus Somerville a lo lang nawlh mai. Chutiang mikhual an nei chu Bungalow a nupa rek a khawsa, Manager leh a nupui chu Vantirhkoh mikhual thleng ang maiin an hlim a. Manager te nupa hi Scot mi niin, Somerville erawh hi chu English a ni thung. Mahse hetiang lam hlaah hi chuan unauang maiin an innel a, an hlim tlang hle. Chung lai chheh vel nawm zia leh mawi zia an sawi lai chuan Scot pa chuan tuna an Bungalow chu a tir te atanga an chenna a nih loh thu leh, an awmna hmasa chu tuna an awmna atanga mel khat vel a hla, Somerville-a pawhin a rawn kal pelh Bungalow hlui tak chu a nih thu a sawi a. Somerville-a pawh in chu Bungalow hlui tak chu kal paha a rawn hmuh thu leh remchanga han belhchian a chak thu a sawi ta zauh mai a.

Chu thu an hriat chuan Manager leh a nupui chu an inmelh ta ralh. Mahse an mikhual pa ngaih a that loh an hlauh avangin hmel pangngai an pu ta thuai. In hlui chhe tawhah chuan rul lehrannung hlauhawm te an awm thin avangin a kal hunah pawh fimkhur turin an chah ta zawk a. A tukah chuan Somerville-a chuan chu hmun chu a zuk tlawh ta ngei a. A Gate pui ber pawh chu mawngkawtha nena tang chungin a nam hawng thei tawk. Gate atanga Inpui pan pheina kawng pawh chu hnihin a lo bawhluk tawh, Verandah atang chuan dim takin Kawngka pui chu an pan phei a. Kawngka pui hawn a tum lai chuan an hawi kual leh zawk a, chu in mawih tawh zia leh hlui tawh zia a hmuh chuan tihpalh thila tihchim rup theih a ni tih hriain, zawimuangin a letleh ta a.An hawi kual leh a, khawkherh(Walnut) thing mawi zet mai, upat hmel tawh tak lam chuan a lung a len leh ta zawk. Khawkherh thing hnuai a va thlen chuan a hlimah chuan an ding vang vang a. Hmun zim te, hun engemaw chen chu enkawl zui tih hriat taka lo fai bik hen chu a hmu ta. An bel chiang a, marble lengphek, upa tawh tak a lo ni. Chuta thu inziak chu a chhiar theih tawh lova, kum 30 hmalama tu emaw thlan chunga phah a ni ngei ang tih a ring. Chiang leh zuala hriat changin a thlenin lam chu a pan leh ta vang vang mai. Mahse a thleninpa chuan a sawi hreh ngang mai, a peh hel a peh hel a, sawi ta mai lovin zanriah an han kil leh ta te te a. Mahse a nupuiin sawi law law tura a lo tur avang leh, khatih hun laia thilthleng hre pha tam tak an la dam avangin thu ni lo lo te a dawnsawn a hlauhawm bawk a. Scot pa chuan a sawi ta nge nge.

Tunhma chuan henglaia thingpui huan hi anmahni enkawl a ni lova. Scot mi tho Manager niin, a nupui leh a laizawnnu nen Bungalow hluiah khuan an cheng thin a ni. A nupui laizawnnu chu Darjeelinga Mission School-ah zirtirtu a a tan avangin inah a awm khat hle a. Reiloteah Asst Manager atana thuneitute rawn dah, Swede tlangval, Engineer zirchhuak tawh chu a rawn awm ve ta hlauh. Bungalow pindan pakhat chu a luah ve a. Chu tlangval chuan Ford Car hlui lo awm chu a chei tha a, an hmang tangkai hle nghe nghe a ni.

Mahse Manager pa nupui chu a khawhar theih em avangin Scotland a an fanu chu an chahchhuak ta ringawt mai a. Chu nula chu, nula tih tham pawh a la ni meuh lo, kum 16 mi lek, inhaithli thlerh thlawrh, chawnban nalh zet, heh sen hiam mai, hmeltha zet mai a ni. Swede tlang val chu chu tleirawl zunah chuan a uai nghal ta chatmai. Mahse a mah hi tlangval fel leh mithiam, nakin lawka Manager a la kaisang mai tur a nih avangin tleirawl nu pawh chuan an in ngaihzawn chu a hnial hran lo. Mahse he Swede tlangval hian chak lohna pakhat a nei. Zu a thlah thei tlat lo. A ruih fuh loh chang phei chuan tawrhhlelhawm tak a ni.

Krismas ni thleng chuan engkim tluang takin a la kal. Chumi kum chuan Darjeeling-a Jymkhana Club chuan Dance Party ropui zet mai an buatsaih a. Chulai chhehvela thingpui huan enkawltu sap zawng zawng chu an sawm vek a. Kan sawi tak Manager te chhungkua pawh an phur tlang hle. Swede tlangval pawhin Ford Car hlui tak chu a bialnu leh a puzawn/pizawn la nimai turte chuanna a nih dawn avangin a tuai fai ve sauh sauh a. Vanduaithlak takin an kal dawn tepah chuan Tleirawl te chu a khua a sik ta hluah mai a. Han kal chi zia zang a ni ta lo. A nu pawh chuan thulh ve mai an tum ut ut nain, tleirawl chuan a remtih tlat loh avangin a kal ve ta tho a. An chhiahhlawh te lo enkawl turin an kalsan ta ringawt mai a ni. Krismas party chu rilru bet lo zet chuan an han chhim ve a. Mahse nu ber rilru a nawm theih loh avangin zinglam dar hnih velah chuan haw turinan inbuat saih ta nge nge. Motor khalh tupa Swede tlangval chu an hmuh tak loh avangin, thiante nen khawiah emaw an intawllenah ngaiin Manager chuan Motor chu a khalh haw ta ringawt mai a ni.

Tindaria an thlen chuan ni pawh a lo tlangsang viau tawh. Bangla an thlen chuan chhiahhlawh ho chu an lo ralkhel nasa mai. Nula damloh thu leh thil thleng chu ngaihthlak tur ber pawh awm lovin an lo phulpui chul hlawm a. Nula mutna pindan an han thlen chuan room chhung bungrua chu a lo in theh thal pheng phung mai. Nula lah chu sawisak hrep tuar tih hriat takin, nikhawhre lovin khumah chuan a lo mu bawk a. Chhiahhlawh ho enkawl dan hriat lah chu a lo beitham lulai khawp. Kurseong atanga an Doctor koha lo thlen chuan an en vela, Darjeeling Sanatorium ah a rang theri ang bera kalpui a ngai a ti ta mai. Mahse kawng bumboh takah chuan inphurh hlum mai a hlauhawm avangin that deuh hun nghah mai chu tihtheih awmchhun a ni ta. That lam pan a hnekin ni thum hnu lekah nula chu a boral ta a mai a. A damlaia khawkherh hlim hnuaia thun chu nuam a tih em avangin chu nula chu khawkherh kung hnuaiah chuan zalh a ni ta a ni. A thihden erawh a mualpho thlak e tiin an ngawibosan ta mai. Mahse he thil thleng hian Manager te nupa hi a nghawng nasawt em avangin Manager chuan a hna atanga retire a dil a, phalsak a nih angin Scotland-ah an kir leh ta a ni.

Chutia laklawh taka Manager a kalchhuah takah chuan a thleninpa chu Thuneitute tirh angin Manager hna thawk turin nula boralna Bangla ah chuan a insuan lut ve ta a. Scot pachal, pa sehhel ve tak maiin nula boral dan an hriat chuan ngawihsan mai har a ti ta tlat. Swede pa lah nula a pawngsual hnu atang khan hmuh zui tur a awm tawh si lo. Chhiahhlawh ho ka atang chuan khami zana thilthleng kha a zawtchhuak ta nge nge a. Kha Swede tlangval khan Manager te nupa Darjeelinga a han dah hnu khan bungraw phur rel, siliguri pan turah a chuang thla leh niin a lang. Zing khaw var dawn lamah nula te tuarh tuarh thawm an hriat chuan chhiahhlawh ho chu an tlan khawm nghal a. Au thawm lo chhuahna Bangla lam chu an pan phei nghal. Chutah chuan Chota Sahib(Swede pa an kohna) chu meng nu rum chunga kawngka atanga a lo tlan chhuak lai an tawk a. A au vak vak a, mi a ang maia a chet avangin a hlauhawm hle. A hmazawna ding te chu a vai kiang lawp a, ramhnuai lamah a tlan lut ta nghal. Mahse chhiahhlawh pakhat chuan a biang dinglam kang dum deuh rut chu a lo hmu hman. Nula khan mutpindana thuk a thingthu nungin a hlap ni ngei tur a ni.

Chutianga thil thleng a chhui kir lai chuan tuk khat chu Manager chuan Kuli pakhat hnen atangin ramhnuaia an chhar, thilfun a dawng nawlh mai a. A han hawn chuan incheina thawmhnaw, ham teh leh seh teh, thisen kai nuaih mai chu a lo ni. Rinhlelh rual lohin Swede pa chu Sakeiin a seh a ni ngei mai. Chumi hnu rei vak lovah chuan zankhat chu Manager chuan Bangla bul lawka ri bengchheng tak chu a hria a. Hurricane khawnvar khaia an chhuah nak chuan, a Gate bul lawkah chuan an chhiahhlawh pakhat chu sakei seh hlum tih hriat takin a lo thi reng mai. Chutah a Laltin chuan an enkual a, a phu zawk mai le. Scot thisen vawt reih rawih pawhin a la tawn ngai loh a tawng ta. Thim zingah chuan mit eng(yellow) lian kelh hulh mai pahnih hian a lo thlir reng mai. Chumi zan chuan thuneitute hnenah ngenna a ziak nghal a. An la chhawr duh a nih chuan a rang lama tlang chhip lama Bungalow thar sak sak turin. Tichuan tuna an awmnah hian an insawn ta a ni.

Chutih lai chuan Sakei in thingpui huan hnathawk a seh tih chu a ri ta zauh mai. Mahse Scot Manager pa hnathawk te a seh ve miau loh avangin Manager chuan a bengkhawn tehchiam lo. Tuk khat erawh chu, mangang baklengin a hnathawk ho an lo tlan chho a, Bangla hlui bulah a hnathawk sakeiin a seh thu an rawn sawi ta mai. Chutah zawng, hnam huaisen a sawi Scot rilru luhlul a chhuak ta le. Sakei in a hnathawk a sehna chu a hmun a zuk en vat a. Khawkherh kung bul, nula thlan bul lawk chu a lo ni tlat. A hnampui nula hi a khawngaih em avangin Manager hian Thlan lung pawh hi a phah tir a ni a. A chhiahhlawh pakhat chu a khat tawka nula thlan tifai reng turinthu a pe bawk a ni. Mahse chumi tum chuan nula thlan chu thla 6 vel zet tihfai loh a ni tih a hmu ta tlat. A chhiahhlawh pawh a ban nghal ta hmiah a. A indaih loh em avanga nula thlan a lo tlawh thin lo chu a inthiam lo hle nghe nghe a ni. Hemi tum hian nula thlan bawr vel chu a chhiahhlawh te a sam fai tir vek a. An samfai em tih chian turin kar khat hnuah amah ngei a kal leh ta ngat.

Thlan bula a kalkual lai chuan hun leh hnawngin marble a tihmelhem chak zia te chu a ngaih tuah nauh nuah a. Mahse..Marble lungphek lai takah chuan fiah mangkhengin Sakei ke hmalam pahnih hniak a hmu ta tlat mai e. A lan chian dan em em ngaihtuah hian, vawi tam a ke a hung nawn thin a ang. A bul vel chu chik leh zualin an bih a. Chhiahhlawh hmun samfai te kehniak chuan sakei hnuhma chu a lo hliah zo awzawng lo. He Sakei hian he thlan hi a tlawh ngun hle tih a chiang ta. Chumi zan la la chuan a hnathawk seh hlumtu sakei chang tur chuan a inbuatsaih ta nghal a. Thlan atanga hla vak lova thing buk rem laia Thangte a dawh zawh chuan zan lama chang turin in lam a pan ta a. Hemi zan kher hian ruah phingphisiau a sur cherh cherh a, khua a vawt zek mai leh nghal. Mahse Scot thisen kai a ni a, tum thulh leh mai mai chi a ni lo. A rifle a Torchlight a vuah te chu endik leh thlapin, thelret puan sinin sa channa lam a pan ta.

He Manager hi Scot pa tih takah, seh hel leh rilsu sak ngeng ngawng tak a ni kan tih tawh kha. thlarau(Spirit) lam hian a nun a vaw buai ve vak lo. A hmelhriat ve zawng spirit chu an ram atanga a dawn tur, a bottle a an rawn thawn chhuah thin chu a ni mai. Chu erawh chu thlah a tum bau lo. Chu lai rama tiauchhum awm dan chu a hrebel ve tawh hle. Kawr ruam a bawh khah hnuah tlangpang a hrut chho leh a. Zing khawvar hma phei chuan thil hmuh fiah a har hle. Mahse hemi zan hian, vanduaina ruah phingphisiau leh thli thaw chu atan vanneihna a ni ve tlat. Thli thaw avang chuan tiauchhum chu a zia awm hle. A Thangte a thu chung chuan nula thlan vel chu chiang lo ruaiin a hmu thei tawh. Chutah thil ri deuh thep thep a hria a, a han hawithlak nak chuan, hnimbuk bulah chuan thil var paw deuh ding zun mai a zu hmu ta. A spirit kha a lo khulh tlem deuh emawni tehreng ni, a khawng titih hial.

Chhumleivak lah chu a reh titih nghal ruih mai a. Thla a eng ta ruai mai. Thin phu dawt dawt chung chuan a thlir reng a, chu thil chu a insiam rem a, nula thlan lam a pan ta. A mit khap kar chu a rei riauin a hre tawh. Chawp leh chilhin mi beidawng, lungchhe em em a insut ri hlawp hlawp a hre zui ta nghal. An enchian chuan pa pakhat hi hmeichhe thlanah chuan a lo thingthi a. Marble lungphek chu nemin, a lu chuan Marble lungphek chu a si a, a hmai dinglama meikanna ser ngei pawh chu thla eng hnuaiah Manager chuan a hmu chiang kher mai. Thinlung lungchhia ngaihdam dilna aw chuan Manager chu hlauhna atangin a hruai chhuak a. Chu Swede pa chu tualthattu a nih a theihnghilh hial tawh. A khawngaih ta em em mai a. Hnem tumin han au chhuah an tum a, chutia a insiamrem lai chuan, a sa channa Thangte chu a ri ta sak. Chumi thawm a hriat veleh marble lungphek chunga thingthi, bungbu chunga ngaihdam dil, tap hlawp hlawp kha a zuang kang zawk ta mai a. Chutah mitkhap kar lovah mihring ni hauh lo, Keipui mitmu lian kiau kiau, eng(Yellow) rual mai chuan, ngho lang vurha ang sen huam chungin a rawn chho thlir ta hau mai le.

Chu veleh Manager chuan a rifle, kausa a a dah chu lekcharin sakei lu zawn tak mai chu an tin a, a hmeipuak ta nghal. Sakei chu thlan bulah chuan a awp rawp a, mahse a thi mai lo. Manager chuan an tinnawn leh a, mahse a kap nawn thei tawh lo. Reife chhung chu sakei chuan chalchangin a mei leh a ke a la thenkual vel reng a. A tawpah chuan nula thlan chu thei leh thei lova melh tawk tawk chungin a chatthla zui ta a ni. A thih hnu hian mihring ni hauh lo mahse Manager hian rilru hahdam tak leh engthawl tak hmuhin a hmu tlat pek. A ngaihdam dilna thuchham thenkhatah hian zu a ruih a vanga pawi a tih thu te a lang zauh zauh ni awm a ni.

Ruih laia ngaihtuahna fim hman thiam nan i hmang tangkai hlauh teh ang u.

(He thu hi Augustus Sommerville a hming chiah tarlanga ziah a ni a. A kum leh ni thup vek a ni bawk. A chhan kan hrethiam theuh awm e.

Advertisements
This entry was posted in Thu Ngaihnawm, True Story. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s