JUNE NI 4 ZAN ATANGA CHIN HRIAT LOHA BO JIMMY A LA DAM EM NI..

AUTHOR : Vanneihthanga Vanchhawng On 22nd July, 2016

  • Thi tawha ngaih hnu ah Jimmy an hmu leh si
  • Jimmy hi a rilru a buai thut a ni lo maw.

Jimmy Laltanpuia (38) H/o Rochhari, Aizawl Venglai chu Electric Vengchung Pu P.C. Khuma In atangin Ni 4.6.2016 (Inrinni) zan dar 6:40 vela a chhuak chin hriat lohin a bo zui a. Chhungkhat laina leh vengchhung mi tlawmngai ten theih ang anga an zawn hnuah hmasawnna engmah a awm theih tak loh avangin CYMA hmalaknain Aizawlkhawpui branch hrang hrang ten thapui thawhin ni 7 chhung an zawng leh a, Jimmy hi vawiin thlengin hmuh a ni ta lo a ni.

Khawtlangin Jimmy an zawn mek lai khan ni khat chu Sairang khawtlang hruaitu hlun ka thianpa Pu Vanchunglura chuan min rawn phone a, “Thianpa, Aizawl lama in mi zawn hi June ni 11 tlai lam dar 5 vel khan Sairangah hmuh a ni tlat mai” a rawn ti ta mai a. A thil sawi chuan beng a verh hle mai.

Pu Vana hian a sawi dan chuan; Jimmy ni ngeia hriat hmutu hi hmeichhia a ni a, khatih lai khan Jimmy bo thu hi a lo la hre ve lo. Jimmy te nen inhre chiang tak an ni. A nau te leh Jimmy te hian Sumo an lo khalh ho thin a, Tin, Jimmy hian Sairangah motor-in tui a rawn chawi reng reng thin a, hai tur chi a nih loh thu a sawi a, tlai dar 5 velah Guwahati Sumo-ah chuangin a seat hma kawngkhar bulah a thu niin a hmutu hian a sawi a, an inbe hran lova, Sumo hi zawi muangin a tlan a, hmelhriat nuihin an innuih liam satliah ringawt niin a sawi bawk. A hmutu hian a hai loh tur zia a sawi a, a tang huai viau mai niin Pu Vana chuan min hrilh bawk a ni.

A bona a rei tawh avangin hetih lai hian Jimmy hi dama hmuh beisei hleihtheih a ni tawh lova, tu te emaw kut tuarin a ruang khawi lai khamah emaw an paih bo emni ang tih ngaihtuahna mi tam takin an nei a ni. Chuti anga ramhnuai kham kar mi thenkhatin an la dap mek laia dama hmu an awm nia sawi hriattur a han awm ta chu a phurawm hle mai a. Rang takin Aizawl venglai Local Council Member Pu F Rodinga phone-in ka va hrilh nghal vat a, Pu Vanchunglura phone number te pawh ka pe nghal a, ka va biak lai ngei pawh hian Pu F Rodinga te hi ramhnuai kham karah Jimmy zawngin an la buai hle mai.

Aizawl venglai khawtlang hruaitu te hian Police hrilh nghalin Jimmy ni ngeia hriat hmutu pawh thil awmdan an zawt chiangin an chhui zui nghal a. Mi bo chhuitu te tan harsatna a thlen hlauhthawn thilthuah kan thu hriat erawh tlangzarh loh tha zawkin kan hria a, thiantha zual tlem kan hrilh bak chu he thu hi kan thup a ni. Tlawmngai leh Police ten an theih ang angin an chhui zui a, mahse beisei angin engmah hmasawnna annei thei ta chuang lo. A hmutu hian a hmu sual a nih te kan rin pui ta deuh a, ‘khati khawpa miin an zawn luai luai laia Sumo seat hmaah ualau taka a chuan duh a rinawm thei lo’ te kan ti ta deuh bawk a.

A nawlpuiin bo zawn beihpui chawlh san tawh mahse, chhungkhat pa, a ruang hlawm tur em pawh awm lova khuangcher bo ta ringawt mai chu chhungkhat laina leh thenrualtha te mut a tui thei hauh lo. Mi bo zawn an awm apianga themtleng te zawk ang maia inrawlh ve ziah thin, tawngtai atanga thil hre thei nia insawi te paw’n thawm an la nei zui ta zel a. Tunhnaiah khan thlarau lam atanga hriattirna dawng nia insawi mi pakhat chuan Jimmy hi la damin Aizawl hnaivai mi fu huan thlamah a riak thin niin a sawi leh ta tlat mai a. Mangan tawpah chuan beiseina awm thei nia sawi apiangbawh ruak ruak loh theih a ni lo. Thenrualtha leh tlawmngai mi engemawzat te chuan July ni 19, Nilaini khan Fu huan ngah deuh khua Lungleng leh Tachhip ram vel an va dap a, engmah an va hmu lo. Beidawng takin Aizawlah an rawn let leh a, Jimmy thlalak te chu in lamah an hawn hlawm a. Hemi nia an motor driver Hunthar veng lama cheng chuan Jimmy thlalak a ah hawn chu inah a phawrh a, a thianpa truck driver ve thoin a han hmuh chuan kar hmasa lawk khan Buichali lei bulah hepa ang chiah chiah hi a hmuh thu a sawi leh ta tlat mai a. He truck driver hian a sawi dan chuan kawng sirah motor a lo phar a, an han din chuan chuan tum awm pawh chuan a awm chuang ta si lova, an tlansan leh ta mai niin a sawi. Beisei bo tawh chuan beiseina thar an nei leh ta a ni.

July ni 20, Ninga ni khan mi engemawzat te chu Sairang piah Buichali lei leh a chhehvel thlithlai turin an liam thla leh ta a, Buichali lei bula dawrte nghaktu hmeichhe pathum te chu thlalak an han entir chuan kar kalta lawkah khan tlai khaw thim hma deuhin an dawr kawta thutna an dahah chu pa ang deuh mai chu a rawn mu a, a rui thing chau mu velah an ngai deuh mai a, an be lem lova. Chaw an ei san a, chaw an ei kham chuan chu pa chu a lo awm tawh lo niin an sawi. A thlalak atang chuan Jimmy ngei chu niin an hria a, thlalaka alan dan ai chuan a cher deuh kuam niin an sawi bawk. Heng hmeichhe pathum te hian Jimmy bo thu hi an lo hre ve miah lo niin an sawi.

Buichali lei bula dawr te nghaktu te hian an sawi dan chuan an dawr kawta chupa a rawn mut tuk tukleh velah zan dar 8 velah mipa tu emawin kawngkhar a rawn kik a,”in awm em, in mu tawh em ni” a rawn ti a, Motor ding thawm te a awm loh chuan zan lama kawngkhar kik an hawn sak ngailo va, chumi zanah pawh chuanchhan pawh an chhang ta lova, a reh zui ve ta mai a, a tuk leh zanah zan rei tawh hnuah tawng lovin a rawn kik leh bawk a, chumi tum pawh chuan an hawn lova chhan pawh an chhang lo. Jimmy nia an hriat ngei kha a nih an ring niin an sawi.

Hetiang hi thil awmdan a nih takah chuan Buichali lei bula dawr hi a rawn pan leh beiseiin nizan hmasa khan tlaivara changtur an indah ta a, an zinga pakhat chuan hnamdang truck lo tlanlai chu lo pharin Jimmy thlalak a en tira hetiang mi hi an hmuh leh hmuh loh te a lo zawt a. Hnamdang driver pakhat chuan nizan hmasa lawk khan Kawnpui dai Kanan thingpui huan zawn velah he pa ang tak hian an motor a lo phar thu a sawi a, an han din chuan motora rawn chuan tum ang pawhin a lang ta leh ta si lova, ram lam a thlir san daih a, chuan a tum lo a ni ange tiin an tlansan leh tak thu a sawi niin thudawnna chuan a sawi a ni.

Hetiang hi an thil hriat dan a nih tak avangin dama hmuh leh beiseina a lian thar leh ta hle mai a, a thlalak te thehdarhin Kawnpui leh a chhehvel tlangdungah Jimmy ngaihven tur an indah leh ta bawk a ni.(Jimmy hian a hriatna a hloh thenin a vakvai zui ta mai em ni ang. Nge, amah ang tak hmu nia insawi te hian an hresual em ni zawk tih te chu rindan awm thei a la ni tho mai a. Chutih rual chuan amah ang tak hmu te hi mi hrang hrang an ni hlawm a, a thlalak an enin Jimmy ngei niin an hre vek hlawm bawk si a, beiseina a thar lo thei lo.

Dam taka Jimmy hmuh a nih ngei theihna’n tawngtai ila, kan mit leh beng te chhi tlang theuh ila a tha ang..vnt)

Advertisements

About Mizo Archive

I'm the one who collect the best writings of Mizos
Aside | This entry was posted in Zoram History and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s