ONE DAY HANDYMAN by R Zonuna RL

AUTHOR :

HANDIMAN KA NI CHAK
Khatia zir tha duh chuang si lova pawl 10 ka failed khan ka rilru a na ve em em a, ka bei te kha a dawng ve khanglang a. Kan kawmthlang tlangval thla thum chiah handiman-ah a tang a, motor a khalh nghal mai kha ka awt em em a. Ka pa chu handiman tanna tur zawng tur khan ka tur tlut tlut mai a nih kha. Aizawla ka u awm chu a be ta hial a.
.
Kar hnih hnuah chuan ka u chuan, “Lo kal sela,” tiin min rawn chah a. Phur em emin Aizawl chu ka pan ta a.
.
Ka thlen zan chuan ka u chuan a hma lak dan min hrilh a.
.
Ka u chuan an office-a a thawhpui thian, Khatla a mi a nei a, a hming chu Remi a ni. Remi chuan nau mipa nupui neia indang tawh Sawma a nei bawk a, Tuikualah an awm a. Sawma chuan thianpa Thana a nei a, Chhinga vengah an awm a. Thana patea fapa Vunga chu Truck Driver a ni a, Chammari West-ah an cheng a. Chu driver Vunga chuan Handiman a nei lo a ni awm e.
.
Chuti kual duah a nih avang chuan Handiman hna ruak chu ka u chuan a zawng kual ve fe ni turah ka ngai. “Sunday-ah kan va leng dawn nia,” a ti a.
.
INTERVIEW DUAH DUAH
Sunday chawhma inkhawm banah ka u in luah Kulikawn atangin kan chhuak a. Khatlaa U Remi kan sawm phei a. Khatla atangin Tuikuala U Remi nau U Sawma kan sawm phei leh a. U Sawma chuan, “Thana hi kei ai chuan thianpa Dawnga nen an inkawmngeih zawk a, sawm kual phawt ang u,” a ti a.
.
U Dawnga chu an in Dawrpuiah kan sawm phei leh a. Chhinga venga U Thanate in kan pan leh a, kan zuk sawm leh a. Kan vannei dawn a ni maithei, kan sawm apiang an lo awm a; an lo hman hlauh zel bawk a. Chanmaria driver Vunga te in chu kan pan ta a.
.
Handiman hna pakhat dil tur chuan Khawhbawk inkhawmpui palai zah zet chu kan inzui kawi ta duah duah mai a nih chu. U Remi leh ka u chu an nuih a za ngei mai. Kei lah ka lo zam ve khanglang bawk a.
.
U VUNGA KAN DIL
U Vunga chu tlangval phanchang lam tawh, satha leh chak hmel zet mai a lo ni a. Tawng tlem chi a ni. Kan lut khup khup mai chu mak ti hmel a pu deuh a. U Thana chuan kei, a hmelhriat dan ler lutuk tak mai tan chuan a han sawi kual zar zar a. Midang hual sa a neih loh chuan handiman atana kei la mai tur chuan a nawr a; ka u chuan a lo tuihnih bawk a.
.
U Vunga chu rei fe a ngawih vang vang hnu chuan, “Tunah chuan ka motor workshop-ah a awm hrim hrim a, kar lehah an peih dawn chauh a. Ka pu pawh ka lo be ve phawt ang a, a rem dawn chuan Thana hi ka lo hrilh mai dawn nia,” a ti a. Kan hawsan ta a.
.
Ka Handiman hna dil chu a rem dawn chuan U Vungan U Thana a hrilh ang a. U Thanan U Dawnga, U Dawngan U Sawma, U Sawman U Remi, U Remin ka U, ka Uin kei min hrilh lehchhawng dawn a nih hmel chu.
.
KA TLING
Ka interview atanga Ningani hmasa berah chuan thu a lo thleng ta a. Handiman atan chuan lak ka ni a, Zirtawpni tlai dar 4-ah Driver U Vunga hnena Joining Report pe tura tih ka ni. Blanket pakhat leh thawhnaw hak thlak ken tur a ni bawk. Ka phur lutuk chu ka chaw ei a tui lova, ka mut te a tui lo vel!!
.
KAN FEHCHHUAK TA
Zirtawpni tlai dar 4 ah chiah Handiman ni turin driver U Vunga hnenah ka in-report ta a. Tlai dar 5 ah motor-ah chungin Rengtekawna bufai phur turin kan liam ta a ni.
.
Kawng lakah chuan kan inbe lo khawp mai. Mi tawng tlem U Vunga bulah chuan emngmah ka sawi ngam lo. Zawhna pahnih chiah min zawt a. “Nu leh pa i la nei em?” tih leh, “I u kha nu nge nula?” tih zawng a ni. A khat tawk a, “Meizial kha han tan leh tawh la,” a tih chu a tawng awm chhun a ni.
.
LUHAI VAWI 1-NA
Kolasibah chaw kan ei dawn a, chaw ei dang pawh an lo awm nual a. Motor ka kalh that lai chuan U Vunga chuan a lo ei tawh a. Ka thutna tura stool awmsa chu a ke kim lo, ding ve thei tho si a ni tih hre miah lo chuan ka’n thu thawr mai a. Hnung lamah ka let tawp a, ka ke chhip chuan chawei dawhkan hnuai ka pet chho a, plastic dawhkan zang tak chu a kang lawp a; min rawn delh zui a.
.
Chhuat laiah chuan chaw nen, vawksa nen, maian bai nen, dawlrep bai nen, antam chhum han nen, chi leh hmarcha nen, purunsen zai lep nen, tui nen kan kawi ta nuaih mai a. Ka hlauh ber chu U Vunga hauh a ni. Rang takin amah chu ka han en a. Che map lo hian a lo nui vur vur mai. Ka lawm ngei mai, a thin a rim si lova.
.
Hotel nei tupa chuan an tlangval chhawr chu a beng a. “He stool hi dah tawh suh ka ti che a ni lawm ni,” a ti a, a thin a rim kher mai! Ka inthlak chhungin a dang an siam tha leh a, hlim tak leh puar takin ka ei a ni. U Vungan min hauh loh avang leh Hotela chaw ka vawikhat eina a nih avangin.
.
THLAHRANG? KA HMU VE
Rengtekawnah chuan kan riak thla a. U Vunga chu mi inah a riak a, kei motorah ka riak thung. Ka mawza thar bun phelh lo chuan ka mu mai a.
.
Zanlai velah chuan palian em em mai hi kan motor lam pan chuan a lo kal ta chhut chhut mai a. Kudam hnung lam atanga lo kalin Kudam chu a rawn kar run mai a. Ka hlau lutuk chu ka tho chhuak rang ngei mai. Ka han hawi vel a, Kudam pawh chu ka hmu thei tawp si lo. Ka mumang a nih ringin ka mu leh a.
.
Ka muhil leh siar siar tih chuan a ngai bawkin palian chu a lo kal leh ta. Ka tho leh a, ka mu leh bawk a. Chutiang hlira vawi thum ka hmuh hnu chuan motor atanga chhuakin ka va zung a. Ka mawza chuan min phuar riauva hriain ka phelh a, ka mu leh a. Heta tang hian palian hmu leh lovin ka muhil hlen ta a. Ka mawza kha ka puh ta ber.
.
LUHAI VAWI 2-NA
A tuk zing dar 9 ah load la turin kan indawh ve dawn a. Back zawnga luh a ngaih avangin ka lo vai ve lauh lauh a. “A tha, a tha, a zau, tawlh zel rawh… A tha, a tha…” A ri ta bur mai!! Kan motor hnung kil lam chuan vai truck hnung sir lam bawk a lo tauh der tawh chu niin. Hrehawm ka va’n ti tak em!!
.
U Vunga chu a lo chhuk a. Ngawi rengin min rawn kal pel a. A hmelah lawm hmel ka hmuh loh laiin thinur hmel pawh ka hmu chuang lo. Vai driver nen chuan an en dun a. Motor pahnih chu a chhiat dan leh chhiat loh dan a inang chiah. An inbe rem thuai a. Kan chawi dawn lo. Ka lawm em em a ni. Kan chawi loh bakah U Vungan min hau lo.
.
LUHAI VAWI 3-NA
Kan buhfai phurh chu Serchhipa dah tur a ni a, Chhinhchhipah kan riak chho dawn a ni awm e. Full-load chuan tlan chak a lo har khawp mai a. Thingdawlah U Vunga chuan thingzai pathum lek a lei a. Load chungah chuan dahin hruizen te deuh leh hlui deuh tawh chuan ka phuar bet a. Kawnpui kan pel hret tih chuan kan thingzai phurh chu a inkhak ri ta ruk ruk a.
.
U Vunga chuan motor chu kawng thlang lamah a dintir a, “Phuar tha lawk ang aw,” a ti a. Kawng sir chep angreng tak atang chuan a thlir chho vung vung a, “A tawnna khi a dul deuh a nih khi, han pawt nghet deuh la, a tha mai ang,” a ti a. Kei chu ka lawn nghal a. A ni chu kawngthlang lam a hawi a, a kap a dap nuap nuap a, a zung dawn tih ka hre mai. Kawng thlang chu a awih phian lehnghal a.
.
Hruizen dul chu nghet taka pawh ka tum a. Thingzai chu ka ke pahniha tlawh meuhin ka’n pawt sawk a, a chat ta hmawk mai. Ka inring hman der si lova, motor a tang chuan a hnung zawngin ka thlawk thla ni berin ka hria. Ka vanduai nge ka vannei? U Vunga zunglai hnungzangah tak mai chuan ka zuk deng ta dawp mai a!
.
U Vunga lah lo inring bik hek suh; kawngthlang awihah chuan kan tla thla dun ta mai a. Kan lum vir thla nawk nawk a, a hing thla hum hum mai a. U Vunga khan a zunna hmanrua kha a khung hman bik lo a ni chek ang chu, a thil khan ka hmai a hru thla nawk nawk mai a. Ka hmuamsak lo chauh a ni. A rei lo na vang vangin ka va han hmu hnai kher em! A rawng pawh a dum a ni. Feet 15 vel lai kan lum hnu chuan Hmunphiah hung hian min lo dang dun a.
.
U Vunga chuan, “I na em? I na em?” a ti a. “Na lo e,” tih pahin kawng lam pan chuan ka vak chho zawt zawt a, eng rilru nge ka put chiah pawh ka hre lo. Hrehawm ka ti takzet a ni.
.
Kawng ka vak chhuak chiah chu ka zuk hawi thla a. U Vunga chuan che lo chang lo hian min lo thlir reng a. A hmelah engmah ka chhiar thei lo. Lawm hmel a pu lova, thinrim hmel hmuh tur a awm bawk lo. Motor-ah ka lawn leh nghal a.
.
Hruizen chat ka zawm mawlh mawlh lai chuan U Vunga chuan kawng a rawn thleng chho ve a. “Hruizen kha a hlui tawh em a ni,” a ti a. Kei chu ka ngawi reng a, a ni paw’n engmah a sawi zui lo. Ka zak em em a; ani lahin min hau duh der lova.
.
LUHAI VAWI 4-NA
Kan tlan leh ta vang vang a. Aizawl kan thleng tep tawh tih chuan ka che suakbak palh leh ta.
.
Min tawk zawngin Bus sei pui pui pathum leh motor dang an rawn inzui duah duah mai a. Inpelh mai theih a ni lo. Chho zawnga kal zawk mah ni ila loh theih lovin hnungtawlh a ngai ta tlat mai. Inti bengvar fahranin ka zuangthla tharh a, ka au leh ta lauh lauh a.
.
“Aw a tha, tawlh zel rawh. A tha, a tha….” A ri leh ta rup mai!
.
Ka’n en chian nak chuan kan motor ke hnung lehlam chu tuiluankawr thuk ang reng takah hian a lo tla der tawh a. A hnung lam chuan a buk hneh zawk deuh avang chuan a ke hma leh lam chu a kang deuh vu bawk a.
.
“A pawi leh ta. A pawi tak zet a ni. Hei hi chu ngaihzam chi a ni tawh lo. U Vunga pawh a ngawi mai mai tawh bik lovang.”
.
U Vunga chu a lo chhuk a, min en lo. Kan motor chu uluk takin a en kual a. Motor dang kan dal lo hlauh. U Vunga chuan eng dang sawi lovin, “Tih ngaihna a awm lo. Aizawl kan thlen phawt a ngai,” tih chiah a sawi a.
.
FAREWEL
A thiante motor-ah Bawngkawn thleng kan chuang ta a. A thiante bulah chuan kei min dem zawngin eng thu mah zuk sawi miah lova! Bawngkawn atang chuan Bus-ah kan chuang leh a. Conductor hnenah chuan pawisa pek pahin, “Pakhat Kulikawn, pakhat Chanmari,” a ti a.
.
Chanmari kan thlen chuan chhuk turin a tho a, min rawn en a. “Ka rawn koh leh hunah che i lo kal leh dawn nia,” a ti a. Ka aw a chhuak thei lova, ka lu ka bu nghat a. U Vunga chhuk chu ka en reng a, a liam ta a. Chu chu U Vunga ka hmuh tawpna a ni. Sana ka en a, Inrinni tlai dar 5 chiah a ni.
.
U VUNGA HNIAK
Tichuan, tun thleng hian U Vunga kohna nghakin ka la awm ta reng a ni. U Vunga hnuaiah darkar 24 vel chiah Handiman hna ka thawk a, ka va han kham lo tak em!! Handiman nih kha chu ka duh tawh hauh lova, U Vunga bula khawsak erawh ka la duh a ni. Hringnun zirtirtu a ni si a.
.
Miten driver mai mai nia an sawi thin lak atanga finna ka dawn hi mihausa leh intivei te lak atang hian ka dawn ve awm ka hre lo. Tawng miah lova U Vunga thu min hnutchhiah chu tun thlenga ka hringnun thufing ala ni ta reng a. A hringnun thufing, zirtir nei kha ka tan a hlu em em a. Zir tham leh nunpui tham a ni.
.
Rei lote chhunga vawi tam ka chet chhiat lai khan ani chuan thluak a lo hmang a ni. Ka thiltih leh chet dan kha ka duh reng vang leh ka sual vang hrim hrima ti ka nilo tih kha a hre chiang em em a. Hriatthiamna leh ngaihdamna mit khan min lo thlir reng thin a lo ni. Hlu ka va’n ti tak em!!
.
Mite chunga rilru kan siam dawn rengin rengin an dihmunah kan inchantir fo a tul a ni tih hi U Vunga khan a hre chiang a ni. Pawi tak khawih nia ka inhriat lai khan ani chu ka dinhmunah a rawn ding chhin phawt a, thuthlukna a siam ta chauh kha a lo ani. Tawng miah lovin thufing, ka dam chhung daih min lo hnutchhiah reng a lo ni si.
.
U Vunga te ang mifing, lehkhathiam si lo hi khawvel hian engzat tak up bo tawh ang maw? Mite ngaihsan an hlawh ngai lo. Mihringten Lei
malsawmna kan tih dawng tamah lah an tang ngai hek lo. Ka ui a ni.
.
“Mahse, U Vung, nang chu, Malsawmna tam tak dawng mawlh ang che.”

R Zonuna RL
Kawrkam Cabin
(Vawksa Street Outfit)

Advertisements
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s