SAWMA PAKHAT HI RINGTUTE TAN MATHEI LOVA PEK TUR A NI EM?

  • sawma pakhat pek dan dik
  • Thuthlung hluia sawma pakhat pek dan
  • Thuthlung thara sawma pakhat pek dan

Hemi chungchâng hi ka vei rûk na a rei tawh a, kan tlangaupui ve thawr teh ang..’Sawma pakhat pêk'(tithing) chungchâng hi kan ram kohhran tin deuhthaw-ah uar takin kan inzirtira, a țha e, Pathian hnena thilpêk hi ringtute tih tur dik tak pawh a ni. Amaherawhchu kan zirtirna kalpui dan erawh hi chu a hleihluak mah mah deuh em aw? Sawma pakhat pêk loh chu Pathian pawisawina lian tak, a laka sualna(sin) ang hialin kan inzirtir niin a lang a, hei hi a dik chiah em? Kohhran memberte chu sawma pakhat pe ngei ngei tura beisei leh phut anni a, a nihna takah chuan member te’n ‘chhiah'(tax) ang deuhin thla tin kohhranah an theh lut țhin niin a ngaih theih. Pe ve lo te chu a rûk takin kan enhrang a, sawisep an hlawh a, Pathian thu zawm lovah kan ngai a, kohhran huangchhungah pawh an tuitla lo châwk..”Kan phal emaw phallo emaw rukru kan nih loh na’n leh Pathian ram zauh nan kan pe tur a ni” tiin kohhran pakhat zirlaibu-ah pawh a chuang kalh nghe nghe a ni. A khaikhawm nan chuan, kohhran member chuan mathei lovin sawma pakhat a pe ngei ngei tur a ni tih hi kohhranin a thu kalpui dan ber chu a ni awm e.

Bible-in engtinnge min hrilh dan i lo thlir dawn teh ang.
Thuthlung Tharah hian sawma pakhat inziahna hi a vang hle a, ringtute tan pek ngei ngei tur tih ziahna phei chu a awmlo hulhual a ni. Kohhran țanchhan ber pakhat ni-a lang pawh “Thuthlung Tharah a paihna kan hmu lo” tih vel mai mai a ni awm e. Sa ei thianglo, Sabbath serh etc paihna pawh kan hmu chuang hauh lova, kan zawm lem chuang lo chu nih hi!

Sawma pakhat pêk hi Thuthlung Hlui zirtirna(OT concept) a ni a, a hnam thlan Israel te laka Pathianin a phût tlat a ni. Israel ho te chuan an buh leh thlai thar, ran vulh, uain, thei rah thar etc ațangin sawma pakhat(10%) Temple maichamah an hlan țhin.(Lev.27:30; Number 18:26 etc).

Thuhlung Hlui hunlai dan ang kil kel khân kalpui ve dawn ngat phei ta ila chu, sawma pakhat chu țum khat aia tam pek a ngai a, Levi chi hote tan a hranin, temple leh ruai atan a hranin leh ramchhung mirethei te tan a hranin pêka ngai a ni. Mithiamte chuan a zavaiin 23.3% vel bawr pêk chhuah a ngai niin an chhut. Sawma pahnih aia tam hlek tihna nih chu.

Thuthlung Thar khawilai mah-a he ‘sawma pakhat dan’-a ringtute intulût tura min tihna emaw fuihna hmuh tur a awmlo a, kan sûm lakluh ațangin chuti zat chu Pathian tan kan dah hrâng tur a ni tihna pawh a awm hek lo. 1 Korinth 16:2-ah “Malsawmna in hmuh ang zia zelin dah khawl țheuh ula..” tiin Paula chuan a ziak a, hetațang hianThuthlung Thar hunah chuan “bituk” a awm tawh lo tih a chiang hle. Kohhranin, kan sûm lakluh ațangin a tlêm berah sawma pakhat kan pe ngei ngei tur a ni ti-a member te tan pek tur zat bituk an siam hi, Thuthlung Thar-a min hrilh dan nen chuan a inperhsan hle niin a lang.

Thuthlung Thar hunah chuan Thuthlung Hlui dan hmangin phuar behin kan awm tawh lova, mitinin(ringtuten) kan duh leh phal zat pe turin zalenna kan nei tawh a ni.Sawma pakhat aia tam pêk chang pawh kan nei anga, a aia tlêm pek chang pawh kan nei ang, kan khawsak dinhmun(condition) a zir zelin. Pathianin min tehna chu kan pek zatah nilovin kan pekna thinlungah zawk a ni..
“Mitinin ui chunga pe lovin, PEK LOH THEIH LOH A NGAI A PE HEK LOVIN, an thinlunga an tum ang zelin pe țheuh rawh se; Pathian chuan hlim taka petu a ni a hmangaih ni.”(2 Kor. 9:7).
He Bible châng hian ‘sawma pakhat pêk ngei ngei tur’ tih leh, ‘kan phâl emaw phâllo emaw pe tur kan ni’ tih zirtirna chu a rawn thaichhe chiang hle awm e..Tin, sawma pakhat hi hnam ze tinrengte lakah nilovin, a hnam thlan Israel ho laka a phut bik liau liau niin a lang.

Thilpêk kan ngaihthah phah tur a ni em?.’Krista taksa’ (kohhran) hian khawsak relbawl na’n sum a mamawh a, sum tello chuan a kal(operate) theilo tluk a ni. Pathian ram a zau zel nan ‘sum’ hi a pawimawh êm êm a ni. Lal Isua’n khawvela rawng a bawl lai pawh khân ‘treasurer'(sumvawngtu) a nei hran ngat tih kan hmu a, hmeichhe țhenkhatin a rawngbawlna atan an neih ang tâwk thawhkhawmin an puih thu pawh kan hmu. Pathian fapa meuh Isua khân a rawngbawl na’n sum a mamawh tih a lang chiang hle. Chuvangin ringtute chuan thilpek hi kan ngaihthah tur a ni lova, Pathian ram zauna tura kan thathawh vena(contribution) a ni tih kan hriat a pawimawh hle.

Tin, Isua hi kan hmangaih tak tak anih chuan a tan kan neih rosumte kan ui tur a nilo. Hei erawh hrereng thung ila, Pathianin min bituk vang nilovin, Amah kan hmangaih tih lantir na’na ui lova hlim taka pe zawk tur kan ni. Kohhran kalphung zawm loh hlauh vang chauha, phâllo leh ui tak chunga pêk hi Pathianin rimtuiah a pawm a rinawm lem loh.

(A ziaktu hi ‘pawl chhuak’ emaw ‘kohhran do’ ka ni hran lova, Baptist kohhran rumrût ka ni e. Bible ațanga ka hmuhdan ațangin ‘thudik’ ni-a ka hriat ka rawn sawichhuak ve mai chauh a ni)

Advertisements
Aside | This entry was posted in kohhran, Pathian Thu, Thu leh Hla and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s