I TUAR NGAM VE EM?

  • Korea nu hmangaihna
  • Korean war
  • Kum 1905 khan Japan-in a protectorate state atan Korean peninsula chu a puang a. Tin, Kum 1910 atang khan a awp tan a. Kum 1945 World War II khan khatih laia tangrual Soviet Union leh US khanPotsdam Conference ah Agreement siamin Japan tlawm hunah Korea chu 38th Parallel ah Chhim leh Hmara țhen hrangin North lam chu Soviet Union-in a awp ang a, South lam chu US-in a awp thung ang tiin.
    Aug 15,1945 ah Korean peninsulaah Japan a tlawm.

    Aug 26,1945 ah Soviet Union chuan an agreement angin 38th Parallel atanga hmar lam zawng ‘N.Korea’a luah kim ta bawk a. Sep9,1945 ah US Sipai ten S.Korea khawpui Seoul an thleng a. Sept 1947 ah US-in S.Korea chu Independent State ni turin a chhuahsan a,1948 ah Republicof Korea(S.Korea) President Dr.Syngman Rhee chuan Korea pumpui (North &South telin) chu pumkhat Republic of Korea anih thu leh amah chu President anih thu a puang a, chumi counter tur chiah chuan Sep 1948 ah Democratics People’s Republic of Korea(N.Korea) chuan Korean Peninsula pumpui chu ramkhat niin legitimate govt an nih thu a puang ve nghal bawk.

    Hetia an inkar a buaina a awm takah chuan Communist N.Korea chuan Soviet Union hnenah S.Korea kah a dil a, Josef Stalin-a khan US inrawlh a rin loh avangin a lo remti mai a June 25,1950 ah N.Korea chuan S.Korea chu Tank tam tak leh Infantry nen a run ta thut a, kar lovah S.Korea khawpui Seoul pawh an la nghal der mai.

    Democracy ram tluchhia a Communist a lut mai tur ngai ngam lovin US a inrawlh ta a, nasa taka an bei let chung pawhin an ti hleithei lova; mahse, a tawpah Gen.Mac.Arthur a war-plan fuh zet mai avangin US army te chuan North lam chu an nawr let ta chiam mai a, N.Korea khawpui Pyongyong an thleng ta rawk mai a nih kha. Hnehna puan chiah an hmabak tihin an rinloh takin China a in rawlh ta thut mai a, Chinese Army amak amaka tam chu N.Korea ah chuan an lo tleh lut ta hum hum mai.

    China rallian dang zo lovin US.Army an hnungtawlh ve leh ta thung a, amaherawhchu tuna 38th Parallel ah khian defensive position tha zet mai la in an tang khawng ve ta tlat a, chuvang chuan, Korean war kan tih chu chak zawk awmlo leh peace accord/pact engmah signed tak tak pawh awm lovin 1953 khan an chawlhsan ta tawp mai a ni.

    Kum1950, June 25 atang 1953 July,28 thleng khan, North Koria leh South Koria kha an inkarah indona rapthlak takin ro a rel a, an inthen ta kha a ni a. North lamah China in țanhmun a khawh pui a, South lamah America in a theihna tawpin dinhmun țha luah turin a lo tanpui ve bawk a. U leh nau kar ah, chhungkaw kar ah, thiantha karah leh nupa inthlahle tak leh hmangaihna hruikhat vuan mekte nen lam an duh emaw, duh lo emaw Chhim leh Hmar indona kal zel chuan ințhen turin a hnuk hrang ta chawn chawn hlawm a.

    Pâwl leh pâwl inkâr-ah te, hnam leh hnam inkâr-ah te tharum thawha ralthuam leh hriamhrei hmanga inbeihna a thleng deuh reng a, mi tam takin nunna an chân phah a; in leh ram-hmun tha tam tak a chhia a, ei-bar zawnna nasa takin a khaihlak a, a tlahiam bawk a. Chu indona hrinchhuah chu rapthlak tak a ni tih mai loh chu sawi fiah dan dang a awm chuang awm lo ve. Heng indona te hian eng rahthamah a chhuah lova, a hnungzuitu chu, țam leh natna, mittui tlakna leh retheihna a ni tlat thung.

    Korean war a fihlim țan a, thlamuanna kawl a eng țan riai ruai tihah khan, American sipai chambang an awm nual a. Chungho zingah chuan James Cooper pawh a tel ve a. Ani chuan Korean nula hmeltha tak Jiwon chu nupui atan a nei a; mahse, Jiwon-in fa a hrin hma lawk chawlhkar khatna ah accident-in James Cooper chu a boral ta hlauh mai a ni.

    Indo țiakhlim leh țampui retheih zual lai tak a lo ni kher bawk nen, Jiwon-i chu api-te khawlam panin thlasik khawvawt tak, vurin a bawh khah chukna lamlian inkham ruah mai chu, khawhar takin a zawh hnak hnak a. Ani ang țangțhen hlim hlawt, raipuar țeuh leh silhtur puan lum takngial pawh neizo lo tan chuan pheikhai a rit duh hle ang le. A pi-te khua a thlen hma chuan a pumchhunga a naupai chuan tawrh zawh loh khawp hiala nâin a rawn tur ta ut ut mai a! A pum na lutuk chu, Han-luipui (Han river) dawhkaina lei hnuaiah chuan khur hlawk hlawk chungin a lut ta ngawt mai a.

    Jiwon chuan tumah bawihsawmtu leh thlamuantu pawh nei lovin Han-lei hnuai ah chuan fapa duhawm tak a hring ta. Nimahse, vanduaithlak takin Jiwon-i chuan hringnun ah chanvo a nei ve ta lo; a fa hrinna lamah a thihphah ta a.

    Chumi tuk chuan, Mr. Min Chu-a zing excer tlan chuan, lei-hnuaia nausen țap rawih rawih thawm a hre ta tlat mai a, Mr. Min Chu tlan lai chu a ding chawt a. Chu Lei-hnuaia nausen țap ri a hriatna lamah chuan thin dep dep chungin a chhuk ta a. Lei-hnuaia a thilhmuh chuan Mr. Min Chu-a chu a barakhaih chiang kher mai. Nausen khawngaihthlak tak, aw-khur beuh beuh chunga lo țap leh a fapa dam khawchhuah theihna tura a silhfen neih zawng zawng hlip a, lo tuamhlawmtu nu khawngaihthlak tak Jiwon-i chu a hmu ta a.

    Mr. Min Chu-a chuan, Jiwon-i kut vawt raih atang chuan chu nausen lainatawm tak chu a pawm ta a. Tin, ani chuan Police hnenah chanchin a hriattir thuai a, nu khawngaihthlak Jiwon-i ruang chu Police ten an la ta a ni. Mr. Min Chu-a chu fa nei theilo a nih avangin chu nausen chu a fa atan a la a, a hmingah Lee Min Cooper a vuah ta a ni.

    Lee Min Cooper chu, a rawn leikang ta deuh a, mi pangngaite tihdanin a nu leh pa dik tak leh an dinhmun hriat tumin a pa Min chu-a chu a zawt ta reuh a. Tichuan, kum 5 a lo nihin, Mr. Min Chu-a chuan Lee Min Cooper-a nuboral dan leh a damkhawchhuah theihna tura a silfen neih chhun leh a taksa lumna thlenga a lo hlan avanga lo damkhawchhuak ta a nih dante a bo abang awm miah lovin mittui parawl teuh chung chuan a hrilh ta vek a.

    Mahse, zing khua alo var chuan, Lee Min Cooper chu hmuhtur a awm ta hauh lo mai. Apa Min Chu-a chuan zing nichhuah hmain a zawng ta ngat ngat a, a beidawng hmanhial a. A beidawn hnu lamah Han-lei hnuai a zu en chuan JiWon-i boralna hmun vurin a bawm khah lûkna hmun ngeiah chuan, chu naupang Lee Min Cooper-a chu a kawr hak lai phelh meuhin a lo ding khur beuh beuh reuh a. Min Chu-a chuan mak a ti ngang mai.

    Min Chu-a chuan a va pawm thuai a, in lamah a hruai hawng ta a. In an thlen hnu chuan, engvanga khatia kawr phelh meuhva lo ding nge i nih tiin a fapa chu a zawt a. Chu naupang tê chuan apa zawhna chu tihian a chhang ta a.”Ka nu khan khawvawt tak hnuaiah ka damkhawchhuah nan a tisa lumna leh a silhfen neihchhun kha ka tan a lo hlan a ni a, ka nu tawrhna hi, tem ve chhin ka chak a, atanami huaisen tak nih theihna awmchhun nia ka hriat avangin ka ti ve ta a ni” tiin mawlmang takin a chhang ta a ni.

    Zantiang khawvawt tak hnuaia ran thlenga mu, lu-nghahnahmun tha pawh nei lo kan Lalpa tan engthil emawtak tihsak ve chakna i nei ve thin em ? nge kan hma lawka piancham ropui lo thleng tur hi, nawmsip bawlna chance tha atan i neihsumte i khawl muk mek zawk? mihring dam kumte a rei si lo va, kan theih tawkin kan in vawng thianghlim zawk dawn lawm ni ka țhian.

    Kan hma lawkah hian sual leh țha indopui a lo thleng leh dawn a, he hunah ngei hian ani Lalpa puihna kan mamawh thin chu ni. I mithmuh leh i benga i hriat thinte kha suala tlu turin an thlem ngei ang che; mahse, Lalpa chakna ringin hnehna i chang ngei ang tih ka ring tlat a ni.

    Advertisements

    About Mizo Archive

    I'm the one who collect the best writings of Mizos
    Aside | This entry was posted in Thu Ngaihnawm, True Story and tagged , , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s