DUHAWMA BAWNG

Pu Mawitea chu in hre lovang, kan khua a mi a ni a, Field thlangah an awm, Bawng za dawn a nei. A thupuia Duhawma bawng ka tih khi Pu Mawitea bawng zawk a ni a, Duhawma chuan bawng a nei lo zu a in thin a, zahmawh sawi a hrat bawk. FB a a status-ah Aizawl ek in leh zun in banga thu ziah chingah te min puh thin.
..
Pu Mawitea Bawng chu a sen te, a dum te an ni a, a pui no hruai pawh an awm nual. Pu Kapsanga thingpui huan kawngah Bawng inzui diah diah an awm chuan Pu Mawitea bawng an ni ngei ngei ang, a nih lo pawhin midang bawng a niang; Bawng nei hi an awm nual a.
..
Pu Mawitea Bawng chu a pa chal tak tak awm nual a, insik pawh an ching a, insik tum a an han inchote hi an bu ul ul a, an kein lei an phiat a, an kiten lei an pir vak vak thin. Bawng insi hi a hmuhnawm em em a, kei leh upeka pawhin hmuhnawm kan ti. Kan pastor chuan hmuhnawm a ti thova, mahse a en tha duh vak lo. Ran insual hi a hmuhnawm a niang Zadenga pawhin arpa a neih loh pawhin arnu a pawm a khawlaia mi arpa bulah a thutpui hruah hruah thin.
..
Vawikhat pawh Lamzawlah Pastor bial fang kan zui a, Kohhran hlim lai a nih a vangin inkhawm banah an zaikhawm a, Pu Lianzama an hruai tir a, inkhawm tanna hun kan hmang zo chiah a, hmanhmawh em emin a tlan chhuak a, ban thlengin a rawn lut tawh lo, Zaikhawm ban chuan sikul kawmthlang a Bawng insi chu lo enin a sen zawk a lo au lauh lauh. Pu Mawitea bawngah chuan a pa sen, Buangliana, ki bawng het hawt, nghawng lian zet mai kha ka duh deuh ber.
..
Bawnghnute hi a tha em em a, in ei ve thin em? Keini pawh kan ei thin. Tlangval bawnghnute in chu an fit sawtin an inhria a, a chak viau a niang. Mizopain dal tuihang leh bawnghnute an hawpho chuan nula an sep zui ngei ngei thin. Bawnghnute chu thingpuiah pawh an pawlh thin.
..
Rinchhana pawh a nauin sikul tlanga a awm,”Ka u, ka nuin lo haw rawh a ti” a rawn ti a, Rinchhana chuan,” Bawnghnute ka bar ru lo, ka haw awm lo” a lo ti a, kan nui vak vak.
..
Primary kan kal lai chuan kan sikul bulah Assam rifle an awm a, helicopter-in an ration an rawn thlak a, bawnghnute hlawhin an camp-ah kan zawn chho thin a, kut lehlam khatin Bawnghnute kan hlawh thin. Kut lian deuhin an hlawh tam a,kut te deuhin an hlawh tlem a nimai.
..
Pa Zuala pawh sipai tui chawiin a inhlawh thin a, ”Pa Zual, vaitawng i thiam tawh awm” an ti a,” Bahut dur se” tih bakin a chhang duh lo.
Pu Mawitea pawhin Bawnghnute a sawr thin a, bawnghnute hi a then chuan tui an pawlh a, a then chuan an pawlh duh lo. Bawnghnute zawng zawngah Thingpui dawr nei leh Hotel siamho Bawnghnute a dal ber.
..
Bawng chu lo nei mi tan buh phurh nan an tangkai em em. Keini pawh kan naupan laiin Zoa te bawngpa kan khalh a, lo awmna kan hriat hnaih ber kan pan a, buh kan va phurh tir a, Zoa te in kan va thlen chuan a pain min vaw hrep a, Buh neitute inah min va hruai a min lo hau hrep bawk. Kan khuaah Pu Rawna bawng ki a sei ber a, Pu Vanluaia Bawngin buh a phur hnem thei ber.
..
Bawngsa hi a tui em a, ruai theh nan pawh an hmang nasa hle, pawl nga kan nih kumin kan khuaah Lugphun an awm a, Bawng an talh a, kan ei ve a, kan thin zinga pakhat Ngura chu a ei tam lutuk a, vawi nga a dawh nawnnaah fatu pakhatin fianpuiin a luah a khawng a, ”Naupangin tiang zat zat an ei ngai lo” a ti a, dawh a phal tawh lo, ruaitheh zawhah tlangah kan chho a, Ngura chu a puar lutuk a,”Ka hrawkah min hnawh, ka haw peih lo” a ti a, a mu tawp a kan haw san. Pu Mawitea hian a bawng zawng zawng hi talh se, a sa hralh vek se, a man a tam ngawt ang.
..
Keipawh Bawng ka neih hunah a hmingah ‘DUHAWMA’ ka ti ang.

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s