UGANDA-A MUSLIM IMAM PAKHAT CHU KRISTA HNUNGZUI A THLAN AVANGIN A NEIH ZAWNG ZAWNG CHÂN VEKIN A VAKVAI

Kan ramah chuan piantharna chu tuarna leh channa aiah zahawmna hlawhna, thawmhnaw thar neihna, mi rin hlawhna, duhsak hlawhna, malsawmna tinrêng dawnna niin a lang. Kan pianthar avanga kan ‘tuar’ leh ‘chan’ han sawi viau tham a awm meuh emaw chu? Kan Kristianna dal êm êm nachhan leh piangthar da leh heti taka kan tamna chhan pawh hi kan ringtu nun kawngah fiahna tak tak hmachhawn tur kan neih tlem luat vang a tih theih ang. Hlim leh lam phurna vel chu kan thlarau chaw lâkna pui ber leh kan rinna tichaktu ber atana kan hman a ni awm asin.

Hetih lai hian, Krista leh Kristianna an dodalna hmun leh râm tam takah erawh Isua Krista hnung zui tura inpêk chu thil tih namai a ni lova, lu chhum bân chhum huamainpek a ngai fova, khawtlang leh chhungte tuithlar leh tuarna lehchanna nasa tak hmachhawn a țul fo țhin.

Africa khawmualpui-a ram pakhat, Uganda khawchhak lama khawsa, Muslim biak in(mosque) inkhawmna kaihruai țhintu,”Imam” pakhat kum 53 mi chu Muslim sakhua kalsana Kristiana a inpek avangin, a nupui fanau, a in leh lo, a hna, a ram leh a neih zawng zawng chânin, bûk te ah rethei takin a khawsa mêk a ni. A sakhaw hlui-a kir leh-a engkim neih lêt leh vek aiin Krista vanga hrehawm tawrh leh vahvaih chu a thlang zawk.

He Krista pasalțha, Kuluseni Iguru Tenywa-a hi Jinja District huamchhunga thingtlâng khaw pakhat Budhagali village-a khawsa a ni a, Kristiana a inpek avangin June 27 zan khân a chhungte leh laichin te ho, an mâkpa(a farnu pasal) kum 45 mi Nsaja-a hova inhawrkhawmin, an in kawtah an pungkhawma, thah an tum avangin loh theih lovin a sahim na’n a tlan chhiat a ngâi ta a ni..”Zan dar 8pm velah ka in pâwna mipui țawng ri lûai lûai thawmchu ka hria a..ka nunna lâk an duh thu an sawi a ni. ‘Kan chhungkaw pûmpui Kristianah an inlet tur kan thlir liam mai mai thei lo’ an ti a” tiin Morning Star News a hrilh a ni. Tenywa-a hi an inchhung hnung lam kawngkâ ațangin a relhru a ni.
“Khami zan khân ka chhungte zawng zawng kalsanin, tlanchhe lo theilo dinhmunah ka awm a ni” a ti. Fa pali, kum 10, 12, 14 leh 17 mi leh nupui pawmlai a nei a ni.

Tenywa-a chuan, thlarau sualin kum tam tak chhung a rilru, taksa leh thlarau a lo sawisak tawh țhin thu leh, May 28-a Elim Church a tlawh ațangin chhanchhuahna a chan thu a sawi..Thlarau sual awpbehna lak ata Isua Krista chhanchhuahna ropui tak a chan dan chu sawiin, “Isa(Isua) thiltihtheihna hmangin min țawngțai a, Isa(Isua) chu ka thinlungah lût turin ka sawm a, chu chuan thlarau sual min tibuaitu thiltihtheihna chu a chhu chat ta a ni” a ti.

Sawi zawmin, “Ka la hrîat reng chu ka khaw hmuh a vai nghal ruai a, thidang(faint) angin ka awm a. Tichuan, pastor chuan thuneihna nen Isa(Isua) hmingin thu a pe ta mawlh mawlh a, a tawpah chhanchhuahin ka lo awm ta hlawl a ni” a ti.

Kristiana a inpek chanchin a chhungte leh laichin te’n an hriat chuan thinurna in an khat a, Islam chu an thlahtute ațanga an sakhaw vawn ngar ngar a la nih avangin inlamleta kir leh turin nasa takin an thlem a, an vau bawk a, mahse Tenywa-a chuan Isua Krista’n a nuna thil ropui tak a tih chu engtikawng pawhin pha thei anih lo thu-in a chhâng a ni.

A inlamlet duh tlat loh avangin a chhungte chuan an thinhrik țan chhova, thlahtute ațanga an în rochung-ah chuan mikhual leh mihrang ang mai-a cheibawl a ni ta a, a nupui Fatiyah-i leh afate thlengin an in chhungah tihduhdahna an tuar chho a, a nupui in a lakah a lungawi lohna lantirin chaw a pe duh lova, țawngkam dengkhawng tak takin a ankhum a, mi rinawmlo leh nêp, mahni sakhua phatsan tih te’n a ankhum phiar phiar țhin a ni.

Mahse Tenywa-a chuan thlarau sual lak ata chhanchhuaka nun thar petu, Isua chu phatsan thei ziazângin a in hre lova, Elim Church ho inkhawmna-ah chuan a tel chhunzawm zel a, chu chuan a laka a chhungte thinurna a ti belhchhah zual sauh a, a thlai chîn, a hmarcha sen hmun chu an chil chhiat sak vek a, a dawr an khar sak a, a ram chanpual liau liau-a thlai ilo chîn pawh an khap sak lehzel a ni. A chhungte’n diklo taka an tih danah, Local Council 1 chairperson hnenah complaint a thehlut ve bawk a, mahse an hmalakna in nghawng a nei lemlo.

Tunah chenna in neilo vakvaiin a awm mêk a, ram a nei tawh lova, hna a nei tawh lova, nupui leh fanau a chân a, chaw ei tur mumal pawh nei lovin bûk te-ah riakin, a khawsa ve naw naw a ni. Hetihlai hian a chhungte chuan la duhtawk lo cheu in, thlarau sualin a luhkhung na’n dawi an la tum hram niin a sawi.
“Ka chhungte chuan min dawi an tum a, mahse Pathianin min humhim tlat a ni” a ti.

Uganda hi Kristian tam na ram a ni a, a ram mipui 85% lawih Kristian an ni. Amaherawhchu, Uganda khawchhak lam hmun/khua tam tak erawh Muslim in an awpbet thung a, Muslim-in an awpbehna hmun rêng rêng-ah sakhaw dang an chêp țhin tih chu kan hre tlâng vek awm e.

Advertisements

About Mizo Archive

I'm the one who collect the best writings of Mizos
Aside | This entry was posted in World News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s