RORELTU LEH DIKNA – Rev Vanlalzuata Sermon.

Rev Vanlalzuata hi an chhungkaw khawsak harsat avanga a sikul luh kum leh a hlo thlawh kum inkalthelh deuh ngawt a nih avanga kum 27 a kai kuma Matric pass theih hram a ni a; chu pawh chu thlam tap mei alh enga lehkha chhiara exam a ni. Matric a pass hlim khan sawrkar hna zawm thei a ni chungin Pathian rawng bawl tura Theology zir zai a rel ta zawk a. A tawizawngin sawi rih ila, tun kum 25 chhung vel hian khaw/veng hrang hrangin rawngbawl tura an sawmna chhangin kum khat chhunga a chhungte nena Pathianni vawi 10 pawh hmang thei lo khawpin a zin/kal chhuak thin a ni.

A lehkhabu “I inah haw rawh” tih hi a bu hmingin a sawi ang hian nu tan chuan inchhung luma, fate enkawl hi a pawimawh ber, chuta tanga tan that loh chuan khawtlang nun, hnam nun a fuh thei lo tih a ni a. “Emau Dai Reh” thung hi chu harsatna nasa tak tawka thi thei mai dinhmuna dinga a inhriat laia, ama sawi dan takah Pathian hnen atanga a dawn a ni.

Pathianni zing atanga ni hnih leh zan khat current neih loh vanga FB chhuti ka ni bawk a; a sei deuh nain a sermon hi i lo ngaithla ang u hming.

  • RORELTU LEH DIKNA
  • Thuthlung Hlui bu kan chhiar chuan roreltu dikte
    avanga ramin malsawmna a dawn leh roreltu dik lote
    avanga ramin chhiatna khur pui a pan dan kan hmu tam
    hle.Vawiin thleng hian roreltu leh dikna tih hi rinna leh
    thiltih inzawm anga a inzawm tlat loh chuan ramin a
    tuar zel dawn a ni. Pathianin khawvel hi a siam lai khan
    tha a ti em em a, a thilsiamte enkawl turin mihringte hi
    min ruat a, mihringte enkawl turin roreltu a ruat bawk
    a. Bible chuan, “Inhruaina fing a awm lohnaah chuan
    mite an tlu thin a, remruat thiam tamnaah himna a awm,”
    a ti a (Thuf.11:14). Nova huna tui lian hmanga ram
    hremna te, Babulon saltan te, mei hmanga Sodom
    khawpui hremnate kha rorelna dik tawk loh vang a ni.
    Rorelna dik lo hi lengkir sang tak anga hlauhawm a ni a,
    chutah chuan ram mipuite leh roreltute pawh an lo tla
    hlum tawh thin.

    Ram hi kan Lalpa ta a ni a, chuvangin roreltuten
    ram chungah ro an relin, ram neitu chu Lalpa a ni a,
    anmahni aia thuneitu a ni tih hre chunga ro an rel a
    pawimawh. Lal Saula khan a aia lal ngaichang lovin a
    duh danin inthawina a hlan a, Samuela’n a hnenah,
    “Lalpa thu i duh loh avangin ani pawhin lal atan a duh
    bik lo che a ni,” tiin a hrilh a. Chu veleh chuan phungzawlin a vir buai ta hle a (1.Samu.15:23). Israel lal Ahaba khan dik lo takin ro a rel a, zawlnei sawi lawk angin a thih khan a thisen chu uiin a rawn liak a, a thihna hmunah chuan nawhchizuarte an insil thin tih kan hmu(1.Lal.22:37,38). A thih hnu hian a chhungte zawng zawng pawh an that mang vek a, khawvelah hian Ahaba thlah kal zel tur an awm tawh lo (II.Lal.10:17).
    Isua hun laia lal Heroda kha itsikna leh verveknaa khat tlat a ni a, a aia thiltithei nia a hriat apiang that duh zel a ni a. A thih dawn pawh khan tumahin an uiin a inring lo. Rome lalber Augusta pawhin, “Heroda fa nih ai chuan a vawk nih pawh ka duh zawk,” a ti hial a ni.

    Lal dik lo an neih thin avanga Israel mipuite tawngtaina sei tak hi a ngaihnawm kan ti dawn nge, a ngaihnawm lo kan ti zawk dawn ? A tawp lam hi han tarlang ila-
    “…An chungah i that thin tehlul nen, ram zau tak i pekah chuan i rawng an bawlsak lo che a, an thil
    tihsual an bansan chuang hek lo. Ngai teh, tunah hi chuan
    bawih kan ni ta a, a chhunga thil rah leh thil tha kan pi leh
    pute ei atana i pek ramah hian bawih kan ni. Kan sual
    avanga kan chunga lal atana i ruatte lah chuan an neihnun
    phah a; kan taksa chungah leh kan ran chungahte lam
    pawh an duh duhin thu an nei a, kan mangang em em a
    ni,” an ti tlawk tlawk mai a ni (Neh.9:35-37). Bible vekin,
    “Misualin rorelna an chanin mite an rum thin” a tih chu
    an chanvo a ni ta a ni (Thuf. 29:2).

    Historian hmingthang tak Arnold Toynbee chuan, “Khawvela ram pathumte chu hmelmate beih avang ni lovin an tlu chhe tawh,” a ti a. Rorelna dik lo chuan sualna khur pui lamah mipui nun a hruai a, keimahni leh keimahni chu hmelmaah insiamin, hmelmate beih hauh lohvin kan tlu sawp vek thei a ni.

    Kum 1960 velah khan Latin America ramte pawh rorelna
    dik lo avangin an lo tlu sawp tawh a, “Kan ram hian
    hmasawnna kan mamawh lo va, inawp behna laka
    zalenna (liberation) kan mamawh a ni,” tiin ‘Liberation
    Theology’ kan tih hi an chher chhuak ta a ni. Kum 40 vel
    kal taah khan Philippine ramte pawh khi an lalpa Marcos kha corruption lalpa a ni a, mipuite chu kawtthlerah a nuaih tel an pungkhawm a, an lal chuan mittui tlakna
    hlovin a kahtir a, mipui chu an tam tial tial a. Tank rual
    chiltir a tum leh a, mipuite chuan a chil hmasak nih an
    inchuh luih luih mai a, an lal tihngaihna hre lo chu a
    thlawk chhuak tawp mai a ni.

    South West Pacific-a Fiji
    ram pawhin an lalte leh mipuiten Pathian hnenah thupha chawia an inhlan thar atangin an ram a dam leh ta a ni.

    Zawlnei Jeremia pawh khan Jerusalema lal leh mipuite
    sualna chu veiin, “A chhungah LAL a awm na nge,?”
    tiin a tap a nih kha (Jer.8:19). Lal chu an awm ngei a, mahse an rorel dan a dik loh avangin mipuiten an lalte dai nut chu an hak ta a ni.

    Abraham Lincolna’n Democracy a hrilhfiahna kan
    hria a, “Mipuite ta, mipuite siam, mipuite tana siam,” tih
    a ni a. Democracy avangin mipuiten mipuite tan lal kan
    siam a, amaherawhchu kan lalte hi mipuite tana thawk
    lovin anmahni tan an thawk leh thin. Eng party pawhin
    sawrkarna siam sela mipuite siam an ni a, nimahsela
    sawrkarna an chan veleh Democracy chu dictator-in an
    thunun leh thin hi thil pawi tak a ni mai lo va, thil thiang
    lo a ni. Kum 1972 atangin MLA kan nei tan a, kum 40 zet
    kan kal chhung hian mipui sawrkar tak tak din lovin Party
    sawrkar deuh hlir kan la din niin a lang. Chuvangin kan
    rama politician zawng zawngte hian Josepha kha kan
    entawn atan thur chhuak ila. Josepha kha a unauten
    huatna avangin an hralh a, an pa Jakoba hnenah chuan “I
    fapa chu sain a seh,” tiin an report a. Hun inher zelah
    Aigupta ramah a unaute chu Josepha hmaah an zuk din
    khan Josepha dinhmunah indintir ta ila, tuna kan Party
    rilru hi puin lo dawngsawng ta ila, an chan a chau hle
    ang le. Nimahsela Josepha chuan, “ In unaupa Josepha,
    Aigupta rama in hralh kha ka ni. Nimahsela heta kal tura
    min hralh avang hian lungngai suh ula,mahni inhaw hek
    suh u, mite nunna chhan him turin Pathianin in hmaah
    mi lo tir hmasa a nih hi…Heta min kaltirtu hi nangni in ni
    lo va, Pathian a ni zawk e…” zu han ti a !! A dik tak chuan
    thah duh khawpa an huat avanga hralh kha an ni a,mahse Josepha’n a lo dawnsawn dan hi a mawiin a entawn tlak hle mai.

    Kan rama mipuiin MLA kan thlan zawng zawngte pawh hian Josepha ang hian, “Heta min tlintirtu hi kan Party a ni,” ti lovin, “Heta min tlintirtu hi Zoram mipui an ni,” tiin rilru pu thiam sela aw, a va duhawm dawn em. Pathianin mipui hmangin an party kha tling atan lo ruat pawh ni sela, mipuite tana rorel turin a ruat a ni si a. Nimahsela hei hi kan hre thiam thei lo a nih hi.Roreltu apiangten kan Party tan ro kan rel a, hleih neihna leh induhsakna uchuak tak tak kan hmang leh thin. Kei,a ziaktu hi neutralist dik tak ka ni a, Pastor ka nih hma pawhin eng Party-ah mah ka hming a la chuang ngai lo.
    Ka fate pawh hian sawrkar hna an dil ve bawk thin a,
    Party-ah an hming a awm loha sawipuitu an nei ve loh
    avangin an tling lo zel a, mahse kan vui chuang reng
    reng lo va, mi dang dem thei kan ni lo. Amaherawhhchu
    eng tikah nge kan ram roreltute hian Party tana rorel
    bansana ram mipuite tana ro an rel ang tih hi ka
    nghahhlelh ber a ni. Chuvangin kei ka rilruah chuan
    inthlan leh dawn hunah chuan neutral hlawm lian tak
    hi siam ila, party hming ziaknaa chuang lo ngam, Pathian thu atanga ram vei tak si, roreltu dik neih duh tam tawk awm ila. Inthlan dawnah thutlukna siamin kan bawh lam lam chu hneh tawka tling turin bei ila, chuta kan
    thlan tlinte chu eng Party mi leh sa pawh ni se, an Party
    thlan tlin ngawt ni lovin, neutral vote kha zahin ram pum huapin ro an rel theiin a rinawm. Tunah hi chuan duhsak taka kan lo vote vete pawhin an Party hming ziaknaah kan chuan ve loh chuan thiam zawk pawh thiam lo zawk, hmu tur pawh hmu lo zawka tan fo a tul rih a nih hi.

    Mahatma Gandhi khan Africa ramah Law a zir laiin chi inthliarna (apartheid) avangin a rilru a hah hle a. Kum 1894-ah khan mingo hovin rel atangin mihang a nih avangin rel atangin a bungrua nen namthlak an tum a, mahse amah khawngaihtuten an khung lut leh ta a. A
    pianna ram India-ah ngei pawh Hindu chi tha (Brahmin)-
    te leh chi hnuaihnung (Harijan/Dalit)-te inkar zauzia chu
    a vei zui a. India rama hnam hrang hrangte hi huana
    pangpar chi hrang hrang inpar pawlh chuat anga mawiin
    a thlir a, inawp behna leh in rah behna hi tihbo a duh
    hle. Chumi avang chauh chuan politics-ah a zuang lut ve ta a, politics hmanga a thil tum (purpose) tihhlawhtlin
    chu politician a nih chhan ber a ni. Tharum thawh lovin
    India zalenna a sual chhuak a, kum 1947 August 15
    zanlaiah India a indang ta a, Independent an lawmna
    hmun pakhatah Nehru chuan, “At the midnight hour when the world sleeps, India awakens to life and freedom. But, where was Gandhi then ? tiin Gandhi hriatrengna a hlan a ni. Khatiang hun pawimawh leh hlimawm taka awm ai
    khan Gandhi-a chuan East Bengal, tuna Bangladesh ni
    ta-a, chi leh chi intihbuaina rapthlak tak kha tih daih hna
    thawh kha a ngai pawimawh zawk a ni. Gandhi kha India President a ni lo va, Prime Minister a ni hek lo va,
    nimahsela rinawm lohna leh dawt thu a huatzia te, dikna
    a ngainatziate kha poltics dik tak a nih avangin Lal Isua
    lo kal leh hma loh chuan kan hre reng dawn a ni.

    Abraham Lincoln pawh khan mingo hovin mi hangho bawiha an neih kha a vei em em a, Pathian duhzawng niin a hre lo va. Nimahsela bawih chhuah thei tur chuan thuneihna lalthutthleng a luah phawt a ngaih avangin America President nih a tum ta a.
    America President 16-na a lo nih pawh khan ropui taka
    White House luah kha a lawmna ber a ni lo va, bawih
    chhuah thei dinhmuna a ding kha a lawmna ber a ni.
    White House luah tura an khua Springfield a chhuahsan dawn pawhin hmel hlim a pu hauh lo va, an khuaa a kir leh pawh a ring lo hial a ni. A chhan chu bawiha tang mihangho nuaih 40 vel tan Jubilee dar a tum dawn si a, Civil War a chhuak ngei dawn
    tih pawh a hria a, a nunna ngei pawh tuboh leh dolung
    inkara ding a ni tih a hria a ni. Bawih chhuahna chu a
    sign ta ngei a, a rin ang ngeiin Civil War a lo thleng a,
    rei lo teah J.Wilkes Booth khan a kap hlum ve ta a nih
    kha. He politician hian lalna leh thuneihna a buan lo
    va, ropuina leh hlawkna a buan hek lo va, thangthar
    tiau zat ral hnu pawha mihringte theihnghilh hauh
    loh tur, a thil tum (purpose) erawh chu a buan chhuak
    ta a ni. John F. Kenedy thukhawchang angin politician
    dik takte chuan, ramin eng nge min tihsak ang tih aiin,
    ram tan eng nge ka tih ang ? tih hi ngaihtuahin an lo
    hmanhlel thin a lo ni e.

    Roreltu dik ni tur chuan policy tha zam hmain policy neitu thinlung a dik hmasak phawt a pawimawh. Khawvelah hian tihsual chu a awm thei a, nimahsela tisualtu thinlung kha a dik phawt chuan
    a tihsual kha a pawi thui thei lo va, tihdik tumna zual zawk a neihtir leh thin. Negro-ho zalenna suala Nobel Peace Prize meuh lo dawngtu Martin Luther King Jr. kha thinlung dik pu mi a ni a. Lung inah vawi sawm leh pahnih a tang a, a nupui fanaute chenna in chu vawi hnih an bomb bawk a. Tuarna tam tak a tawk a,
    mahse tuarna chu a thil tum tihhlawhtlin nana chak
    phah nan a hmang hlauh thung a. A sawi dan chuan,
    “Lal Isuan thinlung dikin min thuam a, Gandhia’n a hlen chhuah dan min zirtir,” a ti hmiah mai. Kum 1966- ah khan tihhlum a ni a; a hnathawhin a nghawng
    chhuah chu a thih hnu kum 42 atang chuan mihang,
    Barrack Obama pawh US President an ni thei ta a, a
    kuhmuma lo par chhuak a nih kan ti thei ngei ang.

    Politician thinlung dik pute chuan infrastructure lian
    tak tak min hnutchhiah lo mah sela, mipuite hnenah
    thinlung dik an hnutchhiah chuan ramin hma a sawn
    tho tho dawn a ni. Tuna kan politician-te hian thangthar lo la awm zel turte tan eng rilru nge min hnutchhiah ve ang aw ?

    Kan politician-te chauh ni lovin sakhuana huangah ngei pawh hian inen fiah kan mamawh khawp mai. Sapram Kohhran chauhzia leh an Biak In ruakte khu kan sawi nasaa, kan tawngtaisak a, missionary hial kan tir a. Nimahsela an nitin nun chu a rinawm em em
    tlat si a. Kan ramah hian Pathian biak kan uar a, phur
    takin kan lam mup mup reng a; nimahsela dikna leh
    rinawmna lamah Sapram kan tluk si lo. Chuta tang
    chuan he zawhna hi a pawimawh – Biak In khat mupa inkhawm reng chunga rinawm si loh nge tha zawk ang, inkhawm lem lohva ni tin nuna rinawm ? He zawhna
    chhanna atan chuan inkhawm bawka rinawm bawk hi
    full mark hmuhna a ni ang a, a tha ber bawk ang. A pahniha chhan kawp awih loh ti ta sela chuan nitin nuna rinawm hi a buk a rit zawk lo’ng maw ?
    Kan biak lai Pathian pawh hian eng nge min phut ? Dik taka tih leh khawngaihna(grace) ngainat leh amah nena
    thuhnuairawlh taka len dun a ni lawm ni ? (Mik.6:8).
    Thlarau kan chan dante pawh hi inen fiah kan mamawh.
    Bible chuan thlarauvah awm turin min phut a, nimahsela thlarauvah awm si lova awm thlarau ruai kan tum thin. Thlarau Thianghlim chuan thinlung a tithianghlim a, engtianga nun tur nge tih min
    kawhhmuh a, tih leh tih loh tur ramri min khamsak
    thin. Thlarau taka nun tuma tisa leh si aiin, tisa taka
    nun thlarau thiam kan mamawh. “Ka tan intiharh
    rawh, dikna i phut si a,” (Sam 7:6). Kan zui Lal Isua hi
    diknaa rorel a ni a, a dikna chu a zirtir a, a zirtirna angin
    a nung a, a tawngkam leh a nun dan a inpersan ve lo.
    Pathian thu hi a sawituin kan zawm theih chin chiah hi
    sawi dawn ila, kan tuipui ang em ? Hla pawh hi kan
    nunpui theih chin chiah hi sa dawn ila kan hlimpui thei
    ang em ? He zawhna hi a huhova chhang lovin mahni
    theuhva chhan dik tum ila a tha ang.

    Tichuan rorelna chuan hnung lam min hawisan a,
    thutak chu kawtthlerah a tlu reng si a, dikna chu a lut thei lo a ni (Is.59:14).

    Advertisements

    About Mizo Archive

    I'm the one who collect the best writings of Mizos
    Aside | This entry was posted in Pathian Thu and tagged , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s