PHILIPPINES PRESIDENT DUTERTE: MI BON TURU HI TU CHIAH NGE A NIH?

  • Khawvelin an zah leh an tlawn rawn US President Obama leh Roman Catholic Pope Francis te meuh pawh “Zawng chhe vakvai ho” (Sons of Bitch) tia sawt ngamtu, European Union meuh pawh zunglai hmuh ngamtu, UN pawh chhuahsan tumnaa vau ngamtu a ni. A țawngkam chauh a hruanghrauah kan ngai palh ang nge? Ruihhlo zuar emaw ngaia a rinhlelhte tìmna nei map lova a suat hmiah hmiah hi khawvel rap a tling a ni.

    June thla ațang khan President a ni țan a, thla 3 chhung lekin ruihhlo zuar/ngaia rinhlelh mi 3000 chuang a thahtir tawh a, heng rinhlelhte hian Court an thleng hman lo reng reng. Kawngah te, in chhungah te, a țhente phei chu an chhungte hmaah ngei kah hlum an ni.

    An thah 3000 chuangte zinga a zatve vel chu Police ho thah an ni a, a zatve dangte chu Duterte-an Civillian nunrawng ho khawma tualthat tura a din Death Squad ho kut tuara thi an ni. Death Squad ho hian Duterte-a duh dan kalpui kawngah an thawh hlawk hle. (German NAZI Dictator Adolf Herr Hitler-a Stermap Teilung a ang sawt hle).

    Heti khawpa mi nunna ren lo President hi tu chiah nge a nih le? Kum 36 liamta 1980 kum lamah khan kir leh ta ila. Philippines chhim lam Mindanaw thliarkara Davao khawpui lam hrūt ila. 1986 kuma Dictator Marcos paihthlak a nih hnu khan Philippines ah danin awmzia a nei lo hle a, Davao hi a hluar ber a ni.

    Khawpui lamlianah ruihhlo zuar, misual rual, silai keng te leh Police te an inkap chur chur reng a, kidnapping, insuamna te chu he khawpui chhinchhiahna pakhat tluk hialin a hluar a, 1985 kum khan Asia Week Magazine phei chuan he Davao hi Tualthahna Buk (Murder City) a ti hial a ni. Hetiang boruakah hian kum 41 mi, Ukil pakhat, a hming Rodrigo Duterte-a chu Governor a rawn ni ta a. Governor thar hian ruihhlo zuar/ngai ho chu kap hlum hmiah hmiah turin Police te green light a hmuh vang mai a. A policy chu “That hmasa ula, thu zawtfiah chauh rawh u” (Before all else, kill) tih hi a ni.

    Duterte leh a Force te hian mi za tam tak thatin Davao hi vawn him an tum hram hram a. Țun khat chu Police ho leh Drugs Trafficking Gang lalpa an inkap a, Gang lalpa chuan hliam na tak a tuar a, hospital emergency ward a an zalh laiin Duterte hi alo kal a Oxygen pipe an vuahte a kut ngeiin a rawn phelh ta hmiah hmiah mai a, a thih phah ta a ni.

    Hemi chungchang hi amah Duterte ngeiin 1988 khan a hrilh niin Filipino newswoman Shilla Crownell chuan The Atlantic Magazine ah September thla khan a tarlang.

    Tin, drugs trafficker pakhat pawh Duterte-a hian helicopter thlawk lai ațangin a tlawh thla niin a sawi bawk.
    Chanchin ngah tak a ni pek a, țum khat chu Davao a meizial zuk khapna Hotel pakhatah foreigner pakhatin mei alo zu palh pek a, Duterte hian revolver a phawi lawk a, tin reng chungin a meizial chu a ei zawhtir vek niin Davao hoin an sawi.

    Drugs zuar/ngawl vei ho that tura a ruka a din Death Squad ho mawlh kha an turu e. Ruk hmang, mi awm țha duh lo, misual, Jail tang chhuak tam tak an tel a, silai an pai a, an duh duh kahhlum phalna a pe leh nghal a. 1988-2016 chhungin mi 1400 chuang an that hman a, an thah tam zawkte hi ruihhlo ngai, sualna tenau khawih palh leh kawng laia naupang vakvaite niin human right Organization ten an sawi.

    Sualna a tlakhniam avangin Davao mi tam zawk chuan Duterte hi an la duh fan a. Davao Governor dinhmun kum 22 chhung a zawn zatin a chelh hial a ni. Newswoman Shilla Crownell chuan Duterte hi “Thisen bual ramin a siam chhuah bungrua” a ti hial reng a ni.

    Sakei kawlh chu ki vuahsakin President ah an hlangkai ta mai si a, Philippines ram pumpui hi Davao cheiin a chei ta mai a ni. Rawngra taka sualna nuaibotu Duterte hian mipui tana thil pawimawh tak pawh a bei duh zel a. A policy “hmuhna hmun hmuna kah hlum nghal” hian Court rorelna engmah lovah a chantir ta a ni. Human Right Organization te pawh a barakhaih hle a, eng hū-ah mah a ngai lo reng reng. Drugs Trafficker lian tak takte aia eddict ho thah ngawt hian “Counseling and healing” lam engmah lovah a chantir a ni. Hlauhawm ber ta zawk chu Sorkar kalsual tur vengtu Judicial thunun theih a tum tlat hi a ni.

    September 15 khan Senators Investigation Commission hmaah “Duterte-a hian Governor a nih lai khan thu min pe a, mi 50 chuang ka thahsak a ni” tiin Eggamma Tobbato chuan a sawi a. Amah Duterte ngei hian Court a thawk pakhat chu Ozzi machine gun in a kaphlum a ni a ti bawk. Mahse, Duterte hi a inpha nasa hle a, hemi sawitu Tobbato-a hi a hriat pawh a hriat ngai loh thuin amah thu zawttu Senator hmeichhia chu a chhang khur khur a. A rilrempui Boxer hmingthang tuna Senator ni mèk Mani Paquo-a a fuihpawrh a, amah thu zawtfiahtu Lila Dimalla-i (Investigation Chairman) ban turin agenda a put luhtir sauh sauh a, an paihthla der mai a ni. Chu mai chu duh tawk lovin Drugs trafficking a tel ve leh a driver nena hmangaihna tuipui chen dun țhin niin a puh zui nghal bawk. Judicial ho zingah Duterte-a chhang ngam reng an awm ta lo a ni.
    Amah vangin Philippines in a țhian țhate a chan zo mek a. Human right a palzutnate avangin US leh khaw thlang ram lamin an kawm serh țan a, democracy mil lo (allergy) tlat China lam a awn ta zawk a. Helam thila țuan țha èm èm China chuan Duterte-a ruihhlo nuaibo tum dan hi țha a ti a, a thlawp thu ni 4 kalta khan a puang nghe nghe a nih kha.

    Heng thilte kan en hian Philippines hian tun hma Dictator hun lai ai maha hun thim lehzual a paltlang dawn a ang a ni.

    E…….., ti ta daih ila, Duterte-a President a nih tak avang hian Davao-in Governor an neih loh i lo hlauhpui palh ang e. Governor thar an nei tawh a nia. A hming chu Sarah Duterte-i a nia. A thu hnial palh Police Officer pakhat chu a hmaiah vawi 4 lok zawt zawtin a pa Duterte-a a chhun zia a tihlan pek kha.

    Reference: 7Day News Journal

    Advertisements

    About Mizo Archive

    I'm the one who collect the best writings of Mizos
    Aside | This entry was posted in Thu Ngaihnawm, True Story and tagged , , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s