MI BUMRO PATHUM

AUTHOR : Zonuna Rl

He pa thuziak hi a ho thei em em a, mahse a chhiar tawh an inchhir ngai lo , chhiar ve teh

THU HMA
Tleirawl, tlangval hre tan kan ni ve tawh a. Hetih lai hian National Higjway kam khaw lian lo ve taka kan awm lai kha a ni. Kan khuaah chuan Police pawh an la awm lo.
.
Heta kan awm lai hian ka pa chuan thian pathum, maksak tak tak leh bumro tak vek a nei a. Mite pha zan lo, mianglo nih duh bau lo vek kha a ni a. Parawl vek an ni bawk. Hemite pathum chanchin hi tlem sawi ka tum a ni. Tamtak pawh sawi tum ila mite pha lo an ni a, chanchin ngah tur an ni lo hrim hrim a. An chanchin ka hlimpui deuh pakhat ka’n sawi ang e.
.
PATHUMTE CHU
Heng ka pa thiante pathum hi han hmelhriat diat diat dawn ila:
.
PA RUAIA : Ani hi palian pui sa tha tung mai leh lu lian zet mai a ni. A hmel enin mi pangngai a ni lovang tih a hriat reng a. Nunna tam deuh nei hmel a pu a. A thih har hmel hliah hliah mai a ni. ‘Vaw hlum rawh’ min ti ta se, ka huphurh zawng tak a ni. A thih hmain kan in vaw chau mai ang tih a rinawm. Vaihlo bawm ‘Dumbur’ hi a kalna apiangah a keng reng mai thin.
.
PA BELA : Ani hi chu tawi len lun, sanghet tlut mai leh lu lian tak tho a ni. Hnar lian tak, beng parh zet leh hang dum muk mai a ni. A kawng kal hi a bu deuh luk luk thin. A hlawma mumang nei tawk thin hmel a pu a. Thlakhat te mumang nei lo vang vanga, zankhat thil thua neih leh hnawk thin a nih duh hmel. Tin, a chaw ei a tui hmel bawk. Sunglass hring deuh ngulh lian pui mai hi a vuah run reng mai a ni. Hmeithai pakhat hi a ngaizawng em em a, ‘ka bialnu’ a ti deuh reng thin.
.
PA NGAIA : Ani hi chu hmai sin tak leh hmui chhah zet si a ni. A hmel hi a Genesis ve hrim hrim. Pa Ruaia ang lo takin nunna der thawn hmel zet mai a ni. A luah kuk kerh i la a thih bel duh hmel. Mahse a hmai sin ang aiin a taksa a inphut nalh ngang mai. A chunga mite pahnih ai khian chaw a heh fe zawk. A hmel a chhiat em avangin nu ho hian an fate tihthaih nan an hmang thin.
.
THE BUMRO TRIO
Anni pathum hi inkawm lo thei si lo, inkawm hlei thei si lo an ni. An feh leh ram an riak a nih loh chuan kan in hi an tap chawtna a ni. Ka pa hi an ngai em em a, hlauh pawh an hlau viau mai. Ka pa hian an pathum hian a khawngaih em em a, a kawm thiam hle bawk. Miten an nuihzat leh an hmuhsitna an tih lan te hian ka pa rilru hi a lo na thin.
.
“Engtikah emaw chuan min la transfer leh ngei awm si a, heng mite hi ka va han ngaihtuah em aw..” a ti vawng vawng fo mai.
.
Ngawi renga an awm hian an inngeih a ni mai a. An titi ho tawh chuan engmah an sawi hman tak tak ngai lo. An inhnial vat a, insual an tintuah nghal zel mai a ni. Ka pa hian a lo thelh vat thin. Mi ang lo enin an inen tawn theuh a, an mahni chauh mi pangngaiah an in ngai vek a. An in ngaisang lo tlang khawp mai.
.
Kan ina lo kal ziah si an rawn kal rual ngai lova, an haw rual ngai hek lo. An pathuma an han thu tlar thup mai hi chu hmu ve mah u la Pathiam themthiam zia in hmu thei ang!
.
Heng ka pa thiante hi khawtual mite chuan THE BUMRO TRIO an ti.
.
ENTIR NAN
An mi an phak lo zia lantir nan hei hi kan sawi ang e:
.
Sikul chawlh ka haw lai hian zankhat chu ka pa khan an pathum chuan a tuka an tih tur a zawt diat diat a. An vai chuan ‘engmah’ an ti vek a. Ka pa chuan, “A nih chuan naktukah ek in khur laiin in rawn inhlawh ang. Rs 100 theuh in hlawh ang a, thuk takin in lai ang,” a ti a.
.
A tukah chuan kan lai ho ta a lawm le. An va han chak hlawm tak em!! An tawng chuan an inhau ang tih a hlauhawm si a, “Ngawi rengin thawk ang u,” ka ti a. A lei a tha bawk a, chawhnu herah chuan Pa Ruaia pawh a pil titih der mai!
.
Pa Bela lut chuan bawngtuthawh a rawn theh chhuak a, “Ruaia, suahdur kha min pe teh, a vung hi ka rawn theh chhuak ang,” a ti a.
.
Pa Ruaia chuan a pe duh ta hauh lo mai a. “Hlawh inzat theuh theuh tumah intirh bik loh tur,” a ti tlat mai a!!
.
“Rawn la vat mai teh, ka paih zawhtir vek mai tur che a nia,”
.
“Level pui intirh loh tur ka tih chu mawle aww…” An inhnial thinrim ta.
.
Pa Bela chuan lei tlangin Pa Ruaia awmah chuan a rawn chhoh vawm dawp mai a. Pa Ruaia chuan cubic lung a chawi lawk a, Pa Bela khur chhung awm chu chhuk den a tum a, keiin ka lo dawm a. Pa Ngaia lah khan a’n ngai ho mai mai khawp a. Thu chungin a lo thlir nui var var a, “I duh leh chhu hlum mai rawh,” a lo ti!!
.
Khur chhung atang chuan Pa Bela chuan kutzungchal a rawn hmuh a. “Min han chhu hlum vaih teh, ka lo chhuak ang a, i chak lovang,” a ti a. Pa Ruaia thin a ur tulh tulh mai si. A lung ken chu kan inchuh a ni ber mai.
.
Kan thawm hriain ka pa a rawn tlan thla a. Phelsepin an kutphahah na vak lovin vawi khat theuh a rawn vua a. Pa Ngaia chuan, “Ka tel ve lo a sin mawle,” a ti niah niah mai.
.
Khitiang vel khi an ni.
.
KA PA DUHSAKNA
An inngeih thei reng reng lo kha ka pa a mangang a, siam that dan tur ngaihtuaha bei reng thin kha a nia. Hemi kum hian inri thapin lo nei se, anmahni siam nan a ti leh ta a.
.
An hnenah chuan, “Lo in nei hla thei em mai, hnai deuhah nei tawh ang che u. Saw laia ka ram saw tin khat hmun theuh in vat ang a, in inri vek ang. Thlam hran in sa theuh ang a, Ruaia hi a laiah awm se, thlam sa lian bik deuh se. Ka hman hun hunah Ruaia thlamah kan riak ho thin ang. Ka tel lo chuan mahni thlamah pawh in riak tur a ni lo,” a ti a. Kan khua atanga Km 4 leka hla Highway kama kan ram chu vahtir a tum a ni. An phur hlawm ngei mai.
.
Ka pa chuan, ” In inhau reng mai hi, a tha lo. Inngaihtuah chiang rawh u. In inngeih loh chuan miten an nuihzat ang che u a, an hmusit telh telh ang che u. Tuna in awm dan ngawt hi chuan kan pemsan leh ang che u a, in inkawm thei dawn em ni”? a ti a. An ngawi thap a, an inngaihtuah ve nasa mai.
.
Lo chu an vat ta a, mautak hmun hlang a ni bawk a, an zo hma ngei mai.
.
CAR HAL THU
Khatih lai kha Mizorama thlawhna tumhmun awm hma lawk kha a ni a. Kan milian ho thlawk duh pawh Silchar-ah an chhuk zel a ngai a.
.
Lo hal hun tawhah Minister pakhat Delhi kal tur kha a car leh pilot motorin Silcharah an zuk dah a. An haw lam chu Minister car kha a chesual palh ta a. Mi Bumro ho vahchapah tak mai chuan a lum lut hlauh mai a. Driver chauh a chuang a, a na lo an ti. Keini chuan hriat pawh kan lo hre ve lova. Mi Bumro ho erawh kha chuan an lo hre vek a lo nia!
.
VC Tlangau a rawn au ta a, “Naktukah lo hal vek tur a ni,” tiin.
.
Kan Bumro Pathumte khan an vahchapa Minister car chu an han hal hnan hmiah mai a!!
.
A hnua kan hriat leh dan chuan VCP kha Police lamin Minister car tlakna laia mite kha hal ve rih lo turin an lo hriattir a. VCP khan Tlangaupa kha zinga The Bumro ho hrilh turin a tir a. Tlangau zing zu chhim hmasa khan a lo chahthlaksan pek a ni awm e.
.
HAND CUFFED
Zana kan ina an lo leng khawm, an lo hal chanchin ka pa hnena an report mek lai chuan Aizawl lam Police an rawn lang ta thut mai! “Minister car in hal vangin man in ni.” Kutkawl an buntir ta hmiah hmiah mai a. A hrilhhaithlak ngei mai.
.
Bumro ho thlabar khan ka pa chu beisei nei tih hriat reng hian an en thin a, tih theih a awm si lo. Ka pa chuan, “Hlauthawng suh u, naktukah ka rawn chho ve ang. Lo inhau hauh suh ang che u. In inhauh chuan in lo hal sa saw midang ka pe daih ang,” a ti a. Police chuan an hruai ta a.
.
Chumi zan chuan ka pa kha a muhil miah lovin ka hria.
.
A tuka ka pa kal tur chu zui ve ka tum ruh ngei mai, ka pa pawn a phal. Ka hriat loh hlan khan Bumro ho chu ka lo hmangaih ve hman em a lo ni! Bakah, Aizawl OC chu ka hmel hriat a ni tlat! A fapate nen sikulah pawl khatah kan thu hova, an inah pawh ka leng fo; amah paw’n min hria.
.
A tukah chuan ka pa nen Aizawl kan pan ve ta vang vang a. Thana kan pan ding nghal a. OC chuan kei min hmu chu a lo fel ngang mai. Ka pa nen chuan an mi mante chungchang kan sawi nghal zung zung a. Ka pa ai mah khan ka sawi thiam zawk a. Mi pangngai an phak lo dan te, khawtuala mite endawng leh hmuhsit an nih dante, an thiltih leh sawi thutak khuka kan khukpui ngai loh zia te kan sawi a. An chungah hremna nep ber lekkawh sak turin kan ngen bawk a.
.
OC chu a ngawi vung vung a. “A nih chu a. Keimah ngeiin kan bia ang e, nangni pawh lo awm ve rawh u,” a ti ta a. A hote chu a mal mala rawn hruai lut turin a ti a.
.
Pa Ruaia : An rawn hruai lut chu a zam lo tih leh a thil tawn chu ek tlukah pawh a ngai lo tih hi a hriat reng mai. A hawi vulh vulh mai a ni.
OC chuan an zawt ta a.
.
“Engatinge Minister car in hal mai?”
.
“Engahnge kan hal loh ang? VC ten hal tur an tia lawm!!”

Ka pa nen kan lo nui a. OC pawh a nui suk mai!
.
OC chu a ngawi leh vung vung a, “Hruai chhuak u la, a dang rawn hruai leh rawh u,” a ti ta ngawt a.
.
Pa Bela : A sunglass hring lian pui mai vuah chungin a rawn lut ngulh ngulh mai a, zam lo tak a ni.
.
OC chuan, “Car chu engtia han hal hnan ngawt nge maw in nih le?”
.
Pa Bela lah chuan, “Ka bialnu chauh lo chu engmah dang ka ngaihtuah lo,” a’n ti teh daih a nih chu!
.
“Tunge i bialnu chu?”
.
“Ziki khu mawle, i hre nange? Hmeithai Ziki.”
.
“In innei dawn em?”
.
“Ka hausak veleh kan innei dawn,”
.
OC chuan hruai chhuak turin a ti leh a.
.
Pa Ngaia : Mak tih hmel deuhin a lo lut a. Ka pa nena min han hmu chu min kawk a, a nui ta vak vak mai a.
.
OC – Engatinge car in hal hnan mai?
.
Pa Bela – A ho e a. Ka vahchap a mi pawh a ni hleinem. Ruaia vahchap a lawm. Bakah enge a rawn lum ngawt teh ei.
.
OC chuan a hruai chhuahtir leh a. Police arsi bel pakhat a ko a. “Engmah kan ang dawn chuang lo, man loh tur tur kan lo man mai mai a ni. Khang mi pathumte kha chhuah tawp mai rawh u,” a ti ta a. Ka pa nen chuan kan va lawm tak em!! Ka pa phei chu a tap lo chauh a ni.
.
HLOH CHU HLAWKNA
Aizawl atang chuan kan hruai haw nghal a. Tlaiah kan inah chaw an ei nghal a. Ka pa chuan, “In han inhau pek em?” a ti a. Pa Bela chuan, “Teh nang aw… Rip chhungah khan Ngaia khan Police zawhna kha a chhang duh lova, pakhat khan vuak a tum a. Ruaia khan, ‘Han vaw vaih teh i chak lovang,’ a lo ti a. Kei pawh ka ngei a, vua se chu a ring kha ka elh tliak ang ka ti deuh a,” a ti a.
.
Ka pa chuan a chil a lem khawlh a. A lawm lutuk chu a hnuk a ulh tih ka hre mai a. A thiante pathum chuan inchhan nachang te an lo hre ve ta si a. Ka nu chuan, “In tang chhuak lawm nan naktukah ka arpui tui lai ka talh ang a, in rawn ei leh dawn nia,” a ti a. An va han hlim tak em!! Heta an hlim hmel tluka hmuhnawm hi kan chhungkaw tan chuan a awm thei chuang lo a ni.
.
Sorkarin car pakhat a chan a, keini’n The Bumro Trio thar kan chhar ve thung a ni. Pem pawh ni ila ka pa hlauhthawn ruk thin chu a thleng lo maithei a ni. Sorkar hloh chu kan tan hlawkna a lo ni ta si a. Ka pa khan a beisei loh lam atangin a thawh hlawh a hmu a ni. Chu hlawh chu sum a ni lova, ropuina leh chawimawina a ni hek lo.
.
Kei pawh keima tawkah ka thaw a lo veng ve em em a. Heta tang chiah hian a ni hmingthan leh fak beisei chuang lova thawh hi a hlawkzia ka hriat ve tak ni. Hei hi Siamtu duh dan pawh a ni ngei ang. Ka pa thiante pawh faina kawngah te, silhfenahte leh eizawnnaahte hma an sawn ngei awm si a. Sorkar paw’n kan chhiah pek khawm atangin car thar a lei leh thei mai ang chu.
~~~~~~~~

Advertisements
Aside | This entry was posted in Thu leh Hla, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s