TUKVERHAH PATHIAN A DING RENG

  • Mipa naupang pakhat hi a unaunu nen a pi leh pute khuaah an zin a, anni chuan mipa naupang infiam nan tiin sairawkherh an pe a. A tir chuan an hlimpui khawp mai.Mahse, a hmanthiam loh em avang chuan a ning ta vat a.Inchhunga a luh leh hma chuan in kawta a pi varak duh em em lo tla lai chu hmuin,tum em em vang pawh ni lovin a perh thlu ta tlat mai. A hma zawnga a thil perh fuh tum thelh reng si kha, a pi varak lu-ah tak a fuh ta si.Varak chu a tlu tawp a, a thi zui ta mai a.

    Mipa naupang chuan pawi a ti em em mai a, mahse, a pawikhawih chu a pi a hrilh ngam bawk si lo. A varak perh thluk palh ruang chu thingnawi dah khawm karah chuan a thukru ta ringawt mai a. Mahse,a rin loh lutukin a thil tih dan zawng zawng chu a unaunu chuan tukverh atangin a lo hmu vek chu niin.

    A tuk zing chaw eikham chuan a pi chuan,’Sally, lokal rawh,thleng sil dun ang,’tiin a sawm a. Mahse, sally chuan,’Ka pi,eng lo nia,Johnny-a hian vawiin chu thleng silnaah puih che a chak thu a sawi a,’a ti ta hlauh va. A unaupa chu hrilhru nghalin, ‘Varak chungchang kha ka hria a nia aw,’a han ti zui zauh bawk a.Chu thu chuan Johnny-a chu a tihlauthawng ta hle mai.Engdang sawi tawh lovin a pi chu thleng a sil pui ta nghal vat a.

    Chhun a lo ni a, a pu chuan Johnny-a te unau chu sangha man tura dila kal an duh leh duh loh a zawt a. Mahse,a pi chuan,’Sally-i hi chuan zanriah ei tur min siampui se ka lo ti deuh a sin mawle,’a lo ti a.Sally-i chu a nui ringawt a, ‘Nichin khan Johnny-a hian chhuahvah a peih loh thu leh in lama puih leh che a duh thu a lo sawi a, ‘a ti leh ta zeih a.Chumi rual chuan a nunaupa chu hrilhru lehin,’Varak chungchang kha,’a ti leh zauh a. Chumi hnu chuan Sally-i te putu chu dil lam pan chuan an chhuak ta a, Johnny-a erawh a pi pui tur chuan inah a awm leh ta a ni.

    Chutiang chuan ni engemaw zat chhung chu ama tih tur chanpual bakah a unaunu tih tur zawng zawng pawh a ti ta zel a. A varak tihhlum chungchang a sawi ngam loh avang chuan a unaunu chuan a chhawr char char a. A tuar theih ta ngang lova, a pi hnenah chuan kalin, a thil sual tih chu a inpuang ta a, a tihpalh liau liau a nih thute chu a sawi ta vek a.

    A pi chuan Johnny-a chu lo kuahin, ‘Bawihte, ka hria alawm. Varak i perh thluk ni khan tukverhah ka lo dak ve reng a, i thil tih zawng zawngte kha ka hmu vek a sin.Mahse, ka hmangaih em avang chein ka ngaidam daih tawh che a lawm. Tuna ka ngaihtuah mai mai chu, i thil tih avang khan eng chen nge i unaunu hi i inhremtir dawn tih hi a ni,’tiin a chhang ta a.

    Chhiartu duh tak, i tunhma nunah eng thil pawi nge i lo khawih tawh? Thil tenawm tak tiin, sawi chhuah zahthlak leh ngaihdam tlak loh ang hialin i lo inngai tawh pawh a ni maithei e. Chu chu setana’n hmanruaah hmangin,nangmah tih hreawm nan leh awpbeh nan a hmang thin a sin.

    Pathian chuan i thil tih engkim chu tukverh atangin a lo hmu reng a,i nun i hman chhoh tak dan nen lam pawh.Mahse, A hmangaih em avang chein a ngaidam vek tawh che a sin. Chuti chung chuan,engtia rei nge sual setana chu i la intihhreawm tir dawn?

    Pathian chuan ngaihdam i dil hun nghakin a la nghak reng che a sin.

    Advertisements
    Aside | This entry was posted in Pathian Thu and tagged , , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s