KARNATAKA KAWNGKAM THINGPUI DAWRAH CHENG 5 IN THINGPUI NO KHAT LEH UNLIMITED FREE DATA INTERNET MINUTE 30 DAIH LEI THEIH

  • Karnataka-a khawpui(town) pakhat, khawpui kilkhawr leh tetakte Siruguppa(Ballari dist) hmuna kawngkam thingpui dawr hawngtu kum 23 mi Syed Khadar Basha-a chuan customer hip dan țha zet mai a ngaihtuah chhuak hlawla, a dawra thingpui no khat cheng 5 man chu ‘free unlimited data internet’ minute 30 chhung daih a thlawnin a ken tel tira, a tifuh cher cher hle.
    .
    Pa thluak țha tak Basha-a hian Wi-Fi router leh unlimited data plan chu local cable operator te ațangin a lei a, a dawra thingpui lei apiang chu wi-fi password inziahna ‘coupon’ a pe tel ta țhin a, a hmangtu-in minute 30 chhung a hman hnuin amahin a rawn in disconnect mai zel a ni. Dawrtu a ngah luatah bituk a siam chawt a, customer pakhat tân nikhatah vawikhat bâk a hman theihloh thung a ni. Thingpui lam nawn sekin awmzia a nei thui lua lo anih ber chu!
    .
    Kumin September thla-a he ngaihtuahna țha zet mai a hman țan ațangin dawrtu a ngah chak hle a, țhalaiin an bawh nasa êm êm a, țhutna in chan lovin thui tak tak an intlar pût renga, a hma-a nikhata thingpui no 100 hralh chhuak țhin khân, a lêt 4 lawih, a lo berah no 400 a hralh chhuak zat zat tawh a ni.
    .
    Siruguppa hi khawpui tetakte leh la hnufual ve angreng tak a ni a, khawpui lian hova ‘free wi-fi zone’ an pekchhuah ang chite an la nei pha ve lova, hei hi a dawr lunna chhan ber pakhat a ni a, a customer tam zawk chu he khawpui bulhnaia thingtlang khaw hnufual ve tak tak ațanga lo kal, internet pack thunna nei zolo, zirlai rethei harsa ve tak tak te anni hlawm a ni.
    .
    “Bengaluru ang khawpui lianah chuan hetia free data pekchhuah hi thil lian tham vak a ni kher lovang. A chhan chu free wi-fi zone a awm thluah a, tin mobile operator te’n free data an pechhuak țhin bawk a ni. Mahse, Siruguppa ang khawpui chengkerah erawh internet pekchhuah a la hniam êm êm a ni. Tunlaiah chuan mitam takin smartphone an nei thluah tawh a, social media ngawl an vei a, an mail an check reng duh bawk” a ti.
    .
    Sawi zawmin, “Min dawrtu țhalaite ka kawmna ațanga ka hmuhchhuah chu, he’ng thingtlang ațanga lehkha zira lo khawsa te hian thla khat atan cheng 100 bak pocket money an nei ngai meuh lova, internet pack thunna tur an nei zolo. Tichuan, he’ng zirlai retheite țanpuina ni pah fawma ka sumdawnna-in a hlawkpui dan bawk tur kawng ka ngaihtuah zui ta chawt a, ka țhiante ka rawn kual hnuin free wi-fi pekchhuah chu ka titlu ta ráwih a ni” a ti.
    .
    Wi-fi router lei na’n cheng 3,000 vel a hmanga, unlimited data pack thla khat dam lei nan thla tin 1,700 a insengral ziah bawk a, a internet speed 1 to 2 mbps chuan vawikhatah phone 10-15 vel a pechhuak zo bawk a ni. Tunhmaa customer 10 ațanga 15 bawr vel nei ve lauh lauh țhin kha, tunah chuan a dawra țhutna chang turin nileng lengin thui tak tak an intlar pût reng tawh a, a kawngkam dawr tetakte chu customer 100 bawr velin nitin an dawr ziah țhin ang a ni.
    .
    Pawl 10 thleng bak lehkha zirlo mahse zirlaite țanpui thei-a a awm chu a lawm thu leh, chutihrual chuan a sumdawnna in kawng dik lam a zawh chho mêk bawk chu a lawmna tizualtu anih thu Bashar-a chuan a sawi a ni.
    Advertisements
    Aside | This entry was posted in National News and tagged , , , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s