KÀNG ȚHELH DAN THAR LEH ZODINTLUANGA – RK Lianzuala.

PHE Department-in Aizawl khawpui chhung hmun 40-ah kàng țhelh motorin tui a chawi theih dan tur a ruahman dawn bakah, motor kal theih lohna hmun 400-ah tui point atanga kàng țhelh theih dan tur ruahman a tum tih kan lo hria a, a va lawmawm dawn ve le, ka ti. Disaster Management kan tih fo hi, a thawm hre zing hle mah ila, a tak takah a chuti lutuk dawn lo tih hi ka ngaihdan a ni a, kàngmei a chhuah pawhin, kan kàng țhelh pawl lam hi fel bawk mah se, a hmun a lo hla a, in kanna hmun a lo kilkhawr a, kawng sirah motor kan dah hnem bawk si a, kàngmei chak tawh laklawh si-ah an țangkai tur anga an țangkai theih lohna hi a tam hle a ni. Hei hi kei takngial pawhin ka lo ngaihtuah ve fo a ni a, veng hrang hranga PHE tuizemah hian tui engemawzat awm reng se a ziaawm ang em, tihte pawh …. mahse kan in sak dan hi a thler engmah fel lo a ni a, L. Keivom sawi dan takah, khàm leh ko pangah kan uai fir fer a ni bawk si.
PHE Minister hi ka fak ngawt mai. Hna a thawkin ka hria a, thil a ngaihtuah a, pawisa pawh a ngaihtuah thiam a nih ka ring. Minister dang huatthu ni hauh suh se, ani anga viak țha, thil ngaihtuah peih leh bawhzui chak hi ni vek sela chuan kan danglam ngei ngei ang tih hi sawi ngam a ni. Urban Development, Sports leh PHE lama a hnathawh hi a tlem lo tlat. Tuna kàng țhelh dan awlsam leh rang zawka chêt theih dan tur ruahmanah hian motor lian kal theih lohna hmun 400-a PHE Department tui point ‘T-Cluster’ ah kàng țhelhna pipe chuktuaha kàng țhelh nghal theihna tur ruahman a ni a, Aizawla Local Council 83-ten mahni veng țheuha point an thlanah siam tum a ni. Local Council tin hian kàng țhelhna tur, hose pipe coil 5, meter 150-a sei țheuh an kawl ang a, motor kal theih lohna hmuna kàngmei a chhuah palh pawhin heng point ațang hian, a hma aia rang zawka țhelh theih beisei a ni.
Kàngmei hi a runthlâk a, kum tam tak, chhungkua hlim taka lo chèn tawhna, in chhung bungrua engkim, neih thing lung kháwnga lak khawm, thawmhnaw leh thil hlu neih ve ang ang, rei lote-a mei väpa a’n chang ringawt mai te hi, a natzia sawi theih a ni lo. Zoram buai laia in hàl avanga lehkha pawimawh riral tamzia te, tun thleng pawhin in kàng avanga chàn hlen tâk, thil hlu, a dang lei theih tawh loh leh awm thei tawh lo hrim hrimte hi a tam a nia. Kum 1981-a Pachhunga College Library kàngte kha, cheng tlûklehdingawn engzat pawh sèn huam ila, lehkhabu kàng ral kha khawvelah hian hmuh kim theih a ni tawh lo hrim hrim. Mi neinung zawkte chuan a in hrim hrim chu a hma aia țha zawk daih pawhin an din thei mahna, mahse an thil kàng ral ang chu engtikah mah an nei tawh ngai lo tho tho ang. Chuvangin kàngmei lakah hian kan fimkhur a ngai a, a lo thleng palh a nih pawhin a rang thei ang bera țhelh a țul a, mi tlawmngai kal khawmte tih theih bâk a tam si a, sorkarin hetia a țhelhna hmanrua, hmun 400-a bunna atana cheng nuai 109 lai a séngte pawh hi a lawmawm a, a mamawh lotu kan nih hlauh phei chuan kan vannei tihna a ni leh mai.
Duh thawhna avangin thil tam tak kan sawi a, țhahnemngaihna avangin kan áng bawrh bawrh fo. Hemi rual hian hetiang thil țha leh, vanduaina tâwkte tuarna tihziaawmna tura kan hotuten kawng an lo zawng hi kan lawm tur a nih ka ring a, a bul tumtu leh a buaipuitute pawh kan fak ve tur a ni dawn lawm ni? Pu Zodintluanga pawh hi kawng tinrengah a fel famkimin, duhthusam a ni e kan ti a ni lo. Mahse tuna kan sorkar ding laiah hi chuan a chhuanawm a, a taima a, a mawng a zäng a, kawng a zawng peih a, a intilal hlur lo a, thil a man chak bawk. Hei hi a enkawl department officer-te pawhin min hrilh ve fo. ‘Ti rawh u’ a ti satliah lo a, an ti ta em, engnge an hmasawn dan? Harsatna an tawk em? Engtia sut kian tur nge? tihte hi a en zui niin an sawi. CM mo nuța a nih avangin duhsak a hlawh nia sawi a awm țhin a, ka hre lo. Mahse hotu dangte hi hetiang hi ni vek se, CM hian mal a sawm duh lo bik dawn em maw ni le? ka ti. Pu Zodintluanga lakah hian engmah ka beisei lo a nia! Ka ngaihdan ka sawi ve a ni mai!

Advertisements
Aside | This entry was posted in Thu leh Hla and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s