AIZAWL-AH KA ZIN VE DAWN

Kuthnathawh ngaisang mi ni mah ila kumtluana a sur a sa hnuaia lo lama liam zut reng hi chu ka chakin nuam ka ti ber pawh a ni chuang hauh lo. Furpui hun lo thleng tur nen hmabak hi a ko satliah mai a ni lo, a er hian a er ngawk a ni ber e.

ᑕ Diktak chuan țhelretpuan nena intuama vangvat kara sadai-ek hampherh hlawih hlawih reng ai chuan Sofa dup nuam tak chunga țhut awn diai paha kuthnathawh țhat zia te, a hlawk zia te leh thlai chin tur țha chi hrang hrangte sawi paha thawh lem loh hlawh bakah hlawh bak piahlama a liam lo dawh ve keuh keuh te chu chakawm tak a ni a, enghelh nei hauh loa Țhutthlengseia mut paha Babul-gum han țhial țalh țalh te chu chakawm ve tak a ni.

ᑕ Chawlhni chawhma inkhawm banah kuhva khawr cheng hnih man kan han lei ve hram a, ruahsur nghah daih pahin Pu Thangsiama te bathlarah kan han țhial sen ve ngial a. Mitthla-a hlo thlawh hmabak lang zut zut chungin Pi Rotei zozial zial, hlep țha thei tur ang bera duhtawka a zial chu ka’n fawp khu ve ngial a, fawh mawlh mawlh lai pawh chuan a thi hram zel pek a. Tleirawl hi la ngaizawng chiah lo mah ila, ‘Zozial zuk leh tleirawl ngaihzawn chu fawh nun sek an ngai’ an lo tih hi he Pi Rotei zozial ațang ngei hian a dik zia hmu ve chuan ka inhria.

ᑕ Aizawla ka Ni; hmunphiata inhlawh țhin chu kar eng emaw zat a damsam tak loh avang leh a fate sikul kal buaipui an ngaih avang chuan awmpui turin min rawn chah a ni tih ka hriat chuan ka lawmna hian van a tawng dawn a ni ber a. Mahse, van hi engtiang chiaha sang nge a nih tih ka hriat mai loh avangin Pa Ramthlira te huana Tawitaw kung chen zet erawh anih ka ring ta zawk.

ᑕ Lawm si, chhungte bula phur hmel fahrana lan duh bik si lo chuan hna țul zia leh hlo thlawh hmabak laklawh zia te chu ka’n sawi kawi vel luam a. Diktak chuan hna laklawk tih vel hi chu chhungte zah vang leh mawihawih ka zawn vang mai mai a ni. Țawngkam thiamna leh dawt tlem țangkawpin fur chhiat chhung chu Aizawl lamah ka tawm hul thek theih ka inring a. Rilru chhungrila lawmna leh hlimna hlira khat chuan zanriah chu ka han kil ve a, Maian bai te chu ka Vawksa tui háng hawp hmiah hmiah mai a. Mahse, maian bai chu a al a ni tih ka han hrechhuak leh hnuhnawh a, chumi hnu chuan ka vawksa tui al hawp leh ta zawk a.

ᑕ Kamțhuahna tui Vawkchaw bela pik luh puat pah chuan kawmchar lamah ka lim phei zak a. Chaw ei kham apianga khel loa thleng țhin a turtu zawng zawng chu chal chuar nang nang leh khup sai ngar ngar chung chuan ka nawr chhuak hlawl hlawl hlawm a. Ka ek khal em em reng mai hi ka buaipui rukna a rei tawh fu a, hmanah kan khua-ah mar dek thiam a lo kal paw’n ka mar ka lo deh tir tawh a, ani chuan ka kal lam fel loh vang a ti tlat pek a, ka awih chuang hlei lo a. Mizopa ek in khur laih thar ngei maiah chuan theihtawp chuan țan ka khawh vel a, a chang leh ka mawng te chu ka’n tisawi kual vel a, a tawpah chuan a tur na bertu chu a chhuak ta hlawl a, ek in khur laih thar ni bawk si, a tum a khal țha bawk nen, a zuk insawh khi phak thei nia.

ᑕ A tuk maia kal nghal tur ka nih avang chuan Sumo ticket ngaihven chuan ka chhuak ta a. Kan khaw Sumo hi a tlan regu tehchiam lo a, tunang hunah phei chuan chuang tur mang pawh hi an awm meuh lo.

ᑕ U Marobert-a chu kan khaw sumo driver a ni a. Thingtlang khawte Driver tihtakah a induh ve deuh larh a. Rinlawk ang ngeiin biak pawh a lo har țalh mai. Thingpuisen vei tlak karh pah chuan Diesel a neih loh thu chuan min chhang ta mauh mai reng a. Mahse, a pawimawh zia leh chuanman ka bat loh tur thu te, kal kawngah eng eng emaw kan lam phei ang a titea ka han thlem kual hnu chuan naktuk daih Diesel chu a nei leh ta hram a, ka lawm ngei mai. A kal dawn ngei a ni tih a chian hnu chuan remchang chuhin dawrkai U Thanveli’n Chini Kg 50 leh Hajmola packet lian a rawn chah a, Pu Rualaua te pafa leh Nl.Alawmi te pawh chuan ba leh ba lo deuh reuh chuan kal chu an rawn tum ve leh ta bawk.

ᑕ Ka Phone hmanlai a chhiat si avang chuan Ka Patea phone hluihlawn tawh chu a siamțhat theih tak mialin tiin ka la a. Ni e, Aizawl awm tur meuhin phone neih loh chu a fuh chiah lo reng a ni. Engtin tin emaw chuan ka Patea phone hlui chu tel te hnawih nalin ka’n remkhawm vel a, a nghet lo lai deuh te chu hruizen chuan ka’n țawn khawm vel a, ken chu a ken pum ve theih ta mai. A hmehna sen chu ka’n hmet vang vang a, a rawn eng ta phet phet a ngaihțha tak chuan ka ak ta hmak a.

ᑕ Zing dar nga-ah chuan Sumo-a chuang turte chu U Marobert-a te kawtah chuan kan kim țhap tawh. U Marobert-a chu towel var, a hlui tawh em avanga uk vek tawh bat chuan a rawn chhuak a, motor chu a’n thlek kual vel thuak thuak a, hnuailam a bih ngar ngar hnu chuan ner nang nang chungin Inchhungah chuan a lut leh a, engthil nge ni ang le aw tia kan lo ngaihchan țhap lai chuan chaicheh kengin a rawn chhuak leh a. Tuman zawhna kan zawt ngam lo, Driver ber a ngawih reng si chuan passenger mai mai tan țawng ngam a ni lo. Kan zinga upa ber Pu Rualaua chu ka va melh zawk a, a ni chuan a sahdah hmuam lai chu a lo paih mek a lo ni a.

ᑕ U Marobert-a chuan chaicheh chuan motor hnuai chu a han hawlh ngar ngar a, ți deuh dák chung chuan kan lo thlek dauh dauh hlawm a. A tawpah chuan sazu note pakhat hi a rawn chep chhuak ta va va a, chumi rual chuan Sazupui pawh a rawn tlanchhuak chai chai bawk . A motor chu tlanchhuak loa a din rei tawh em avang chuan Sazu-in a hnuaiah bu lo chhepin no a lo hring hi a lo ni a. .
Engkim peih anih hnu chuan U Marobert-a chu driver țhutna-ah chuan a țhu ta vang a, a chuang tur zawngte chuan motor chu kan nam ta laih laih a. Nu Biakmawii te In thleng kan nam hnu chuan a vu ve ta hlurh hlurh a, a tlan sawt phei auh auh a, Pu R.Lawma te In kawtah chuan a ding ta a. Mahni seat țheuhah chuan kan țhu ta far mai le, Aizawl ka kal dawn chu a ni ta reng mai si, ka tha te chu a khur der der thei hial.

ᑕ Kawng chhia-ah chuan kan insawh phei ve laih laih reng a, ruah a lo sur nal tawh nen, kawng a khuar nasain tuihawk a tling nasa bawk si a, tlanchak a har khawp mai. U Marobert-a chuan a motora tape a dah chu a han tinung a, khawvela zaithiam a tih ber mai leh a duh ber, Mél li Sainas (Miley Cyrus a sawi ve dan) chu a zai tir ta viah viah mai a, boruak a nuam țan viau mai. Mahse, a tape pawh chu a lo thar tawh bik chiah lo a ni ang, kawngkhuar kan daia a han insawh dawtah hian Lalsangzuali’n, ‘Kumhlui Kumhlui Kumhlui’ a rawn ti awl awl zel a, kawngkhuar kan han chhuak a, a ri țút a Mêl li Sainas chu a rawn zai ve leh mai bawk a. Kawng biboh laiah kan han insawh leh deuh bauh bauh a, a tape chu a rawn kiui ruai ruai a radio a man leh tlat pek zel a. Ding lama a kawi a piangin zai chu a tawp daih zel lehnghal. Kawngpheiah Mêl li Sainas, kawngkhuarah Lalsangzuali ‘Kumhlui’, a sawh nasat deuhin radio-a vai zai, dinglam kawngkawia zai tawp daih, chutiang zel chuan thui fe chu kan lo tlan ve ta reng mai.

ᑕ Titi hrang hrang vawrh pah chuan khaw țhenawm chu kan tlan pel ve ta reng mai. Mahse, hriat lawk leh beisei lawk loh deuh thil a thleng ta, kan motor chu a thi ta buk a, a tape erawh a la zai uar viau thung. A chhan kan hre lo tlangin Driver ber U Marobert-a chu a hawihaiin a ngaihna a hre lo hle mai a. Kei; a steering pawh Sap Țawnga hre lo tan phei chuan a ngaihna hi a awm lo leh zual. Pu Rualaua chu ka va melh zawk a, sahdah a lo hmuam dawn mek a.

ᑕ Chutia a ngaihna hre loa U Marobert-a hoa kan hawi lawl lawl lai chuan khaw țhwnawm sumo a rawn tlan hlauh mai a. Driver chuan a hma te chu a’n hawng a, a’n khawih kual vel hnu chuan a vu ve leh ta hlat hlat a kan lawmin kan hlim tlang teh e. Pu Rualaua chu ka va melh leh kher a, a sahdah hmuamna hnarkaw insawi hleih bawih chung chuan a lo nui ve țha a. Tichuan, kan zinkawng chu kan zawh leh ta bauh bauh a. Mahse, thui pawh kan la tlan hma chuan kan hma-ah chuan motor pathum an lo ding țhap a, leiminin kawng a lo hnawh a, an lo tang hi a lo ni a. Leimin lah chu a nasa phian mai a, han thenfai mai chi rual a ni lo. Let leh mai loh chu tihdan a vang ta hle mai.

ᑕ Hrilhai ru angreng tak, tihtheih nei bawk si lo chuan ka phone pai ve chu ka’n hmet eng vei pup a, battery low tih leh thih a rual nghal mai bawk si. Let leh ta ila; ka hmabak hlo thlawh tur mitthla-ah a rawn lang zut zut a, thosi leh vaihmite vi rite chu ka hre thei hian ka inhria. Ka pa, kawngherhpui vei dam leh, a tluksual leh avanga che țha thei ta lo, ka zin tur pawh huphurh em em tu khan lo lamah khel loin mi tir liam leh ngei dawn si. Suangtuahna ramah Aizawl khawpuia ka len nasat zuai zuai tawh tehreng nen le. Bei a dawngin a ngaihna avang ta takzet mai.

ᑕ Kir leh mai loh chu tihtheih awm si lo le, U Marobert-a pawh chuan a motor chu a her rem a, kan khaw lam pan chuan kan tlan leh boh boh a. Beisei loh deuh kan chungah a thlen tak siah chuan kan nguai hlawm hle mai a, țawng peih pawh kan awm meuh lo. Pu Rualaua chu va melh ka’n tum leh deuh a mahse, ka melh peih thlawt ta lo a.

ᑕ Khaw țhenawm kan tlan luh mek lai chuan ka ngaihtuahna-ah thil pakhat a lo lut zawr a, sumo chu din tirin ka Bag ka la a, ka chhuk ta thauh a. Midangte chuan mak tiawm fe hian min melh hlawm a. Pu Rualaua phei chu a sahdah hmuamna a hnarkua a insawih hleh tawh bakah mak ti hmel zet chuan a tihsawih belh leh kher a.

ᑕ Engmah sawi hran lo chuan kan chawl lawk ang e tih leh kal ka rual mai a, an ni pawh chu an tlan zui ve mai bawk. Motor tukverh ațang chuan Nl. Alawmi chuan mi rawn thlek veng veng reuh a, ka lung a ti leng dawn dawn a mahse, hlo thlawh peih lohna rau chuan mi rawn țham harh zawk a, ka lung chu a leng leh ta lo a.

ᑕ Aizawlah zin theih ta bawk si loh, khua-ah lah țhelretpuan nena hlo thlawh hnabak ni bawk. Chutiang tehhrep ai chuan kan khaw țhenawmah chuan mihlim lemchangin ka hlim zin ta hmiah mai a. An kohhran hlim boruak kal chhoh lai a ni bawka a boruak a fuh viau mai. Tunlaiah thim thuah hnih chu a common deuh tawha ka hriat avangin thim thuah thum ka tlangaupui a, “Thim thuah hnih lo thleng tur hi engahmah ngai lo kan tam avangin Lalpa thinurna berhbu chu kan tawngbaw zual zel a, thim thuah thum a rawn thlen dawn ta anih hi.” tiin ka’n au vel a, mihlim chansan duh zual ho thinlung a khawih mawih chiang ve teh e. .

ᑕ Nuthlawi hlim thar Nuthlawi Roboihi chu ka bitum nghal chat a. Ani țawngkam thiam leh mi hip khawm thiam tih takah a inah chuan kan bawrkhawm țaih reng a, min support țha bawk nen, ka thu ken a fuh bawk nen ngaihsan ka hlawh chak viau. Nuthlawi Roboihi Inah chuan a chhun a zanin ram thuthlung kan sawi a, thim thuah nga lam lam te kan sawi kai ta mai. Thlarau thianghlim lah chuan a pawl hian min rawn pawl zawt zawt hlawm a, kan chhah tlang tawh hle.

ᑕ Mihlim rual kan han awmkhawm a, thlarauin min han pawla kan che tak tak mai hi chu Thlarau Thianghlim hnathawh mah ni se thianghlim lo taka chet mai te chu a chakawm duh rum rum mai zel țhin. Kan zai a, kan lam a. A țhen sahdah, khaini, tuibur lo tibawk nen, țhenkhat zakkha nei, thlan rim nen, thingthupui rem lam, hmuh chhun âm taka ei te kan ni nawk bawk nen, chutiangho kalkhawm thlarauin min han pawl tak tak mai chu Nuthlawi Roboihi Inah chuan kan su hing thang uih huam huam hi a ni hawt mai.

ᑕ Khaw țhenawmah chuan thla thum tehmeuh rawngbawlin ka hlim zin ta a. Aizawl chu kal ta chiah lo mah ila tum ruk ang tho chuan fur chhe zual leh hlo thlawh hautak vanglai chu ka pumpelh ta tho a ni.

An Idea Can Change Your Life

Advertisements
Aside | This entry was posted in Thu leh Hla, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s