Sihhuai

October thla a ni a, Hlo thlawh kan zawh tawh avangin ka ţhianpa in, ‘krismas atana intuak nan, thing i zai dun ang hmiang’ tiin, min rawn sawm a. ‘Zai tur i hriatte chuan ka pawiti hleinem’ ka lo ti a. “A hlat chu a hla deuh a, mahse a pu turin Burma mi kan ruai mai dawn nia. Kan riah chilh ang a, ramvah pah in, nuamsain kan thawk dawn nia. Sa chânna tur pawh a tam ang. Silai keng ila, sa kah tur zawng, duh athu a ni mai” tiin min sawi hawt pui khawp a.

Tichuan a tukah ulhbun pahnih kengin silai mu tam tawk nen phur takin kan thawk chhuak ta a ni. Kei chuan ramvah leh sachân mawlh mai chu ka phûr phah ber zawk a. An thingzai na țhin kan thlen chuan, arâ leh hreipui te chu kan la a. A hlat tawh tehreng nen, a ai ramril lam pan chuan kan kal leh ta zel a. Hmanraw dang chu ‘nakin ah kan la leh mai dawn nia’ tiin, kan bawr tawh em avang chuan kan kalsan a.

Tlai lam darthum vel chiah chiah ah kan thleng ve ta hram a, ka chau ngei mai. Luite tui țhatna deuh bêlin, hmun rem ţha lai deuh ah riahbuk kan sa a. Khawthim hmain kn inpeih hman hram. Chuti chung pawn a bang chu kan ping hman ta chuanglo. Khua a tuihul tho a, a nuam zawk mah mai. Rawngte bawlin, kan thingzaina hmun tur chu kan bûk thlang lawk a nih thu te min hrilh a. “Ti khan lo awm la, sava zanriak kah tur ka va zawng ang e. I rawngbawl chhungin ka lo let leh hman ang. Vahrit riahna hriatsa ka nei” tiin, ţhianpa chu a thawk chhuak ta a. Keipaw’n chawbel vil pahin magazine hlui ka ken te chu, mei engah ka bih vel mai mai a.

Chutia rilru ding taka ka awmlai chuan, kan chhak lam atang hian ka hminga min rawn ko tu awm tlat hian ka hria a. Kan hawi chuak a, kan ngaithla vang vang a, a reh leh daih bawk si. Ka bengchhe ri a ni ang e tiin, chawbel ka suan a. Chawhmeh tui tur ka chhuangkai chiah tih chuan, a hma aia chiang zawk in min rawn ko leh ta a, ka ţhianpa aw a nilo tih ka chiang. Mahse tunge hetiang ram pilrilah ka hminga min ko ngawt tur awm. Ka pu thusawi ka hrechhuak zawk.

“Ramrilah mi kúk emaw, i hminga an koh che emaw in, a zawna vawithum an koh hma che chu, chhâwn in eih ngawt suh, rammi an ni thei” a tih țhin kha mawle tiin ka ngaihtuah a. Chawhmeh chu ka siam chhunzawm leh a, ‘mei vil pahin bati siam teh ang’ ka ti a. Bati phita turin, buara hrui ka hrual a. Ka siam mawlh mawlh lai chuan, chiang tak mai leh tèng fiah zet hian mi rawn ko leh a. Mahse ka eih duh chuanglo.

‘Țhianpa pawh chu va rei tawh si ve mawle’ ti a, ka ngaihtuah lai mekin ka piah ral ah chuan silai a puak ta dur a. ‘Kâp a ni maw’ ka ti rilru nghal a. Chu veleh ka chhaklam min rawn kohna ațang chuan, nutling râwl hi, lungchhe em em in a rawn țap ta mai a!! “Bawihte ” an ti vawng vawng mai chu, ka ngaih a ţhalo kher mai. A eng chu ni maw tiin ka ngaihtuah a.

Ka la tawn ngailoh thil a ni a. Mahse mi sawi leh ka pu ngeiin min hrilh ţhin chu ka hria. Rammi a nih ngei dawn hi, tiin ka ngaihtuah a. Ka pu pawhin “ramvah te hi i hrat ve si a. Hetiang thil ilo tawng a nih chuan, hlau miahlo in hmachhawn tawp la, an rikrâp che a nih chuan vau te pawh vau la. Mahse, a hranpa chuan cho ngai suh” a tih ţhin te kha ka hrechhuak a.

Ka chhak lawk ah lah chuan, lungchhe em em in a ţap hliam hliam reng mai bawk si. Ka ning deuh chuan kan luite belh ber chu, ţhianpa nghah pahin, chakâi kan chhit teh ang tiin, meichher nen lui mawng lam thuivaklo atanga chhit chhoh tum in ka chhuk ta a. Mahse, kalsan ka tum ber ţap thawm chuan, mi zuive ta tlat mai. Ka awm pawh a ti nuam chiahlo. ‘Min zuam hle mai maw.. Mahse, i rin ang chu ka ni hauh lo ang’ tiin, ka inti pâukhauh a. Thui pawh kal duhlo in, luite chu ka zawh chho leh nghal mai a.

Mi kal ngai lohna tih tak ah kawi thum vel lekah chuan, hrawl fe fe sawm lai ka man nghal pang mai. Kan bûk zawn ah chuan duhtawkin, Bukah ka phei a. Țhianpa a lo la thlen loh avangin, nghah pahin, ka chakâi man chu ka chhum nghal a. Meivil pahin magazine bawk chu, batî ëng ah mu chungin ka chhiar leh a.

Piahlawk ațang chuan, țhianpa chuan thawm atrawn nei țan ta a, a silai rikna nen gaihtuahin, ka rin aiin a lo thleng hma mange ka ti rilru a. Ka tho a mei ka chhawm țha a. Mahse, mei ëng chinah chuan a thawm a tawp ta daih mai. Ka hriat țanna ațang bawk chuan, a rawn hêi hâ, chho țha leh dap dap mai a. Ka lo thlir reng a, mei ka tuah êng sauh bawk a. Mahse, a hma ang bawkin, mei ëng chin a rawn thlen dawn meuh chuan, a tawp leh ta daih mai. ‘E he heee,,,, tiang hrim hrim chuan, a va ninawm dawn ve âw’ ka ti rilru vang vang mai. Thâwm ka hriat leh pawh chuan, ka ngaihsak duh tawh lo a. Lehkhabu chu pawisa lo awm deuhin ka chhiar san ta a.

Vawihnih ngawt a rawn tih nawn leh hnu chuan, ka țhianpa chu a lo thleng ve ta hram a. Ka chakai chhum pawh a hmin tawh bawk a. “Han hahdam deuh la, i duh hun hun ah chaw kan eidawn nia” ka ti a. Țhianpa ipte pui chu ka’n en a. Vahrit nu pakhat leh a pa tuai pakhat a lo kap a.
“Hei i phir elaw?
“Nia, an lo fu dun a. Musep in ka kap a. Ka phir hlauh a nih kha. I rilțam tawh awm sia, chaw chu kan ei mai dawn mi. Chawei kham ah kan puah mai dawn nia” a tih tak ah chuan. Chawei ka siam a. Chakai an hmuh chuan, “min lo nghak rei hle ni maw…ka tum ai hla ka kal lawm le. A hnai zawk ah, riak an lo awmlo a. Ka kal hla ta deuh ani. Pawi hle mai” a ti a. “Pawilo hei i rawn hlawhtling lutuk alawm. Zingah sa kan hmeh phah dawn hi” ka ti a.

Chaw kan eilai chuan țap thawm a awm tawh lo a a reh tlawk tlawk tawh tih ka hria. Țhianpa hi ka hrilh ang nge, hrilh lo ang. Dawih min tih phah ang em tih te ka ngaihtuah mai mai a. Ka rilru hria ang hrim in. Țhianpa chuan, “thawm i hria em” a rawn ti ta mai a. “Ngati nge, eng thawm maw, i silai ri maw!” kati deuh hu a. Ani chuan “a.. I hriatloh chuan țha nih chu, ka ngaihtuah deuh mai mai che mawle. Henglai ram vel hi chu, min an tlawh pawh vaklo a. A ram pawh a țha in, a ngaw te hi lo atan a, vah ngailoh a ni a, Sa pawh an tam. Tawn hriat pawh i ngah phah ngawt ang” a ti a. Chutia an sawi takah chuan, keipawn ka thawm hriat te chu ka hrilh leh hnuhnawh a.

“I lo thlen hma khan bùk rawn thleng silo hian vawinga ngawt i rawn haw hman asin” tiin, za lo chung chung in ka nui lui sak a. Ani chuan, “tiang hi i nih ka rin vang a nia nang kher ka sawm che. Midang chu zankhat bak an riak peihlo. Kan thingzai tur hi ka it si a. Ka rawn sawm tawp che nih hi. Kan kih sa a nia, a hlanna pawh kan siam vek tawh. Hlan tawp atni mai. Naktukah kan hlang ang a, kan zawh ve leh sa kan chang dawn nia. Sih chan tur țha deuh deuh ka hria a nia” a ti seuh seuh a. Riltam tawh bawk nen chaw pawh kan ei hnem kher mai. No4 ka chhum chu kan mam țhak a. Buhtlei leh chawbel chu, kan insem te te a. Kan han zut dun vel a. Ka puar bawk a niang, Mut a chhuak rum rum thei hial mai. Chawei kham kan țhut chawlh meuh chuan, dar riat a lo pel der tawh a.

Zial te kan zu a, Vahrit chu pakhat ve ve in kan puah a. Kan puah zawh chuan, pakhat kan chhum a. Pakhat kan khai a. Vahrit te hi chu, an thih atang zankhat han riah ila a tui tawk chiah țhin. An sa a lo phut a. A thûr sek pawh a reh țhin a ni. Vahrit sa chhum vil pah chuan, ka thawm hriat dan chu a kimchangin ka hrilh ta a ni.

Ani chuan “chuti a nih chuan, thing i fawm khawl teh ang” a ti a. Enge a chhan pawh hre lemlo in “awle”, tih leh thing fawm tur a thawh ka rual a. Chhuah hmain kan vahrit chhum chu mei kan chhawm țha leh a. Kan chhuahsan ta a. Ka țhianpa hi kei aia kum nga laia upa, hrat khawkheng tak mai. Ramvah leh thingzai a, eizawng palian tak. Ft5 leh inch10 laia sang. Sațha tak, lang zên zaih si a ni. Hlauh neilo ni a ka hriat. Â deuh phuang anga lang, tawn hriat ngah tak a ni. Tichuan, Ani buk mual lehlam ah a kal a. Kei lehlam mual ah torchlight nen thingro chu ka zawng ta a.

Bûk mei eng pawh ka hmu phak vuai vuai, hnahkhar hmunah lutin a dingro ka hmuh apiang chu ka kit a, ka khawh khawm zel a. Put hnem theih deuh tur ka duh avangin, chawnpuar tiah vel chin. Pu khat, pawm vel țelh țawlh ka sat tawh ang tih ah, kan bûk lam ațang chuan nutling rawl hi a țap leh ta hliam hliam mai. Chawl meuhin ka’n ngaithla vang vang a, a thu chham erawh a hriat chian fak theih loh , a țap ri erawh a chiang em em si. A lungchhe hle tih a hriat a. Bûk meituah chu a rem tawh a niang, a eng pawh ka hmu thei tawh lo. Ka thing sah khawl chu ramhrui in ka tel a. Ka light ka seh kawh a. Min thlir rengtu awm tlata hriatna ka nei leh nghal. Hnunglam ka hawi ngamlo a. Ka tukhum erawh a hit mur chuaih chuaih mai. Țhianpa khan bûka țap thawm chu a hre ve angem le, tih te ka ngaihtuah a. Sah belh lo a, Bûk pan phawt ka duh avangin ka tel sa chu ka pu a. Buk lam ka pan ta.

Hnunglamah chuan min rawn zuitu awm tlat a, ka hriatna chuan min pên zau tir khawp mai. Mahse, hlau lo anga lan a ngai si. Tukhum zawng a par țha duh chiai chiai ngei mai.

Thawk leh khatah ka thingput chu, hnunglam atang min han phihsak thut mai chu, Ka țhu hnawk mai. A rang a rangin ka tho nghal a. Ka light chuan ka’n en kual pawp pawp a. Egmah ka hmu silo. Mahse ka che vel min thlirtu chu a awm chiang tih hria. “Min ti buai suh, a rit a nia, min puih i tum a nih ngawt loh chuan, min kalsan teh. Ka ning țep tawh a nia” kati ta ringawt a. Ka âw chu a khûr ang tih ka hlau khawp mai. Ka pu leh a Ka kalpui țan, pên hnih thum bak ka pên hmanlo. Hnunglam atang chuan ka thingput chu an rawn nam thut mai a. Inring hman heklo: mualdung chhuk deuh euh euh ni bawk si. Hmalam panin ka tlan dawt dawt mai a, ka tlu lo chauh a ni. Ka din theih meuh chuan, bûk ka hnaih hle tawh a. Meiling pawh ka hmu thei tawh.

Patling rawl pherh zet hian deuhsawh fahran in min han nuih uarh uar mai chu, min tih dan nen, ka thinrim kher mai. Ka hlauhna te chu abo zo a. Ka tlawmngai lutuk chuan, “khatianga infiam ngai em ni. Rawn inlan ve ta che…min tih dan reng mai hi ka duhlo, ka dawh hram hram che a, ka hlauh che i ring em ni. Mipa ka nih hi” tiin ka chem ka phawrh a. Ka bula thingtuai leh mau te chu ka sat fik hmawk hmawk a. Ka thinrim lutuk chuan, hlauh nachang ka hre tawh lo. Ka thil sah te chu engtin nge ka fik hmawk hmawk theih zawk ka hrelo reng reng. A reh tak vang vang avang chuan, bûkah ka thing chu ka pu phei a. Ka thleng chiah tih in țhianpa pawh a rawn thleng ve nghal a.

“Tunge i auh vak vak a,, ka rawn hre phak deuh vuai vuai asin” a rawn ti he haw a. Min tihbuai dan vel chu ka hrilh a. Mithar i nia an ramchhungah kan lawilut a ni a, an fiah che ah ngai rawh. Zanin hi tun ang a i paltlang theih chuan, an tibuai tawh lo ang che” a ti a.

“I hresa ni maw,, tinge i sawi loh, zan zana thing kan fawm nachhan pawh hi enge” ka ti ta a.
“Thawm in min hnaih loh deuh nan leh kan chungah kut an thlak loh nan meipui kan chhep anga kan tih en reng a ngai dawn a ni. Tlaivar daihthingro kan fawm a ngai, darsawm pakhat rik hma a kan lo inpeih vek a ngai a ni. Thing fawmsa i nei em” a ti a.

“Ka rawn put bang tlem a ni mai. Fawm belh a ngai ang” ka ti a. “Ka bulah lokal mai rawh. Fawm sa ka nei, kan han pu dun lawk mai dawn nia” a ti a. Ka tlawmngai ve bawk si chuan, “ngailo ka han fawm leh ange” kati ve țalh a. “Ani chuan tlawm ah la duh suh, min zui mai teh” a tih tak tlat avang leh ka thinrim reh tawh bawk si nen, hlauhna chuan min zem leh deuh tawh si a, ka zui ve ta nge nge a.

A thing fawm sa chu kan han pu a. Buk kan thlen chuan meipui chhepin, a êng ah kan thingfawm sa chu, fâk khat te in kan tan a. Tlaivar chu min daih em ang chu maw.. Thing hring bûk bul vel ami hi tlem la tel ila, kan tuahtel zeuh anga daih thei tawh mai ang ati a. Kan inpeih fel chuan, mutna kan phah a.

I tihdan hi kan in men chhawk dawn nge kan mu dawn ti a ka zawh chuan, i duh dan dan ati mai a. Ka chau bawk nen ka mutchhuak in min zêm hneh tawh bawk si. Mu ang tih leh Pawisak neilo thei ang ber chuan, ka mu nghal a. Bûk bang a awmlo a. A chung leh a chhuat a ni mai a. Mutna laite tih loh chu lei kan ring nghal a. Bêkte ang deuha sak a ni.

Ka mu chu ka chau bawk a. Ka muhil nghal mai ni tur ani. Ka mumangah chuan, mipakhat lian zet mai, a hmel hmuh chian theih miah si loh pakhat hian, “haw nghal rawh. He ramah hian kan lawm hauh lo che a nia. Ka chakâi khawi i man a. I thianpa lahin ka nau leh afapa a kap bawk. He hmun ah hian nuam rawn tawl reng reng suh ang che. Kan ram a ni a, in tan hmun a awmlo. Tho la haw nghal vang vang rawh” min lo ti a, Kei chuan “tihbuai che u ka tum lo. Thing rawn zai kan tum mai chauh a ni. I chakai khawi a nih pawh katlo hre hleinem, Luia awm atni a, ka man ve tawp a nitmai. Nangmahni’n min tibuai reng zawk a nih hi. Min kiansan zawk mai teh u”, Ka lo ti a.

A thinrim kher mai, mi rawn pan a. Mi rawn rek ta a ni. A lian in a chak si. Ka tal nasa mai. Ka harh hlawl chu, ka țhianpa chuan min lo sawi vak vak a. Min ko bawk a. “Ti nge ti nge, harh rawh” a lo ti mek a.

Ka mang chu ka hrilh a. “Ni maw..An zuam viau che chu ka ringlo a. An huphurh hle che niang. “Mei hi kan chhawm țha ange, mu leh rawh” a ti a. Keipawh chu ka mu ve leh mai a.. Mahse, ka muhil hleithei tawh lo.

Țhianpa muhil hnar ri deuh sêk sêk chu ka ngaithla reng a. Ka lo muhil deuh siar siar a niang. Ka ngalrek ah hian kutphah lian zet maiin hnehsawh tak a, min han hmer hi ka hria a. Ka harh zawk mai, chutah min han phih zui mai chu, ka leng deuh lawp mai a. Lei chhuat ah chuan ka mu hlawm thla tawp mai. A rang arangin ka tho nghal a. Ka phu chiang si patling rawl pherh zet mai in min han nuihsawh zui uar uar mai a. Midangin anlo zawm ve bawk a. Nutling râwl leh naupang chenin, za tak mai leh deuhsawh taka min han nuih chu, pang ah țâng atvak chem chem mai. Ka inti pachang a. Meipui chu ka va chhawm țha a.

Țhianpa pawh a rawn harh ve tawh a, rawn thawhchhuah pahin, “An lo thawk tak tak tawh ni maw, min kaitho ve ta che le” tiin a rawn phun nung nung a. Min nuih awr awr chu a tawp a. Phun bul bul leh inbe ser ser ri chuan, mei eng chin leh chinloh ah chuan min hual vel a. Ka hmulthi a ding ar ar mai leh nghal a. Țhianpa a rawn thawh ve tawh avangin, ka hlauhna pawh a kiam sawt a. Thiana engtin nge kan tih dawn ti a, ka zawh lai mek chuan, mangang au rawl diktak mai hian, “min chhan ruu…min pui teh u..” a’n ti vawng vawng mai leh nghal a.

Țhianpa chuan, “engtin nge maw kan tih dawn le.. Hetiang em em chu a ni ngailo asin. Ka hrethiam tawh bik lo tawp mai. Kan riahna hmasa ah kha chuan, thawm bak an chhuah ngai silo a, heti hrim chuan zan a rei duh dawn mange” ti a, a sawi lai reng chuan, mangang aurawl chuan min rawn pan ta a.

Patling na tuar in, mangang tak mai a. Țanpuina dil a, an au tial ruai ruai mai chu Râpawm duh ngei mai. Nutling aurawl in a zui nghal a, naupang tapin an lo chhawn bawk. Meipui eng chin leh chinloh ah chuan, anmahni hmuh theih miah silo in, min vel nuaih nuaih mai a ni.

“Ti teh țhianpa, silaimu kha phawrh la. A zên chauh kha in kap tak teh ang. Upa ho in an sawi țhin ka hria ani. Ti ve chhin ang ” ka ti ta a. Mei a rem deuh phei chuan min rawn hnaih thei kher mai. Silai chu ka la a. An rawn hnai deuh ta maw tih ah chuan “kha le,, keimah pasalțha Hawnglaia tu chhuan hnihna kani ngai e. Min va zahlo ve. Ka dawhthei tawh bik nek lo che u, sa leh râlah ka tlan bik hlei lawng e” tiin. Silai ka hmet puak a. Țhian pa’n min rawn rawn nghal a, in hrosa chungin silai kan hmetpuak a. Bûk kan kal hual a. Kan kap ri dup dup reng bawk a.

Kan han chawlh meuh chuan, anlo reh țhap tawh. Thlan a tla phungthei lawm le.. Țhianpa chuan “an reh tawh dawn a niang, khua pawh avar țep tawh ang. Kawl a rawn eng țanin ka hria” a tia. A sawi zo deuh chiah tih chuan, patling thinrim rúm leh phun bul te nutling țap râwih râwih ri te chuan, kan piah lam ah min hlat zawngin an țap phei ta chuah chuah mai. An țap ri chuan, thling a fan vek thei in ka hria. Kawl a lo eng țan a, zan zawng zawng ah chuan a rei ber awm e. Minute tin mai kha kum khat zel ni awma mawi a ni.

“Țhianpa kan riahna hmun hi nimin khan kan belchiang hman silo a. Kan awmna vang hi ani thei mai lo maw”..ti in kan zawt a. “Ka hrelo le. Ka lo tawn tawh te nen chuan, nizan kha chu danglam tak a ni. Khatiang em em in an rawn che ngailo. Ka hlau takzet a ni. Awmlo la chu, ka buai mangang viau ang” a ti ta mai a. Ka hlauh zia leh amah avanga thlamuang ka nih zia te. Huaisenna min petu a ni tih a inhre der silo. Hlau ve ve chungin kan lo, hlau lo der ve ve a lo ni reng si a.

“Rawng lo bawl ve thung la. Ramvah pahin kan awmna lai vel hi kan belchiang teh ang” ka ti a. Țap thawm liamna lam pan chuan ka phei nghal a. kan awmna mual chuan chung lam hrut tur chuan, ka pan chho ta a ni.

A ram a țha in, a zawl pharh dup mai a. Nimin khan belhchianna hman awm hek lo. Hmun rem thalai tiin buk kha kan sa chwt mai kha ani a. Kan fangkual vel ta chu, hmun zawl pharh tha em em mai, kan bûk chung lawkah chuan alo awm niin. A chuan hnuai hmun rem țha laiah bûk kan sa a lo ni a. Hmunzawl chu ka lut phei a. Mihring sulhnu chiah chu hmuh tur awmlo mahse, mihring tualchaina ni ngeiin a lang. A fai țhain a bel hnum hlurh mai a. Kawngpui ang tak hi a kalphei ruah mai bawk a. Ka zawh phei zel a, ka zam rum rum mai. Ka thâu ah mi man a. Enge maw hian min mawlh tlat. Ka hlauh ber erawh ka hre hauh silo. Min en țhup ni ber hian ka hria.

A fai chin tal chu ka zawh reng reng dawn a ni ti rilru chungin ka kal zel a. Khua pawh a var fel vek tawh a. Mahse ngaw chhung chu, thing leh mau a țhat em avangin, a la thim ruih tho. Min enthla reng ni a ka hriatna chu a nasa tulh tulh leh nghal. Silai pawh chu ak lo in, a ken in ka keng ta a. Pen sawmhnih vel ka phei leh ang tihah chuan, ka kawng zawh chu mual pahnih kar cheh ruam rai deuh ah a inkhawh lut tih ka hmu ta a ni.

Ka harh zawk mai. Hei ngei hi Ramhuai liam kawn chu a lo ni maw. An bu zawl leh an. tual châina kan lo ur atin nih hi ka ti rilru a. Kir leh tuma ka inher chiah chu, engemaw hian min kalpel fua mai a. Mahse hawilet duh hauhlo in, ka let leh ta nal nal a. Min zuitu erawh an awm chiang mai. Ka kal chak leh mi zui chak a. Ka muan deuh leh a muang ve zel niin ka hria. Thing leh mau kar vel atang chuan, min en țhup mai ni hian ka hria a. Kan bûk zawnah chuan chhukin bûk ka thlen hma chu, ka thlamuang lo. Tukhum mur uaih uaih in ka kal a ni ber. Bûk ka thlen chuan ka thaw huai huai mai. Țhiana pawn chawei a lo peih tawh a.

Ka thleng chiah chu, “tinge mi rawn vawm vak vak a. Bûk chung pawh i vawm pawp fur alawm. Zing zingah intih țhaih tum te chu,” a lo ti nung nung a. Kei chuan “ka vawm lo che..I awihloh leh chawei kham ah buk chunglam ram khi han chuan ve chhin la i hre mai ang. Buk pawh kan sawn a ngai. Min kiansan hauh lo ang. Nizan kha chu, aite chhin na lekah ngai rawh. Kan riak leh a nih chuan, kan tan a hlauhawm pha tlat. Kan chung chiah khi an tualchaina a nia. Apiah lawk ah sawn an liam kawn pawh a awm” Ka ti a.

“Khai aw, kalo hre hleinem ka la han kai chho ngai bik miahlo a. Zan dang nen a inthlau reng a ni. En ve kher pawh a ngaih loh chu. Chaw ei kham ila, kan insuan nghal mai dawn nia, Chaw ei ang tih tur kan ngah hi” ati a. Chawei kan siam a. Kan vahrit sa ber a pawh chu ka eitui tawh lo. Ramhuai sa ah riak ka chan a. Țhiana chuan a duh bawrh bawrh khawp mai. Ka hrilh duh lem hlei lo a. Duh leh kan ei zawh vek hun ah ka la hrilh ang chu.

Kan han inpeih fel meuh chuan, dar riat vellai alo ni tawh a. A ngai te bawkin bawr zet in kan in ak chhuak leh ta hnu hnu a. Tlawm thlak duh angreng khawp mai. Keini aiin thil an ti thei zawk miau si a, ui dawih zawk ang mai a, meikhup a kal hnu hnu bak sahimna awm silo. Mualthum vel lai kan kal leh hnu chuan, luitui țhatna lai hmun rem deuh ah chuan kan in nghat a. Mualdung takah hian buk sa tawh ang, sapui pawn a khawih ngailo anti ngai e, tiin mualdung hmun rem țhalaiah chuan buk kan sa a. Luite tui chu mau phelin buk kawtah kan la phei a.

Buk hlui chhuat pu turin țhianpa a kal a. Keiin a chung tur changel satin, ka chih nghal bawk a. Ka peih fel meuh chuan țhiana pawh alo thleng phei leh tawh a. “Kan vahrit khai kha a lo awm tawh reng reng hleinem. I ak phei mi” a rawn ti ho mai a. Kei chuan “ak nang, Pawi hleinem. A fapa kan ei tawh sia, a nu tal kha chu vuiliam ve mai mai rawh se, a dang an la tam ang” ka lo tih san mai a. Hriatthiam loh hmel fe chuan min en hû a. Ka hrilh ve ta a ni.

An uak tlai khaw hnu leh rih. Kei pawn a tui hang leh a bawp ka ei ve tho lawm. Ramhuai sa leh a tui hang kan ei ni mai lawm. Tiin kan nui vak vak a. Buk kan sa zo ta bawk a. Thingzai tur hlang tur chuan kan thawk chhuak ta a.

A lo lian tha kher mai. An tan bunna a hmai ringawt pawh ka dung chen lai a ni mai. Tum khatah ringawt pawh cubic sawmnga chin chu, a chuak hrim hrim dawn sa. A hlân erawh ka huphurh ngang mai. Ka la tive ngai silo a kan hlan theih pawh ka ringlo hial. Mahse ti țhang tih takah, engemaw ti tiin țhianpa zarah kan hlang ve mai bawk a. Mak ka ti ngei mai. Ka țhiana chak zia pawh ka hriatchian phah khawp mai. Tichuan a tuka hna țan theih turin kan kalsan ta a ni.

Sava zanriak kah tur zawngin kan ințhen a. Ka kal ta chu, Buk mual lehlam ah chuan chho in. Phivawk kawlhzet mai ka țhawng fuh pek a, Min rawn bei nghal chat mai. A chal țha tawh viau leh nghal a. Ka inrin hma in ka kekawr a rawn tai thler hawk mai a. A sa kan ei duh dawn loh avangin ka kap duhlo a. Ka tlanchhiat san ta a ni.

Ka tlanchhiatna lamah chuan, zawngrual thawm ka hria a. Kan pan hnai chu, an zanriak tur in hawr khawm an lo ni a. A sân tham deuh avangin mualdungah chuan ka chho a. Khâm ko atang a phei zawnga kah rem tur chuan ka pan hnai zel a. Lei lam chu a thim vek tawh a. Han hawi chhoh chuan unau hmelhai ang hun vel a la ni. Eng ka chhi ngam silo a. Thim tham ah chuan, arkhawthimdai tak meuh meuhin ka veh hnai zel a. Ka duh ang chin ka thlen chuan, kan en chiang a. Sawmhnih vel lai chu an ni. An hmuh nawm ngang mai. Ka en reng a ka lam hnaih ber ami a pachal sual ber chu ka kap ta a.

Ka fuh chiang ngei mai mahse a tla duh tlat lo. Midang ho chu an tlanchhe chum chum mai a. Ka kah belh duh lemlo bawk a. Muangchangin silaimu ka thun leh a. Ka kah sa thingkunga in ham bet tlat chu ka va kap nawn leh a. Muangchangin a tawlh liam riai riai a. A tla ve ta nge nge a.

Kan chhuk meuh chuan ka rinaiin alo khâm daih mai. Ka thil rah a pelh a, ka duh reng vang ni miahlo in, mawngtawlh in kan tleng thla pur pur mai chu, mangan thlak duh ngei mai. Ka din theih meuh chuan. Ka kekawr mawng a pawp vek hman. Torchlight in a tlakna lam ka én a ka va chhar ta a. A hnungzangah leh a nakah silaimu alo tlang ve ve a. a lian țha khawp mai. Zawng mei sei chi a ni a. Hlawhtling inti takin buk lam ka pan zui ta a ni.

Ka țhianpa pawh a lo thleng tawh a. Varung pahnih a lo kap a. A lo rawh vel mek niin, Ka zawng kah an hmuh chuan a phur ngang mai. Chumi tlai chu, varung sa hmeh in chaw kan ei a. Kan eikham a. Zawng kan puah fel meuh chuan, zan alo rei fu tawh a. “Zanin chu thlamuang deuhin kan mu thei dawn a nih hmel hle mai, tirawh i mu teh ang. Nizan kan mu tha bawk silo” tiin, kan mu ta nghal a.

Ka mumangah chuan, a hma ami bawk khan. “In buk in chhuah san chu a țha e. Chhuahsanlo vaìh ula chuan, in chak lo hle ang. Kan tlangval te ramchhuah bo lai a ni a. In vannei mai mai a ni. He lamah hian rawn chho teh, thil ka lo entir ang che” a ti a.

An tualchaina ni ngei a ka rin ka han fan ah khan min hruai a, an lo tam kher mai. Hmanlai pipu te ang maiin, hrenpereng an kaih a. Naupang lah ruakin an lo infiam nuk nuk bawk a, chhun en lai ang mai a ni. A lai ah meipui an chhep a, an tlangval ho chuan an lo lam hual luih luih mai a. Min hruai tupa chuan “tukin a, I lokal te kha kan lo thlir reng che asin. Kan tlangval ho pawh ka khap dai thei mai mai a nih kha. A ai thui kha han kal vaih la chuan damin i haw tawh miahlo ang. I huaisenna hi ka zah em a. Hun ka pe che a nih kha. I á lo hlauh a, In him phah ta nih hi. Kan tlangval te zinga pakhat thaza fal deuh khan a khawih hman țep che a. I hawi let ta hlauh a, a kalpel ta zawk che nih kha i hnungah kan zui reng che a, rawn hawi let vaih la chu, kan tlangval te khan an zuam sawt ang che nga, ka dang thei tawh kherlo ang. Kan bu zawlah ngei ilo kal a. Damin i chuak kha lawm hle ang che. Tunah chuan tumah kan inti buai tawh tur a nilo. Nangni hringmi te avang hian kan chêp tulh tulh si a. Kan bu zawl chu kan hauh na ve khawp a nia. Keini chauh hi kan nilo a. Lal hran hran kan awm ve tho. Midang pawh in tihbuai loh nan fimkhur hle ang che,” Min ti ta a.

“Ka duh vang renga tibuai che u, kan ni hleinem’ kan hriatloh vang zawk alawm. Tih buai che u kan duh bik reng reng lo,” tia chhân ka tum a. Ka țawng thei reng reng lo mai. Ani chuan “i sawi tur chu ka hria e. Chuvang ania, hun ka pek che. Mahse, midang chu kei ang in an dawhthei ve kherlo ang. Fimkhur ang che, haw leh tawh rawh,” a ti a.

Ka harh hlawl mai. Kawl alo eng țan tawh bawk a. Ka tho a, rawngbawl ka țan nghal a. Chaw ei ka peih hnu chuan, țhianpa chu ka kaitho a. Chaw te eiin, Chaw kan eikham chuan thingzai tur chuan kan thawk chhuak ta a.

Tluang takin karkhat chhung chu, kan thawk ta. Thingzai pawh cubic sawmriat lai kan zai thla tawh a. Rinai daih in a chhuak hnem dawn leh nghal: kan lawm in kan hlim khawp mai.

Chawlhni(sunday) a nih avangin ramhnuai mah nise, thingzai kan chawl a. Ramhuai liam kawn a kan riah zan te chu kan sawi vel mai mai a. Ka mumang te chu ka hrilh a. Alo han kal ve kherlo kha a inchhir loh thu sawiin țhianpa pawh a phûl hlut a. “A dik ngei a nih hi, hei min ti buai ta reng reng lo mai, i han fang kual hlauh kha kan vannei a nih hi. A nachang ka hre reng reng hleinem kei chuan, ka pa pawh in rammi reng reng chu cho loh tur, thil an tithei phian a nia, hlau lo in hmachhawn tawp ila a tawk. Inthiar fihlim san a him ber” a ti țhin” a ti a.

Tichuan awm awl ni a ni bawk a luiah sangha man turin kan kal ve ta thung a. Kan riahna mawnglam ah hian tuitla an tìh mai. Lui lian lutuk nilo. Len den ve theih na si a awm a. Chuta lên den tum chuan, sangha châk a na alawm le tiin kan kal ta a ni.

Lui kan thlen thlak chuan, kan chawfun leh a dang tul lemlo ho chu. Kan thawmhnaw nen, luikamah chuan kan dah a. Lui mawnglam chu kan zawh thla ta char char a. Sangha pawh an tam hmel khawp mai. A hla tham deuh bawk a, mi kal tam heklo. mihring sulhnu kan hmuh pawh a hlui thei khawp mai.

Duhtawk kan zawh hnu chuan, vaihlo zial te kan han zu khawmuang leh te te phawt a. Lén chu kan dèng chho țan ta a. Sangha pawh an ți lemlo bawk a, man a nuam khawp mai. Reilote ah rawnal burkhat chu kan man der mai. Kan zawhthla thui lemlo bawk a. Mauburthum kan man meuh chuan, kan innghahna kan lo thleng chho der tawh mai a. Ni pawh a vanlaizawl vel chiah a ni.

Kan sangha man burkhat chu kan chhum a, kan inbual fai a, chhun chaw kan fäk zawh chuan sachanna tur i zawng haw ang kan tia. Kan sangha man leh thildangte chu kan in ah sem a. Kan buk lam pan pahin kan haw kual ta a.

Tlangdungah zel chho in, sa chânna tur sih țha deuh hmuh inbeisei in kan zawng chho ta a. Thla rallam mah nise, sih lùn țha deuh chu a chân chi viau tho tur ah kan ngai a. Inlam haw kan hnaih deuh a ngai tawh a, buhfai kan neih tlem tawh avangin. Sa lian tham deuhte a kah theih beisei a Sih chân tur zawng kan ni ber.

Ka zâwng kahna piah mual kan chhuak chho chu, hmun rem zawl țha lai tak mai ah hian sihtui țha em em mai hi a lo awm a, sa hnu chu pui tak a ni. Sazuk, sakhi, saghal, saza – an hnu chu a chiar dup mai a kan hlim kher mai. A hmun hma a fai si a, han chânna tur ber thingkung chu a vang ta thung tlat mai a. Mau hmun tih takah, Thingkung han belh mai tur awm silo a. Awm se chu chang nghal ila, khaw èn laipawn kan kah hman ngei ka ring hial. Hmuntin deuh thaw ațang hian sa in sih an rawn panna kawng chu a thlur seng sung mai a. Țhianpa chuan “țhângte i dawh chawp mai ang, tih ngaìhna awmlo nih hi. A lun hmel bawk a, thawm nei viau mah ila, a pawi hranlo ang. Kah tur tawk chu an awm hrim hrim” a ti a. Țhangte tur thingtuai kan sat a, kan dawh chawp ta nawk nawk mai a. Ft sawm vel lai a sangah chuan țhut mut theih tur in nuamsa taka awm theih nan kan siam ta a. Pahnih kan ni bawk a, kan siam rinawm tlet tlawt khawp mai. Han chet vel pawn a nghing eih lo hrim hrim.

Kan siam zawh meuh chuan, ní pawh a lo tla felder tawh mai. Țhiana phúr phéng chuan, chân nghal a duh tut tut mai leh nghal a. “Lui kan kal tawh a. Sangha lah kan man țha. Torchlight pakhat chauh kan keng bawk si. Sunday a thawh atan chuan duhtawk ang. En laiin bùk i pan vat zawk teh ang. Kawngpawh zawn chawp ala ngaih hi ” ka ti tlat a. Ka hawpui thei ta hrâm a.

Harsa em em lo in bûk kan thleng thei mai a. Rawngte bawlin sangha kan chhum a. Chaw kan han eifel meuh chuan darriat vel a lo ni leh daih tawh mai Mutna siamin, mutpah chuan kan sih hmuh lún țhat zia mawlh chu kan sawi dun a. Kan ti ti mawlh mawlh lai chuan, ral leh lam ațang chuan a rawn kùk ta råih mai. Kan awmna lam atang chuan pakhatin alo chhawn vat bawk a. A tute chu ni maw, tun ang zana han in chhawn tak vak vak mai chu, kawng an bo emaw nile kan ti a. An inchhawn a reh chiah chuan, a rawn kuk hmasakna lamah chuan thinglian tak tlu tur ang hian, a auh ri țuah țuah mai a. Chutah an tlu tur chuan, ri țuah țuah chungin, Mau a delh puak pawp pawp mai bawk a. Kùk ri bawk chu an in chhawn leh a. Leimin hum hum ri hian atzui nghal a.

Chung rikna hmun chu kan piah ral, kan lui kalna kam lehlam pang kan buk zawn ep a ni. A ri zawng a chiang duh khawp mai. Keini luikam leh lam ah kan riak a, a lehlam kam tihna a nih chu. Țhianpa chuan, “chung chu dan pangngai a ni, naktukah chuan engmah hmuh tur a awm leh chuang lo ang. Kan hre har zawk khawp a nia. A chang chuan ramhuai ho hian lo an vat țhin a, zanah kher leh nghal, an in au chuah chuah zel,” a tih lai mek chuan an in ko ta liah liah mai a.

An sawi tak erawh a hriat theih der loh. An aw erawh a fiah em em tho bawk si. An thawm ațha ngang mai. Kan ngaihthlak renglai chuan hriatloh karin, kan lo muhil der mai a. Zing kan han thawh chuan, țhianpa sawi ang tak tak khan, engmah thing tlu leh leimin awm reg reng hmuh tur a awm miah lo. Nizan a, a thawm ringawt atang kha chuan, a mual mual a min hem huam awm tak kha a ni a. A mak khawp mai.

Tukțhuan kan eikham chuan thingzaina lamah kan thawk chhuak leh a. Thing pawh kan zai hnem tawh kher mai. Kan hlan sa chu, a tuk ah kan zai zawh mai hmel a. Tlai lamah chuan hma takin kan bang a. Tunge sih chang hmasa zawk tur țhum vawrin kan en a. Kan chang chak ve ve si.

Mahse țhianpa a vannei ta zawk a. Sih chang tur chuan phùr zetin a kal ta a. Keipawh hmun dangah ramvah haw pahin sava zanriak tal kah tur zawngin ka kal. Ka kual ka kual a, kah tur ka hmuh loh avangin, vahrit zanriak tur thlawk ri ngaithla in an riah duhna awm ang ah țhu in ka ngaithla ta ringawt a.

A reh vang vang khawp mai. Mahse rei pawh ka țhu lo, ka chhak lawk ah chuan vahrit thla khawng ri ka hria a, ka pan chho ta a ni. Ka han hmu lawk lo a. Ka thawm a hria nge, a nú zawk chu a rawn thlawk chhuak a. A pa dak vual vual chu ka kap ta a. A rawn tla ri phur phur mai. Ka chhak lawkah chuan a tla thum dut a. Ka han chhar chuan a lo thifel der tawh. Hlawhtling inti zet chuan buk lam panin ka haw ta ani.

Rawngte ka bawl a.Vahrit chu ka puah a. Țhianpa silai rik hun ka ngai chang reng bawk a. A kah ngei ngei ka rin avangin eng sa ber nge ni ang tih ringawt ka lo ngaihtuah a. Rawng ka bawl zo a. Chawbel pawh ka herchhuak vek tawh. Ka dah dai a, Vahrit chu ka chhum ta thung a. A hmin hman loh leh zinga eitur a ni mai, ka ti rilru a. Mei vil pahin bati engah lehkhabu ka chhiarsan a. Darriat leh a chanve vel bawr a nih ka ring. Țhianpa chu a va kap har zawk ve aw ka ti rilru nauh nauh a. Mahse sih hi zawng chan rei a ngai deuh țhin reng reng a. Sakhi te chu thim hma in a kah mai theih tho bawk a. Sih kha a lun em avangin beisei ka lo ti sang ve em em ringawt a ni mahna. Amah lah sa kap thei tak a lo ni bawk nen.

Mahse ka rinloh deuhin a rawn haw ta luau mai. “Ti nge kah tur awm na nge” ka lo ti a. “Awmlo,,, enge a chhan pawh ka hrelo , a hmun saw ka țih tlat. Ka thau ah min man tlat ni ber in ka hria. Naktuk ah va chang ve chhin la, i hrethiam mai ang” a ti ringawt a.

“Nih chu mawle… I chau deuh a ni ang e. Chaw te ei ila, i mu vat ang naktukah hma deuhin zawh tum ila. Tuk leh lam chu kan haw mai a ngai dawn a ni. Buhfai kan neilo țep tawh a nia” ka ti a. Chaw kan eikham chuan mutna te siamin kan tlu zal a. Kan luh leh hun chu, thingzai put kawngte siam hmasak a. Burma ho pawh hruai nghal mai a țhat tur thute kan sawi a. Kan ti ti mawlh mawlh lai chuan, zan hmasa ang deuh bawk chuan, ral leh ral ațang bawk chuan an in au leh ta a. Mahse, zan hmasa ang lo takin zanin chu an thawm a na tehchiam lo. Thil pawimawh tak inhrilh ang mai hian, an in au tawn reng a.

An reh ta vang vang mai. Chutah le, pakhat hi a han kùk râi’h mai a. Lúnglian pui pui lum ang mai hian a rawn ri ta rùih ruih mai. Mau te chu a dèng puak pawp pawp mai a. An kùk rùih rûiha, an haw haw dúr dur mai bawk a. Kan ramhuai ho chu enge maw lawm an nei aniang a, ti rilru chungin kalo mutthilh san ta ani.

Zing kan tho chu a hma ang bawkin engmah hnuhma hmuh tur a awm leh hlei law.. Ka thawm ah ka țhianpa pawh a rawn tho ve a. Rawngbawl pah chuan zanah ti khawp khan thawm a țha a. Phe hen hun awm tak si, hnuhma engmah awm leh ngai silo chu, mak ka tih thu ka sawi vel mai mai a.

Chawei pah chuan vawin chu chawhma bak thawh a ngai dawn lo bawk a, hahdam in thawk ang aw” ka ti sauh sauh a. Thianpa chu ala tawng ve miahlo tih ka hrechhuak a. “I nuamsam lo em ni tinge iva ngawichawi ve” tiin kan zawt a.

Ani chuan a, “eng nilo e. Ka țha e, Nizan ka mumang kha ka lo ngaihtuah a, ka rilru ah a awm reng alawm mawle.. “Englo ania, ka sih channa ah khan ka lo awm a. Kan hawikual vel kha hmuntin maiah khan, ramsa chi hrang hrang, alian ate an lo tam khawp mai a. Minlo thlir țhup mai niin. Silai lah chu ka lo keng reng renglo mai, silai la tur a rawn kal kan tum kha ka kal sawt thei miahlo a. Sih ah hlir khan ka awm zel si a. Ka mangang hman khawp mai. Mahse, i thawm khan min ti harh ta a ni. Tunah pawh hian sih ah khan awm ang in ka in ngai deuh tlat in ka hria” a ti a.

Kei lah pek chuan, “i mawngèk i thiar fai lo niang, Hmai phih la reh mai ang. Ti rawh insiam ila, i zuk zo vat teh ang. Ka chân ni a ni bawk a. Min sawi hlauh țalh tum suh. Ka chang ve dawn tho tho. Sawtiang reng renga Sih lùn, sa tlan nasat ka la hmu ngailo, ka phùrna ringawt pawh hi damloh pui tham a ni” ka ti a.

Thingzai tur chuan kan chhuak ta a. Kan zai tluang viau na a. Țhiana erawh nidang a ang tlat lo. A phurlo in a nguai riau mai a. Mahse, ngaihțhat loh na ka nei lem hlei lo a. Ka phùr e’m vang anih ka ring.

Darhnih velah kan zo a. Phur takin buk kan pan chho a. Țhianpa lah chu a ngawichawi em em mai a. A chau deuh ni tur ah ka ngai mai a. Chhun chaw tur ang rengin rawng ka bawl a. Ka chân rei deuh palh pawh a. Rilțam lo turin ka hisap deuh a ni. Rawng ka bawl zawh chuan chawei ka siam a. “Țhianpa ei ila, hei ka siam vek tawh a nia, tiin țhianpa tlu zal chu kan au a. Ani chuan, “chaw pawh ka chaklo ka ti, nangmahin lo ei mai teh. Mutzal ka duh rih tlat mai” a tih vang chuan, keimahin ka ei ta a.

Ka chawei kham kan inpeih fel meuh chuan, ní pawh a hniam tawh khawp mai. “Țhianpa ka kal ania. Chaw chu iduh hun hun ah lo ei ve mai rawh aw.. Zanriah a ni tawh mai. Rawng pawh lo bawl duh tawh suh ” ka ti a. Mi chhang lem hlei lo chuan, “min thlah rawh u. Ka haw dawn” tiin, a rawn riat nawk nawk mai a. A tawngvai ni maw tiin, nui deuh pùt put chungin ka chhuahsan ta a.

Ka phur bawk a, phei khai a zang duh ngei mai. Kalkawngah chuan vahrit, ramar leh varihaw tih ang reng, zanriak tur pawh ka hmu nual mai. Ni dang chu nise ka kap ngei ang. Mahse, salian beisei a kal ka nih avangin ka ngaihsak lem lo. Sazuk, saza, sanghal, enge maw ber chu, ka kah ngei ka inring tlat. Tiang reng reng a Sih lùn leh rak hi ka la hmu ngailo hrim hrim. Thim hma deuhin ka thleng phei a. ‘Sa hnu thar a awm em aw ‘ tiin, sih lam chu ka va belchiang hmasa e ka tia, ka rinloh deuhin, ka țhianpa ke (pheikhwk) hnu ka hmu ta țeuh mai a. Engtizia nge maw. Ani ramvachal leh hrat khawkheng tak maiin, hetia dai pherh vak nge maw anih le.. Mahse, pawi ka ti hranlo. Hetiang khawp a Sih lùn ah hi chuan, an țit(hlauh) phah ka ring lemlo. Chuvanga țhiana pawh fimkhur lo a nih ka ring leh ta zawk a.

Țhangte lam chu panin, ka phei a. Ka lawn chho ta nghal a. Țhut hmun te ka rem fel a ka inpeih chuan khua pawh a thim ani tawh mai. Vanvar lam han hawi chhoh erawh chuan, thing leh mau lér te chu ala hmuh theih ruai ruai a. Kah ngei ngei inring tak chuan phur em em in ka țhu ta vang vang a. Ka rinai in sa thawm erawh ka hre har, thla rallam(mang) a nih tawh avang chuan, ngaw chhung phei chu, a thim chhah kher mai, aimitthlawn dik tak a ni.

Ka hnuai lam ah chuan thawm ka hria a, ka ngaithla reng a. Sihlam panin a kal ngei niin ka hria, mahse, pakhat chauh a nilo. An hnahthel pal rik pawh a ri sut sut thei a. Sarual nge ni a. A no hruai aw.. Sih lam ka hma zawn ah chuan an ri phei zel a.

Muangchang leh thawm dimtak in, ka insiam rem a. Silai chuan kap nghal thei mai turin kan tin a. Torchlight leh silai hmeh bel in kan chhun eng phut a..!! Mahse…, engmah ka hmulo. Ka hnuai vel te chu ka énkual zel a, Engmah reng reng hmuh tur a awmlo. Hmm.. Ka bengchhe ri mai mai em ni aw,, Mahse, ka hreciang viau lawi si. Ngawi reng chuan ka țhu leh ta vang vang a.

Thlivawt takin min rawn chhem ni mai hian ka hria, a vawt sùng sung mai. Kut kuangkuaha ka awm lai chuan, ka țhutna țhangte chu, hneh zet hian a rawn insawi then lawp mai a. Ka tla țhe’lh leh nghal. Sazuk in, a pang hiah nan a rawn hmang ta mai emaw ni tiin. Ka zuk ên a, engmah hmuh tur a awmlo.

Sihtui lamah chuan mihringin kuta tui kan thal a, kan in ang mai hian, tui han in ri hruih hruih ri ka hria a. Ka light chuan kan chhun vat a. Ka rei le.!! Ka țhianpa ngei mai chuan țhu chungin sihtui chu a lo in kiang kiang mai. Mak ka ti lutuk chu ka mengzau kawk kawk mai a ni.

Ka èn reng nachungin, engtik laiin nge a bo ka hre hmanlo. Mitkhap kar lek chhungte mah nise ka hmu chiang khawp mai. Chutia ka hamhaih lutuk in ka èn reng lai chuan, ka awmna chu atrawn sawi leh lawp mai a, ka tla teuh kher mai. Ka uai tang hman hram a ni. Patling lungawi lo thinrim aw tih hriat tak mai hian, “chhuk nghal rawh” rawn ti hian ka hria a. Ka mùr chuaih chuaih mai.

Ka hlauh em vang chu a niang, ka uai kai chho rang kher mai. Thlipui rawn thawk ang mai hian , thlanglam kawr ațang chuan, a rawn ri chho hum hum mai a. Ava nasa em em ve aw…min chhem thlak loh nan tiin ka lo invuan nghet lawk kher mai. Mahse, a rawn thleng thei miahlo.

Sih lamah chuan, ka țhianpa aw ngei mai kha, na tuar tih hriat tak mai hian a rúm ta nghúr nghur mai a. Ka hnuai ațang chuan a hma ami aw..bawk chuan, “chhuk rawh ka ti ni lawm ni” a rawn ti leh a. “Ka chhuk dawn e” tiin rang tak chuan ka chhuk nghal a. Ka țhianpa lah chu a la rum dur dur mai bawk si a. Light chuan kan èn a, ka hmu thei bawk silo.

Palian tak hian min rawn pel fua niin ka hria a, “haw nghal vat rawh” a rawn ti a. Ngaih țhalo zet leh tlawmngai rilru tak chuan buk lam ka pan ta a. Ka țhianpa chu ka ngaihtuah kher mai. A mumang leh sih kam vela a ke hnu ka hmuh te chu ka ngaihtuah a. Sihtui kha alo in tak tak em mi dawn le..

Ka hnunglam ah lah chuan min zui dúl dul ni mai hian ka hria. Ka țhianpa chu ngaihtuah hle mah ila, ka hnunglam ami te chuan, anmahni ka hlauh vang emaw an ti ang tih ka hlauh avang chuan, ka duh ang pawn ka kal chak ngamlo zawk a. Ka țhianpa chu ka ngaihtuah e’m avangin, hlauh lam pawh ka hre chang tawh lo. A thi nge a la dam ang tih mawlh chu ka ngaihtuah ber a ni. Buk ka thlen chuan, ka chhuah dawn a a mut dan ngai khan alo la mu a. Ka’n âu a, min chhang miahlo.

Ka zuk sawi a. A khua a sik nasa hle tih ka hre nghal mai. Mutbu chu ka kaipharh a, ka mut țha ta vat a. Puante sin lum tirin, tuiin a chalah ka dep bawk a. M.b. Nachhawkna kan pai ve chu, mum hnih ka rawt sawm a. Thirfian in ka barh zui a, ka mangang ngei mai. A hnu deuh ah chuan, a rawn tawngvai ta a. Sih lam hlir mai chu a țawngvaih pui char char mai. Ka’n biak lah chuan mi chhang mumal reng reng lo mai a. Siha awm ang khan a inngai tlat a ni.

Vawikhat chu meng a deuh ruai chung hian, “nichina ilo kal kha ka lo hmu reng che asin” a rawn ti a. Ka ngaih reng ațha thei tawhlo. Upa ho in, thla’ai koh chungchang leh sih huai nei, bùng huai nei vel an sawite kalo hre ve tawh a. Mahse, tun ang hunah chuan, an awm kalo ring tawh lo hrim hrim a ni. Sih huai nei ah chuan, lung vawm luh te, a tui dåi, khawih leh zuk bih reng hian, sih huai thinrim chuan, an thla a man thin niin an sawi.

Chutiang a lo nih a, ka țhianpa hian sihtui kha a in a nih si chuan, atthla chu koh ngei a ngai dawn a ni. Ka ngaihtuah ngial paw’n a dik ngei ka ring nghet tlat. Khuaah midang han pun dawn ila, lam a hla tham si. Ka țhianpa lah kalsan chi ani bawk silo. Sih ka chan lai khan a thla rum leh amah ngei kha ka hmu bawk si a, chhan dang a awm thei tawh lo. Hun pawh ka nei tlem hle tawh a ni tih, amah ka hmuh leh a thla rum ka hriat ațang khan a ti chiang em em a ni. Hlauh sawi thei leh hlauhna hun a awm tawh lo. Ka țhianpa hi dama hmuh leh ka duh a nih chuan, sih ah khan kir leh in a thla kha ka va koh ngei a ngai a ni. Hlauh nei miahlo tan chauha tih theih thil chu kei hian hlau chung chungin ka tithei angtem. Midang pùnna hun a awm silo a, ka tih ngei ngei a ngai ani.

Tichuan ka insiam a, ka țhianpa thla ko tur chuan ka chhuak ta a. Ka inngaihtuah nasa kher mai. Hlauh chuan koh haw theih a ni silo. Keimah ngei pawh hi minlo man ve mai ang em. Mahse, chutiang ngaihtuah thei ka nilo. Duh leh kan thi dun anga ni mai. Keipawh ni ila, min chhan tur hian a kal ve ngei ngei ang tih ka hria. Eng pawh ka chungah thleng se, hlau lo tur leh hmachhawn ngam turin, ka inti paukhauh a, hmanhmawh tak chuan ka kal sauh sauh a.

Ka inngaihtuah thinrim tulh tulh a. A hma in zah kan ngai tawh a, ui dawih zawk ang mai a, ùm chhuah kan ni a. Eng vangin nge, Hlau leh khur a, Anni lakah hian ka tlanchhiat bik reng ang ni.

Sih thlen hma mualpawng ka han chuang chhuak chu, ka țhianpa aw ngei mai chuan, “min chhan ru… Min pui teh u..” ti in a rawn äi ta lawm lawm mai a. Hmanhmawh takin sih lam pan chuan tlan ti tih in, ka kal buan buan a, torchlight eng ringawt nen chuan kal chak theih hek loh, ka hmanhmawh bawk si chu, ka inpal nawk nawk mai a. Ka țhianpa lah chu ala au vau vau reng bawk a. A aw pawh a zuai sawt khawp mai.

Sih ka hnai ta hle tih ah chuan ka âu ve ta a. “Țhianpa lo lungngai reng reng suh, k a lo kal ê, ka lamah hian lo kal la, ka lo pui ang che. Keimah pasalțha sakei pawh chum hlum ngam, tupa chhuan hnihna ka ni ngai e. Tunge min dang ngam, ka țhian ka lam rawn pan zel rawh ka rawn hruai haw dawn che,” ti lauh lauh chung chuan, ka bul vela thing leh mau te chu ka sat fik hmawk hmawk a.

“In chhuah lo a nih vaih chuan, inhmun zawng zawng hi ka sat darh vek dawn a ni, ” tiin ka inhrosa kúk kuk a. Ka țhianpa thla âi chuan ka lam a rawn pan zel a, ka ko reng bawk a. Thli a rawn thaw sung sung a, thing leh mau erawh a che lo. Hnahthel ro a leng chum chum mai a. Ka țhiana aw chu ka pan zel a, Ani pawh ka lam pan chuan a rawn âi phei ve zel bawk a. Ka bul zawn alo thlen chuan, ka kapkar ah hian a rawn lut tlang ni mai hian ka hria. Ka lum deuh pup mai. A aw pawh a reh ta hmak a. “Ka țhian lungngai reng reng suh, nangmah hruai turin alawm katlo kal,” tiin ka thlamuan a.

Hmuh theih miah loh mah se, ka bulah chuan a awm ve ngei tih ka hria a ni. Thli tleh leh hnahthel leng chum chum te pawh a reh a. Mahse, min thlir țhup tu awm in ka hria. Ka lam an rawn pan chiang atni. Ruah mal lian zet zetin hnahthel ro, a deng ri țuk țuk ang mai hian ka lam pan chuan a rawn ri tluar tluar mai a.

“Țhianpa hlau reng reng suh. Ka bulah hian awm tlat la ka hruai haw dawn che atni. Heng ho hian min tibuai leh tawh lo ang. Engahnge nangmahni pawh inlan ngam silo. Ramsa ang a, in inlantir min rawn tibuai tawh reng reng suh u. A ngam chu rawn inlan ve ta che u. Keimah zam ngailoa tupa, Hlauh neilo” tihpahin ka silai chu ka kap puak dur a. Min rawn zui reng reng suh ang che u.

“Ti rawh țhianpa hma hruaila, i hnung ka rawn dawl ang e. I haw ang aw” ka ti a, Ka hma ah chuan a kal ve chiang a ni. Hnim a tawn chet te pawh ka hmu thei vek. Ka zuive zel a, ka be reng bawk a. Ka hnung lamah pawh min zuitu an awm, mahse, ka hawi let duhlo. Țhianpa silai ka kap puak dawn a nia, lo inring rawh aw ka ti a. Ka hnunglam ami te hnenah chuan, “min rawn zui tawh suh u, keini pawn kan rawn tibuai tawh lo ang che u. Min tibuai lui tlat a nih chuan, in chenna zawng zawng hi midangte nen kan phin darh vek ang,” tih pah chuan hawilet miah lo in ka silai chu ka kap leh a, An reh ta deuh. Mahse, min enzui tu chu an la awm tlat in ka hria, ka ngaihsak duh tawh bik lo.

“Ka țhian muangchang khan kal rawh aw.. I hah lutuk ang e. Buk kan thlen hunah i țha ve leh mai ang. Lungngai reng reng suh. Mei kan țan ang e aw.. I zu ve duh em,” tiin ka be mawlh mawlh a. Ani pawh ka hma ah a la kalve zel tih ka hria. Buk kan thlen dawn hnaih chuan “țhiana kan thleng țep e, kal zel rawh thlaphang reng reng suh. I hnunga hi ka rawn zui zel che a nia” tiin, Buk chhugah chuan ka zui lut ta a.

Ka țhianpa chu ka va pan a. “Țhianpa kan thleng tawh e.. lo harh tawh la. Engkim a țha vek tawh a nia. Buk kan thleng tawh asin tiin ka va sawi a.. a rawn rum țuah țuah a, a rawn meng chhuak ta a ni.

“Ka va lwm ve ‘țhianpa tui minlo bun teh a… Ka va lawm tak em…” A rang a rang in tui ka va suak a Ka intir ta a. A duh khawlh khawlh ngei mai, ka mittui a tla lo chauh a ni. Ka lawm bawk si, ka khawngaih bawk si. Chawei ka siamsak a. A bulah țhu in ka eipui a, ti hian a sawi ve ta a.

“”” Thingzaina hmun ațanga, sìh châng tura kan ințhen ta kha, phûr takin ka chho a. Ka chhoh lam in, i zâwng kahna mual ah khan, zawng riak tur thawm ka hria a. Mahse, ka ngaihsak duh lemlo a, ka phûr lutuk kha, ka hmanhmawh chho khawp mai a. Tlailam sih tlan ka kah ngei theih ka inring tlat a. Nitlak hma a thlen chhoh hman hram ka tum ani. Mahse, thingzaina atang kha chuan, kawng a chho si a. Mualzawl ka thlen chhoh meuh kha chuan, ka hah kher mai. Ka tuihal lutuk kha, ka dangte a ro huam huam mai a. Pipu te sawi ang țhin puithu na te kha chu, awih ve kherlo mah ila, sihtui han in êm kha chu ka duh bik chiah lo a. Ka pa pawh in ramril deuh a Sih hlun țha deuh hi chuan huai a nei duh viau a nia, a tih țhin pawh ka hre reng. Mahse, ka tuihal lutuk kha tih ngaihna awm heklo. Kha tiang lai hnaiah tui a awm bawk silo a. Hreh deuh chungin ka pan phei a. Ka va in ta bawrh bawrh mai a ni. Ka hmai ka phih zui bawk a. Sa hnu thar bih in ka kal kual a. A thar țha vel vek mai.

Tichuan, phûr takin țhangte ah khan ka lawn chho ta a. Ka țhut fel hnu reilote ah nì pawh a tla ve nghal mai a. Chhaklam atang khan, sakhi tuai hi a rawn chhuk thla zan zan mai a. Ka kap ang nge kap lo ang tiin, ka in khâp buai khawp mai.

Diktak chuan sazuk kah ka inbeiseia. Sakhi tuai kha chu a te ka ti khawp mai. Haw pui tham law law kah ngei ka duh a ni. Kalo en reng a. A rawn chhuk zel a. Sih a thlen hma deuh chuan a ding a. Thawk leh khat ah, “hawk” a tia hlauh nei tih hriat tak mai hian a lim puat a, A pilbo zui ta a ni. Tinge maw nile, min hmu der silo a. Kei min hnung chhawn deuh zawnga ding a ni bawk si. Ka hnuhma a hmuh vang ti dawn ila, a la hmu phak lo hrim hrim ang tih ka hria. Sakei hmu ang maiin a ni a tlanchhiat ni.

Mak ti deuh mah ila, pawi ka ti lem lo a. Thawm dang ngaithla in ka beng ka chhi leh țan ta a. Ka hnunglam atang hian hmanhmawh deuha Sih lam rawn pan thawm ka hria a. Ka hawi let duh lemlo, min kalpelh hunah ka hmuh theih dawn tho avangin, ka hmalam chu ka lo bih reng a. Khua pawh a la thim chianglo a, Leilam pawh a la hmuh theih vek. Kalo bih reng a, mahse arawn thleng thei reng reng lo mai. Ka inher a, ka hnunglam ka zuk en chu, ka phu chiang kher asin. A taksa ramsa ni si, a lu lam mihring ang, hmelchhe zet mai, mitmu lian kel kul hian minlo thlir chho vung vung chu lo ni in, ka hamhaìh kher mai. Ka hmulthi a ding ur ur a. Khap miahlo hian mi en ngur mai si a. Ka zâm ve khawp mai, ka thau ah mi man a. Che chang lo lekin mi thlir vung reng mai bawk si. A hmel kha ka hmu chiang viau na a. A hmel hmang awm dan erawh sawifiah thiam a har khawp mai.

Chet na chang pawh ka hrelo. Min aikaih ni ber in ka hria. “Zahpah na nei miahlo in ka tui i zen a, In mai pawh duhtawk lo in, i hmaite i phih zui a. Ka tualzawl lah i rap pherh kual vel bawk a. Damin ka chhuah hauh lo ang che. Rawn chhuk nghal rawh,” ti mai hian ka hria. A hmuiphun erawh ka hmulo, ka bengah erawh a ring hle si. Ka thinlungah a chiang em em mai a ni.

Khatiang taka zam chhiatna kha ka la nei ngailo hrim hrim. Ka harh chhuak thut a, Inti pachangin kah mai tumin ka han tin a. Mahse, ka hmu ta reng renglo mai a. Ka bengah lah chuan.. A thusawi kha a ri nawn tluk tluk mai. Ka chhuk hreh tawh bawk si, ka thu ngam tawh bawk silo.

Khua pawh a thim tawh a. Hlauhna namen lo hian min tuam atni ber mai, mu leh mal pawh ka nei hleithei tawh lo. Ka hnuai ah leh ka sir ahte chuan min hual tuau tuau niin ka hria. I silai ri khawk pawh kha ka hre thei a. Kha khan min ti harh thar a. Inti pachang hram hram chungin ka chhuk ta a. Mawng a za duh chuaih chuaih kher mai.

Lei ka rah thlen rual chiah chuan min rawn keuh chawrh mai a. Ka zuangtho vat a, ka silai pawh ka thlauh phah a. Mahse, torchlight ka la hum avang chuan ka ên kual a. Engmah ka hmulo. Ka chem ka phawrh a, “Tu phiangsen nge i nih min va zuam awm ve” tiin Ka chem chuan boruak te ka vai vak vak a. Ka silai tla ka hmuh ve leh ka chhar a. Ka rawn haw phei ta a ni. Min zui reng a, Ka bengah hian, “i thil hmuh kha sawi reng reng suh” tih hi a ri reng mai a. Buk ka rawn thlen lai pawh kha ka hre mumal lo. Mahse, ka rawn luh rual khan, min kiansan ta a. Chanchin min zawh pawh khan, ka sawi ngam silo a. Ka hlauh thu ringawt ka hrilh che nih kha. Zana ka mumang pawh kha sawi kim loh ka nei.

Ka mumang ah khan, sih ah ka lo awm ka ti na a, min rawn hruai chhuak a ni. Mahse, kei leh nang chu kan mu ve ve tho. Ka thlarau kha a chhuak a ni ber ang chu. Min rawn hruai phei kha, Haw an phal ta tlat lo mai a. I țhianpa sawn a rawn chhan ngam che a nih chuan i haw leh thei mai thei. A rawn hruai ngamlo che emaw, a nachang a hrelo a nih chuan, damin i haw tawh lo ang. Kan zingah awm in sal ini ang a, kan rawng i bawl tawh dawn ani minti a. Ama thu leh theihna avanga a rawn hruai chhuah hma che a. I sawi chhuak anih chuan, i thi nghal ang” min ti bawk si. Sih chang tur a, chhuah i tum laia min koh leh i thusawi zawng zawng te kha ka hre vek a, ka chhang thei silo che a. A hrehawm asin, i hriatthiam beisei in ka rawn tawngvai der a. Mahse, nang lah khan ka țawngvai tak tak emaw tiin, min nuih vur vur duh chauh bawk si.

Keimah tak kha chu mu reng mah ila, ka taksa ah khan ka awm rei thei tawh lo a. Ramhuai ho khan min thunun hneh tawh zawk tlat si a. Ka duh emaw duhlo emaw țan ka khawh ve thei tawh tlat lo a ni. I kalta kha ka zuive nghal che a, i thlen hma in ka lo thleng daih tawh. Ka zui chhuah rual rual che khan, sih ka thleng deuh nghal mai niin ka hria. I lo thlen ve leh khan an inko khawm nghal a. Sihtui i rawn pan a, a bula in awm lai vel te khan, i in ve ang tih ka lo hlau kher asin. Ka hnu hma i hmuh rual a, I ngaih thalo hmel ka hmuh khan, ka lawm hman khawp a, mahse, ngaihțhat hmel deuhin i kal leh nghal mai bawk si. Țhangte’a i lawn tur te kha pawh thlak an tum che a. Mahse, an hotu ber khan a phallo. “Chhinchhiahna a pu tlat. Kan ti na theilo, min hlau anih ngawt loh chuan, Pasalțha thlah dik tak a ni” a ti che a. “Kan tihțhaih ang a, min hlau a nih chuan kan khawih thei ang. Mahse, kan khawih a nih chuan minti na ve thei tlat a ni” tiin, a hote kha a hrilh a. Amah ngei pawh khan, a khawih ngamlo che tih ka hria. An han tih țhaih tan che a. I thawm hriat i hmuh zawh loh te kha, a rualin sakhi angah an chang a. Thawm an rawn siam ta a ni. In èn ve leh khan anbo daih zel alawm. I awmna te an rawn sawi a. A…i hrethiam vek ang chu. Sihtui rawn inri kuang kuang tu pawh kha keimah ka ni lo, Anmahni bawk anih kha. Tih hlauh che an tum avangin keimah angin an rawn inlan mai mai a nih kha. An rin aia i hlauh loh avang khan an thinrim in min sawisa ta a. Ka rum ri kha i lo hre ta a ni.

I haw hnu khan min nuihsawh khawp mai a. “Nang chu kan sal i ni dawn ta. I țhianpa va mangțha la, naktuk khawvar hma ngeiin kan hnenah i awm tawh ang” min ti ta a. I hnungah an rawn zui dul dul che a. Mahse, kei chu kal tura min tih khan bûkah kalo awm leh tawh a.
Min rawn koh te khan ka chhang thei bawk silo che a, a hrehawm duh asin aw.. Damdawi min pek te kha ka hre kur a, mahse, ka tan khan awmzia a awm thei tak tak tawh silo. Sih atanga min ko ri lah ka hre reng bawk si. A tawp nan thei leh theilo in, sih lam bawk ka rawn sawi leh a, tichuan kalsan che ka tum ta a. Min rawn lam turin palian zet zet pahnih in buk kawtah min nghak reng bawk si nen. Rilru na ngawih ngawih chunga, chhuah ka tum lai khan, i tho a, i insiam tih kan hmuh khan, “sih pan i tum nge midang puna kal i tum” ka lo ti a. Ka țawng i hrethei silo. Pawn lam ami te lah chuan min ko reng bawk si. Ka chhuahsan ta che a.

Mahse, sih lam pan a i rawn kalve ka hmuh ruala ka lawm zia kha, engmah hian a hrilhfiah zo lo ang. Mahse le, ramhuai ho ve thung erawh chu, an thinrimin an phili buai kher mai. Hmanhmawh zetin min kai a. Theihtawpin țang ve mah ila, ka hneh hlawl silo. Min vua a, min chhir a, min sawisa mawlh mawlh mai a ni. Ka mangang lutuk kha ka auchhuak thei tih pawh ka inhrelo. Ka au vak vak ri kha i hria ang tih ka ring phaklo reng reng Mahse, min hruai tura ilo kal khan, an thu hnuaiah ka awm vek tawh biklo a ni. An ram chhung i rawn thlen a, min rawn koh phei kha chuan, min chelhbet thei ta lo a. I lam ka rawn pan ta a. Min man beh phet an tum a, min chelh nghet thei tawh silo a. I bul ka rawn thlen khan, an thinrim lutuk khan, rawn bawh mai che an tum a. Mahse chem ilo vai a, thing leh mau in sah chhum te khan an hlau a. An hnungtawlh leh țhin a. Min rawn man leh an tum khawp mai. Silai i kah puah phei kha chuan an țil huk a, an bo duak asin. Mahse haw tur a, i han hnungchhawn chiah kha an huangtau thar leh niang, an rawn hnai leh tuau tuau mai a. Mahse, i pawisak loh em avang khan, an hlau zawk che ni ngei ang. Silai in kah nawn leh phei kha chuan, tlemte bakin min zui tawh lo, Chung ho pawh an ramchhung chin bak kha chu an rawn kal ngam talo. I chungah ka lawm takzet a ni. Nagmah avanga dam leh ka ni si a. Engtikahmah ka rul seng lo ang che. Hlauh em em hi kala nei ngailo a. Mahse, nangin min chhanna ang ah hi chuan kei chuan ka ngamve hauh lo ang. Ka lawm takzet a ni ” a ti a. Ka khawngaihin ka lung a ti chhe lek lek mai.

” Țhiante hnenah lawmthu sawi a ngailo. Nangpawh ni la , min chhan tur chuan ka thih ai i thi ngam ang tih ka hriat vang alawm, ka chhan ngam chauh zawk che. ‘Țhian țha te chu dam leh tlang khat; thih leh ruam kha’ an ti em ni kha. U leh nau, chhung leh khatte chu, mangan hunah, țhianțha te chu engtiklai pawn.”

” Hetianga dam taka kan in kawm leh thei hi lawm ila. Hun kal tawh kha chu, kal tawh anih ang ngeiin liam rawh se. Hmun hi kan ti fel ang a, mutna kan siam ang e. Mu chawl tawh rawh, duh leh mut pahin kan ti ti dawn nia” ka ti a, mutna te siam in kan mu ta a. “Țhiana upa ho ti ti leh an thurâwn te an serh leh sang te lo ngaihchan țhin hi a lo țha a nih hi. Tun ang dinhmun ah pawh khan, tapchhak zawl ti ti ka ngaihthlak thin avanga, a nachang hre chauh ka ni si a. Țhenkhat chuan putar mai mai te kan ti leh ringawt țhin a. Lehkhathiam lo leh mawl mangtea langte pawh hi. Keini aia khawvel lo hmang rei tawh leh tawn hriat ngah zawk ta chu, an thurawn te hi a lo pawm tlak ber fo a nih hi” tiin, kan mu ve ta a.

Zing ka thawh meuh chuan țhianpa chuan chawei a lo peih der tawh a. “Ni sat hma in haw vat ila. Kawngah sakah tur te kan hmuh takin” tiin, chaw kan bar sawk sawk a. Kan inpeih chuan hawzai kan rel ta a. Muangmar in rilru zangkhai takin kan haw ve ta a ni.

Haw kawngah chuan, sakhi kan kap hlauh a. Lungdam takin in kan thleng a. Manganna tamtak tawk mah ila, mahni inchhunglum han thlen meuh chuan, kan buaina leh manganna te kan theihnghilh zo a. Hahdam leh thlamuang takin kan chawl thei ta ani.

“Hemi hnua kan hlawhfa te chunga thil thleng leh ka țhianpa in min boralsan tak dan mak leh rapthlak tak te chu, ni dangah ka la hrilh leh dawn che nia” tiin, ka pu chuan min mutsan ta a. Kei pawh kham lo tak leh ngaihthlak leh chak tak chungin ka mutna ka pan ve ta a ni.

A tawp ta.

Advertisements
Aside | This entry was posted in Fiction, Thu Ngaihnawm and tagged , , , , , , , , . Bookmark the permalink.

2 Responses to Sihhuai

  1. Mizo Archive says:

    A lawmawm lutuk e

    Like

  2. Anonymous says:

    A ziaktu chu Hriata Tea ani e. SIHHUAI ziaktu khi

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s