‎SAKEI SEH PUMPELH by Pu CHHUNTHUAMA

AUTHOR : Vanlaldika

Kum 1969 khan Serchhip Zuangleng ram chu lo atana theh a ni a. Ri pawh nei mumal lovin ka lo chu a bing angreng hle mai a. Chutih nak alai chuan Upa duh loh danin thlam ka’n sa kher leh nghal a.( thlam chhuat chanve lei ring, a dang dawh kan tihna a ni).

Thitin thla ni 30 a ni a, dan pangngaiin mite aia zawh tlai bik hlauvin riak turin ka in-ak chhuak leh ta a. Kawtchhuah ka thleng chu ruahpui vanawn a lo sur ta ngheng mai a. Kal luihna chi a nih loh avang chuan ka kir leh ta a. Chumi zan chuan mumang mak tak mai ka nei ta a ni.

Ka mumang hmasa berah chuan ka lovah chuan ka lo riak leh a, thlam kawtah ka lo ding a. Thlam kawtah chuan thlanlung thar sur mai, a chunga ha siam thar rapthlak tak mai hi ka lo hmu a. “Tu ha tak ni ang maw?” tia ka thlir reng lai chuan hmana thi tawh ka puzawn Nikhuma chu ka bulah a lo ding reng niin. Ani lah chuan,” Ka ha a nih kha” a lo ti a. Kei chuan,”I ha a nih loh kha, i ha te chu a nalh em kha” ka ti a. Ani chuan,” Thlan vungin a chhilh vang a nih kha; i ha pawh ni se hetiang tho hi a ni ang, Chhunthuam, ramah hian nangmah chauh chuan riak tawh suh, i riah fo chuan he thlan thar hi i luah mai tur a nia” mi lo ti a. Kei lah chuan,” Luah lo vang, hlauh tur a awm lo” ka tihsan mai a. Ani chuan,” Chutiangin ti ngawt suh, tunah pawh ka ngaihtuah em che a, ka lo kal a nih hi” ti chungin mi liamsan ta a. Ka harh nghal a, mak ti tak leh ngaihtuah reng chung chuan zunram ka thiar a, ka mu leh ta a.

Ka muhil leh chauh tihah chuan mumang ka nei leh ta nghal mai a. Ka mumangah chuan kan vau tui ka lo chawi a, ka thal lai mek chuan ka pu Nikhuma bawk chu ka hmu leh a.”E khai, riak tawh suh ka tih kha, engah nge i la riah fo? Tunah haw nghal la i tan a tha ang” tih pahin a ha siamthar bawk chu mi entir leh a. Ama ha pawh ni lovin sakei ha a lo ni a, a chungah sâr a lo zam kulh mai bawk a. Kei chuan,” Hlauhawm a awm lo ve, ka khua pawh a har lo khawp asin” ka tihsan leh mai a. Ka pu chuan,” Ni lo, thlanvung sen kha i luah ka hlauh em vang alawm, ka awmna atangin buai chung chungin ka lo kal a nih hi” a ti leh a. Ka harh chhunzawm ve leh a. Kan nu pawh harhin,” ka mumang hlawm tak chu…!” ka tia, zunram thiarin ka tho leh ta a. A ruk tak chuan ngaih a ngam lo angreng hle mai.

Ka’n mu leh chuan mumang hmasa ang deuh bawk ka mang leh ta a. Ramah ka lo riak leh a, kan thlam kawtah chuan thlanvung tharlam em em mai hi ka hmu leh ta. Chutah chuan pu Nikhuma bawk chu a lo thu leh vang a. Ka en reng lai chuan,” aw haw haw, a va’n mak zo zai tak em! Engah nge i la riah luih fo aw? Haw vang vang la, i la him hman ang, hmun hlauhawm a nih hi, i vangvat thah zante khan sakeiin i lu zawna i tukverh hawnah khan a rawn hnim thin che a. Engmah i hre der si lo. Hman zana sanghar sazu man thawm emaw tia,’ Nghara seh tak rawh’ i tih te kha sakei asin. Khami zante khan sakeiin i thlam hi lungthilin a rawn vawm uaih uaih a, i mut duhin engmah i hre si lo, haw vat rawh, tun bak chu ka lo kal hman tawh lo vang, ka thu awih rawh, i nupui fanaute an ngaihtuahawm e” a ti hlur a.

Kei lah chuan,” Hlauhawm a awm lo ve” ka lo tihsan zel a.A tukah chu phur lo ru angreng, mumang vanga tlawm hreh tak si chuan riak tur chuan ka insiam ta a. Mahse kan nu’n ka thil sawi avang chuan a phal ta tlat lo va, kal luih ka’n tum pawn mittui nen mi uai bet tlat si a, chuti na na na tiin ka thulh leh ta a.

A tuk lehah chuan ka unaute ka puzawnte nen kan lo zo tur chuan kan thawk chhuak ta a. Thlam kan zu thleng chu kan han chian chu le, thlam vel chu sakei hnu hian a lo chiar dep dup mai a. Thlanvung thar ka hmuhna hmun velah te chuan a bawhna hnua lo bel hnum hen hun mai a nih chu. Ka thlam tukverh bul ka chian ngat a, sakei hnu a lo lang kelh kulh bawk a.Vau tui chawi turin dân ûm ka pu chhuak a, hman zana sanghar sazu umna nia ka hriat te chu ka en vel a, sanghar hnu ni lovin sakei hnu hlir a lo nih chu. Thil thlen dan ka ngaihtuah a, ka rilru te te chuan,” E khai, a va’n mak em! Ka puzawn thi tawh hian a tu leh fate hi mi a va ngaihtuah ve leh aw’ ka ti rilru vawng vawng a.

Ka tui thal lai chuan kan khaw pasaltha pakhat hi silai puin a lo kal ngauh ngauh a.” Chhunthuam, Ropuii pa, i huai roh mang e aw. Hetiang ram pilrilah mahnia ram i riah fo mai, nizan maiah pawh i lo mawnga khu sapuiin sanghal a bei nih awm khu..” a ti leh ta mai a. Mak ka ti ta deuh deuh va, engmah ka sawi lo nain ka mumang erawh ka hrereng thung a ni.
( Pu Chhunthuama hi kohhran upa niin VC menber pawh a ni tawh a, he lehkhabu ziaktu hian kum 1980 khan a kawm a, chuta a kawm tuma a sawi ang diakdiak a a ziah a ni.)
( Zopa fiamthu leh titi. By Sena Tlau & edited)”

Advertisements
Aside | This entry was posted in Thu Ngaihnawm, True Story and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s