Ni 3 awh Mizoram Legislative Assembly thlasik thutkhawm tihtawp a ni

Ni 3 awh Mizoram Legislative Assembly thlasik thutkhawmchu vawiin khan tiamchin awm lova tihtawp a ni.

Deputy Speaker R Lalrinawma kaihhruaia session neihah hian dan thar Mizoram Drugs (Controlled Substance) Bill, 2016 leh Mizoram Fisheries (Amendment) Bill, 2016 te pass a ni.Starred Question 90 lut zingah 77 pawm a ni a, 17 hnawl a ni a, House-a chhan turin zawhna 57 chhawpchhuah a ni a,16 chhan hman a ni. Ziak chhan chi Unstarred Question 23 lut zingah 19 pawm a ni a, 4 chu hnawl a ni a. Zawhna chhan kawngah Deptt. hrang hrangte thawhrimna a fak rualin Dy. Speaker chuan P & E Deptt. atangin zawhna chhanna pakhat dawn a ni lo, a ni.

Session tan niah member lo ni tawh pahnih – Pu LP Thangzika leh Pu J. lalthangliana te sunna hun hman a ni a, session-ah report panga thehluh a ni a, lehkha pawimawh 10 House dawhkana ‘lay’ a ni a, sorkar Bill pahnih lutte lungrual taka pass ve ve an ni.

Vawiin Assembly Session-ah member-te hun rei vak lo chhung an inau buai.Zawhna leh chhna hun hman a nih laiin MNF member Pu Laluatkima’n MIZOFED-in Mizoram sorkarah buhfai supplyhna a thawh leh thawh loh leh a kaihhnawih thil dang a zawt a. Heng zawhnate hi Co-operation Minister Pu Lalrinmawia Ralte-in a chhang a. Pu lalruatkima’n zawh belh lehin, kar hmasaa Aizawl Zemabawk Tuirial retailer-in Supply Kudam atanga a lak chhuah nia sawi, buhfai chhia House chhungah a lek chhuak a. Co-operation Minister-in zawhbelhna te a chhan laiin Buhfai chungchang chu a hriat thui loh thu leh Supply changtu Minister-in a hriatchian zawka rin thu a sawi a. Supply Minister Pu John Rotluangliana’n buhfai supply chhia nia sawi chu Mizofed Supply ni loin FCI buhfai a nih zawk thu a rawn sawi a. Thu a sawi lai hian Pu Lalruatkima rawn ding chhuak ve lehin zawhna leh chhan hun a tawp tawh a, zawhna an zawh zawk Minister-in a chhang zo tawh bawk a, Supply Minister lo sawi ve tur a awm lo, a ti a.

Hetia an inauh buai tak avang hian Dy. Speaker Pu R. Lalrinawma rawn inrawlhin, House ro relnaah a thu ber a, Cooperation Minister-in Supply Minister-in a hre zawka a rin vangin Supply Minister chu thu sawi turin a ko a ni, a ti a. Record hleihtheih loha bengchheng a lo siam zui zel a nih chuan House atanga a chhuahtir tur thu Pu Lalruatkima a hrilh a.

MNF member Pu K. Sangthuama rawn ding ve lehin Pu Lalruatkima thlavang a rawn hauh a, a chunga action lakna tur khawp thil a tih loh thu sawiin Dy. Speaker chu ‘lai’ deuh zawka rorelna kalpui turin a rawn ngen a. Pu R. Romawia, Pu PC Zoramsangliana,Pu Lalrinliana Sailo leh Home Minister Pu R. Lalzirliana te pawh rawn au chhuakin Dy. Speaker-in thu tura a tih hnuah House boruak a pangngai leh ta a ni.

Opposition Mizo National Front (MNF) party worker te thinrim chuan vawiin session neih lai pankhawmin police te nen an innawr a, hliam tuar an awm nual.

MNF Thalai Headquarter bultumin lungawi lohna lantirna hi neih a ni a, MNYF Treasurer Pu Lalrindika Chhangte chuan ram roreltute mipuiin an aíawha an thlan chhuah te an ni a.

Mipuite chunga ro an rel danah an thikthu a chhiain, thil thaah chuan Sorkar thlâwp a, thil tha loah chuan na taka Sorkar do tur leh, bêngharh tura ding an ni tih a sawi a. House chhunga Chief Minister Pu Lal Thanhawla’n Opposition MLA Pu Lalruatkima zawhbelhna te chu a chhang duh lo va, “ka chhang dawn lo,” ti a a sawi chu hriatthiam loh thu sawiin, Chief Minister-in mipui aiawh, MLA zawhna a chhang duh lo hi MNF Thalai te chuan engtizawng mahin an hrethiam thei lo va. Mizoram mipui hmaah ngaihdam dil tur leh sawifiahna siam leh ngei turin an phut tih an sawi a.Pu Lal Thanhawla chu Assembly House zahawmna ti bawrhbang a, a thlangtlingtu Mipui te zah lo vah an puh a ni.

Congress Sorkar, Pu Lal Thanhawla kaihhruai hian Mizoram dung leh vang, Chhim leh Hmarah Kawngpui zawh tlak a siam lo a, khawpui chhung Kawng tha lai a awm lo bawk an ti a, Buhfai supply chungchangah MIZOFED kal tlangin an mi duhsak zawngte an supply tir a.Muipuiin buhfai an dawng chhe em em tih sawi bawkin, Buhfai chhia supply tirtu leh eirawngbawlna GAS harsa lutuk ngaihthahtu chu Minister John Rotluangliana a ni a, he department a enkawl atangin a hna a la tlin lo zar zar a. A ban ngei an phut tih an sawi bawk.

Hetihlai hian, Mizoram Pradesh Congress Committee chuan thuchhuah siam ve leh nghalin, Session-a House Leader leh Chief Minister ni bawk Pu Lal Thanhawla’n eptu MLA Pu Lalruatkima zawhna a chhan loh chu, a zawhna pangngai a chhan hnua chhan ngei ngei ngai kher lo ‘zawhbelhna’ a ni an ti a, hemi chhuanlama MNF Thalaite chet dan chu a demawm takzet a ni an ti a,

An chet chhan hi MNF party Vice President leh Minister hlui Dr. R. Lalthangliana chu vawiina Special Judge, Prevention of Corruption Mizoram in Court-a a koh hliahkhuhna atana boruak an siamah an ngai tih an sawi a, Eirukna thubuai kaihhnawiha Court-in MNF Vice President a koh vanga MNF Thalaite’n rem lo chung a, mawi leh mawi lo pawh thlu lova boruak dang siam an tum hi ‘politics’ thalo leh mipui chawkbuaitu mai a ni a. Mipui zah lohna zawnga hmalakna zahthlak tak a ni, an ti.

AIR NEWS

Advertisements

About Mizo Archive

I'm the one who collect the best writings of Mizos
Aside | This entry was posted in Zoram History and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s