PATHIAN RAWNGBAWLTU ROPUI TE’N SAWMA PAKHAT CHUNGCHANG ENGTINNGE AN SAWI

Sawma Pakhat chungchângah post ka siam a, keima mimal thlirdan ngau ngau-a ngâitu an țhahnem hle a, Pathian rawngbawltu ropui tak tak ten engtinnge an sawi tih hi kan rawn tarlang ang e. He’ng Pathian mi dik tak te hian an ngaihdan satliah sawi thâwr lovin, Bible-a an hmuhdan ațangin a ni an sawi tih i lo hre bawk ila.

Thuhriltu ropui ber zinga khawvelin a ngaih, ‘Prince of Preacher’,Pathian tana mi hrat khawkheng Charles Spurgeon-a chuan Sawma Pakhat(tithe) chungchang tihian a sawi,
“Juda hovin zawm ngeî ngeî tur(obligation) a nih avanga sawma pakhat puithiam hnena an pêk țhin ang kalphung hnuaiah i awm ve lo ve. Chutiang dan(rules) zamna chu Chanchin Țha-ah(gospel) a lo awm a nih ngat chuan ‘thîlpek’ mawina leh duhawmna a ticheureu vek(destroy) tihna a ni ang a, i zalenna thei rah vûl tur a chhuh sak bawk che tihna a ni ang. Ka pa pianchampha-ah enge ka pêk ang tih min tuk sak theitu eng dan mah a awmlo. Mipa-in(pasalin) a nupui eng thil nge a ‘present’ ang tih rel sak theihtu eng dan bu-ah mah zam a awm hek lova, kan hmangaihte chungah engtianga ngainatna leh duatna(affection)nge kan lanchhuah tir ang tih min hrilh theitu pawh a awm lo. Nilo, kan thilpek chu zalenna ațang liau liau a ni tur a ni, a nih loh chuan a duhawmna(sweetness) zawng zawng a bo vek dawn tihna a ni” a ti.

Sawma pakhat system kalpuitu Methodist church founder leh hruaitu John Wesley chuan “I theih zat thawkchhuak la, i theih zat khawl la, i theih zat pe rawh. Nangmah leh i chhungte mamawh phuhru(take care) phawt la, chumi hnuah kohhran mamawh phuhru rawh. Kristian ang nilova Judaho angin, pek zat tur inbitukin nangmah leh nangmah inphuar suh”.

Keini Prostestant pû ber Martin Luther chuan ” Mosia dan khan Juda te chauh a phuar, Jentailte min phuar tello. Mosia nen inzawmna kan nei lo. Mahse Mosia dan pakhat lo zawm ta ila, Mosia dan pumpui ka zawm a ngai ang a, ka serh pawh ka tantira ngai ang”.

Billy Graham: “Bible-in kan pek chhan chu kan duh rêng vang a ni tur a ni a ti a, phallo chûngin emaw tihluihna(compulsion) a ngaiin kan pe tur a ni lo” a ti.

John Calvin, Martin Luther, Charles Spurgeon, John Bunyan, John Wycliffe, Adam Clark, Campbell Morgan, Oliver Cromwell, and others believe that tithing should not be taught in the churches.

Heng bakah hian “Kristian Van Ram Kawng Zawh” ziaktu John Bunyan, Presbyterian pû ber tih theih John Calvin, John Wycliffe, Adam Clark leh Pathian rawngbawltu ropui dang tam tak te pawhin he Sawma Pakhat dan(tithe system) hi ThuthlungThar fate tan an pawm lo a ni.

Thuthlung Hlui ațanga a landan pawhin Sawma Pakhat hian dan khauh tak zam a nei a, thil thar(buh, thlai, thei etc) leh ran vulh ațang chauhin pek tur a ni a, sum lakluh(income) ațangin pek tur a ni lova, sumfaiin an pe ngai lo a ni. Khatih hunlai khân sum an chelek tawh tih Bible-ah vêk kan hmu a, sumdawng, thing mistiri etc te pawh an awm nuk a, mahse Pathianin ‘Sawma Pakhat’ chu income ațangin a phut tel miau lo. Tin, mirethei ten an pe ngai lo niin a lang a, miretheite chu a dawngtute anni zawk a ni. Sawma pakhat chu puar leh fan na’n ‘chaw’ atan liau liau hman țhin a ni. Suma chantirin, sum anga hmanchhuah a ni ngailo.

Sawma Pakhat system hi kan kalpui(practice) ta sa sa anih chuan, a nihna ang taka kalpui hi ringtu leh Kohhran tih tur dik tak a ni dawn lo’m ni? Kan duhdan anga lo hêr rem ve ngut turin thuneihna kan nei meuh emaw chu??

Sawma pakhat hi kohhran hmasa te khan an practice thu kan hmulova, an neih thawhkhawmin an insemrual țhin niin a lang. Tirhkohte pawhin an zirtirnaah vawikhat mah practice tur tiin an sawi lang lo bawk a ni. Mahsela, Pathian tana phal taka ‘thilpek’ pe turin uar takin an zirtir/fuih țhin thung a ni.

Kan kohhranho pawh hian ‘thilpek’ zawngin inzirtir mai ila, chhiah anga kohhran mite pek zat tur bituk bur lovin. Tun ai hian thilpek pawh a lut țha zawk lovang tih tunge sawi thei? Pek loh chu hremhmun tlak phah theihna ang thawthanga kan inzirtir leh kan phal lo anih pawhin kan pe ngei ngei tur a ni tih zawnga kan inzirtir hi chu zirtirna diklo hulhual a ni. Phal tak leh ui lova pe turin kohhran mite i fuih sauh sauh ila, miretheite tan rilru hrehawnna tur leh inkiltawihna tur siamsak lo ila,”tlem lua awmlo tam lua awmlo” ti-a, zalenna zau tak siamin, kan pek zat nilovin kan pekna thinlung zawk a pawimawh zia te hi in fah mawlh mawlh ila, kan kalphung a diklo anih chuan pawmin insiamțha ngam bawk ang u.

Note: Tam tak chuan ‘over’ min ti ngeiin ka ring. Kohhran hi ka hua-in ka dodal reng reng lova, ka damloh chungchangah pawh min țanpui nasa êm êm tute an ni a, ka pa hi kohhran upa min a ni nghe nghe a, kohhran hi ka zah takzet. Mahse, chu chuan ka thurin(belief), thudik ni-a ka hriat ka sawichhuahna kawngah min dal tur a nilo tih hi ka ngaihdan rumrut a ni tlat thung. Tin, pawng tawng ziah ve thawr ka nilova, mahni phak ang tawka ka thlir kual ve fê hnuah pawh hun rei tak ziak ngam lovin ka awm zawk a ni.

Advertisements
Aside | This entry was posted in kohhran, Pathian Thu, Thu leh Hla and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s