VAWK CHAW BEL BULA HMANGAIHNA

Author: Lal Zoenga
  • Ka ni fanu pasal neihna tur khua, Rulchawm kan thleng chu ka chau hnap mai. Ka taksa a nih tur ang anga thang vek tawh ka nih thleng pawhin motor ruih leh nupui hmuh loh hi ka la sim thei lo.
    .
    He khuaa ka kal chhan ber chu ka farnu pasal neih dawn vang a nih rualin thil dang a awm. Ka thianpain thingtlang lam nulain khawpui tlangval an ngai sang, nupui tur han ngaihven ru deuh ang’ a tih vang a ni pakhat a, sa free vang a ni bawk.
    .
    Kei hi parawl thankin tih takah mahni in lamah chawhmeh nei tui lo thang deuh mai ka ni a. Chawhmeh tui chu mi aiin ka hre daih zawk emaw tih tur a nih laiin ka hriat tui ang erawh chu chaw eia sawmtu ka neih changa ka ei fuh tum bakin ka ei ngai lo thung. Thlen tlai atang chuan ka mamawh chhanna ni ngei turin menu-ah vawksa an rawn telh a. Khatiang em ema tam kha ka pum hian a la pai ngai lo.
    .
    Chaw kan ei hma bawk a, thu hleithei lo, ding thei chiah si lo khawpa ka puarna chu hmanhmawh miah loin zozialin ka han digest leh a. Chu khaw vawk sa tui dan atang chuan “Hei hi ka nupui” tia sawi haw tur nei loa haw chu ka tum lo nghal bur mai.
    .
    Khua a thim fel ta tihah chuan ka thianpa chu a rawn thleng phei a. ‘Nula rim tur a hual ruk thu’ a rawn sawi chuan ka phur kher mai.
    Ka insiam zung zung a, an khaw nula hmel tha leh an chhuanvawr nia an sawi te in lam panin kan chhuak ta a.
    .
    Veng tlabirh lam panin kan chhuk zel a, kan lenna tur in kan thlen thlak chuan khawpui tlangval inleng nei tih takah min lo be tha khawp mai. An nula hmel chhe hran lo tak mai leh An rapa vawk sa rep ka hmuh chuan chu khua ka ngaina nghal der a. Sa nei, min chelh rih tum awm se chu ui beh ka har viau lo maithei a ni.
    .
    ‘Kungi, hei hi ka thianpa Duhawma a nih hi, kei chu vawiina mi Behlawia tho kha ka nia. Duhawm, hei hi Kungi a nih hi, inchibai rawh u” tia ka thianpain inhmelhriattirna a neih chuan Rulchawm nula chhuanvawr kut chu ka va hmer vang vang a. A no riau.
    .
    ‘Aizawl atanga lo kal maw in nih, in lo kalna a hla si a, in chau em? ‘ tia Kungi zawhna chu chhan tuma ka an zuau laiin Behlawia chuan, ‘Chau lo e. Hei, Duhawma car hian kan lo kal a, ” a lo ti thawt thawt a. Car chu sawi loh, silipar pakhat leh Mangai bak han chuanna chi ka nei ser si lo a. Inthiamlo teh mah ila sút leh theih a ni tawh lo.
    .
    Car ka neih thu Behlawian a sawi laia Kungi hmela danglamna lo awm ka hmuh erawh chuan car nei anga min sawi thiam Behlawia chu ka thian a ni lo ang tih ka hlau thar leh.
    .
    An vawk chaw chhum mek chu inla polite takin ka chawhsak a, khawpui tlangval vawk chaw chawk chu min ngai sang ru viauin ka hria. Kungi chu biak vel a nuamin a fel riau a, chhungpuinu atan iaina reng ka nei tawh lo.
    .
    Darkar chanve vel kan thut hnu chuan Behlawia chuan zei chhuahin kuhva min leisan leh ta. A zei thei a nia. Kungi leh kei chiah chu vawk chaw bel bulah chuan kan awm ta. Sawi tur a vang duh kher mai. A kut chu kan vawnsak thawr a, a lo haw hauh lo.
    .
    Ka sawi duh sawi tan hun a ni tih ka hria a. Behlawian min hrilh fo thin ‘hmeichhua chu an lawmna tur thil hrilh keuh keuh phawt tur’ a tih chu apply ka tum a. Hmanrua erawh ka hre lo kher mai. Ka hre chhuak ta! Hmeichhia chuan an thil neih leh anmahni fak an lawm thin.
    .
    Ka ngawi vang vang a, sawi mai tur erawh ka la hre lo. “In sarep chu a nalhin a tuihmel hle mai. ”
    .
    “Nia. ”
    .
    An chhungkaw thil ka fak vang chuan sawi lang lo mah se a lawm hle tih ka hre thei. Amah ka fak ve leh tur a ni.
    .
    “Ih maw Kungte, i ha kha a la that hmel hle mai, saruh i khel thei viauin ka ring.”
    .
    Aizawl tlangval meuhin ka fak chu sawi thiam phak bakin a lawm ni ngei tur a ni. A ngawi hmak mai.
    .
    Kan titi mek lai chuan ka pum lam chuan kal lam an ang tlat lo mai. A ri ruih ruih a. Mawng lamah an liam thla ruih ruih nimaiin ka hria.
    Second rei lote hnuah chuan namen loin san min rawn pe ta. Hmela lang chhuak khawpin ka íp a, Kungi ngaih tha lo chuan ‘I damsam lo em ni? A rawn ti a. Zahna chi a ni tawh lo.
    .
    “Kungi, khawnge in ek in? ”
    .
    “Inhnuaiah khuan..I pum a nuam lo em ni? ”
    .
    Eng thil mah sawi thei ka ni tawh lo. Ek in awmna lam pan tumin ka ding a, min hnawh na sauh si. Bawp khawkherha kal a ngai a, kal chak a har si. Kungi’n min nuihzat dan tur lam ngaihtuah thei ka ni tawh lo. Ka puma mi hi clear thuai thuai a ngai tawh zawk.
    .
    An inhnuai kawng nia ka hriat lamah chuan ka kal a, current a lo la awm lo zui. A thim vek a, engmah a hmuh theih loh. Mawng tichip chunga kal ngai, kawng dap ngai bawk, ip ngai bawk nen a va han hreawm tak. Ka posi chu min lo hmu se a nalh lo viau ang.
    .
    An ek in chu ka hmu mai thei si lo a, ka tlin ta lo. Ka bul maia bawm ang tak, a chung kua ka dap fuhah chuan ka thu hnawk a, ka bun ta hem hem mai le. Ka hnuaiah chuan ri deuh mem mem ka hria a, mahse, chutiang ngaihtuah hman ka ni tawh lo. A tla tha duh ngang mai. Isuan buh chi theh thu a tehkhina lei thaa tla, a leh hnih te, a leh thumtea a to ang mai khan tlaia ka puma lut tura ka buh mal ei hrang hrang kha inhlawm khawmin a leh li te, a leh nga tein a rawn chhuak khawm ni maiin ka hria.
    .
    A tul ang ang ka paih chhuah hnu chuan muang changin ka chho a, ka zang hawk mai. Mak ti deuha min lo en hu chu mak ti lo ang takin ka en let a. Ka melh no vel ta thung a. Hmangaihna hlan a hun tan ta.
    .
    A ngai te bawkin a kut chu ka vuan leh a. Engmah a hre lo bawk a, a lo vuan ve leh mai bawk. Rei kan thu hman lo, san min rawn pe leh tlat mai. Buk li zet tur ka paih hnu pawha a la rawn ti fo mai chu ka thin a rim kher mai.
    .
    Chhuanlam thiam taka siamin a hmun ngai bawk ka zu pan leh a. Tun tum chu a hlawmin a chhuak ta tlat lo. Kaw lam fel lo natna a ni tih hrilh ka ngai lo.
    .
    Thla tam fe ka ei loh tawh, pumin a zawh loh khawpin vawk sa ka ei nghek a. Ka pumpuiin mak a lo ti a, pai ngaihna hre loin hetiang zawng hian a rawn chhuah ta a ni. A va han zia lo tak.
    .
    Ka thut chhoh leh hnu pawha Behlawia lo la thleng lo chuan ka ngaih a ti tha lo mai pawh ni loin ka thin a tirim hlur tawh.
    .
    A vawi thum nana san min rawn pek leha ka hmun ka thlen hman loh teuhzia chu sawi lan chi pawh a ni lo.
    .
    Dar 10 a ri hnai a. Kawngka lamah thawm a lo awm a. Behlawia a nih ringin ka lawm ru kher mai. Haw ka chakna a rei tawh lutuk. Hawsan chi a ni si lo. Ka rin loh zawk Kungi pa leng haw a lo ni a. Inhmel hriattirna kan neih hnu chuan kan bulah chuan a rawn inhem lum ve a. Minute khat vel a thut hnu chuan thil theihnghilh nei niawm takin a ding hluai a. “Kan arpuiin a awp keu hlimho kha a bawmah ka dah hrang a, ar chhiarah ka dah lut miah lo mai, ka zu dah tha lawk ang e, ” tih leh torch light lak a rual a, a chhuak nghal a. A pawi zo ta.
    .
    “Kungi, naktuk zanah kan lo leng leh dawn nia, ” tih leh chhuah ka rual ve nghal a. Ka tlan pah chuan patling thinrim au thawm ka hre pha vuai vuai a. Nupuia neih lam chu a beiseiawm ta lo.
    .
    A tukah chuan inneih inkhawm ka kal ve hram a. An khaw mipui chuan an lo hre vek tawh. Min nuih ru tet tet vek a. Ka zak ngang mai. “Kungite arte 13 a ek khum hlum vek” tih chu chu khuaa ka than dan chu a ni.
    .
    Vawk chaw bel bula hmangaihna hlan tum kha vawk chaw bel bulah ka e lo chauh a. Ka thlen hlima ka hero ve tehlul nen chaw ei puar luat vangin ka zero zo ta.
    Advertisements
    Aside | This entry was posted in Thu Ngaihnawm. Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s