APRIL FOOL – KA FOOL FULL.

SAWI NAWN FO ANG
Bang lova ka sawi thin, ka sawi nawn fo tur la ni zel chu thingtlang tlangval Aizawl khawpuia lehkha zir lai kha a ni. Nuam leh nuam lo inpawlh nuai(h)a nun hman lai kha. Vanglai nun nei ve a, sawi leh thei tura min siamtu leh min vengtu hi kei aia nasa hian fak theuh teh u. A phu si a..Hetih hun laia ka thil tawn, tawn nawn leh atana ka duh miah loh pakhat ka han sawi mai mai teh ang.

TLUANGTEA
Hepa hi sawi phawt a ngai. Aizawla ka awm tirha ka thian chhar thar a ni. Thingtlang tlangval ve tho, kan class a mi a ni. Afel a, a fing a, thian nih tling zet mai a ni bawk. Mahse a fing mah mah thin, ka tan chuan..A mahin mihausa in a luah a, a intodelh reuh lutuk. Kei, ka u nena khawsa aiin a changtlung zawk. Fing viau e ti lo chuan a hmel a tha lem lo. A chhipah khawng kerh kerh ila a beng leh hnar vel atangin Tlumpi an rawn vah chhuah zawih zawih duh hmel!! A hmel that vak loh chu ka tan vanneihna a ni fo.

JUDY
He nula hi sawi leh phawt a ngai. Kan class a mi tho a ni. Tluangtea in luah neitu, mihausa fanu mal a ni. A pa hian a ngai lutuk a, a ute phaia lehkha an zir laiin a ni chu Aizawlah a zir a ni. He nula han hmelthat dan em em hi chu aw… i awih lo hial ang!.Kan class mipa ho awmkhawm an nuih dar dar tawh hi chuan Judy chu suangtuah loh lohvin an suangtuah ti ila a sual lo. Mipa zawng zawng duh, hmeichhia zawng zawng thik a ni. Han en thuak ila a ke ler atanga ei tan atan a itawm a; en ngun deuh phei chuan chil zuk put thei a! Mipa ho hian a hmui leh an hmui insiktir chakawmzia an sawi thin a, mahse kei chuan a hmui che vel chu hmuhnawm ka ti zawk thin.

Judy hi chuan Khuai no leh Balung rapawm zia leh a to sizia te; Bekang leh Telhawng buatsaih buaithlakzia leh a tlawm sizia te; Mid-day meal leh CCE hi naupangin lehkhha thiam nan aia hnungtawlh nana an hman zawk zia te; Kelkang kan rauhsan leh hma sizia te; Swimming Pool-ah hian Ajinomoto fiante khat thlak ila, a hnu darkar khatah saruakin cheng ila, engmah danglam a awm chuan lohzia te; Aizawl khawpuiah Concrete building nei, Ration Card sen nei an awm teuh laiin thingtlangah chuan rap ina cheng Ration Card var nei an awm leh sizia te; Tuidawt pawh tuium a lo nih a, Zawlbuk pawh tuizem a lo nih tak daih si chuan mihringte pawh hi Aiawt kan la nih mai a rinthu te sawi siam siam se. A hmui che vel ka en chak a ni. Aaaa… Judy ka hmuh hi chuan Chung lam dem ngam si lovin Lei lamah hian dem tur ka zawng thin tih hi ngaihtuah zui mai ang u.

Judy te in sira inte pakhat chu Tluangtea luah chu a ni. Ka leng zing bawk a Judy chu ka hmu ngun mai. Mahse kei mizakzum chuan chu Angel hmel pu chu ka biak phakah ka ngai ngai lo.

TLUANGTEA THANGCHEP
Inrinni tukthuan ei khamah ka u len hlan hian Tluangtea a lo kal a..” ‘Judy-in kan in i luah rei ve tawh nen chaw vawikhatmah i la rawn ei lova. Ka nu leh pa’n an ngai pawimawh khawp mai a. Vawiin tlaiah chaw rawn ei ta che. Nangmaha i zah deuh leh i thianpa Zonuna kha sawm ve mai la. Tlai dar thum velah lo kal u la, a rawn ti a,’ a rawn ti a.”
.Mak ka tiin ka va’n lawm tak em! Judy-in ka hming a lam tel ve! Ka meng phar awn awn mai a! “Chu, Judy chuan ka hming a lam a maw!!? Awmzia a awm thei ang em? Bialpa a nei lo a mi?”Ka phur takzet a ni.

Tluangtea chuan, “Ka hre chiah lo, a sawi hi chu a sawi fo che a. Judy chuan a pangpar hungna brick tihfai nan Steel Brass hawh tur a duh bawk a. Kan kensak tur thu ka hrilh mai a sin. Chaw chu kan eisak ang chu, an sawmna a zahawm sia tiraw. Steel brush chu nangman hawh tur lo zawnsak mai la,” a ti a.
“Awle, awle. Ka rawn keng mai ang. Dar thumah ka rawn kal ang,” ka ti zung zung a. Ka va han phur tak em! Ka hlim veng veng hi a ni mai.

Tluangtea haw hnu chuan kan thenawm velah steel brush hawh tur ka zawng kual ta zek zek mai a. In nga lai ka zawh hnuah ka hmu hram a. Kha mi ni han rei zia kha aww..! Ka nghak thei lo chu a ni ber e. Ka rilru chuan ‘tlai dar 3 hi a ri thei tawh dawn lo a niang a,’ te ka’n ti vei thin. A chang leh, ‘Pathian hian dar 3 han riktir thut mai se la,’ te ka’n ti leh thin ! A tawpa tawpah chuan a ri ta.

THANGCHEPAH KA AWK
Ha vawi thum lai ka nawh hnuah Judy te in chu steel brush nen ka pan ta a. Ka keartui khan ka mawng a vaw zauh zauhin ka hria!.Chu mihausa leh chhungkaw zahawm fanu chu, chu Judy ngei mai chu kekawrbul nen pawnah a lo awm a. Ka va nuih sak a, min lo nuih let ve!.”Lo leng rawh. Tluangtean, ‘ka hman leh lo, nangmahin lo ei mai rawh, lo ti rawh’ min tia. Awi..steel brush i rawn keng a law? Ka lo hmang lawk aw. Kan ta a bo daih a,” a ti a. Kei, awk laklawh chuan ka hmantir a, ka tihpui bawk a, a nuam chiang a ni. Khawvel hi ka ta! Judy hmuh lai hian lung lian pui pui vuak kep rup rup tur awm se ka ti ngei mai!

Khua a tlai zel a. Judy chu a lo felin rin anga huphurhawm a lo ni lo. An sitting room-ah kan awm a, TV te enin ka tlangnel ta khawp mai. Khua a tlai zel a, ka awhna thang atang chuan tal chhuah nachang reng ka hre lo..An awmpui nu a rawn dak a, “Bawihi, i nu ten chaw an ei mek a,” a rawn ti a.

Judy chuan thawh pahin min rawn en a, “Ei ve nghal mai la,” a ti a.
Kei ta pek chuan, “Ei ve nghal mai dawn lawm ni,” ka la ti cheu!

FOOL CHIANG
Choka kan va lut chu a nu leh pa chuan an lo ei mawlh mawlh tawh a, thleng ruak pakhat a awm bawk a. Chawhmeh lah chu an han ngah em em khawp. Judy chuan thleng dang lak pahin,”Ka nu, hei ka thianpa hian ei ve nghal mai rawh se,” a ti a. A nu chuan, “Ei rawh se, ei rawh se. Keini ina a ei duh chu a lawmawm lam a nih chu,” a ti a. Ka lawm ve em em a, ngaihtuahna ka la seng chuang lo!

Ka ei ve ta a. Judy nu chuan an awmpuinu chu a kova, a hrilh ru a. Rei vak lovah an awmpui nu chu plate-a chaw keng chungin a lo lut leh a, dawhkanah a dah a. Tih atin ka la awm zel a!

Khawrh khat ka ei zo tep tih chuan Judy nu chuan a pasal hnenah chuan, “My dear, vawiin chu thiannu Siamin min rawn bum teh a tum ve a. Kei lahin April Fool a ni tih ka lo hre kar sia…..” An sawi engmah ka hre zui tawh lo..

KA ZAK, KA ZAK, KA ZAK.
Ka harh chhuak ta. Chhe heiii…! Hûiiii ha….!! Vawiin hi April Fool! Kei hi chaw eiah min sawm lo. Tluang hmelchhephaka… Steel brush te ka keng vel! Haw har min lo ti awm. Ei ve nghal tura min tih khan, “Ei ve nghal mai dawn lawm ni,” te ka ti vel! Thenawmte chaw an va dil…. Let tawp ila, thi nghal daih ila ka va han ti tak em!!

Ka lu hi a hai mup mup a, ka lum pup pup mai. Isua ka nei emaw nei lo emaw khawvel hi bo thut se aw…! A nih loh pawhin Mithianghlim lawr thleng phut se, ka chaweinate hi lawr vek se, keimah chauhin awm ila. Engatinge kei mi zakzum hian zahna tawpkhawk ka tawn tak…!? Thihchilh bomb te hi pai reng tawh tur a ni!

“Ka hman leh lo, nangmahin lo ei mai rawh,” tih ka hriatte khan… Judy khan enge eitur chu a hre lo. Mawla, i mawl, i mawl… A tana ka ken steel brush pawh hman hawh min lo dil a ni lawm ni, Mawla. Ka zak, ka zak, ka zaaak..

Ka harh chhuah leh chuan Judy leh a nu chu ka bulah an lo ding a, Judy chuan ka luah a lo dawm a; a pa chu a thuthmunah a lo ding run bawk a. Chaw la hmuam tun chung hian ka thlan chuan min lo bual hnup tawh a lo ni. Engtin chiah nge ka lo awm ka hre lo.

Ka chaw la hmuam thial nawk nawk pah chuan, “Judy, a pawi ka ti. Ka damdawi ei lai ei a hun a, ka lo theihnghilh a,” ka’n ti ngawt a. Mahse ka inchhir leh nghal. Judy chuan hrisel lohna khirh tak neihah min ngai tawh ang. A sawi darh hial maithei bawk. Mahse engmah siamthat theih a awm tawh lo. Tun ang hunah hian chet fuh a awm thei tawh lo. Ka FOOL FULL thak a ni. Shalla!

Ka haw dan chiah pawh ka hre lo. Kal lamah ka keartuiin ka mawng a vua a, haw lamah chuan ka keartuiin ka kezungpui ka rap a ni. Ka pai leh chawn chawn thin. Tluang-Phakara….! Ani chu nise a zak chuang miah lo ta ve ang.

In ka han thleng chu ka u chuan, “Khutiang mi zahawm inah te engtia sawm lohva chaw ei ve ngawt nge maw i nih le?” min lo ti.

Ka ngawi reng a. Hei pawh Tluang-misuala thiltih bawk.

Ek inah ka lut a. Ka ngaituah chian poh leh ka zak a. Setana tal mualpho tel ve chu nise a zia tak a awm tur. Mahse ka zahnaah hian a mualpho tel awm ka hre si lo. Class te kan la kal leh ang a, Judy chu kan la inhmu leh awm si….

Ekin bangte chu ka chum leh bur thin a.

Advertisements
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s