THINGTLANG NULA SINGAPORE-AH

  • “Mizoram atangin Singpore-ah House Maid ni turin a kal theih,” tih chu mite titi atangin ka lo hre ve a. Ka thiannu nen kal ve tumin kan in rawt phur a, kal kan tum ve khawp mai. Keini thingtlang nula mawlmang tak mai chuan Aizawla Agency pakhat chu kan han be pawp ta a. “Hostel-ah a awm theih, rawn training ula, heta tangin passport kan buaipui dawn nia,” an ti a. Ka thiannu nen chuan Aizawl kan pan ta a.
    .
    Kar thum vel kan training ta a ni. Kan training hian eisiam dan, tawng leh an ram kalphung min hrilh deuh ber. Tichuan 20.. a lo thlen chuan kal turin ka in puahchah ta a. Ka thiannu erawh a passport vel an tîh bo kualsak vel avangin a thinrim a, kal ve ta lo. Mahse kal rualpui tur chu an lo awm leh tho a.
    .
    Sawi zawr zawr mai ang. Tichuan kei Lengpui airport pawh la hmu miah lo kha Lengpuiah chuan thlawhna ka nghak ve ta vang mai le!! Thlawhnaa ka chuang te chu ka mumang a ang ka ti a, ka inngai ropui ve ringawt mai mawle!
    .
    Van sanga kan han thlawk te chu hnuai lam han en ila ropui dangdai tak ani, ka tan chuan. Chhum leh chhum inkara kan awm lai phei chuan Barbie film-a vansang thengrenga an thlawk dul dul vel angah khan ka awm ve ten ka hria. Mahse pawi lutuk… Thlawhtheihna ka “Rui” ta tlat mai. Hrehawm tak a ni. Rem leh rem lovin thuthlegah ka thu mu a. Ka ngaihtuah let hian ka nuih a za zawk. Tichuan nuam lo leh luhai bur chung chuan SINGAPORE an tih chu kan thleng ta a ni.
    .
    Airpor(Changi Airport) ah chuan kan chhuk ta. Awii.. a va ropui mep mep tak emmm!! Vanram a ang ka ti. La hmuh ngai loh tih takah kan hawi vual vual mai a ni. (Hei hi kan training naa min hrilh ang chiah a ni.) Kan ruala chhuakte chu kan zui ve zel a. Kan luggage-te kan lak fel hnu chuan Aiport luhnaah possport vel show turin kan tlar ve tat a. Kan thing hnek hnek bik asin aww.. Haha.. Tichuan, paper-te kan han check-tir chuan kan lut ve mai zel a. Pawnah chuan min hruaitu tur nghakin kan thu ta a.
    .
    An hmel ang lo leh pawr chip chep min hmuh chuan min hre nalh mai nia mawle! Min rawn pantu lukhawlh putar te chuan kan passport-te a en a, a kawl hmak a. Amah chu kan zui dul dul mai a ni.
    .
    Kan thlen hian Mizoram nilo, Myanmar, Indonesia, Phillipines tih vel atanga kal pawh min lam khawm vek. Tichuan chau em emin Medical Test nei turin min hruai nghal a. Kan thisen, kan zun, kan ruh vel an check thlap a ni.
    .
    Kan zawh hnuah zan khat riahna tur building-ah min dah khawm leh a. Kan chau lutuk chu khumah kan thal nghal vek mai. Tichuan zingkar en hma in driver dangin min rawn lam leh a. Kan bag rit tak tak nen kan kual reng mai a ni. MOM (Ministry of Manpower), Singpore hnuaia hnathawk tur, vawikhat kalna ni hote training pekna hmunah min hruai leh a.
    .
    Sawi tawh angin hnam hrang hrang kan ni. Room hrang hrangah kan tawng hriatthiamna apiangah min dah hrang thluah a. Training min pe leh a. Heta kan training hian puanzar dan, Singpore in relbawl dan, kan Employer-te bulah engtinnge kan awm ang tih te leh DAN lalzia vel kan zir teuh mai.
    Training kan zawh hnu hian Staff-ten kan kawr hmaah paper min belsak a. Kan Agent tur teuh awmna a ni. Ka rilrua lo lang hmasa ber chu – thil an tih thlip thlepzia te, thil tih sual an hlauhzia te kha a ni. Singapore-a lut chhuak reng reng hi dan kengkawhtu MOM hian a hriatpui vek a. A ram mi leh sa leh hnathawk tura kalte hi min hre hrang vek ti ila kan sawi sual lo ang; kan ram ang ni lo hian.
    .
    Agent-a kan awm chhungin Thump print ti turin min hruai leh a, chu chu kan Work Permit siamna tur a ni. Kan hnathawh tur kan chian a ngai a, a ram mi leh sa te paw’n hetiang hi an neih vek a ngai. Kan hnathawh tur ang thawk lova thil dang tih duah a rem lo. Kan thawh tur ang thawk lo a, kan Work permit min check a, a dik loh chuan man kan ni mai. Dan a lal em em a ni. Mi tu pawhin dan kalha awm an hlau a, engkim hi a fel thlup ni ber in ka hria.
    .
    Singapore hi Thliarkar te tak te a ni a. Mizoram ai paw’n a te an ti. Mahse mihring erawh an tam ngang mai. Sorkarin in a sa teuh a. Hausa leh rethei deuh te luah tur mil zelin an sa a. A then a te a, a then a lian a. Chu chu a luahtu tur ten an thlang mai thin.
    .
    Ram intodelh an ni em em lovin ka hria. Engkim deuh thaw, hmun thuma thena hmun hnih vel hi chu ramdang atanga an lak luh niin ka hre bawk. Chuvangin engkim hi lei a ngai a, a thlawn hi a awm meuh lo. Hei vang hi a niang sum a hlu a, hna an thawk rim a ni. An in ren em em vek mai. Mipuiin sorkarah rethei ber thlengin Tax a chhung lut a, sorkarin ram a enkawl let leh a. Ram pawhin hma a sawn nasa reng a.
    .
    Han awm a, han chenchilh takah chuan thil kan hmu tam in ka hre ve nial nual a. Rualawhna tur a awm teuh mai. An polite-zia te leh tar leh upate an zah thiamzia te; an thalaite pawh an awm mai mai lohzia leh an thawhrim ve zia te ka hmu a ni. Shopping Mall leh market ah han kal ila thlalai in hna an thawk a. Hnathawh tur hi a tam hrim hrim a ni.
    .
    Hei vang tak hian kan ram thalaite, lehkhathiam hna hmu lo tam takte hi ram danga kal chhuah hi uar ang u. Keini thiam pawh nei lo kan kal ngam chuan thiam nei tan chuan a va huphurhawm dawn lo tak em ka ti thin. Hna sang aim nghal tawp lovin hna hniam te thawk tur paw’n lehkhathiam tan chuan a awlsam vek mai dawn si a. Ram dangah sum a hlu a ni. Thawhchhuah chuan kan ramah hi kan tung ding vat thei dawn te hian ka hre ve thin. Ka sawi thiam lo zawk a ni.
    Incheina hi kan hrethiam lo fo a, Mizo nulaten dem kan hlawh fo thin. Singapore hi vawh lai nei lo, lum em em kum tluan a ni. Mall-ah te, taxi, Bus.etc reng rengah Aircondition dah vek ani.. Keini ang kan len chhuah chuan khawlaiah te kan tei duh a. A lum a, kekawrtlawn hak tup te a peihawm loh. Kekawrbul hak hi a awlsam a, a sik leh sa mil ber a ni bawk. An incheina hi a sanglo khawp mai. Hausa tak pawh chuak dawn se kekawrbul tai leh T-shirt, pheikhawk or chapal bun chuan an duhtawk viau mai. Tin, kawrfual chhing an uar hle bwk. Thawmhnaw aiin ei leh in, chenna nuam an ngaipawimawh zawk te hi an fakawm. Ralkhat thlir a lo sel ngawt hi a tul ber fo lo.
    .
    Chaw chu buh an ei ve mai a. Thlaihnah an uar hle, soup nen. Sa pawh an uar. An sa lei dan tak te hi kan ramah tih theih ve se chuan duhthusam a va ni tak em!!
    Sa hi a hrang tete in part hrang hrang in an zuar a. Hranghnih lek ang te’n a lei theih a ni. A ti hlawm, a vun tel te, a kaw chhung leh a ti her dip thlegin a lei theih a ni. A hrang tete khan man an chhiar mai a, a awlsam phian.
    .
    Chhungkua hian an in kharkhip tawp mai a, thenawm khawveng inlen pawh a awm ngai lo. Hriat pawh an in hre mang lo. Chhungkua an inngaipawimawh a, mimal an inzah thiam a, mi chunga thu neih an tum ve vak lo. Chungkua a hunawl hman leh chaw ei chuah te, khaw fan kual vel a in-enjoy hi an uar hle bawk. An ram hrim hrim hi len kualna hmun tur a tam a, ram hruatuten ten ram an chei nasa hle. An in sak dan ringawt pawh hi hmuhnawm a tling vel vek mai ni.
    .
    Tawk phawt rawh se, a sei tawh e mai; ka sawi thiam lo si.
    Advertisements
    Aside | This entry was posted in Thu Ngaihnawm and tagged , , , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s