RBI in cheng 500 leh 2000 note thar a tlangzarh.

Sawrkar laipui thupek anga ram pumah ni 8 zanlai atanga cheng 500 leh cheng 1000 note tih thih a nih chungchangah Mizoram sawrkar chuan kalphung mumal tak a kalpui nghal avangin tumah lo chi-ai lo turin Chief Secretary Pu Lalmalsawma’n mipuite a ngen.

Pu Lalmalsawma chuan he thil avang hian ni 2 ni 3 chu mipui ten harsatna engemaw tawk an awm pawhin hei hi ram pumin a thatpui tur thil a nih avangin mipui tan manganna tur a awmlo tih a sawi a. Ram chhunga pawisa lem virvel leh chumi in a hrin chhuah ralthuam, drugs dan lova India rama tawlh luh leh sum chheprelh tibo tura sawrkar laipui hmalakna a nih thu sawiin heng thil thalo avang hian sawrkarin a hmuh tur ang chhiah a hmu thei lova, chu chuan mipui mimir in an tangkaipui tur hmasawnna sum a dal tlat a ni, a ti.

Cheng 500 leh cheng 2000 note thar RBI in a siam chuan Mizoram a lo thleng thuai dawn tih Chief Secy chuan a sawi bawk a ni.

Pawisa thi avang hian Bank te chu an inpuahchah fel nan vawiin khan khar a ni a, naktuk ah erawh hawn a ni leh nghal dawn a, ATM zawng zawng, Cash Deposit Machine leh Cash recyclers, pawisa lut/chhuak sawngbawlna hmunte te erawh naktukah pawh hawn a ni lo anga, Pawisa note hlui cheng 500 leh cheng 1000 te chu thlaleh December ni 30 thleng Bank account-a dah emaw, note danga thleng tur a ni a. Identity Card kengin Bank-ah leh Post Office ah te cheng 4000 aia tamlo pawisa a thleng theih ang. Ni 15 ral hnuah pawisa thleng theih zat cheng 4000 chu thlirnawn a ni ang a, a tul chuan tihsan a ni ang.

Mi pakhatin ATM atanga pawisa a lak chhuah theih zat hi ni 1-ah cheng 2000 a bituk a ni a, November 19 atang chuan card pakhat in ni 1 ah cheng 4000 a lakchhuah theih ang.

Pawisa fai tawh chet ngailova account khawih entir nan cheque, demand draft, credit/debit card, mobile wallet leh electronic fund transfer te chu a ngaiin a kal reng thung ang a, Mipui ten harsatna an pumpelh theih nan sawrkar damdawiin ah te, damdawi zawrhna, railway ticket lakna, sawrkar enkawl ticket counter,airport consumer, co-operative society, milk booth, public sector oil marketing company enkawl petrol/diesel leh gas station ah te chuan pawisa hlui hi naktuk thleng pawm tura tih a ni.

He thil inthlak danglam avang hian khawpui dang ai chuan Mizoramah nghawng a nei nep rih niin kan corr chuan a sawi a, sumdawng ten cheng 500 leh cheng 1000 note an la dawng zui thei a, amaherawhchu phai lam company nena inzawm sumdawng te erawh chuan pawisa thi hi an dawng duh tawh lo nghal a ni.

Hetihlai hian, hriat lawk loh thil thleng a nih avangin, damdawiin leh a kaihhnawih thila inentir tur te pawhin pawisa fai kawlsa an neih loh avang leh ATM khar a nih bawk avangin, inentir thei ta lo te pawh an awm a, thenkhatah chuan inhriatthiamna nen ba thlaua thil lei leh indawr te pawh an awm tih kan corr chuan a sawi a ni.

RBI chuan cheng 500 leh 2000 note thar a hmaa aia tha zawk leh hmelhmang danglam zawk a tlangzarh a. He pawisa note thar hi mitdelte tan pawha hman awlsam tur leh hriathran awlsam zawk tura duan a ni.

RBI thuchhuah danin cheng 2000 note thar hi a hmingah ‘Mahatma Gandhi (New) Series’ tia vuah a ni a, a phekah hian Mars-a thlalem kahchhuah , Mangalayan thla a chuang a, a rawng atan rawng sen dang hman a ni. Cheng 500 note chu vutbuak rawng niin Delhi Red Fort tihlan a ni bawk.

Sawrkar laipui chuan cheng 500 leh 1000 note tih thih a nih vanga mipuiten hun reilote chhung harsatna an tawh chu tiziaawm turin theihtawp an chhuah thu a sawi. Vawiina New Delhi-a thuthar lakhawmtute a kawmnaah Finance Minister Arun jaitley chuan cheng 500 leh 2000 thar chu naktuk atangin bank leh post office-ah thleng theiha a awmtawh tur thusawiin, pawisa hlui thleng chungchangah harsatna a awm loh tur thu leh mipuite indaih pawisa dah anih tur thu a sawi bawk. Hei bakah hian sawrkarin cheng 500 leh 1000 note ti thi tura thutlukna a siam chu hmun tinrengah mipuiten an thlawp a, India hmasawnna tura ke penna ropui tak ani a ti a. Sum chheprel leh danlova sum leh pai che vel a tihtlem dawn avangin India sum dinhmunin hma a sawn ngei dawn a, kan ram GDP pawh a san phah dawn ani a ti. Ram chhung eibar zawnna kawngahmasawnna pawimawh tak ani a, state leh sawrkar laipuiinchhiah a dawnna kawngah pawh hlawkna nasa tak a thlen ngei ang Pu Jaitley chuan a ti bawk. India ram chu pawisa fai tawhchet ngaih tawhlohna ramah a hruai ngei dawn a ni ati bawk.

Hetihlai hian Congress party chuan sawrkar thutlukna chu a thlawp thu a sawi a, mahse pawisa dik kawltu mipuiten harsatna leh buaina an tawh erawh chuan hlawkna a awm loh tur thu a sawi.

Vawiin khan Finance Minister hlui P Chidambaram chuan New Delhi-ah thuthar lakhawmtute kawmin pawisa hlui leh thar thlengnaah mipuite tana awlsam leh harsatna awmlo thei ang bera kalpui a tul thu asawi a. naktuk hi sawrkar leh bankte tan he thutlukna chungchangah hian fiahna ni pawimawh tak a ni dawn a ni a ti bawk.

Prime Minister Narendra Modia’n sum chheprel dona tura cheng 500 leh 1000 note a titawp chu ram chhung hmun hrang hrangah thlawp tu a neih that thu leh PM Modi fakawm an tih thu an sawi. A thlawptu zingah hian milar engemawzat an tel a, Rajinikanth, Amitabh Bachchan, Karan Johar leh Anurag Kashyap-te chu a langsar zual an ni.Sawrkarin huai taka thutlukna a siam chu tha an tih thu lehsum chheprel tam lutuk a tihtlem bakah ram sum leh pai dinhmun a siamthat ngei an beisei thu an sawi a.

Bihar CM Nitish Kumar pawhin sawrkar thutlukna chu a thlawp thu a sawi a, mipuiten tunah harsatna reilote tawk hrih mah ila sum chhep rel leh pawisa lem leng vel tam lutuk tih tlem nan a that tur thu a sawi.

(DIPR & CORR)

Advertisements
Aside | This entry was posted in National News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s